民數記 第 21 章

1

(THR) Khiā-khí tī lâm-hng ê Ka-lâm lâng, A-la̍h-tek ông, thiaⁿ-kìⁿ Í-sek-lia̍t lâng tùi A-tha-lîm lō͘ lâi, chiū kap Í-sek-lia̍t lâng kau-chiàn, lia̍h in kúi-nā lâng.

(BCL) 徛起佇南方的迦南人亞拉得王，聽見以色列人對亞他林路來，就及以色列人交戰，掠幾若人。

2

(THR) Í-sek-lia̍t lâng tùi Iâ-hô-hoa hoat-gōan kóng, Lí nā chin-chiàⁿ chiong chit ê peh-sìⁿ kau góa ê chhiú, góa chiū it-chīn châu-bia̍t in ê siâⁿ.

(BCL) 以色列人對耶和華發願講：「你若真正將此個百姓交我的手，我就一盡剿滅的城。」

3

(THR) Iâ-hô-hoa thiaⁿ Í-sek-lia̍t lâng ê siaⁿ, chiong Ka-lâm lâng kau-tài in; in chiū it-chīn bia̍t in, kap in ê siâⁿ; hit só͘-chāi ê miâ chiū kiò Hô-jíⁿ-má.

(BCL) 耶和華聽以色列人的聲，將迦南人交代，就一盡滅及的城。彼所在的名就叫何珥瑪。

4

(THR) In tùi Hô-jíⁿ soaⁿ khí-sin, tùi Âng-hái ê lō͘ khì, beh se̍h Í-tong ê tōe; peh-sìⁿ ūi-tio̍h só͘ kiâⁿ ê lō͘, sim put-chí lóe-chì.

(BCL) 對何珥山起身，對紅海的路去，欲踅以東的地。百姓為著所行的路，心不止餒志，

5

(THR) Chiū hiâm Siōng-tè kap Mô͘-se kóng, Lín siáⁿ-sū chhōa góan chhut Ai-kı̍p, hō͘ góan sí tī chit ê khòng-iá ah? In-ūi bô piáⁿ, bô chúi, góan ê sim iàm-chiān chit ê chheng-tām ê chia̍h-mı̍h.

(BCL) 就嫌上帝及摩西講：「恁啥事導阮出埃及、互阮死佇此個曠野啊？因為無餅，無水，阮的心厭賤此個清淡的食物。」

6

(THR) Iâ-hô-hoa chiū chhe hé-chôa jı̍p peh-sìⁿ ê tiong-kan, kā peh-sìⁿ; Í-sek-lia̍t lâng sí chōe-chōe.

(BCL) 耶和華就差火蛇入百姓的中間，咬百姓。以色列人死多多。

7

(THR) Peh-sìⁿ kàu Mô͘-se hia, kóng, Góan ū hōan-chōe, in-ūi góan ū hiâm Iâ-hô-hoa kap lí; chhiáⁿ lí kiû Iâ-hô-hoa hō͘ chiah ê chôa lī-khui góan. Mô͘-se chiū thòe peh-sìⁿ kiû.

(BCL) 百姓到摩西遐，講：「阮有犯罪，因為阮有嫌耶和華及你。請你求耶和華，互諸個蛇離開阮。」摩西就替百姓求。

8

(THR) Iâ-hô-hoa tùi Mô͘-se kóng, Lí chòe chı̍t-bé hé-chôa, kùi tī kî-koaⁿ-téng; kìⁿ-nā hō͘ i kā-tio̍h ê, chı̍t-ē khòaⁿ, chiū ōe o̍ah.

(BCL) 耶和華對摩西講：「你做一尾火蛇，掛佇旗杆頂；見若互伊咬著的，一下看，就會活。」

9

(THR) Mô͘-se chiū chòe chı̍t-bé tâng-chôa, kùi tī kî-koaⁿ-téng; kìⁿ-nā hō͘ chôa kā-tio̍h-ê, chı̍t-ē khòaⁿ chit ê tâng-chôa, chiū o̍ah.

(BCL) 摩西就做一尾銅蛇，掛佇旗杆頂；見若互蛇咬著的，一下看此個銅蛇就活。

10

(THR) Í-sek-lia̍t lâng khí-sin, chat-iâⁿ tī O-po̍k.

(BCL) 以色列人起身，紮營佇阿伯。

11

(THR) Koh tùi O-po̍k khí-sin, chat-iâⁿ tī Í-iâ-a-pa-lîm, chiū-sī ǹg jı̍t-chhut ê só͘-chāi, kap Mô͘-ap saⁿ-tùi ê khòng-iá.

(BCL) 閣對阿伯起身，紮營佇以耶亞巴琳，就是向日出的所在，及摩押相對的曠野。

12

(THR) Tùi hia khí-sin, chat-iâⁿ tī Sat-lia̍t ê soaⁿ-kok.

