馬太福音 第 26 章

1

(THR) Iâ-so͘ kóng chiah ê ōe soah, chiū kā I ê ha̍k-seng kóng,

(BCL) 耶穌講諸個話息，就給伊的學生講：

2

(THR) Lín chai kè nn̄g jı̍t pôaⁿ-kè-choeh chiū kàu, Jîn-chú tú-tio̍h kè/2-sàng khì tèng sı̍p-jī-kè.

(BCL) 「恁知，過二日過節就到，人子抵著解送，去釘十字架。」

3

(THR) Hit sî hiah ê chè-si-thâu kap peh-sìⁿ ê tiúⁿ-ló chū-chı̍p tī chè-si-thâu, miâ Kai-a-hoat ê īⁿ,

(BCL) 彼時許個祭司頭及百姓的長老聚集佇祭司頭名該亞法的院。

4

(THR) saⁿ-kap chham-siông ēng khúi-khiat ê kè lia̍h Iâ-so͘ lâi thâi I.

(BCL) 相及參詳用詭譎的計掠耶穌，來伊。

5

(THR) Chóng-sī kóng, Tng choeh-kî m̄-thang, kiaⁿ-liáu peh-sìⁿ ê tiong-kan ū jiáu-lōan.

(BCL) 總是講：「當節期呣通，驚了百姓的中間有擾亂。」

6

(THR) Iâ-so͘ tī Pek-tāi-nî, thái-ko Se-bûn ê chhù,

(BCL) 耶穌佇伯大尼癩西門的厝，

7

(THR) ū hū-jîn-lâng tòa ge̍k-pân, lāi-bīn tóe ke̍k kùi-khì ê hiuⁿ-iû, chiū-kūn I, tng I chē toh ê sî piàⁿ tī I thâu-khak téng.

(BCL) 有婦仁人帶玉瓶，內面貯極貴氣的香油就近伊，當伊坐桌的時，傾佇伊頭殼頂。

8

(THR) Ha̍k-seng khòaⁿ-kìⁿ chiū siū-khì, kóng, Án-ni phòa-hùi ū siáⁿ lō͘-ēng?

(BCL) 學生看見就受氣，講：「按呢破費有啥路用！

9

(THR) In-ūi chit ê iû ōe bōe-tit chōe-chōe gûn, lâi hō͘ sòng-hiong lâng.

(BCL) 因為此個油會賣得多多銀，來互喪鄉人。」

10

(THR) Iâ-so͘ chai chiū kā in kóng, Lín siáⁿ-sū thiau-lân chit ê hū-jîn-lâng ah? in-ūi i só͘ kiâⁿ lâi khóan-thāi góa ê sī hó sū.

(BCL) 耶穌知，就給講：「恁啥事刁難此個婦仁人啊？因為伊所行來款待我的是好事。

11

(THR) In-ūi siông-siông ū sòng-hiong lâng kap lín tī-teh, nā-sī góa bô siông-siông kap lín tī-teh.

(BCL) 因為常常有喪鄉人及恁佇；若是我無常常及恁佇。

12

(THR) In-ūi i tò chit ê iû tī góa seng-khu, chiū-sī pī-pān góa bâi-chòng lâi kiâⁿ ê.

(BCL) 因為伊倒此個油佇我身軀，就是備辦我埋葬來行的。

13

(THR) Góa sı̍t-chāi kā lín kóng, Phó͘ thiⁿ-ē, bô lūn sím-mı̍h só͘-chāi thôan chit ê hok-im, iā beh kóng-khí chit ê hū-jîn-lâng só͘ kiâⁿ, lâi kì-liām i.

(BCL) 我實在給恁講，普天下，無論甚麼所在傳此個福音，也欲講起此個婦仁人所行，來紀念伊。」

14

(THR) Hit sî cha̍p-jī ê ha̍k-seng chı̍t-ê, miâ chòe Ka-lio̍k lâng Iû-tāi, khì kìⁿ hiah ê chè-si-thâu,

(BCL) 彼時，十二個學生一個名做加略人猶大，去見許個祭司頭，講：

15

(THR) kóng, Lín beh hō͘ góa jōa chōe, góa beh chiong I kau hō͘ lín? In chiū kap i iok, hō͘ i gûn saⁿ-cha̍p.

