馬太福音 第 4 章

1

(THR) Hit sî Iâ-so͘ hō͘ Sèng Sîn chhōa kàu khòng-iá, beh siū Mô͘-kúi chhì.

(BCL) 彼時，耶穌互聖神導到曠野，欲受魔鬼試。

2

(THR) Í-keng kìm-chia̍h sì-cha̍p jı̍t-mî, āu-lâi chiū iau.

(BCL) 已經禁食四十日暝，後來就枵。

3

(THR) Chhì-ê óa-lâi kā I kóng, Lí nā sī Siōng-tè ê Kiáⁿ, chiū kah chiah ê chio̍h pìⁿ chòe piáⁿ. Nā-sī I ìn kóng,

(BCL) 試者倚來給伊講：「你若是上帝的子，就教諸個石變做餅。」

4

(THR) Ū kì-chài kóng, Lâng ê o̍ah, m̄ nā óa-khò piáⁿ, chiū-sī óa-khò tùi Siōng-tè ê chhùi só͘ chhut lóng-chóng ê ōe.

(BCL) 若是伊應講：「有記載講：人的活，呣若倚靠餅，就是倚靠對上帝的嘴所出攏總的話。」

5

(THR) Mô͘-kúi chiū chhōa I kàu sèng siâⁿ, hō͘ I khiā tī tiān ê bé-liu, kā I kóng,

(BCL) 魔鬼就導伊到聖城，互伊徛佇殿的尾溜，

6

(THR) Lí nā sī Siōng-tè ê Kiáⁿ, tio̍h ka-kī tiô-lo̍h-khì; in-ūi ū kì-chài kóng, I beh ūi-tio̍h lí bēng-lēng I ê thiⁿ-sài, In beh ēng chhiú hû lí, Bián-tit lí ê kha tak-tio̍h chio̍h.

(BCL) 給伊講：「你若是上帝的子，著家己趒落去，因為有記載講：伊欲為著你命令伊的天使，欲用手扶你，免得你的腳觸著石。」

7

(THR) Iâ-so͘ kā i kóng, Koh ū kì-chài kóng, Bo̍h-tit chhì Chú lí ê Siōng-tè.

(BCL) 耶穌給伊講：「閣有記載講：『莫得試主──你的上帝。』」

8

(THR) Mô͘-kúi koh chhōa I chiūⁿ ke̍k kôaiⁿ ê soaⁿ, ēng thiⁿ-ē bān kok kap in ê êng-kng hō͘ I khòaⁿ;

(BCL) 魔鬼閣導伊上極高的山，用天下萬國及的榮光互伊看，

9

(THR) kā I kóng, Lí nā phak-lo̍h pài góa, chiah-ê góa lóng hō͘ lí.

(BCL) 給伊講：「你若仆落拜我，諸個我攏互你。」

10

(THR) Iâ-so͘ chiū kā i kóng, Sat-tàn, thè-khì; in-ūi ū kì-chài kóng, Tio̍h pài Chú, lí ê Siōng-tè; to̍k-to̍k ho̍k-sāi I nā-tiāⁿ.

(BCL) 耶穌就給伊講：「撒但，退去！因為有記載講：著拜主──你的上帝，獨獨服事伊若定。」

11

(THR) Tùi án-ni Mô͘-kúi lī-khui I; ū thiⁿ-sài kàu, lâi su-hāu I.

(BCL) 對按呢，魔鬼離開伊，有天使到來伺候伊。

12

(THR) Iâ-so͘ thiaⁿ-kìⁿ Iok-hān koaiⁿ-kaⁿ, chiū thè-khì Ka-lī-lī;

(BCL) 耶穌聽見約翰關監，就退去加利利；

13

(THR) lī-khui Ná-sat-le̍k, khì Ka-pek-lông khiā-khí; chit só͘-chāi tī hái-piⁿ, tī Se-pò͘-lûn kap La̍p-tāi-lī ê kau-kài;

(BCL) 離開拿撒勒，去迦百農徛起。此所在佇海邊，佇西布倫及拉大利的交界。

14

(THR) sī beh èng-giām chá thok sian-ti Í-sài-a só͘ kóng ê, kóng,

(BCL) 是欲應驗早託先知以賽亞所講的，

15

(THR) Se-pò͘-lûn ê tōe, La̍p-tāi-lī ê tōe, Iân hái-kîⁿ ê lō͘, Iok-tàn ê hô gōa, Gōa-pang ê Ka-lī-lī;

(BCL) 講：西布倫的地，拉大利的地，沿海墘的路，約但的河外，外邦的加利利──

16

(THR) Chē tī o͘-àm ê peh-sìⁿ, Bat khòaⁿ-kìⁿ tōa kng; Chē tī sí-ìm ê tōe ê, Ū kng khí-lâi chiò in.

