民數記 第 14 章

1

(THR) Hōe-chiòng chiū chhut-siaⁿ, tōa âu-kiò; hit-mî peh-sìⁿ lóng thî-khàu.

(BCL) 會眾就出聲大喉叫；彼暝百姓攏啼哭。

2

(THR) Í-sek-lia̍t lâng ai-òan Mô͘-se A-lûn; hōe-chiòng tùi in kóng, M̄-ta̍t-tio̍h góan sí tī Ai-kı̍p tōe! m̄-ta̍t-tio̍h sí tī chit khòng-iá!

(BCL) 以色列人哀怨摩西、亞倫；會眾對講：「呣值著阮死佇埃及地，呣值著死佇此曠野。

3

(THR) Iâ-hô-hoa siáⁿ-sū chhōa góan kàu chit só͘-chāi, hō͘ góan tó tī to-ē ah? Góan ê bó͘ kap kiáⁿ beh siū lia̍h; góan tò-khì Ai-kı̍p kiám bô khah-hó mah?

(BCL) 耶和華啥事導阮到此所在，互阮倒佇刀下啊？阮的某及子欲受掠。阮倒去埃及豈無卡好嗎？」

4

(THR) In saⁿ-kap kóng, Lán tio̍h lı̍p chı̍t ê siú-léng, tò-khì Ai-kı̍p.

(BCL) 相及講：「咱著立一個首領倒去埃及！」

5

(THR) Mô͘-se A-lûn chiū phak-lo̍h tī Í-sek-lia̍t chôan-hōe chèng-lâng ê bīn-chêng.

(BCL) 摩西、亞倫就仆落佇以色列全會眾人的面前。

6

(THR) Thau-khòaⁿ tōe ê lâng ê tiong-kan, Lùn ê kiáⁿ Iok-su-a, kap Iâ-hu-nî ê kiáⁿ Ka-le̍k, thiah-lı̍h in ê saⁿ;

(BCL) 偷看地的人的中間，嫩的子約書亞及耶孚尼的子迦勒拆裂的衫，

7

(THR) tùi Í-sek-lia̍t chôan-hōe kóng, Góan só͘ keng-kè thau-khòaⁿ ê tōe, sī ke̍k-hó ê tōe.

(BCL) 對以色列全會講：「阮所經過、偷看的地是極好的地。

8

(THR) Iâ-hô-hoa nā hoaⁿ-hí lán, chiū beh chhōa lán kàu hit ê tōe, chiong tōe siúⁿ-sù lán; hit ê tōe sī lâu lin kap bı̍t ê tōe.

(BCL) 耶和華若歡喜咱，就欲導咱到彼個地，將地賞賜咱；彼個地是流奶及蜜的地。

9

(THR) Chóng-sī lín m̄-thang pōe-pōan Iâ-hô-hoa, iā bo̍h-tit kiaⁿ hit só͘ -chāi ê peh-sìⁿ, in-ūi in sī chòe lán ê chia̍h-mı̍h; koh tì-ìm in ê í-keng lī-khui in; koh ū Iâ-hô-hoa kap lán tī-teh; m̄ bián kiaⁿ in.

(BCL) 總是恁呣通背叛耶和華，也莫得驚彼所在的百姓；因為是做咱的食物，閣致蔭的已經離開。閣有耶和華及咱佇，呣免驚！」

10

(THR) Chóng-sī chôan-hōe kóng, Ēng chio̍h-thâu tìm-sí in. Iâ-hô-hoa ê êng-kng tī hōe-bō͘ ǹg Í-sek-lia̍t lâng chhut-hiān.

(BCL) 總是全會講：「用石頭擲死。」耶和華的榮光佇會幕向以色列人出現。

11

(THR) Iâ-hô-hoa tùi Mô͘-se kóng, Chit ê peh-sìⁿ khòaⁿ-khin Góa beh kàu tī-sî ah? Góa tī in tiong-kan kiâⁿ che it-chhè ê sîn-jiah, in iáu-kú m̄-sìn Góa, beh kàu tī-sî?

(BCL) 耶和華對摩西講：「此個百姓看輕我欲到底時啊？我佇中間行這一切的神蹟，猶久呣信我欲到底時？

12

(THR) Góa beh ēng un-e̍k lâi phah in, hō͘ in bōe tit-tio̍h sêng-chiap gia̍p; hō͘ lí chiâⁿ-chòe tōa-kok, pí in khah-kiông.