(BCL) 「恁欲互我偌多？我欲將伊交互恁。」就及伊約互伊銀三十。

16

(THR) Tùi hit sî i chhē ki-hōe chiong Iâ-so͘ kau hō͘ in.

(BCL) 對彼時，伊尋機會將耶穌交互。

17

(THR) Tû-kàⁿ-choeh ê thâu-chı̍t jı̍t, ha̍k-seng chiū-kūn Iâ-so͘ kóng, Ài góan tī sím-mı̍h só͘-chāi kā lí pī-pān chia̍h pôaⁿ-kè-choeh?

(BCL) 除酵節的頭一日，學生就近耶穌講：「愛阮佇甚麼所在給你備辦食過節？」

18

(THR) I kóng, Lín jı̍p siâⁿ chhē bó͘ lâng, kā i kóng, Sian-siⁿ kóng, Góa ê sî kūn lah; góa kap góa ê ha̍k-seng siú pôaⁿ-kè-choeh tī lí tau.

(BCL) 伊講：「恁入城，尋某人，給伊講：『先生講：我的時近啦，我及我的學生守過節佇你兜。』」

19

(THR) Ha̍k-seng chiàu Iâ-so͘ só͘ hoan-hù ê khì kiâⁿ: chiū pī-pān pôaⁿ-kè-choeh.

(BCL) 學生照耶穌所吩咐的去行，就備辦過節。

20

(THR) Kàu jı̍t àm Iâ-so͘ kap cha̍p-jī ê ha̍k-seng chē toh.

(BCL) 到日暗，耶穌及十二個學生坐桌。

21

(THR) Chia̍h ê sî, Iâ-so͘ kóng, Góa sı̍t-chāi kā lín kóng, lín tiong-kan chı̍t lâng beh bōe góa.

(BCL) 食的時，耶穌講：「我實在給恁講，恁中間一人欲賣我。」

22

(THR) Chèng lâng chin iu-būn, chı̍t-ê chı̍t-ê kā I kóng, Chú ah, chóng bô sī góa o͘h?

(BCL) 眾人真憂悶，一個一個給伊講：「主啊，總無是我哦？」

23

(THR) I ìn kóng, Kap góa chhun chhiú tī pôaⁿ-nı̍h ê, hit-ê beh bōe góa.

(BCL) 伊應講：「及我伸手佇盤裡者，彼個欲賣我。

24

(THR) Jîn-chú tò-khì chiàu só͘ kì-chài chí I ê ōe; nā-sī bōe Jîn-chú ê ū chai-ē ah! hit lâng bô chhut-sì khah hó.

(BCL) 人子倒去，照所記載指伊的話；若是賣人子的有災禍啊！彼人無出世卡好。」

25

(THR) Bōe I ê Iû-tāi kóng, Lia̍p-pí, chóng bô sī góa o͘h? Kā i kóng, Lí í-keng kóng lah.

(BCL) 賣伊的猶大講：「拉比，總無是我哦？」給伊講：「你已經講啦。」

26

(THR) In teh chia̍h ê sî, Iâ-so͘ the̍h piáⁿ, chiok-siā peh-phòa, pun hō͘ ha̍k-seng, kóng, The̍h-khì chia̍h; chit-ê sī góa ê seng-khu.

(BCL) 食的時，耶穌提餅，祝謝，擘破，分互學生，講：「提去食，此個是我的身軀」；

27

(THR) Koh phâng poe chiok-siā hō͘ in, kóng, Lín lóng tio̍h lim i;

(BCL) 閣捧杯，祝謝，互，講：「恁攏著飲伊；

28

(THR) chit-ê sī góa ê huih, chiū-sī bêng iok ê huih, ūi-tio̍h chōe-chōe lâng lâi lâu-chhut ê, tì-kàu chōe tit-tio̍h sià-bián.

