民數記 第 22 章

1

(THR) Í-sek-lia̍t lâng khí-sin, chat-iâⁿ tī Mô͘-ap ê pîⁿ-iûⁿ, tī Iok-tàn hô-gōa, Iâ-lī-ko ê tùi-bīn.

(BCL) 以色列人起身，紮營佇摩押的平洋、佇約但河外，耶利哥的對面。

2

(THR) Se-phoat ê kiáⁿ Pa-le̍k khòaⁿ-kìⁿ Í-sek-lia̍t lâng tùi A-mô͘-lī lâng só͘ kiâⁿ it-chhè ê sū.

(BCL) 西撥的子巴勒，看見以色列人對亞摩利人所行一切的事。

3

(THR) Mô͘-ap chin kiaⁿ hit ê peh-sìⁿ, in-ūi in chin-chōe; Mô͘-ap in-ūi Í-sek-lia̍t peh-sìⁿ, sim chiū tio̍h-kip.

(BCL) 摩押真驚彼個百姓，因為真多，摩押因為以色列百姓，心就著急，

4

(THR) Mô͘-ap kā Bí-tiân ê tiúⁿ-ló kóng, Taⁿ chit-kûn ê lâng beh it-chīn chia̍h lán sì-ûi só͘ ū ê, chhin-chhiūⁿ gû chia̍h chhân-nı̍h ê chháu chı̍t-poaⁿ; hit-sî Se-phoat ê kiáⁿ Pa-le̍k chòe Mô͘-ap ông.

(BCL) 摩押給米甸的長老講：「今此群的人欲一盡食咱四圍所有的，親像牛食田裡的草一般。」彼時西撥的子巴勒做摩押王。

5

(THR) I chhe sù-chiá khì Tōa-hô-piⁿ ê Pî-to̍at, kàu Pí-jíⁿ ê kiáⁿ Pa-lân ê pún só͘-chāi kiò i lâi, kóng, Khòaⁿ ah, ū chı̍t ê peh-sìⁿ tùi Ai-kı̍p chhut-lâi; khòaⁿ ah, in jia-móa tōe-bīn, iā khiā-khí tī góa ê tùi-bīn.

(BCL) 伊差使者去大河邊的毗奪，到比珥的子巴蘭的本所在，叫伊來，講：「看啊，有一個百姓對埃及出來，看啊，遮滿地面，也徛起佇我的對面。

6

(THR) Taⁿ chhiáⁿ lí lâi, kā góa chiù-chó͘ chit ê peh-sìⁿ, in-ūi in pí góa khah-kiông; kiám-chhái góa ōe phah lâi khah-iâⁿ in, kóaⁿ in chhut chit ê só͘-chāi; in-ūi góa chai lí só͘ chiok-hok ê , chiū tit-tio̍h hok-khì, lí só͘ chiù-chó͘ ê, chiū siū chiù-chó͘.

(BCL) 今請你來，給我咒詛此個百姓，因為比我卡強，豈採我會拍來卡贏，趕出此個所在。因為我知，你所祝福的，就得著福氣；你所咒詛的，就受咒詛。」

7

(THR) Mô͘-ap tiúⁿ-ló kap Bí-tiân ê tiúⁿ-ló, chiū khí-sin, chhiú tòa pok-kòa ê lé, khì kàu Pa-lân hia, chiong Pa-le̍k ê ōe kā i kóng.

(BCL) 摩押長老及米甸的長老就起身手帶卜卦的禮，去到巴蘭遐，將巴勒的話給伊講。

8

(THR) I tùi in kóng, Kim-mî lín hioh chia; chiàu Iâ-hô-hoa só͘ hoan-hù góa ê, góa beh hê-hok lín. Mô͘-ap ê siú-léng chiū hioh tī Pa-lân hia.

(BCL) 伊對講：「今暝恁歇遮，照耶和華所吩咐我的我欲回覆恁。」摩押的首領就歇佇巴蘭遐。

9

(THR) Siōng-tè lîm-kàu Pa-lân, mn̄g i kóng, Kap lí tòa hiah ê lâng sī chī-chūi?