(BCL) 對遐起身，紮營佇撒烈的山谷。

13

(THR) Tùi-hia khí-sin, chat-iâⁿ tī A-lùn ê hit-pêng, chiū-sī tī khòng-iá, tùi A-mô͘-lī ê tōe-kài chhut-lâi; in-ūi A-lùn sī Mô͘-ap ê kau-kài, tī Mô͘-ap kap A-mô͘-lī ê tiong-kan.

(BCL) 對遐起身，紮營佇亞嫩的彼旁。就是佇曠野，對亞摩利的地界出來；因為亞嫩是摩押的交界，佇摩押及亞摩利的中間。

14

(THR) Só͘-í Iâ-hô-hoa kau-chiàn ê chheh ū kóng: So͘-hoat ê Oa-hap-pek, Kap A-lùn hiah ê soaⁿ-kok;

(BCL) 所以耶和華交戰的冊有講：「蘇法的哇哈伯及亞嫩許個山谷，

15

(THR) Í-kı̍p chiah ê soaⁿ-kok ê chúi-chôaⁿ, Chiū-sī ǹg A-jíⁿ khiā-khí ê só͘-chāi, Óa-kūn Mô͘-ap ê kéng-kài.

(BCL) 以及諸個山谷的水泉，就是向亞珥徛起的所在，倚近摩押的境界。」

16

(THR) In tùi hia kàu Pí-jíⁿ; che chiū-sī Iâ-hô-hoa bat tùi Mô͘-se só͘ kóng-khí ê chíⁿ, kóng, Lí chū-chı̍p peh-sìⁿ, Góa beh ēng chúi hō͘ in.

(BCL) 對遐到比珥，這就是耶和華曾對摩西所講起的井。講：「你聚集百姓，我欲用水互。」

17

(THR) Hit-sî Í-sek-lia̍t lâng chhiùⁿ-koa kóng, Chíⁿ ah, chhèng-chhut-lâi; lín tio̍h tùi i chhiùⁿ-koa;

(BCL) 彼時以色列人唱歌講：井啊，淐出來！恁著對伊唱歌。

18

(THR) Chit ê chíⁿ sī siú-léng khui i, Peh-sìⁿ chun-kùi ê lâng, Ēng kôan-pèng, ēng in ê kóaiⁿ-á ku̍t ê.In tùi khòng-iá khì Má-tha-ná;

(BCL) 此個井是首領開伊，百姓尊貴的人用權柄用的枴仔掘的。對曠野去瑪他拿，

19

(THR) Tùi Má-tha-ná kàu Ná-ha̍p-lia̍t, tùi Ná-hap-lia̍t kàu Pa-bo̍at.

(BCL) 對瑪他拿到拿哈列，對拿哈列到巴末，

20

(THR) Tùi Pa-bo̍at kàu Mô͘-ap tōe ê soaⁿ-kok, kàu hit ê khòaⁿ lo̍h-kē, ōe khòaⁿ-kìⁿ khòng-iá ê Pî-su-ka ê soaⁿ-chiam.

(BCL) 對巴末到摩押地的山谷，到彼個看落低，會看見曠野的毗斯迦的山尖。

21

(THR) Í-sek-lia̍t lâng chhe sù-chiá khì kìⁿ A-mô͘-lī lâng ê ông Se-hông, kóng,

(BCL) 以色列人差使者去見亞摩利人的王西宏，講：

22

(THR) Kiû lí iông-ún góa tùi lí ê tōe keng-kè; góan bô phian tī chhân-hn̂g, kap phû-tô-hn̂g; góan iā bô beh lim chíⁿ-nı̍h ê chúi; to̍k-to̍k kiâⁿ tōa-lō͘, tı̍t-tı̍t keng-kè lí ê tōe-kài.

(BCL) 「求你容允我對你的地經過；阮無偏佇田園及葡萄園，阮也無欲飲井裡的水，獨獨行大路，直直經過你的地界。」

23

(THR) Se-hông m̄-chún Í-sek-lia̍t lâng keng-kè i ê kéng-kài; Se-hông chiū chū-chı̍p i ê chèng peh-sìⁿ, chhut-lâi kàu khòng-iá, beh tí-te̍k Í-sek-lia̍t lâng, kàu Ngá-cha̍p; kap Í-sek-lia̍t lâng kau-chiàn.

(BCL) 西宏呣准以色列人經過伊的境界，西宏就聚集伊的眾百姓出來到曠野，欲抵敵以色列人，到雅雜及以色列人交戰。

24

(THR) Í-sek-lia̍t lâng ēng to thâi i, chiàm i ê tōe, tùi A-lùn kàu Ngá-phok, tı̍t-tı̍t kàu A-bûn lâng hia; in-ūi A-bûn lâng ê tōe-kài chin kian-kò͘.

