民數記 第 19 章

1

(THR) Iâ-hô-hoa hoan-hù Mô͘-se A-lûn kóng,

(BCL) 耶和華吩咐摩西、亞倫講：

2

(THR) Iâ-hô-hoa só͘ bēng-lēng lu̍t-hoat ê tiâu-lē sī án-ni kóng, Lí tio̍h hoan-hù Í-sek-lia̍t lâng ēng chı̍t-chiah sûn-chôan bô hâ-chhû, bē-bat kòa-taⁿ, chhiah-sek ê gû-bú, khan kàu lí chia.

(BCL) 「耶和華所命令律法的條例是按呢講：你著吩咐以色列人，用一隻純全無瑕疵、未曾掛軛，赤色的牛母牽到你遮，

3

(THR) Lí tio̍h chiong i kau hō͘ chè-si Í-lī-a-sat, thang tòa chhut iâⁿ-gōa; lâng chiū thâi gû tī i ê bīn-chêng.

(BCL) 你著將伊交互祭司以利亞撒；通帶出營外，人就牛佇伊的面前。

4

(THR) Chè-si Í-lī-a-sat tio̍h ēng chńg-thâu-á the̍h i ê huih tām-po̍h, ǹg hōe-bō͘-chêng hiù huih chhit-pái.

(BCL) 祭司以利亞撒著用指頭仔提伊的血淡薄，向會幕前灑血七擺。

5

(THR) Tio̍h ū chı̍t-lâng tī chè-si ê ba̍k-chiu-chêng, sio bú ê gû-á, chiū-sī sio i ê phê, i ê bah, i ê huih, i ê pùn.

(BCL) 著有一人佇祭司的目睭前燒母的牛仔；就是燒伊的皮、伊的肉、伊的血、伊的糞。

6

(THR) Chè-si tio̍h chiong pek-hiuⁿ-chhâ, giû-chhek-chháu, chu-âng-sek mî, lóng hiat tī sio gû ê hé-tiong.

(BCL) 祭司著將柏香柴、牛膝草、朱紅色綿攏佇燒牛的火中。

7

(THR) Chè-si tio̍h sóe i ê saⁿ, ēng chúi sóe seng-khu, jiân-āu jı̍p iâⁿ; chè-si beh bô chheng-khì kàu ê-hng.

(BCL) 祭司著洗伊的衫，用水洗身軀，然後入營，祭司欲無清氣到下昏。

8

(THR) Sio gû-á ê lâng tio̍h ēng chúi sóe i ê saⁿ, ēng chúi sóe seng-khu, beh bô chheng-khì kàu ê-hng.

(BCL) 燒牛仔的人著用水洗伊的衫，用水洗身軀，欲無清氣到下昏。

9

(THR) Tio̍h ū chı̍t ê chheng-khì ê lâng siu-sı̍p gû-bú ê hu, hē tī iâⁿ-gōa chheng-khì ê só͘-chāi, lâu-teh chòe Í-sek-lia̍t hōe-chiòng tû khì lâ-sâm ê chúi; che iā-sī tû-khì chōe.

(BCL) 著有一個清氣的人收拾牛母的灰，下佇營外清氣的所在，留做以色列會眾除去垃墋的水。這也是除去罪。

10

(THR) Siu-sı̍p gû-bú ê hu ê lâng tio̍h sóe i ê saⁿ, beh bô chheng-khì kàu ê-hng; che beh hō͘ Í-sek-lia̍t lâng kap kià-kha tī in tiong-kan ê gōa-lâng chòe éng-óan ê lē.

(BCL) 收拾牛母的灰的人著洗伊的衫，欲無清氣到下昏。這欲互以色列人及寄腳佇中間的外人做永遠的例。」

11

(THR) Bong-tio̍h lâng ê sin-si ê, chiū beh chhit-jı̍t kú bô chheng-khì.

(BCL) 「摸著人的身屍的，就欲七日久無清氣。

12

(THR) Hit-lâng kàu tē-saⁿ jı̍t, tio̍h ēng hit ê chúi chheng-khì pún-sin; kàu tē-chhit jı̍t chiah chheng-khì; i nā tī tē-saⁿ jı̍t bô chheng-khì pún-sin, kàu tē-chhit jı̍t chiū bô chheng-khì.

(BCL) 彼人到第三日著用彼個水清氣本身，到第七日才清氣。伊若佇第三日無清氣本身，到第七日就無清氣。

13

(THR) Kìⁿ-nā bong-tio̍h lâng ê sin-si, bô chheng-khì ka-kī ê, chiū phah lâ-sâm Iâ-hô-hoa ê hōe-bō͘, chit ê lâng tio̍h tùi Í-sek-lia̍t tiong chián-tû; in-ūi tû-khì lâ-sâm ê chúi bô hiù tī i ê seng-khu, i chiū bô chheng-khì, i ê bô chheng-khì iáu-kú tī i.