(BCL) 我欲用瘟疫來拍，互得著承接業，互你成做大國，比卡強。」

13

(THR) Mô͘-se tùi Iâ-hô-hoa kóng, Án-ni, Ai-kı̍p lâng beh thiaⁿ-kìⁿ; in-ūi Lí ēng Lí ê kôan-lêng, chhōa chiah ê peh-sìⁿ tùi in tiong-kan chiūⁿ-lâi.

(BCL) 摩西對耶和華講：「按呢埃及人欲聽見；因為你用你的權能，導諸個百姓對中間上來。

14

(THR) In beh ēng chiah ê sū kā chit só͘-chāi khiā-khí ê lâng kóng. In í-keng thiaⁿ-kìⁿ Iâ-hô-hoa Lí tī chiah ê peh-sìⁿ ê tiong-kan; in-ūi Iâ-hô-hoa Lí tng-bīn hō͘ lâng khòaⁿ-kìⁿ, koh Lí ê hûn thêng tī in ê téng-bīn, Lí jı̍t-sî tī hûn-thiāu tiong, mî-sî tī hé-thiāu tiong, tī in ê bīn-chêng kiâⁿ.

(BCL) 欲用諸個事給此所在徛起的人講；已經聽見耶和華──你佇諸個百姓的中間；因為耶和華你當面互人看見，閣你的雲停佇的頂面。你日時佇雲柱中，暝時佇火柱中，佇的面前行。

15

(THR) Taⁿ Lí nā thâi-sí chiah ê peh-sìⁿ, chhin-chhiūⁿ thâi-sí chı̍t-lâng, hiah ê thiaⁿ-kìⁿ Lí ê miâ-siaⁿ ê lia̍t-kok beh gī-lūn kóng,

(BCL) 今你若死諸個百姓，親像死一人，許個聽見你的名聲的列國欲議論講：

16

(THR) In-ūi Iâ-hô-hoa bōe-ōe chhōa chiah ê peh-sìⁿ jı̍p I tùi in chiù-chōa èng-ún ê tōe, só͘-í tī khòng-iá thâi-sí in.

(BCL) 『因為耶和華會導諸個百姓入伊對咒誓應允的地，所以佇曠野死。』

17

(THR) Taⁿ kiû Chú hián-chhut tōa kôan-lêng, chiàu Lí só͘ bat kóng ê, kóng,

(BCL) 今求主顯出大權能，照你所曾講的講：

18

(THR) Iâ-hô-hoa bô khòai siū-khì, koh ū hong-sēng ê chû-ài, sià-bián chōe-kòa kè-sit, koat-tòan bô lia̍h ū-chōe ê chòe bô chōe, tek-khak kui-kiū i ê chōe, tùi pē kàu kiáⁿ, kàu saⁿ-sì tāi.

(BCL) 『耶和華無快受氣，閣有豐盛的慈愛，赦免罪過過失；決斷無掠有罪的做無罪，的確歸咎伊的罪，對父到子，到三、四代。』

19

(THR) Kiû Lí chiàu Lí ê tōa chû-ài sià-bián chit ê peh-sìⁿ ê chōe, chhin-chhiūⁿ Lí tùi Ai-kı̍p kàu taⁿ, siông-siông sià-bián in chı̍t-iūⁿ.

(BCL) 求你照你的大慈愛赦免此個百姓的罪，親像你對埃及到今常常赦免一樣。」

20

(THR) Iâ-hô-hoa kóng, Góa chiàu lí ê ōe ū sià-bián in.

(BCL) 耶和華講：「我照你的話有赦免。

21

(THR) Chóng-sī Góa kí Góa ê o̍ah-miā lâi kóng, Piàn-tōe beh chhiong-móa Iâ-hô-hoa ê êng-kng.

(BCL) 總是我指我的活命來講，遍地欲充滿耶和華的榮光。

22

(THR) In-ūi chiah ê lâng ū khòaⁿ-kìⁿ Góa ê êng-kng, í-kı̍p Góa só͘ kiâⁿ tī Ai-kı̍p kap khòng-iá ê sîn-jiah, iáu-kú chhì Góa cha̍p-pái, m̄ thiaⁿ-thàn Góa ê ōe;

(BCL) 因為諸個人有看見我的榮光以及我所行佇埃及及曠野的神蹟，猶久試我十擺，呣聽趁我的話，

23

(THR) in koat-tòan bōe tit-tio̍h khòaⁿ-kìⁿ Góa tùi in ê lia̍t-chó͘ só͘ chiù-chōa èng-ún ê tōe; hōan-nā khòaⁿ-khin Góa-ê lóng bōe tit-tio̍h khòaⁿ-kìⁿ.