(BCL) 以色列人用刀伊，佔伊的地，對亞嫩到雅博，直直到亞捫人遐，因為亞捫人的地界真堅固。

25

(THR) Í-sek-lia̍t lâng chhú i it-chhè ê siâⁿ, Í-sek-lia̍t lâng iā khiā-khí A-mô͘-lī ê siâⁿ, tī Hi-sı̍t-pún, kap i it-chhè ê siâⁿ.

(BCL) 以色列人取伊一切的城，以色列人也徛起亞摩利的城，佇希實本及伊一切的城。

26

(THR) Chit ê Hi-sı̍t-pún sī A-mô͘-lī ông Se-hông ê siâⁿ; i bat kap Mô͘-ap chêng ê ông kau-chiàn, tùi i ê chhiú chhiúⁿ chôan-tōe, tı̍t-kàu A-lùn.

(BCL) 此個希實本是亞摩利王西宏的城；伊曾及摩押前的王交戰，對伊的手搶全地，直到亞嫩。

27

(THR) Só͘-í chòe-si ê lâng liām, kóng: Lín tio̍h lâi Hi-sı̍t-pún, Gōan Se-hông ê siâⁿ tit-tio̍h khí-chō, koh kian-kò͘;

(BCL) 所以做詩的人唸講：恁著來希實本；願西宏的城得著起造，閣堅固。

28

(THR) In-ūi ū hé tùi Hi-sı̍t-pún chhut, Ū hé-iām tùi Se-hông ê siâⁿ hoat, Sio-húi Mô͘-ap ê A-jíⁿ, Kap A-lùn kôaiⁿ ê só͘-chāi ê chú.

(BCL) 因為有火對希實本出，有火焰對西宏的城發，燒毀摩押的亞珥及亞嫩高的所在的主。

29

(THR) Mô͘-ap ah, lí ū chai-ē! Ki-bo̍at ê peh-sìⁿ ah, lín bia̍t-bô lah! Hō͘ i ê ta-po͘-teng chòe tô-cháu-ê, Cha-bó͘-kiáⁿ chòe siū-lia̍h-ê, Kau hō͘ A-mô͘-lī ông Se-hông.

(BCL) 摩押啊，你有災禍！基抹的百姓啊，恁滅無啦！互伊的查甫丁做逃走的，查某子做受掠的，交互亞摩利王西宏。

30

(THR) Góan siā-in; Hi-sı̍t-pún kàu Tí-pún it-chīn húi bia̍t, Góan hō͘ tōe pha-hng, tı̍t-kàu Lô-hoat, Chiū-sī kàu Bí-tí-pa.

(BCL) 阮射；希實本到底本一盡毀滅。阮互地拋荒，直到羅法；就是到米底巴。

31

(THR) Án-ni, Í-sek-lia̍t lâng chiū khiā-khí tī A-mô͘-lī lâng ê tōe.

(BCL) 按呢，以色列人就徛起佇亞摩利人的地。

32

(THR) Mô͘-se chhe lâng khì thau-khòaⁿ Ngá-siā, chiū chhú in hiah ê hiuⁿ-siā, kóaⁿ-chhut khiā-khí hia ê A-mô͘-lī lâng.

(BCL) 摩西差人去偷看雅謝，就取許個鄉社，趕出徛起遐的亞摩利人。

33

(THR) Í-sek-lia̍t oat tùi Pa-san ê lō͘ khì; Pa-san ông Go̍k, kap i ê chèng peh-sìⁿ, lóng chhut-lâi tí-te̍k in, tī Í-tek-lâi kap in kau-chiàn.

(BCL) 以色列人越對巴珊的路去。巴珊王噩及伊的眾百姓，攏出來抵敵，佇以得來及交戰。

34

(THR) Iâ-hô-hoa tùi Mô͘-se kóng, M̄-bián kiaⁿ in, in-ūi Góa í-keng chiong i kap i ê chèng peh-sìⁿ, i ê tōe, lóng kau tī lí ê chhiú; lí tio̍h khóan-thāi i, chhin-chhiūⁿ lí bat khóan-thāi tiàm tī Hi-sı̍t-pún ê A-mô͘-lī ông Se-hông chı̍t-iūⁿ.

(BCL) 耶和華對摩西講：「呣免驚！因為我已經將伊及伊的眾百姓，伊的地，攏交佇你的手；你著款待伊親像你曾款待踮佇希實本的亞摩利王西宏一樣。」

35

(THR) In chiū phah i, kap i hiah ê kiáⁿ, í-kı̍p i ê chèng peh-sìⁿ, bô kā i lâu chı̍t-ê, chiū tit-tio̍h i ê tōe.

(BCL) 就拍伊及伊許個子，以及伊的眾百姓，無給伊留一個，就得著伊的地。

Bible Color Mark

• 台語漢字羅馬本
• 巴克禮全羅