(BCL) 此個是我的血就是盟約的血，為著多多人來流出的，致到罪得著赦免。

29

(THR) Nā-sī góa kā lín kóng, taⁿ liáu-āu góa bô lim chit ê phû-tô ê chiap, thèng-hāu hit jı̍t góa kap lín lim hit ê sin-ê tī góa ê Pē ê kok.

(BCL) 若是我給恁講，今了後，我無飲此個葡萄的汁。聽候彼日我及恁飲彼個新的佇我的父的國。」

30

(THR) Í-keng gîm si, chiū chhut-lâi, khì Kaⁿ-ná soaⁿ.

(BCL) 已經吟詩，就出來去橄欖山。

31

(THR) Hit sî Iâ-so͘ kā in kóng, Kim-mî lín lóng beh ūi-tio̍h góa lâi siū that-gāi, in-ūi ū kì-chài kóng, Góa beh phah bo̍k-chiá, chiū iûⁿ-kûn sì-sòaⁿ.

(BCL) 彼時，耶穌給講：「今暝，恁攏欲為著我來受塞礙。因為有記載講：我欲拍牧者，就羊群四散。

32

(THR) Nā-sī góa koh-o̍ah liáu-āu beh tāi-seng lín khì Ka-lī-lī.

(BCL) 若是我復活了後，欲代先恁去加利利。」

33

(THR) Pí-tek ìn I kóng, Chèng lâng sui-jiân ūi-tio̍h lí lâi siū that-gāi, iā góa éng-éng bô siū that-gāi.

(BCL) 彼得應伊講：「眾人雖然為著你來受塞礙，也我永永無受塞礙。」

34

(THR) Iâ-so͘ kā i kóng, Góa sı̍t-chāi kā lí kóng, kim-mî koe iáu-bē thî, lí beh saⁿ pái m̄ jīn góa.

(BCL) 耶穌給伊講：「我實在給你講，今暝雞猶未啼，你欲三擺呣認我。」

35

(THR) Pí-tek kā I kóng, Góa chiū nā tio̍h kap lí sí, iā koat-tòan bô m̄ jīn lí. Chèng ha̍k-seng iā lóng sī án-ni kóng.

(BCL) 彼得給伊講：「我就若著及你死，也決斷無呣認你。」眾學生也攏是按呢講。

36

(THR) Iâ-so͘ kap in kàu chı̍t só͘-chāi, miâ Khek-se-má-nî, kā I ê ha̍k-seng kóng, Lín chiah-ê chē chia, thèng-hāu góa khì hia kî-tó.

(BCL) 耶穌及到一所在，名客西馬尼，給伊的學生講：「恁諸個坐遮，聽候我去遐祈禱。」

37

(THR) Chiah chhōa Pí-tek kap Se-pí-thài nn̄g ê kiáⁿ saⁿ-kap khì; chiū iu-būn, chhám-chhoeh.

(BCL) 才導彼得及西庇太二個子相及去，就憂悶，慘慼，

38

(THR) Kā in kóng, Góa ê sim chin iu-būn kàu beh sí, lín tòa chia kap góa kéng-séng.

(BCL) 給講：「我的心真憂悶，到欲死；恁住遮及我警醒。」

39

(THR) Lio̍h-lio̍h-á chìn-chêng, bīn phak tī tōe-nı̍h, kî-tó, kóng, Góa ê Pē ah, nā ōe chòe-tit, tio̍h hō͘ chit ê poe lī-khui góa; chóng-sī m̄ sī chiàu góa só͘ ài, sī chiàu lí só͘ ài.

(BCL) 略略仔進前，面仆佇地裡，祈禱講：「我的父啊，若會做得，著互此個杯離開我。總是，呣是照我所愛，是照你所愛。」

40

(THR) Chiū lâi ha̍k-seng hia, khòaⁿ-kìⁿ in teh khùn, kā Pí-tek kóng, Án-cháiⁿ-iūⁿ, lín bōe-ōe kap góa kéng-séng pòaⁿ-sî kú ah?