(BCL) 決斷得著看見我對的列祖所咒誓應允的地。凡若看輕我的，攏得著看見；

24

(THR) To̍k-to̍k Góa ê lô͘-po̍k Ka-le̍k, in-ūi i lēng-gōa ū chı̍t ê sim-chì, ôan-chôan tè Góa, Góa beh chhōa i jı̍p i só͘ kiâⁿ-kàu ê tōe, i ê hō͘-è iā beh tit-tio̍h hit ê tōe chòe gia̍p.

(BCL) 獨獨我的奴僕迦勒，因為伊另外有一個心志，完全隨我，我欲導伊入伊所行到的地；伊的後裔也欲得著彼個地做業。

25

(THR) A-má-le̍k lâng kap Ka-lâm lâng tiàm tī soaⁿ-kok tiong; bîn-á-jı̍t lín tio̍h o̍at-tò-tńg, tùi Âng-hái ê lō͘ khì khòng-iá.

(BCL) 亞瑪力人及迦南人踮佇山谷中，明仔日恁著越倒轉，對紅海的路去曠野。」

26

(THR) Iâ-hô-hoa hoan-hù Mô͘-se A-lûn kóng,

(BCL) 耶和華吩咐摩西、亞倫講：

27

(THR) Chiah ê pháiⁿ ê hōe-chiòng tùi Góa hoat-chhut òan-giân, Góa thun-lún in beh kàu tī-sî ah? Í-sek-lia̍t lâng ai-òan Góa ê òan-giân, Góa lóng thiaⁿ-kìⁿ lah.

(BCL) 「諸個歹的會眾對我發出怨言，我吞欲到底時啊？以色列人哀怨我的怨言，我攏聽見啦。

28

(THR) Tio̍h kā in kóng, Iâ-hô-hoa kóng, Góa kí Góa ê o̍ah-miā lâi kóng, Lín hō͘ Góa thiaⁿ-kìⁿ ê ōe, Góa beh chiàu án-ni khóan-thāi lín.

(BCL) 著給講，耶和華講：『我指我的活命來講，恁互我聽見的話，我欲照按呢款待恁。

29

(THR) Lín ê sin-si beh tó tī chit khòng-iá, kìⁿ-nā lín tiong-kan kè-sǹg ê lâng, chiàu i ê siàu-gia̍h, tùi jī-cha̍p hè í-chiūⁿ, tùi Góa chhut òan-giân ê,

(BCL) 恁的身屍欲倒佇此曠野，見若恁中間過算的人照伊的數額，對二十歲以上，對我出怨言的，

30

(THR) tek-khak bōe tit-tio̍h jı̍p Góa chiù-chōa èng-ún lín khiā-khí ê tōe; to̍k-to̍k Iâ-hu-nî ê kiáⁿ Ka-le̍k, kap Lùn ê kiáⁿ Iok-su-a, beh jı̍p-khì.

(BCL) 的確得著入我咒誓應允恁徛起的地；獨獨耶孚尼的子迦勒及嫩的子約書亞欲入去。

31

(THR) Chóng-sī lín ê gín-á, chiū-sī lín só͘ kóng beh siū-lia̍h ê, Góa beh chhōa in jı̍p-khì, in chiū chai lín só͘ khì-sak hit ê tōe.

(BCL) 總是恁的囝仔，就是恁所講、欲受掠的，我欲導入去，就知恁所棄拺彼個地。

32

(THR) Lūn-kàu lín, lín ê sin-si beh tó tī chit khòng-iá.

(BCL) 論到恁，恁的身屍欲倒佇此曠野；

33

(THR) Lín ê kiáⁿ-jî beh tī khòng-iá phiau-liû sì-cha̍p nî, tam-tng lín îm-hēng ê chōe, tı̍t-kàu lín ê sin-si tī khòng-iá siau-bia̍t.

(BCL) 恁的子兒欲佇曠野漂流四十年，擔當恁淫行的罪，直到恁的身屍佇曠野消滅。

34

(THR) Chiàu lín thau-khòaⁿ hit ê tōe ê jı̍t-chí, kiōng sì-cha̍p jı̍t, chı̍t-jı̍t tí chı̍t-nî, lín tio̍h tam-tng chōe sì-cha̍p nî; lín chiū chai Góa khì-sak lín.