(BCL) 上帝臨到巴蘭，問伊講：「及你住許個人是是誰？」

10

(THR) Pa-lân ìn Siōng-tè kóng, Sī Mô͘-ap ông Se-phoat ê kiáⁿ chhe lâng kàu góa chia, kóng,

(BCL) 巴蘭應上帝講：「是摩押王西撥的子差人到我遮，講：

11

(THR) Khòaⁿ ah, ū peh-sìⁿ tùi Ai-kı̍p lâi, jia-móa tōe-bīn; chhiáⁿ lí lâi kā góa chiù-chó͘ in, kiám-chhái góa ōe thâi-iâⁿ in, kóaⁿ in chhut-khì.

(BCL) 『看啊，有百姓對埃及來，遮滿地面，請你來給我咒詛，豈採我會贏，趕出去。』」

12

(THR) Siōng-tè tùi Pa-lân kóng, Lí m̄-thang kap in khì, iā m̄-thang chiù-chó͘ chit ê peh-sìⁿ; in-ūi in sī tit-tio̍h hok-khì-ê.

(BCL) 上帝對巴蘭講：「你呣通及去，也呣通咒詛此個百姓，因為是得著福氣的。」

13

(THR) Pa-lân chheng-chá khí-lâi, tùi Pa-le̍k ê siú-léng kóng, Lín tò-khì lín ê só͘-chāi, in-ūi Iâ-hô-hoa m̄-chún góa kap lín khì.

(BCL) 巴蘭清早起來，對巴勒的首領講：「恁倒去恁的所在，因為耶和華呣准我及恁去。」

14

(THR) Mô͘-ap ê siú-léng chiū khí-lâi, tò-khì Pa-le̍k hia, kóng, Pa-lân m̄-khéng kap góan lâi.

(BCL) 摩押的首領就起來，倒去巴勒遐，講：「巴蘭呣肯及阮來。」

15

(THR) Pa-le̍k koh chhe siú-léng, pí chêng khah-chōe, khah chun-kùi-ê.

(BCL) 巴勒閣差首領，比前卡多卡尊貴的。

16

(THR) In kàu Pa-lân hia, tùi i kóng, Se-phoat ê kiáⁿ Pa-le̍k án-ni kóng, Kiû lí m̄-thang hō͘ sím-mı̍h tāi-chì chó͘-tòng lí bô lâi góa chia.

(BCL) 到巴蘭遐，對伊講：「西撥的子巴勒按呢講：『求你呣通互甚麼代誌阻擋你無來我遮，

17

(THR) In-ūi góa beh hō͘ lí tit-tio̍h ke̍k-tōa ê chun-kùi; kìⁿ-nā lí tùi góa kóng sím-mı̍h, góa beh chiàu án-ni kiâⁿ; só͘-í chhiáⁿ lí lâi, kā góa chiù-chó͘ chit ê peh-sìⁿ.

(BCL) 因為我欲互你得著極大的尊貴。見若你對我講甚麼，我欲照按呢行；所以請你來，給我咒詛此個百姓。』」

18

(THR) Pa-lân tùi Pa-le̍k chiah ê jîn-sîn kóng, Pa-le̍k chiū nā ēng móa-chhù ê kim-gûn hō͘ góa, góa iā m̄-káⁿ pôaⁿ-kè góa ê Siōng-tè ê bēng-lēng, lâi ke-kiám kiâⁿ.

(BCL) 巴蘭對巴勒諸個人臣講：「巴勒就若用滿厝的金銀互我，我也呣敢過我的上帝的命令來加減行。

19

(THR) Chhiáⁿ lín kim-mî koh hioh chia, thèng-hāu góa chai Iâ-hô-hoa koh kā góa kóng sím-mı̍h.

(BCL) 請恁今暝閣歇遮，聽候我知耶和華閣給我講甚麼。」

20

(THR) Hit-mî Siōng-tè lîm-kàu Pa-lân hia kóng, Chiah ê lâng nā lâi kiò lí, lí chiū khí-lâi kap i khì; chóng-sī Góa só͘ beh kā lí kóng ê, lí tio̍h chun-thàn.

(BCL) 彼暝，上帝臨到巴蘭遐，講：「諸個人若來叫你，你就起來及伊去，總是我所欲給你講的，你著遵趁。」

21

(THR) Pa-lân chá-khí khí-lâi, pī-pān lû; kap Mô͘-ap ê siú-léng saⁿ-kap khì.

