民數記 第 20 章

1

(THR) Chiaⁿ-ge̍h-kan, Í-sek-lia̍t lâng chôan-hōe lâi kàu Sîm ê khòng-iá, peh-sìⁿ chiū tiàm tī Ka-te-su. Bí-lī-àm sí tī-hia, chiū bâi-chòng tī-hia.

(BCL) 正月間，以色列人全會來到尋的曠野，百姓就踮佇加低斯。米利暗死佇遐，就埋葬佇遐。

2

(THR) Hōe-chiòng bô chúi thang lim; in chiū chū-chı̍p kong-kek Mô͘-se A-lûn.

(BCL) 會眾無水通飲，就聚集攻擊摩西、亞倫。

3

(THR) Peh-sìⁿ chiū kap Mô͘-se kè-kàu kóng, Chêng góan ê hiaⁿ-tī sí tī Iâ-hô-hoa ê bīn-chêng, góan m̄-ta̍t-tio̍h hit-sî sòa sí.

(BCL) 百姓就及摩西計較講：「前阮的兄弟死佇耶和華的面前，阮呣值著彼時續死。

4

(THR) Lín siáⁿ-sū chhōa Iâ-hô-hoa ê hōe-chiòng kàu chit ê khòng-iá, hō͘ góan kap góan ê cheng-siⁿ sí tī-chia ah?

(BCL) 恁啥事導耶和華的會眾到此個曠野、互阮及阮的精牲死佇遮啊？

5

(THR) Lín siáⁿ-sū hō͘ góan chhut Ai-kı̍p, chhōa góan kàu chit ê pháiⁿ só͘-chāi ah? Bô só͘-chāi thang iā-chéng, iā bô bû-hoa-kó, bô phû-tô, bô sia̍h-liû, koh bô chúi thang lim.

(BCL) 恁啥事互阮出埃及、導阮到此個歹所在啊？無所在通撒種，也無無花果、無葡萄、無石榴，閣無水通飲。」

6

(THR) Mô͘-se A-lûn lī-khui hōe-chiòng kàu hōe-bō͘ mn̂g-kháu, phak tī tōe-nı̍h; Iâ-hô-hoa ê êng-kng tùi in hián-hiān.

(BCL) 摩西、亞倫離開會眾，到會幕門口，仆佇地裡；耶和華的榮光對顯現。

7

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

8

(THR) Lí tio̍h kia̍h kóaiⁿ-á, lí kap lí ê hiaⁿ A-lûn chio-chı̍p hōe-chiòng; tī in ê ba̍k-chiu-chêng lín bēng-lēng chio̍h-pôaⁿ chhut-chúi, lí ūi-tio̍h peh-sìⁿ hō͘ chúi tùi chio̍h-pôaⁿ chhut, hō͘ hōe-chiòng kap in ê cheng-siⁿ lim.

(BCL) 「你著抬枴仔，你及你的兄亞倫招集會眾，佇的目睭前恁命令石磐出水，你為著百姓互水對石磐出，互會眾及的精牲飲。」

9

(THR) Mô͘-se thàn bēng-lēng, tī Iâ-hô-hoa ê bīn-chêng kia̍h kóaiⁿ-á.

(BCL) 摩西趁命令，佇耶和華的面前抬枴仔。

10

(THR) Mô͘-se A-lûn chio-chı̍p hōe-chiòng kàu chio̍h-pôaⁿ-chêng, Mô͘-se tùi in kóng, Lín chiah ê pōe-ge̍k ê lâng tio̍h thiaⁿ ah, góan tio̍h hō͘ chúi tùi chit ê chio̍h-pôaⁿ lâu-chhut-lâi hō͘ lín mah?

(BCL) 摩西、亞倫招集會眾到石磐前。摩西對講：「恁諸個悖逆的人著聽啊：阮著互水對此個石磐流出來互恁嗎？」

11

(THR) Mô͘-se kia̍h-khí chhiú, ēng kóaiⁿ-á phah chio̍h-pôaⁿ nn̄g-ē, chiū ū chōe-chōe chúi lâu-chhut, hōe-chiòng kap in ê cheng-siⁿ lóng lim.

(BCL) 摩西抬起手，用枴仔拍石磐二下，就有多多水流出，會眾及的精牲攏飲。

12

(THR) Iâ-hô-hoa chiū tùi Mô͘-se A-lûn kóng, In-ūi lín m̄ sìn Góa, bô tī Í-sek-lia̍t lâng ê ba̍k-chiu-chêng chun-kèng Góa chòe-sèng, só͘-í lín bōe-tit-thang chhōa chiah ê hōe-chiòng jı̍p Góa só͘ sù-hō͘ in ê tōe.

(BCL) 耶和華就對摩西、亞倫講：「因為恁呣信我，無佇以色列人的目睭前尊敬我做聖，所以恁得通導諸個會眾入我所賜互的地。」

13

(THR) Chiah ê chúi miâ kiò Bí-lī-pa ê chúi; sī in-ūi Í-sek-lia̍t lâng kap Iâ-hô-hoa kè-kàu; Iâ-hô-hoa chiū tùi in hián-bêng ka-kī chòe-sèng.

(BCL) 諸個水名叫米利巴的水，是因為以色列人及耶和華計較，耶和華就對顯明家己做聖。

14

(THR) Mô͘-se tùi Ka-te-su chhe sù-chiá khì kìⁿ Í-tong ông, kóng, Lí ê hiaⁿ-tī Í-sek-lia̍t án-ni kóng, Lí chai góan só͘ tú-tio̍h it-chhè ê kan-khó͘.

