馬太福音 第 6 章

1

(THR) Kín-sīn bo̍h-tit tī lâng ê bīn-chêng kiâⁿ lín ê gī, kò͘-ì hō͘ in khòaⁿ-kìⁿ; nā án-ni, chiū bô tit-tio̍h pò-siúⁿ tī lín thiⁿ-nı̍h ê Pē.

(BCL) 「謹慎，莫得佇人的面前行恁的義，故意互看見，若按呢，就無得著報賞佇恁天裡的父。

2

(THR) Só͘-í chín-chè ê sî, bo̍h-tit tī lí ê bīn-chêng pûn hō-thâu, chhin-chhiūⁿ ké-hó ê lâng tī hōe-tn̂g kap koe-lō͘ só͘ chòe ê, ài lâng êng-kng in. Góa sı̍t-chāi kā lín kóng, In í-keng siū-tio̍h in ê pò-siúⁿ lah.

(BCL) 所以，你賑濟的時，莫得佇你的面前歕號頭，親像假好的人佇會堂及街路所做的，愛人榮光。我實在給恁講，已經受著的報賞啦。

3

(THR) To̍k-to̍k lí chín-chè ê sî, bo̍h-tit hō͘ lí ê tò-chhiú chai lí ê chiàⁿ-chhiú ê só͘ chòe;

(BCL) 獨獨你賑濟的時，莫得互你的倒手知你的正手的所做，

4

(THR) hō͘ lí ê chín-chè ún-ba̍t; chiū lí ê Pē, kàm-chhat tī ún-ba̍t ê, beh pò-tap lí.

(BCL) 互你的賑濟隱密。就你的父鑑察佇隱密的，欲報答你。」

5

(THR) Lín kî-tó ê sî, bo̍h-tit chhin-chhiūⁿ ké-hó ê lâng; in-ūi in ài khiā tī hōe-tn̂g kap tōa koe-bīn ê oat-kak kî-tó, beh hō͘ lâng khòaⁿ-kìⁿ. Góa sı̍t-chāi kā lín kóng, In í-keng siū-tio̍h in ê pò-siúⁿ lah.

(BCL) 「恁祈禱的時，莫得親像假好的人，因為愛徛佇會堂及大街面的越角祈禱，欲互人看見。我實在給恁講，已經受著的報賞啦。

6

(THR) To̍k-to̍k lí kî-tó ê sî, tio̍h jı̍p lí ê ba̍t-pâng, koaiⁿ mn̂g, kiû lí ê Pē, tiàm tī ún-ba̍t ê; chiū lí ê Pē, kàm-chhat tī ún-ba̍t ê, beh pò-tap lí.

(BCL) 獨獨你祈禱的時，著入你的密房，關門，求你的父佇隱密的；就你的父鑑察佇隱密的，欲報答你。

7

(THR) Koh lín kî-tó ê sî, ōe bo̍h-tit ta̍uh-ta̍uh têng, chhin-chhiūⁿ gōa-pang lâng; in-ūi in phah-sǹg kóng chōe-chōe ōe, chiah tit-tio̍h thiaⁿ-kìⁿ.

(BCL) 閣恁祈禱的時，話莫得沓沓重，親像外邦人，因為拍算講多多話才得著聽見。

8

(THR) Só͘-í lín bo̍h-tit o̍h in; in-ūi lín bē kiû I ê tāi-seng, lín ê Pē í-keng chai lín só͘ khiàm-ēng ê.

(BCL) 所以恁莫得學；因為恁未求伊的代先，恁的父已經知恁所欠用的。

9

(THR) Só͘-í lín tio̍h án-ni kî-tó: Góan tī thiⁿ-nı̍h ê Pē, Gōan lí ê miâ sèng.

(BCL) 所以，恁著按呢祈禱：阮佇天裡的父；願你的名聖。

10

(THR) Lí ê kok lîm-kàu. Lí ê chí-ì tit chiâⁿ, tī tōe-nı̍h chhin-chhiūⁿ tī thiⁿ-nı̍h.

(BCL) 你的國臨到；你的旨意得成，佇地裡親像佇天裡。

11

(THR) Góan ê jı̍t-sı̍t, kin-á-jı̍t hō͘ góan.