(BCL) 巴蘭早起起來，備辦驢，及摩押的首領相及去。

22

(THR) Siōng-tè, in-ūi i khì, chiū siū-khì; Iâ-hô-hoa ê sù-chiá khiā tī lō͘-nı̍h lâi tí-te̍k i; i khiâ lû, nn̄g ê lô͘-po̍k kun-tè i.

(BCL) 上帝因為伊去就受氣；耶和華的使者徛佇路裡來抵敵伊。伊騎驢，二個奴僕跟隨伊。

23

(THR) Lû khòaⁿ-kìⁿ Iâ-hô-hoa ê sù-chiá khiā tī lō͘-nı̍h, chhiú-nı̍h pu̍ih to; lû chiū tùi lō͘-nı̍h siám jı̍p hn̂g; Pa-lân chiū phah lû beh hō͘ i kui gôan-lō͘.

(BCL) 驢看見耶和華的使者徛佇路裡，手裡拔刀，驢就對路裡閃入園，巴蘭就拍驢，欲互伊歸原路。

24

(THR) Iâ-hô-hoa ê sù-chiá chiū khiā tī phû-tô-hn̂g ê o̍eh-lō͘, chit-pêng ū chhiûⁿ, hit-pêng iā ū chhiûⁿ.

(BCL) 耶和華的使者就徛佇葡萄園的狹路；此旁有牆，彼旁也有牆。

25

(THR) Lû khòaⁿ-kìⁿ Iâ-hô-hoa ê sù-chiá, chiū siám-óa hit ê chhiûⁿ, khoeh Pa-lân ê kha tī chhiûⁿ-nı̍h; Pa-lân chiū koh phah i.

(BCL) 驢看見耶和華的使者，就閃倚彼個牆，夾巴蘭的腳佇牆裡；巴蘭就閣拍伊。

26

(THR) Iâ-hô-hoa ê sù-chiá koh chìn-chêng khì, khiā tī o̍eh-o̍eh ê só͘-chāi, siang-pêng bô lō͘ thang oat.

(BCL) 耶和華的使者閣進前去，徛佇狹狹的所在，雙旁無路通越。

27

(THR) Lû khòaⁿ-kìⁿ Iâ-hô-hoa ê sù-chiá, chiū phak tī Pa-lân ê ē-tóe, Pa-lân hoat siū-khì, ēng kóaiⁿ-á phah lû.

(BCL) 驢看見耶和華的使者，就仆佇巴蘭的下底，巴蘭發受氣，用枴仔拍驢。

28

(THR) Iâ-hô-hoa khui lû ê chhùi, lû tùi Pa-lân kóng, Góa tùi lí chòe sím-mı̍h, lí kéng-jiân phah góa chí saⁿ-pái ah?

(BCL) 耶和華開驢的嘴，驢對巴蘭講：「我對你做甚麼，你竟然拍我此三擺啊？」

29

(THR) Pa-lân tùi lû kóng, In-ūi lí hì-lāng góa; góa hūn chhiú-nı̍h bô to; ū, chiū kā lí thâi-sí.

(BCL) 巴蘭對驢講：「因為你戲弄我，我恨手裡無刀，有，就給你死。」

30

(THR) Lû tùi Pa-lân kóng, Góa kiám m̄-sī lí ê lû, lí it-seng só͘ khiâ-ê mah? góa pêng-sò͘ bat tùi lí án-ni kiâⁿ mah? Pa-lân kóng, Bô.

(BCL) 驢對巴蘭講：「我豈呣是你的驢你一生所騎的嗎？我平素曾對你按呢行嗎？」巴蘭講：「無。」

31

(THR) Hit-sî Iâ-hô-hoa khui Pa-lân ê ba̍k-chiu, i chiū khòaⁿ-kìⁿ Iâ-hô-hoa ê sù-chiá khiā tī lō͘-nı̍h, chhiú pu̍ih to; Pa-lân chiū àⁿ-thâu phak tī tōe-nı̍h.