(BCL) 坐佇黑暗的百姓曾看見大光；坐佇死蔭的地的有光起來照。

17

(THR) Tùi hit sî Iâ-so͘ khí-thâu soan-thôan kóng, Lín tio̍h hóan-hóe, in-ūi thian-kok kūn lah.

(BCL) 對彼時，耶穌起頭宣傳，講：「恁著反悔，因為天國近啦！」

18

(THR) Iâ-so͘ kiâⁿ tī Ka-lī-lī ê hái-kîⁿ; khòaⁿ-kìⁿ nn̄g ê hiaⁿ-tī-á, chiū-sī Se-bûn, kiò chòe Pí-tek, kap i ê hiaⁿ-tī An-tek-lia̍t, pha bāng tī hái-nı̍h, in-ūi sī thó-hî lâng.

(BCL) 耶穌行佇加利利的海墘，看見二個兄弟仔，就是西門叫做彼得及伊的兄弟安得烈，拋網佇海裡；因為是討漁人。

19

(THR) I chiū kā in kóng, Lâi tè góa, góa beh hō͘ lín tit-tio̍h lâng chhin-chhiūⁿ thó-hî ê.

(BCL) 伊就給講：「來隨我，我欲互恁得著人親像討魚的。」

20

(THR) In liâm-piⁿ lī-khui bāng lâi tè I.

(BCL) 連鞭離開網，來隨伊。

21

(THR) Tùi chia chìn-chêng, koh khòaⁿ-kìⁿ nn̄g ê hiaⁿ-tī-á, chiū-sī Se-pí-thài ê kiáⁿ Ngá-kok kap i ê hiaⁿ-tī Iok-hān, kap in lāu-pē Se-pí-thài tī chûn-nı̍h teh pó͘ bāng; Iâ-so͘ chio in.

(BCL) 對遮進前，閣看見二個兄弟仔，就是西庇太的子雅各及伊的兄弟約翰，及老父西庇太佇船裡補網，耶穌招，

22

(THR) In liâm-piⁿ lī-khui chûn, pài-pia̍t in ê lāu-pē, lâi tè I.

(BCL) 連鞭離開船，拜別的老父，來隨伊。

23

(THR) Iâ-so͘ piàn kiâⁿ Ka-lī-lī, tī in ê hōe-tn̂g kà-sī, soan-thôan thian-kok ê hok-im, i-hó peh-sìⁿ-kan ta̍k iūⁿ ê chèng-thâu, kap ta̍k iūⁿ ê pīⁿ-thiàⁿ.

(BCL) 耶穌遍行加利利，佇的會堂教示，宣傳天國的福音，醫好百姓間逐樣的症頭及逐樣的病疼。

24

(THR) I ê miâ-siaⁿ pò-iông kàu thong Sū-lī-a; hōan ū tì pīⁿ ê, tú-tio̍h chōe-chōe iūⁿ ê chèng-thâu kap thàng-thiàⁿ ê, hōan-tio̍h kúi ê, iûⁿ-hîn ê, piàn-sūi ê, chhōa in lóng lâi chiū-kūn I, I chiū i-hó in.

(BCL) 伊的名聲報揚到通敘利亞。凡有致病的，抵著多多樣的症頭及痛疼的、患著鬼的、羊眩的、半　的，導攏來就近伊，伊就醫好。

25

(THR) Hit sî, tùi Ka-lī-lī, Te-ka-pho-lī, Iâ-lō͘-sat-léng, Iû-thài, kap Iok-tàn gōa, ū chōe-chōe tīn ê lâng lâi tè I.

(BCL) 彼時，對加利利、低加波里、耶路撒冷、猶太，及約但外，有多多陣的人來隨伊。

Bible Color Mark

• 台語漢字羅馬本
• 巴克禮全羅