民數記 第 12 章

1

(THR) Bí-lī-àm kap A-lûn hiâm Mô͘-se, ūi-tio̍h i só͘ chhōa Kó͘-sı̍t ê cha-bó͘-kiáⁿ; in-ūi Mô͘-se bat chhōa Kó͘-sı̍t lâng ê cha-bó͘-kiáⁿ chòe bó͘.

(BCL) 米利暗及亞倫嫌摩西為著伊所娶古實的查某子。因為摩西曾娶古實人的查某子做某，講：

2

(THR) In kóng, Iâ-hô-hoa kiám toaⁿ-toaⁿ kap Mô͘-se kóng-ōe? Kiám iā bô kap góan kóng-ōe mah? Chit ê ōe Iâ-hô-hoa thiaⁿ-kìⁿ.

(BCL) 「耶和華豈單單及摩西講話，豈也無及阮講話嗎？」此個話耶和華聽見。（

3

(THR) Hit ê Mô͘-se chòe-lâng ke̍k-kî un-jiû, iâⁿ-kè sè-chiūⁿ ê chèng-lâng.

(BCL) 彼個摩西做人極其溫柔，贏過世上的眾人。）

4

(THR) Iâ-hô-hoa hut-jiân tùi Mô͘-se A-lûn Bí-lī-àm, kóng, Lín saⁿ-lâng chhut-lâi kàu hōe-bō͘ chia; in saⁿ-lâng chiū chhut-lâi.

(BCL) 耶和華忽然對摩西、亞倫、米利暗講：「恁三人出來，到會幕遮。」三人就出來。

5

(THR) Iâ-hô-hoa tī hûn-thiāu-tiong kàng-lîm, khiā tī Pò͘-pîⁿ mn̂g-kháu, tiàu A-lûn kap Bí-lī-àm; in nn̄g lâng chiū chhut-lâi.

(BCL) 耶和華佇雲柱中降臨，徛佇布棚門口，召亞倫及米利暗，二人就出來。

6

(THR) I kóng, Tio̍h thiaⁿ Góa ê ōe; lín tiong-kan nā ū sian-ti, Góa Iâ-hô-hoa beh ēng īⁿ-siōng hō͘ in bat Góa, tī bîn-bāng-tiong kap in kóng-ōe.

(BCL) 伊講：「著聽我的話：恁中間若有先知，我──耶和華欲用異象互識我，佇眠夢中及講話。

7

(THR) Góa ê lô͘-po̍k Mô͘-se m̄-sī án-ni; i chīn-tiong tī Góa ê chôan-ke.

(BCL) 我的奴僕摩西呣是按呢；伊盡忠佇我的全家。

8

(THR) Góa beh bīn tùi bīn kap i kóng-ōe, chiū-sī bêng-bêng kóng, bô ēng chhai-gú; koh i beh khòaⁿ-kìⁿ Iâ-hô-hoa ê hêng-iông; lín hiâm Góa ê lô͘-po̍k Mô͘-se, siáⁿ-sū bô kiaⁿ ah?

(BCL) 我欲面對面及伊講話，就是明明講，無用猜語，閣伊欲看見耶和華的形容。恁嫌我的奴僕摩西，啥事無驚啊？」

9

(THR) Iâ-hô-hoa siū-khì in, chiū khì.

(BCL) 耶和華受氣就去。

10

(THR) Hûn tùi Pò͘-pîⁿ-téng sóa-khui; khòaⁿ ah, Bí-lī-àm thái-ko chhin-chhiūⁿ seh. A-lûn khòaⁿ Bí-lī-àm, khòaⁿ ah, i sī thái-ko.

(BCL) 雲對布棚頂徙開，看啊，米利暗癩親像雪。亞倫看米利暗，看啊，伊是癩，

11

(THR) A-lûn tùi Mô͘-se kóng, Góa ê chú ah, kiû lí bo̍h-tit in-ūi góan ê gû-gōng hōan-chōe, chiong chit ê chōe kui tī góan.

(BCL) 亞倫對摩西講：「我的主啊，求你莫得因為阮的愚戇犯罪，將此個罪歸佇阮。

12

(THR) Kiû lí m̄-thang hō͘ i chhin-chhiūⁿ í-keng sí, chiah tùi lāu-bú ê thai chhut, bah í-keng nōa chı̍t-pòaⁿ.

(BCL) 求你呣通互伊親像已經死，才對老母的胎出、肉已經爛一半。」

13

(THR) Mô͘-se chiū ai-kiû Iâ-hô-hoa kóng, Siōng-tè ah, kiû Lí i-hó i.

(BCL) 摩西就哀求耶和華講：「上帝啊，求你醫好伊！」

14

(THR) Iâ-hô-hoa tùi Mô͘-se kóng, Siat-sú i ê lāu-pē phùi-nōa tī i ê bīn, i kiám bô kiàn-siàu chhit-jı̍t mah? Taⁿ tio̍h kā i koaiⁿ tī iâⁿ-gōa chhit-jı̍t, jiân-āu chiah thang chhōa i jı̍p-lâi.

(BCL) 耶和華對摩西講：「設使伊的老父呸涎佇伊的面，伊豈無見誚七日嗎？今著給伊關佇營外七日，然後才通導伊入來。」

15

(THR) Tùi án-ni koaiⁿ Bí-lī-àm tī iâⁿ-gōa chhit-jı̍t; peh-sìⁿ bô khí-sin, thèng-hāu Bí-lī-àm koh jı̍p-lâi.

(BCL) 對按呢關米利暗佇營外七日。百姓無起身，聽候米利暗閣入來。

16

(THR) Āu-lâi peh-sìⁿ tùi Hap-sé-lio̍k khí-sin, tī Pa-lân ê khòng-iá an-iâⁿ.

(BCL) 後來百姓對哈洗錄起身，佇巴蘭的曠野安營。

Bible Color Mark

• 台語漢字羅馬本
• 巴克禮全羅