馬太福音 第 9 章

1

(THR) Iâ-so͘ lo̍h chûn kè hái, khì kàu I ê pún siâⁿ.

(BCL) 耶穌落船，過海，去到伊的本城。

2

(THR) Tú-tn̄g ū lâng kng chı̍t ê piàn-sūi ê tó tī pho͘-á-nı̍h lâi chiū-kūn I; Iâ-so͘ khòaⁿ-kìⁿ in ê sìn, chiū kā piàn-sūi ê kóng, Kiáⁿ ah, chòe lí an-sim, lí ê chōe sià lah.

(BCL) 抵當有人扛一個半　者倒佇舖仔裡來就近伊。耶穌看見的信，就給半　者講：「子啊，做你安心！你的罪赦啦。」

3

(THR) Ū keng-ha̍k-sū kúi-nā lâng sim-lāi kóng, Chit lâng chhiàm-kôan lām-sám kóng.

(BCL) 有經學士幾若人心內講：「此人僭權濫糝講。」

4

(THR) Iâ-so͘ chai in ê sim-ì, chiū kóng, Lín siáⁿ-sū sim-lāi khǹg pháiⁿ ì-sù ah?

(BCL) 耶穌知的心意，就講：「恁啥事心內囥歹意思啊？

5

(THR) Kóng, Lí ê chōe sià, á-sī kóng, Khí-lâi kiâⁿ, tá-lo̍h chı̍t hāng khah khòai?

(BCL) 講『你的罪赦』，抑是講『起來行』，叨落一項卡快？

6

(THR) Chóng-sī beh hō͘ lín chai, Jîn-chú tī tōe-nı̍h ū kôan thang sià chōe, chiū kā piàn-sūi ê kóng, Khí-lâi, giâ lí ê pho͘-á, tò-khì lí ê chhù.

(BCL) 總是欲互恁知，人子佇地裡有權通赦罪」；就給半　者講：「起來！夯你的舖仔倒去你的厝。」

7

(THR) I chiū khí-lâi, tò-khì i ê chhù.

(BCL) 伊就起來，倒去伊的厝。

8

(THR) Chèng lâng khòaⁿ-kìⁿ chiū kiaⁿ; kui êng-kng Siōng-tè, chiū-sī ēng chit hō kôan hō͘ lâng ê.

(BCL) 眾人看見就驚，歸榮光上帝，就是用此號權互人的。

9

(THR) Iâ-so͘ tùi hia keng-kè, khòaⁿ-kìⁿ chı̍t lâng, miâ Má-thài, chē tī hiòng-koan; chiū kā i kóng, Tè góa; i chiū khí-lâi tè I.

(BCL) 耶穌對遐經過，看見一人名馬太，坐佇餉關；就給伊講：「隨我。」伊就起來隨伊。

10

(THR) Iâ-so͘ chē toh tī i ê chhù, ū chōe-chōe thiu-hiòng ê kap pháiⁿ lâng lâi, kap Iâ-so͘ chham I ê ha̍k-seng tâng chē.

(BCL) 耶穌坐桌佇伊的厝，有多多抽餉者及歹人來，及耶穌參伊的學生同坐。

11

(THR) Hoat-lī-sài lâng khòaⁿ-kìⁿ, kā I ê ha̍k-seng kóng, Lín sian-siⁿ siáⁿ-sū kap thiu-hiòng ê í-kı̍p pháiⁿ lâng saⁿ-kap chia̍h?

(BCL) 法利賽人看見，給伊的學生講：「恁先生啥事及抽餉者以及歹人相及食？」

12

(THR) Iâ-so͘ thiaⁿ-kìⁿ chiū kóng, Ióng-kiāⁿ ê lâng bô khiàm-ēng i-seng, to̍k-to̍k phòa-pīⁿ ê chiū tio̍h.

(BCL) 耶穌聽見，就講：「勇健的人無欠用醫生，獨獨破病的就著。

13

(THR) Chóng-sī, Góa ài lîn-bín, m̄ ài chè-sū, chit kù sím-mı̍h ì-gī, lín tio̍h khì o̍h. In-ūi góa lâi m̄ sī beh chio gī lâng, sī beh chio pháiⁿ lâng.