(BCL) 就來學生遐，看見睏，給彼得講：「按怎樣？恁會及我警醒半時久啊？

41

(THR) Tio̍h kéng-séng, tio̍h kî-tó, bián-tit jı̍p tī bê-he̍k; sim-sîn kam-gōan, nā-sī jio̍k-thé nńg-chiáⁿ.

(BCL) 著警醒著祈禱，免得入佇迷惑。心神甘願，若是肉體軟茈。」

42

(THR) Tē jī pái koh khì kî-tó, kóng, Góa ê Pē ah, chit-ê poe nā bōe-tit lī-khui góa, tek-khak tio̍h góa lim i, chiū gōan lí ê chí-ì tit chiâⁿ.

(BCL) 第二擺閣去祈禱講：「我的父啊，此個杯若得離開我，的確著我飲伊，就願你的旨意得成。」

43

(THR) Koh-chài lâi khòaⁿ-kìⁿ in iū teh khùn, in-ūi in ê ba̍k-chiu siap.

(BCL) 閣再來，看見又睏，因為的目睭澀。

44

(THR) Lī-khui in koh khì, tē saⁿ pái kî-tó, iā sī kóng hiah ê ōe.

(BCL) 離開閣去。第三擺祈禱，也是講許個話。

45

(THR) Hit tia̍p koh chiū-kūn ha̍k-seng, kā in kóng, Taⁿ thang khùn lâi an-hioh lah. Sî kūn lah, Jîn-chú siū bōe tī chōe-jîn ê chhiú.

(BCL) 彼霎閣就近學生，給講：「今通睏來安息啦！時近啦，人子受賣佇罪人的手。

46

(THR) Khí-lâi saⁿ-kap kiâⁿ; bōe góa ê lâng kūn lah.

(BCL) 起來！相及行。賣我的人近啦！」

47

(THR) Iáu teh kóng ê sî, hut-jiân cha̍p-jī ê ha̍k-seng ê chı̍t ê, Iû-tāi, lâi, iā ū kui tīn lâng kia̍h to kap thûi-á, tùi chiah ê chè-si-thâu kap peh-sìⁿ ê tiúⁿ-ló hia saⁿ-kap lâi.

(BCL) 猶講的時，忽然十二個學生的一個猶大來，也有歸陣人抬刀及槌仔，對諸個祭司頭及百姓的長老遐相及來。

48

(THR) Bōe I ê bat kap in thò àm-hō, kóng, Góa kā I chim ê, hit lâng chiū-sī, lín thang lia̍h I.

(BCL) 賣伊的曾及套暗號，講：「我給伊唚的彼人就是。恁通掠伊。」

49

(THR) Chek-sî chiū-kūn Iâ-so͘, kóng, Lia̍p-pí, pêng-an; chiū tı̍t-tı̍t kā I chim.

(BCL) 即時就近耶穌，講：「拉比，平安」，就直直給伊唚。

50

(THR) Iâ-so͘ kā i kóng, Pêng-iú ah, lí beh lâi chòe ê, chiū chòe. Hiah ê lâng chiū chìn-chêng, khí chhiú lia̍h Iâ-so͘.

(BCL) 耶穌給伊講：「朋友啊，你欲來做的，就做。」許個人就進前，起手掠耶穌。

51

(THR) Hut-jiân ū kap Iâ-so͘ tī-teh ê chı̍t lâng chhun chhiú pu̍ih to, thâi chè-si-thâu ê lô͘-po̍k, siah-khì i chı̍t ê hī-á.

(BCL) 忽然有及耶穌佇的一人伸手拔刀，祭司頭的奴僕，削去伊一個耳仔。

52

(THR) Iâ-so͘ chiū kā i kóng, Siu lí ê to jı̍p gôan-ūi, in-ūi hōan-nā kia̍h to ê beh tùi to sí.

(BCL) 耶穌就給伊講：「收你的刀入原位！因為凡若抬刀的，欲對刀死。

53

(THR) Á-sī lí phah-sǹg góa bōe-ōe kiû góa ê Pē, chiū I tī chit tia̍p beh kā góa chhe cha̍p-jī iâⁿ khah ke ê thiⁿ-sài mah?