(BCL) 見若摸著人的身屍、無清氣家己的，就拍垃墋耶和華的會幕，此個人著對以色列中剪除；因為除去垃墋的水無灑佇伊的身軀，伊就無清氣，伊的無清氣猶久佇伊。

14

(THR) Lâng sí tī pò͘-pîⁿ-lāi, hit ê tiâu-lē sī án-ni: kìⁿ-nā jı̍p hit ê pò͘-pîⁿ, kap it-chhè tī pò͘-pîⁿ-lāi ê, lóng tio̍h bô chheng-khì chhit-jı̍t kú.

(BCL) 「人死佇布棚內彼個條例是按呢：見若入彼個布棚，及一切佇布棚內的，攏著無清氣七日久。

15

(THR) Kìⁿ-nā hian-khui ê khì-kū, chiū-sī kòa bô khàm-ba̍t ê, iā sī bô chheng-khì.

(BCL) 見若掀開的器具，就是蓋無蓋密的，也是無清氣。

16

(THR) Bô-lūn sím-mı̍h lâng tī chhân-iá bong-tio̍h hō͘ to thâi-sí-ê, á-sī sin-si, á-sī lâng ê kut-thâu, á-sī hûn-bōng, chiū chhit-jı̍t kú bô chheng-khì.

(BCL) 無論甚麼人佇田野摸著互刀死的，抑是身屍，抑是人的骨頭，抑是墳墓，就七日久無清氣。

17

(THR) Tio̍h ūi-tio̍h chit-ê bô chheng-khì ê lâng the̍h tām-po̍h só͘ sio tû-khì chōe ê hé-hu, hē tī khì-kū-lāi, tò o̍ah-chúi tī hí téng-bīn.

(BCL) 著為著此個無清氣的人提淡薄所燒除去罪的火灰下佇器具內，倒活水佇彼頂面。

18

(THR) Tio̍h ū chı̍t ê chheng-khì ê lâng the̍h giû-chhek-chháu ùn tī chit ê chúi, chiong chúi hiù tī pò͘-pîⁿ, kap lóng-chóng ê khì-kū, í-kı̍p hit lāi-bīn ê lâng; koh hiù bong-tio̍h kut-thâu ê, á-sī bong-tio̍h siū thâi-ê, á-sī bong-tio̍h sí-si ê, á-sī bong-tio̍h hûn-bōng ê.

(BCL) 著有一個清氣的人提牛膝草搵佇此個水，將水灑佇布棚，及攏總的器具以及彼內面的人，閣灑摸著骨頭的，抑是摸著受的，抑是摸著死屍的，抑是摸著墳墓的。

19

(THR) Tē-saⁿ jı̍t kap tē-chhit jı̍t, chheng-khì-ê tio̍h kā hit ê bô chheng-khì-ê hiù chúi, kàu tē-chhit jı̍t thang hō͘ i chheng-khì; hit-lâng tio̍h sóe-saⁿ, ēng chúi sóe seng-khu; kàu ê-hng chiah chheng-khì.

(BCL) 第三日及第七日，清氣的著給彼個無清氣的灑水，到第七日通互伊清氣。彼人著洗衫，用水洗身軀，到下昏才清氣。

20

(THR) Chóng-sī hit ê bô chheng-khì ê lâng iā bô chheng-khì ka-kī ê, tio̍h tùi hōe-tiong chián-tû i; in-ūi i phah lâ-sâm Iâ-hô-hoa ê sèng-só͘; tû-khì lâ-sâm ê chúi bô hiù tī i ê seng-khu, i sī bô chheng-khì ê lâng.

(BCL) 「總是彼個無清氣的人也無清氣家己的，著對會中剪除伊，因為伊拍垃墋耶和華的聖所。除去垃墋的水無灑佇伊的身軀，伊是無清氣的人。

21

(THR) Che beh kā in chòe éng-óan ê lē; koh hit-ê kā lâng hiù tû-khì lâ-sâm ê chúi, hit-lâng tio̍h sóe i ê saⁿ; kìⁿ-nā bong hit ê tû-khì lâ-sâm ê chúi-ê, tek-khak bô chheng-khì kàu ê-hng.

(BCL) 這欲給做永遠的例。閣彼個給人灑除去垃墋的水，彼人著洗伊的衫。見若摸彼個除去垃墋的水的，的確無清氣到下昏。

22

(THR) Kìⁿ-nā bô chheng-khì ê lâng só͘ bong-tio̍h-ê, chiū bô chheng-khì; bong-tio̍h i ê, tek-khak bô chheng-khì kàu ê-hng.

(BCL) 見若無清氣的人所摸著的就無清氣；摸著伊的，的確無清氣到下昏。」

Bible Color Mark

• 台語漢字羅馬本
• 巴克禮全羅