(BCL) 總是，『我愛憐憫，呣愛祭祀。』此句甚麼意義，恁著去學。因為我來呣是欲招義人，是欲招歹人。」

14

(THR) Hit sî Iok-hān ê ha̍k-seng chiū-kūn I kóng, Góan kap Hoat-lī-sài lâng ta̍uh-ta̍uh kìm-chia̍h, nā-sī lí ê ha̍k-seng bô kìm-chia̍h, sī cháiⁿ-iūⁿ?

(BCL) 彼時，約翰的學生就近伊，講：「阮及法利賽人沓沓禁食，若是你的學生無禁食，是怎樣？」

15

(THR) Iâ-so͘ kā in kóng, Sin-kiáⁿ-sài kap hō-chhōa ê lâng saⁿ-kap tī-teh, hō-chhōa ê lâng kiám ōe ai-siong mah? to̍k-to̍k sî-jı̍t beh kàu, sin-kiáⁿ-sài tùi in tiong-kan bô--khì, hit sî in chiū beh kìm-chia̍h.

(BCL) 耶穌給講：「新子婿及賀娶的人相及佇，賀娶的人豈會哀傷嗎？獨獨時日欲到，新子婿對中間無去，彼時就欲禁食。

16

(THR) Bô lâng ēng sin pò͘ pó͘ kū saⁿ; in-ūi só͘ pó͘ ê hit tè, ōe kiù-lı̍h hit niá saⁿ, i ê phòa-khang koh khah tōa.

(BCL) 無人用新布補舊衫；因為所補的彼塊會糾裂彼領衫，伊的破孔閣卡大。

17

(THR) Lâng iā bô ēng sin chiú tóe tī kū phê-lông; nā sī ū, chiū lông lı̍h, chiú lāu, lông ia̍h sòa pháiⁿ; to̍k-to̍k ēng sin chiú tóe tī sin phê-lông, chiū nn̄g hāng lóng pó-chôan.

(BCL) 人也無用新酒貯佇舊皮囊；若是有，就囊裂，酒漏，囊亦續歹。獨獨用新酒貯佇新皮囊，就二項攏保全。」

18

(THR) Kóng chiah ê ōe ê sî, tú-tn̄g ū chı̍t ê koaⁿ lâi pài I kóng, Góa ê cha-bó͘-kiáⁿ tú-á sí, chóng-sī lí lâi ēng chhiú bong i, i chiū ōe o̍ah.

(BCL) 講諸個話的時，抵當有一個官來拜伊，講：「我的查某子抵仔死，總是你來用手摸伊，伊就會活。」

19

(THR) Iâ-so͘ khí-lâi tè i khì, I ê ha̍k-seng ia̍h khì.

(BCL) 耶穌起來隨伊去；伊的學生亦去。

20

(THR) Tú-tn̄g ū chı̍t ê hū-jîn-lâng, hiat-lāu cha̍p-jī nî, kiâⁿ óa I ê ka-chiah-āu, bong I saⁿ-á-ku ê chhiu;

(BCL) 抵當有一個婦仁人，血漏十二年，行倚伊的尻脊後，摸伊衫仔裾的鬚；

21

(THR) in-ūi i sim-lāi phah-sǹg kóng, Góa kan-ta bong I ê saⁿ, chiū ōe hó.

(BCL) 因為伊心內拍算講：「我干單摸伊的衫，就會好。」

22

(THR) Iâ-so͘ o̍at-tńg-sin, khòaⁿ i chiū kóng, Hū-jîn-lâng ah, chòe lí an-sim, lí ê sìn hō͘ lí hó lah; tùi hit sî hū-jîn-lâng chiū hó.

(BCL) 耶穌越轉身，看伊，就講：「婦仁人啊，做你安心！你的信互你好啦。」對彼時，婦仁人就好。

23

(THR) Iâ-so͘ kàu hit ê koaⁿ ê chhù, khòaⁿ-kìⁿ pûn ta̍t-á ê, iā ū chèng lâng teh khàu;

(BCL) 耶穌到彼個官的厝，看見歕笛仔的，也有眾人哭，

24

(THR) chiū kóng, Thè-khì, in-ūi cha-bó͘ gín-ná m̄ sī sí, sī teh khùn. In chiū léng-chhiò I.