(BCL) 抑是你拍算我會求我的父就伊佇此霎欲給我差十二營卡加的天使嗎？

54

(THR) Nā án-ni, chiū sèng-keng só͘ kóng chit ê tāi-chì tek-khak ū ê, cháiⁿ-iūⁿ ōe èng-giām ah?

(BCL) 若按呢，就聖經所講，此個代誌的確有的怎樣會應驗啊？」

55

(THR) Hit sî Iâ-so͘ kā in hiah ê lâng kóng, Lín kia̍h to kap thûi-á chhut-lâi lia̍h góa, chhin-chhiūⁿ beh lia̍h chha̍t mah? Góa jı̍t-jı̍t chē tī tiān-lāi kà-sī lâng, iā lín bô lia̍h góa.

(BCL) 彼時耶穌給許個人講：「恁抬刀及槌仔出來掠我，親像欲掠賊嗎？我日日坐佇殿內教示人，也恁無掠我。

56

(THR) Chóng-sī chit ê sū lóng chiâⁿ, sī beh èng-giām sian-ti só͘ kì-chài ê. Hit sî ha̍k-seng lóng lī-khui I cháu.

(BCL) 總是此個事攏成，是欲應驗先知所記載的。」彼時學生攏離開伊走。

57

(THR) Lia̍h Iâ-so͘ ê tòa I kàu chè-si-thâu Kai-a-hoat ê só͘-chāi, tī hia hiah ê keng-ha̍k-sū kap tiúⁿ-ló í-keng chū-chı̍p.

(BCL) 掠耶穌的帶伊到祭司頭該亞法的所在；佇遐許個經學士及長老已經聚集。

58

(THR) Pí-tek hn̄g-hn̄g tè I kàu chè-si-thâu ê īⁿ, jı̍p lāi-bīn kap hiah ê chhe-ia̍h saⁿ-kap chē, beh khòaⁿ hit ê kiat-kio̍k.

(BCL) 彼得遠遠隨伊到祭司頭的院，入內面及許個差役相及坐，欲看彼個結局。

59

(THR) Chiah ê chè-si-thâu kap chôan kong-hōe chhē lām-sám ê kan-chèng kong-kek Iâ-so͘, ài hō͘ I sí.

(BCL) 諸個祭司頭及全公會尋濫糝的干證攻擊耶穌，愛互伊死。

60

(THR) Sui-jiân chōe-chōe lām-sám kan-chèng ê lâi, iā bô tit-tio̍h. Āu-lâi ū nn̄g-ê kàu, kóng,

(BCL) 雖然多多濫糝干證的來，也無得著。後來有二個到，

61

(THR) Chit lâng bat kóng, Góa ōe húi-hōai Siōng-tè ê tiān, saⁿ jı̍t chiū khí i.

(BCL) 講：「此人曾講：『我會毀壞上帝的殿，三日就起伊。』」

62

(THR) Chè-si-thâu khí-lâi kā I kóng, Lí lóng bô ìn mah? Chiah ê lâng só͘ kan-chèng lí ê sī sím-mı̍h?

(BCL) 祭司頭起來，給伊講：「你攏無應嗎？諸個人所干證你的是甚麼？」

63

(THR) Nā-sī Iâ-so͘ chēng-chēng. Chè-si-thâu kā I kóng, Tng chit ê chin-o̍ah Siōng-tè, góa bēng-lēng lí chiù-chōa lâi kā góan kóng, lí kó-jiân sī Siōng-tè ê Kiáⁿ, Ki-tok, á m̄ sī.

(BCL) 若是耶穌靜靜，祭司頭給伊講：「當此個真活上帝，我命令你咒誓來給阮講，你果然是上帝的子基督抑呣是？」

64

(THR) Iâ-so͘ kā i kóng, Lí í-keng kóng lah; nā-sī góa kā lín kóng, Tùi chit tia̍p liáu-āu lín beh khòaⁿ-kìⁿ Jîn-chú chē tī ū kôan-lêng ê ê tōa pêng, chē thiⁿ ê hûn lâi.