(BCL) 摩西對加低斯差使者去見以東王，講：「你的兄弟以色列按呢講：『你知阮所抵著一切的艱苦，

15

(THR) Góan ê lia̍t-chó͘ lo̍h-khì Ai-kı̍p, góan tòa tī Ai-kı̍p kú-kú; Ai-kı̍p lâng pháiⁿ khóan-thāi góan kap góan ê lia̍t-chó͘.

(BCL) 阮的列祖落去埃及，阮住佇埃及久久；埃及人歹款待阮及阮的列祖，

16

(THR) Góan ai-kiû Iâ-hô-hoa ê sî, I thiaⁿ góan ê siaⁿ, chhe-khián sù-chiá chhōa góan chhut Ai-kı̍p; taⁿ góan tī lí ke̍k piⁿ-thâu ê siâⁿ Ka-te-su.

(BCL) 阮哀求耶和華的時，伊聽阮的聲，差遣使者導阮出埃及。今阮佇你極邊頭的城加低斯。

17

(THR) Kiû lí iông-ún góan keng-kè lí ê tōe, góan bô beh tùi chhân-hn̂g kap phû-tô-hn̂g keng-kè, iā bô lim chiah ê chíⁿ ê chúi; to̍k-to̍k kiâⁿ tōa-lō͘, bô phian-chó phian-iū, tı̍t-tı̍t keng-kè lí ê tōe-kài.

(BCL) 求你容允阮經過你的地。阮無欲對田園及葡萄園經過，也無飲諸個井的水，獨獨行大路，無偏左偏右，直直經過你的地界。』」

18

(THR) Í-tong ông kóng, Lí m̄-thang tùi góa chia keng-kè, bián-tit góa kia̍h to chhut-lâi tí-te̍k lí.

(BCL) 以東王講：「你呣通對我遮經過，免得我抬刀出來抵敵你。」

19

(THR) Í-sek-lia̍t lâng kā i kóng, Góan beh tùi tōa-lō͘ kiâⁿ-khì; siat-sú góan kap cheng-siⁿ lim lí ê chúi, góan beh hêng lí kè-chîⁿ; chún góa pō͘-kiâⁿ kè-khì, bô chhap pa̍t-hāng.

(BCL) 以色列人給伊講：「阮欲對大路行去；設使阮及精牲飲你的水，阮欲還你價錢。准我步行過去，無插別項。」

20

(THR) I kóng, Lí m̄-thang keng-kè. Í-tong ông chiū chhōa chōe-chōe lâng chhut-lâi, ēng kong-ngī ê chhiú tí-te̍k i.

(BCL) 伊講：「你呣通經過！」以東王就導多多人出來，用剛硬的手抵敵伊。

21

(THR) Án-ni Í-tong m̄ chún Í-sek-lia̍t lâng tùi i ê tōe-kài keng-kè; Í-sek-lia̍t chiū o̍at-tńg lī-khui i.

(BCL) 按呢，以東呣准以色列人對伊的地界經過。以色列就越轉，離開伊。

22

(THR) In tùi Ka-te-su khí-sin, Í-sek-lia̍t ê chôan-hōe kàu Hô-jíⁿ soaⁿ.

(BCL) 對加低斯起身，以色列的全會到何珥山。

23

(THR) Iâ-hô-hoa tī óa-kūn Í-tong piⁿ-kài ê Hô-jíⁿ soaⁿ, hoan-hù Mô͘-se A-lûn kóng,

(BCL) 耶和華佇倚近以東邊界的何珥山吩咐摩西、亞倫講：

24

(THR) A-lûn beh tò-chó͘, in-ūi i bōe-tit-thang jı̍p Góa siúⁿ-sù Í-sek-lia̍t lâng ê tōe, in-ūi tī Bí-lī-pa ê chúi lín ûi-ke̍h Góa ê bēng-lēng.

(BCL) 「亞倫欲倒祖。因為伊得通入我賞賜以色列人的地；因為佇米利巴的水，恁違逆我的命令。

25

(THR) Lí tòa A-lûn kap i ê kiáⁿ Í-lī-a-sat chiūⁿ Hô-jíⁿ soaⁿ,

(BCL) 你帶亞倫及伊的子以利亞撒上何珥山，

26

(THR) thǹg A-lûn ê saⁿ, kā i ê kiáⁿ Í-lī-a-sat chhēng; A-lûn beh sí tī-hia, tò-khì.

(BCL) 褪亞倫的衫，給伊的子以利亞撒穿；亞倫欲死佇遐，倒去。」

27

(THR) Mô͘-se chiàu Iâ-hô-hoa só͘ bēng-lēng-ê kiâⁿ; in saⁿ-lâng tng hōe-chiòng ê ba̍k-chiu-chêng chiūⁿ Hô-jíⁿ soaⁿ.

(BCL) 摩西照耶和華所命令的行。三人當會眾的目睭前上何珥山。

28

(THR) Mô͘-se thǹg A-lûn ê saⁿ, kā i ê kiáⁿ Í-lī-a-sat chhēng; A-lûn tī-hia sí tī soaⁿ-téng; Mô͘-se kap Í-lī-a-sat lo̍h-soaⁿ.

(BCL) 摩西褪亞倫的衫，給伊的子以利亞撒穿，亞倫佇遐死佇山頂。摩西及以利亞撒落山。

29

(THR) Hōe-chiòng khòaⁿ-kìⁿ A-lûn í-keng sí, chiū ūi A-lûn thî-khàu saⁿ-cha̍p jı̍t; Í-sek-lia̍t chôan-ke iā lóng án-ni.

(BCL) 會眾看見亞倫已經死，就為亞倫啼哭三十日，以色列全家也攏按呢。

Bible Color Mark

• 台語漢字羅馬本
• 巴克禮全羅