(BCL) 阮的日食，今仔日互阮。

12

(THR) Sià-bián góan ê ko͘-hū, chhin-chhiūⁿ góan ia̍h ū sià-bián ko͘-hū góan ê lâng.

(BCL) 赦免阮的辜負，親像阮亦有赦免辜負阮的人。

13

(THR) Bo̍h-tit chhōa góan jı̍p tī chhì, tio̍h kiù góan thoat-lī hit ê pháiⁿ-ê.

(BCL) 莫得導阮入佇試；著救阮脫離彼個歹的。（有古卷加：因為國、權能、榮光，攏是你所有，代代無盡。阿們！）

14

(THR) In-ūi lín nā sià-bián lâng ê kè-sit, lín ê Thiⁿ Pē ia̍h beh sià-bián lín.

(BCL) 「因為恁若赦免人的過失，恁的天父亦欲赦免恁；

15

(THR) Lín nā bô sià-bián lâng ê kè-sit, lín ê Pē ia̍h bô beh sià-bián lín ê kè-sit.

(BCL) 恁若無赦免人的過失，恁的父亦無欲赦免恁的過失。」

16

(THR) Koh lín kìm-chia̍h ê sî, bo̍h-tit chhin-chhiūⁿ ké-hó ê lâng tài iu-iông; in-ūi in chiong in ê bīn pìⁿ pháiⁿ khòaⁿ, beh hō͘ lâng khòaⁿ-kìⁿ in teh kìm-chia̍h. Góa sı̍t-chāi kā lín kóng, In í-keng siū-tio̍h in ê pò-siúⁿ lah.

(BCL) 「閣恁禁食的時，莫得親像假好的人帶憂容；因為將的面變歹看，欲互人看見禁食。我實在給恁講，已經受著的報賞啦。

17

(THR) To̍k-to̍k lí kìm-chia̍h ê sî, tio̍h boah lí ê thâu, sóe lí ê bīn;

(BCL) 獨獨你禁食的時，著抹你的頭，洗你的面，

18

(THR) bô hō͘ lâng khòaⁿ-kìⁿ lí teh kìm-chia̍h, sī hō͘ lí tòa tī ún-ba̍t ê Pē khòaⁿ-kìⁿ; chiū lí ê Pē, kàm-chhat tī ún-ba̍t ê, beh pò-tap lí.

(BCL) 無互人看見你禁食，是互你住佇隱密的父看見；就你的父鑑察佇隱密的，欲報答你。」

19

(THR) Bo̍h-tit ūi-tio̍h ka-kī chek-chū châi-pó tī tōe-nı̍h, ū thâng kap sian phah-pháiⁿ, iā ū chha̍t iah khang thau-the̍h ê só͘-chāi.

(BCL) 「莫得為著家己積聚財寶佇地裡；有蟲及銹拍歹，也有賊挖孔偷提的所在。

20

(THR) To̍k-to̍k ūi-tio̍h ka-kī chek-chū châi-pó tī thiⁿ-nı̍h, thâng kap sian bô phah-pháiⁿ, iā bô chha̍t iah khang thau-the̍h ê só͘-chāi.

(BCL) 獨獨為著家己積聚財寶佇天裡；蟲及銹無拍歹，也無賊挖孔偷提的所在。

21

(THR) In-ūi lín ê châi-pó tī hia, lín ê sim iā beh tī hia.

(BCL) 因為恁的財寶佇遐，恁的心也欲佇遐。」

22

(THR) Seng-khu ê teng chiū-sī ba̍k-chiu; lí ê ba̍k-chiu nā kim, thong seng-khu chiū kng.

(BCL) 「身軀的燈就是目睭。你的目睭若金，通身軀就光；

23

(THR) Lí ê ba̍k-chiu nā hoe, thong seng-khu chiū àm. Lí lāi-bīn ê kng nā àm, hit ê àm jōa tōa ah!

(BCL) 你的目睭若花，通身軀就暗。你內面的光若暗，彼個暗偌大啊！」

24

(THR) Bô lâng ōe ho̍k-sāi nn̄g ê chú-lâng; in-ūi i ōe òan-hūn chit-ê, thiàⁿ hit-ê; á-sī ōe tùi-tiōng chit-ê, khòaⁿ-khin hit-ê; lín bōe-ōe ho̍k-sāi Siōng-tè sòa ho̍k-sāi chîⁿ-châi.