(BCL) 耶穌給伊講：「你已經講啦。若是我給恁講，對此霎了後恁欲看見人子坐佇有權能者的大旁，坐天的雲來。」

65

(THR) Tùi án-ni chè-si-thâu thiah-lı̍h ka-kī ê saⁿ, kóng, I kóng-chhut chhiàm-kôan siat-to̍k ê ōe; lán iáu-kú khiàm sím-mı̍h kan-chèng ah? Taⁿ lín í-keng thiaⁿ-kìⁿ I ê chhiàm-kôan siat-to̍k lah.

(BCL) 對按呢祭司頭拆裂家己的衫，講：「伊講出僭權褻瀆的話，咱猶久欠甚麼干證啊？今恁已經聽見，伊的僭權褻瀆啦。

66

(THR) Lín phah-sǹg cháiⁿ-iūⁿ? Ìn kóng, I kai sí.

(BCL) 恁拍算怎樣？」應講：「伊該死。」

67

(THR) Chiū phùi-nōa tī I ê bīn, ēng kûn-thâu-bú cheng I; iā ū-ê ēng chhiú siàn I,

(BCL) 就呸涎佇伊的面，用拳頭拇掙伊，也有的用手搧伊，講：

68

(THR) kóng, Ki-tok ah, lí sī sian-ti, tio̍h kā góan kóng, phah lí ê sī chī-chūi.

(BCL) 「基督啊，你是先知，著給阮講拍你的是是誰？」

69

(THR) Pí-tek chē tī gōa īⁿ; ū chı̍t ê lú-pī kūn-óa i kóng, Lí iā bat kap Ka-lī-lī lâng Iâ-so͘ chòe tīn.

(BCL) 彼得坐佇外院，有一個女婢近倚伊，講：「你也曾及加利利人耶穌做陣。」

70

(THR) Pí-tek tng chèng lâng ê bīn-chêng m̄ jīn kóng, Góa m̄ chai lí teh kóng sím-mı̍h.

(BCL) 彼得當眾人的面前呣認，講：「我呣知你講甚麼！」

71

(THR) Chhut-khì kàu īⁿ mn̂g, koh chı̍t ê lú-pī khòaⁿ-kìⁿ i, kā tī hia ê lâng kóng, Chit-ê iā bat kap Ná-sat-le̍k lâng Iâ-so͘ chòe tīn.

(BCL) 出去，到院門，閣一個女婢看見伊，給佇遐的人講：「此個也曾及拿撒勒人耶穌做陣。」

72

(THR) Pí-tek koh m̄ jīn, sòa chiù-chōa kóng, Góa m̄ bat hit ê lâng.

(BCL) 彼得閣呣認，續咒誓講：「我呣識彼個人。」

73

(THR) Ū hiah kú, piⁿ-á teh khiā ê lâng kūn-óa kā Pí-tek kóng, Lí sı̍t-chāi iā sī in ê tóng, in-ūi tùi lí ê khiuⁿ-kháu lō͘-chhut.

(BCL) 有許久，邊仔徛的人近倚，給彼得講：「你實在也是的黨，因為對你的腔口露出。」

74

(THR) I chiah chiù-mē, koh chiù-chōa, kóng, Góa m̄ bat hit ê lâng. Koe chiū thî.

(BCL) 伊才咒罵，閣咒誓，講：「我呣識彼個人。」雞就啼。

75

(THR) Pí-tek chiū kì-tit Iâ-so͘ ê ōe kóng, Koe iáu-bē thî, lí beh saⁿ pái m̄ jīn góa. Chiū chhut-khì gōa-bīn, tōa thî-khàu.

(BCL) 彼得就記得耶穌的話講：「雞猶未啼，你欲三擺呣認我。」就出去外面大啼哭。

Bible Color Mark

• 台語漢字羅馬本
• 巴克禮全羅