(BCL) 彼時，耶和華開巴蘭的目睭，伊就看見耶和華的使者徛佇路裡，手拔刀，巴蘭就俯頭仆佇地裡。

32

(THR) Iâ-hô-hoa ê sù-chiá tùi i kóng, Lí siáⁿ-sū chí saⁿ-pái phah lí ê lû ah? Khòaⁿ ah, góa chhut-lâi tí-te̍k lí, in-ūi lí tī góa ê bīn-chêng só͘ kiâⁿ ê, sī pōe-ge̍k.

(BCL) 耶和華的使者對伊講：「你啥事此三擺拍你的驢啊？看啊，我出來抵敵你，因為你佇我的面前所行的，是悖逆。

33

(THR) Lû khòaⁿ-kìⁿ góa, chiū siám-pī góa chí saⁿ-pái; siat-sú lû bô siám-pī góa, góa í-keng thâi-sí lí, hō͘ lû o̍ah-teh.

(BCL) 驢看見我，就閃避我此三擺；設使驢無閃避我，我已經死你，互驢活。」

34

(THR) Pa-lân tùi Iâ-hô-hoa ê sù-chiá kóng, Góa ū hōan-chōe lah, góa m̄-chai lí khiā tī lō͘-nı̍h chó͘-tòng góa; lí nā bô hoaⁿ-hí góa khì, góa chiū tò-tńg-khì.

(BCL) 巴蘭對耶和華的使者講：「我有犯罪啦。我呣知你徛佇路裡阻擋我；你若無歡喜我去，我就倒轉去。」

35

(THR) Iâ-hô-hoa ê sù-chiá tùi Pa-lân kóng, Lí kap chiah ê lâng khì; chóng-sī lí chí-ū thang kóng góa só͘ beh tùi lí kóng-ê. Pa-lân chiū kap Pa-le̍k ê siú-léng saⁿ-kap khì.

(BCL) 耶和華的使者對巴蘭講：「你及諸個人去！總是你只有通講我所欲對你講的。」巴蘭就及巴勒的首領相及去。

36

(THR) Pa-le̍k thiaⁿ-kìⁿ Pa-lân lâi, chiū khì Mô͘-ap siâⁿ ngiâ-chih i; chit ê siâⁿ sī tī piⁿ-kài ê ke̍k-thâu, tī A-lùn ê piⁿ-thâu.

(BCL) 巴勒聽見巴蘭來，就去摩押城迎接伊；此個城是佇邊界的極頭，佇亞嫩的邊頭。

37

(THR) Pa-le̍k tùi Pa-lân kóng, Góa kiám m̄-sī chhiat-chhiat chhe lâng kàu lí hia khì kiò lí mah? Lí siáⁿ-sū bô lâi góa chia ah? góa kiám bô chin-chiàⁿ ōe hō͘ lí chun-kùi mah?

(BCL) 巴勒對巴蘭講：「我豈呣是切切差人到你遐去叫你嗎？你啥事無來我遮啊？我豈無真正會互你尊貴嗎？」

38

(THR) Pa-lân ìn Pa-le̍k kóng, Góa taⁿ lâi kàu lí chia, góa kiám ū kôan ōe kóng sím-mı̍h ah? Siōng-tè ēng sím-mı̍h ōe kau-tài góa, góa chiū kóng i.

(BCL) 巴蘭應巴勒講：「我今來到你遮！我豈有權會講甚麼啊？上帝用甚麼話交代我，我就講伊。」

39

(THR) Pa-lân kap Pa-le̍k saⁿ-kap kiâⁿ, lâi kàu Ki-lia̍t-ô͘-só.

(BCL) 巴蘭及巴勒相及行，來到基列胡瑣。

40

(THR) Pa-le̍k thâi gû-iûⁿ hiàn-chè, chiū sàng hō͘ Pa-lân í-kı̍p kap i tī-teh ê siú-léng.

(BCL) 巴勒牛羊獻祭，就送互巴蘭以及及伊佇的首領。

41

(THR) Kàu keh chá-khí, Pa-le̍k chhōa Pa-lân kàu Pa-le̍k ê kôaiⁿ-ūi; Pa-lân tùi hia khòaⁿ Í-sek-lia̍t peh-sìⁿ ke̍k-thâu ê só͘-chāi.

(BCL) 到隔早起，巴勒導巴蘭到巴勒的高位；巴蘭對遐看以色列百姓極頭的所在。

Bible Color Mark

• 台語漢字羅馬本
• 巴克禮全羅