(BCL) 「無人會服事二個主人；因為伊會怨恨此個，疼彼個，抑是會對重此個，看輕彼個，恁會服事上帝，續服事錢財。」

25

(THR) Só͘-í góa kā lín kóng, Bo̍h-tit khòa-lū lín ê sìⁿ-miā beh chia̍h sím-mı̍h, beh lim sím-mı̍h, á-sī lín ê seng-khu beh chhēng sím-mı̍h. Lín ê sìⁿ-miā kiám bô khah tōa tī bí-niû, iā lín ê seng-khu kiám bô khah tōa tī i-chiûⁿ mah?

(BCL) 「所以我給恁講，莫得掛慮恁的生命欲食甚麼，欲飲甚麼；抑是恁的身軀欲穿甚麼，恁的生命豈無卡大佇米糧？也恁的身軀豈無卡大佇衣裳嗎？

26

(THR) Chhì-khòaⁿ thiⁿ-tiong ê pe-chiáu, bô chèng-choh, bô siu-sêng, bô chek-chū tī chhek-chhng, lín ê Thiⁿ Pē iā teh chhī in. Lín kiám bô pí hiah-ê khah kùi-khì mah?

(BCL) 試看天中的飛鳥，無種作，無收成，無積聚佇粟倉，恁的天父也飼。恁豈無比許個卡貴氣嗎？

27

(THR) Lín sím-mı̍h lâng ōe ēng khòa-lū hō͘ sìⁿ-miā khah tn̂g chı̍t khek kú?

(BCL) 恁甚麼人會用掛慮互生命卡長一刻久？

28

(THR) Siáⁿ-sū ūi-tio̍h i-chiûⁿ khòa-lū ah? Chhì-siūⁿ soaⁿ-nı̍h ê pek-ha̍p-hoe, cháiⁿ-iūⁿ tōa châng; in bô tio̍h-bôa, bô pháng cheh;

(BCL) 啥事為著衣裳掛慮啊？試想山裡的百合花怎樣大欉；無著磨，無紡織。

29

(THR) nā-sī góa kā lín kóng, tng Só͘-lô-bûn ke̍k hâng-ngó͘ ê sî, i só͘ chhēng ê m̄ ta̍t-tio̍h chit hō hoe ê chı̍t lúi.

(BCL) 若是我給恁講，當所羅門極行伍的時，伊所穿的，呣值著此號花的一蕊！

30

(THR) Taⁿ soaⁿ-nı̍h ê chháu, kin-á-jı̍t tī-teh, bîn-á-jı̍t hiat tī hé-lô͘, Siōng-tè hō͘ i chhēng kàu án-ni, hô-hòng lín, sió-sìn ê lâng ah?

(BCL) 今山裡的草今仔日佇，明仔日佇火爐，上帝互伊穿到按呢，何況恁，小信的人啊！

31

(THR) Só͘-í bo̍h-tit khòa-lū kóng, Góan beh chia̍h sím-mı̍h? Beh lim sím-mı̍h? Beh chhēng sím-mı̍h?

(BCL) 所以，莫得掛慮講，阮欲食甚麼？欲飲甚麼？欲穿甚麼？

32

(THR) In-ūi chiah-ê lóng sī gōa-pang lâng só͘ kiû ê; lín ê Thiⁿ Pē iā chai chiah-ê lóng sī lín khiàm-ēng ê.

(BCL) 因為諸個攏是外邦人所求的。恁的天父也知，諸個攏是恁欠用的。

33

(THR) To̍k-to̍k tāi-seng kiû I ê kok kap I ê gī, chiū chiah ê mı̍h lóng beh sòa hō͘ lín.

(BCL) 獨獨代先求伊的國及伊的義，就諸個物攏欲續互恁。

34

(THR) Só͘-í bo̍h-tit ūi-tio̍h bîn-á-jı̍t khòa-lū; in-ūi hit ê bîn-á-jı̍t, i beh ka-kī khòa-lū. Chı̍t jı̍t ê kan-khó͘ tī chı̍t jı̍t kàu-gia̍h.

(BCL) 所以，莫得為著明仔日掛慮，因為彼個明仔日伊欲家己掛慮；一日的艱苦佇一日夠額。」

Bible Color Mark

• 台語漢字羅馬本
• 巴克禮全羅