(BCL) 照恁偷看彼個地的日子共四十日，一日抵一年，恁著擔當罪四十年，恁就知我棄拺恁，

35

(THR) Góa Iâ-hô-hoa í-keng kóng, Góa beh án-ni khóan-thāi che it-chhè chū-chı̍p tùi-te̍k Góa ê pháiⁿ hōe-chiòng; in beh tī chit khòng-iá siau-bia̍t, sí tī-chia.

(BCL) 我──耶和華已經講，我欲按呢款待這一切聚集對敵我的歹會眾；欲佇此曠野消滅，死佇遮。』

36

(THR) Mô͘-se só͘ chhe thau-khòaⁿ hit ê tōe, tò-tńg lâi pò hit só͘-chāi ê pháiⁿ siau-sit, tì-kàu chôan-hōe ai-òan i;

(BCL) 摩西所差、偷看彼個地倒轉來，報彼所在的歹消息，致到全會哀怨伊，

37

(THR) hiah ê pò hit só͘-chāi pháiⁿ siau-sit ê lâng, lóng tú-tio̍h un-e̍k, sí tī Iâ-hô-hoa ê bīn-chêng.

(BCL) 許個報彼所在歹消息的人攏抵著瘟疫，死佇耶和華的面前。

38

(THR) Thau-khòaⁿ hit só͘-chāi ê lâng ê tiong-kan, chí-ū Lùn ê kiáⁿ Iok-su-a, kap Iâ-hu-nî ê kiáⁿ Ka-le̍k, iáu-kú o̍ah-teh.

(BCL) 偷看彼所在的人的中間只有嫩的子約書亞及耶孚尼的子迦勒猶久活。

39

(THR) Mô͘-se chiong chiah ê ōe kā Í-sek-lia̍t ê chèng-lâng kóng, peh-sìⁿ chiū chin iu-būn.

(BCL) 摩西將諸個話給以色列的眾人講，百姓就真憂悶。

40

(THR) In chá-chá khí-lâi chiūⁿ-khì soaⁿ-téng, kóng, Khòaⁿ ah, góan tī-chia, beh chiūⁿ-khì Iâ-hô-hoa só͘ èng-ún ê tōe, in-ūi góan ū hōan-chōe.

(BCL) 早早起來，上去山頂，講：「看啊，阮佇遮，欲上去耶和華所應允的地，因為阮有犯罪。」

41

(THR) Mô͘-se kóng, Lín siáⁿ-sū ûi-pōe Iâ-hô-hoa ê bēng-lēng ah? chit ê sū bōe-ōe heng-thong.

(BCL) 摩西講：「恁啥事違背耶和華的命令啊？此個事會亨通。

42

(THR) Bo̍h-tit chiūⁿ-khì, in-ūi Iâ-hô-hoa bô tī lín tiong-kan, kiaⁿ-liáu lín hō͘ tùi-te̍k phah-pāi.

(BCL) 莫得上去；因為耶和華無佇恁中間，驚了恁互對敵拍敗。

43

(THR) In-ūi A-má-le̍k lâng, kap Ka-lâm lâng, lóng tī-hia tī lín ê thâu-chêng, lín beh tó tī to-ē; in-ūi lín o̍at-thâu bô tè Iâ-hô-hoa; só͘-í Iâ-hô-hoa bô beh kap lín tī-teh.

(BCL) 因為亞瑪力人及迦南人攏佇遐佇恁的頭前，恁欲倒佇刀下；因為恁越頭無隨耶和華，所以耶和華無欲及恁佇。」

44

(THR) Chóng-sī in chū-choan chiūⁿ soaⁿ-téng; nā-sī Iâ-hô-hoa ê iok-kūi kap Mô͘-se bô chhut-iâⁿ.

(BCL) 總是自專上山頂，若是耶和華的約櫃及摩西無出營。

45

(THR) Tùi án-ni A-má-le̍k lâng, kap Ka-lâm lâng, khiā-khí tī soaⁿ-nı̍h ê, lóng lo̍h-lâi kong-kek in, phah-pāi in, kàu tī Hô-jíⁿ-má.

(BCL) 對按呢亞瑪力人及迦南人徛起佇山裡的攏落來攻擊拍敗，到佇何珥瑪。

Bible Color Mark

• 台語漢字羅馬本
• 巴克禮全羅