(BCL) 就講：「退去！因為查某囝仔呣是死，是睏。」就冷笑伊。

25

(THR) Í-keng kóaⁿ chèng lâng chhut, chiū jı̍p-khì, khan i ê chhiú; cha-bó͘ gín-ná chiū khí-lâi.

(BCL) 已經趕眾人出，就入去，牽伊的手，查某囝仔就起來。

26

(THR) Chit ê hong-siaⁿ piàn thôan tī hit ê tōe-hng.

(BCL) 此個風聲遍傳佇彼個地方。

27

(THR) Iâ-so͘ tùi hia keng-kè, ū nn̄g ê chhiⁿ-mî lâng tè I, kiò kóng, Tāi-pı̍t ê hō͘-è, lîn-bín góan.

(BCL) 耶穌對遐經過，有二個睛暝人隨伊，叫講：「大衛的後裔，憐憫阮！」

28

(THR) Í-keng jı̍p chhù, chhiⁿ-mî lâng chiū-kūn I. Iâ-so͘ kā in kóng, Lín sìn góa ōe chòe chit ê sū mah? Ìn kóng, Chú ah, ū.

(BCL) 已經入厝，睛暝人就近伊。耶穌給講：「恁信我會做此個事嗎？」應講：「主啊，有。」

29

(THR) I chiū bong in ê ba̍k-chiu kóng, chiàu lín ê sìn, kā lín chòe chiâⁿ.

(BCL) 伊就摸的目睭，講：「照恁的信給恁做成。」

30

(THR) In ê ba̍k-chiu chiū khui. Iâ-so͘ giâm-giâm hoan-hù in kóng, Kín-sīn bo̍h-tit hō͘ lâng chai.

(BCL) 的目睭就開。耶穌嚴嚴吩咐講：「謹慎，莫得互人知。」

31

(THR) Nā-sī in chhut-khì, piàn thôan I ê miâ tī hit tōe-hng.

(BCL) 若是出去，遍傳伊的名佇彼地方。

32

(THR) In chhut-khì ê sî, tú-tn̄g ū lâng chhōa chı̍t ê é-káu hōan-tio̍h kúi ê lâi chiū-kūn Iâ-so͘.

(BCL) 出去的時，抵當有人導一個啞口患著鬼者來就近耶穌。

33

(THR) Kúi í-keng kóaⁿ chhut, é-káu ê chiū kóng ōe; hiah ê chèng lâng lóng kî-kòai kóng, Í-sek-lia̍t tiong bē bat khòaⁿ-kìⁿ án-ni.

(BCL) 鬼已經趕出，啞口者就講話。許個眾人攏奇怪，講：「以色列中，未曾看見按呢。」

34

(THR) Nā-sī Hoat-lī-sài lâng kóng, I óa-khò kúi-ông lâi kóaⁿ kúi.

(BCL) 若是法利賽人講：「伊倚靠鬼王來趕鬼。」

35

(THR) Iâ-so͘ piàn kiâⁿ chiah ê siâⁿ chiah ê hiuⁿ-siā, tī in ê hōe-tn̂g kà-sī lâng, thôan thian-kok ê hok-im, i-hó ta̍k iūⁿ ê chèng-thâu, ta̍k iūⁿ ê pīⁿ-thiàⁿ.

(BCL) 耶穌遍行諸個城諸個鄉社，佇的會堂教示人，傳天國的福音，醫好逐樣的症頭逐樣的病疼。

36

(THR) I khòaⁿ-kìⁿ hiah ê chèng lâng, chiū khó-lîn in; in-ūi in khùn-khó͘ sì-sòaⁿ, chhin-chhiūⁿ iûⁿ bô bo̍k-chiá.

(BCL) 伊看見許個眾人，就可憐；因為困苦四散，親像羊無牧者。

37

(THR) Tùi án-ni chiū kā I ê ha̍k-seng kóng,

(BCL) 對按呢就給伊的學生講：「通收成的是多，做工者是少。

38

(THR) Thang siu-sêng ê sī chōe, chòe kang ê sī chió; só͘-í lín tio̍h kiû hn̂g Chú pek kang khì kā I siu-sêng.

(BCL) 所以，恁著求園主迫工去給伊收成。」

Bible Color Mark

• 台語漢字羅馬本
• 巴克禮全羅