馬太福音 第 25 章

1

(THR) Hit sî thian-kok beh pí-phēng cha̍p ê chāi-sek-lú, kia̍h in ê teng, chhut-khì ngiâ-chih sin-kiáⁿ-sài.

(BCL) 「彼時，天國欲比並十個在室女，抬的燈，出去迎接新子婿。

2

(THR) Kî-tiong gō͘-ê gōng ê, gō͘ -ê tì-sek ê.

(BCL) 其中五個戇的，五個智識的，

3

(THR) Gōng ê kia̍h in ê teng, bô lēng-gōa tòa iû.

(BCL) 戇的抬的燈，無另外帶油；

4

(THR) To̍k-to̍k tì-sek ê kia̍h in ê teng lēng-gōa tòa iû tī in ê khì-kū lāi.

(BCL) 獨獨智識的，抬的燈另外帶油佇的器具內。

5

(THR) Sin-kiáⁿ-sài iân-chhiân, chiū lóng tuh-ka-chē teh khùn.

(BCL) 新子婿延延，就攏盹瞌睡睏。

6

(THR) Pòaⁿ mî, ū tōa siaⁿ kiò kóng, Sin-kiáⁿ-sài lâi lah; lín chhut-lâi chih i.

(BCL) 半暝有大聲叫講：『新子婿來啦，恁出來接伊！』

7

(THR) Hit sî chiah ê chāi-sek-lú lóng khí-lâi, siu-chéng in ê teng.

(BCL) 彼時，諸個在室女攏起來修整的燈。

8

(THR) Gōng ê kā tì-sek ê kóng, chhiáⁿ chiong lín ê iû pun góan, in-ūi góan ê teng beh hoa lah.

(BCL) 戇的給智識的講：『請將恁的油分阮，因為阮的燈欲熄啦。』

9

(THR) Tì-sek ê ìn kóng, Kiaⁿ-liáu lín góan lóng bô kàu; khah hó khì tùi bōe ê lâng ka-kī bóe.

(BCL) 智識的應講：『驚了恁阮攏無夠；卡好去對賣的人家己買。』

10

(THR) Khì bóe ê sî, sin-kiáⁿ-sài kàu, hiah ê piān-ê kap i jı̍p hun-in ê iân-toh; mn̂g chiū koaiⁿ.

(BCL) 去買的時，新子婿到。許個便的，及伊入婚姻的筵桌，門就關。

11

(THR) Jiân-āu kî-û ê chāi-sek-lú ia̍h lâi, kóng, Chú ah, Chú ah, kā góan khui.

(BCL) 然後其餘的在室女亦來，講：『主啊，主啊，給阮開！』

12

(THR) Nā-sī i ìn kóng, Góa sı̍t-chāi kā lín kóng, Góa m̄ bat lín.

(BCL) 若是伊應講：『我實在給恁講：，我呣識恁。』

13

(THR) Só͘-í tio̍h tiuⁿ-tî, in-ūi lín m̄ chai hit ê jı̍t, hit ê sî.

(BCL) 所以，著張持，因為恁呣知，彼個日，彼個時。」

14

(THR) In-ūi chhin-chhiūⁿ chı̍t lâng beh khì gōa-kok; chiū tiàu i ka-kī ê lô͘-po̍k chiong só͘ ū ê kau-tāi in.

(BCL) 「因為親像一人欲去外國，就召伊家己的奴僕，將所有的交代；

15

(THR) Chı̍t-ê hō͘ i gûn gō͘ chheng, chı̍t-ê hō͘ i nn̄g chheng, chı̍t-ê hō͘ i chı̍t chheng; kok chiàu in ê châi-tiāu; chiū khì gōa-kok.

(BCL) 一個互伊銀五千，一個互伊二千，一個互伊一千，各照的才調，就去外國。

16

(THR) Niá gō͘ chheng ê, sûi-sî khì chòe seng-lí, koh thàn gō͘ chheng.

(BCL) 領五千的隨時去做生理，閣趁五千。

17

(THR) Niá nn̄g chheng ê ia̍h sī án-ni, koh thàn nn̄g chheng.

(BCL) 領二千的亦是按呢閣趁二千。

18

(THR) To̍k-to̍k hit-ê niá chı̍t chheng ê khì, chiū ku̍t tōe, lâi khǹg-ba̍t i ê chú-lâng ê gûn.

(BCL) 獨獨彼個領一千的去就掘地，來囥密伊的主人的銀。

19

(THR) Kè kú-kú chiah ê lô͘-po̍k ê chú-lâng kàu, kap in sǹg-siàu.

(BCL) 過久久，諸個奴僕的主人到，及算數。

20

(THR) Niá gō͘ chheng ê lâi, koh tòa gō͘ chheng, kóng, Chú ah, lí kau-tāi góa gō͘ chheng; lí khòaⁿ, góa ū koh thàn gō͘ chheng.

(BCL) 領五千的來閣帶五千，講：『主啊，你交代我五千。你看，我有閣趁五千。』

21

(THR) I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-lı̍p lí lâi kóan chōe-ê; thang jı̍p lí ê chú-lâng ê khòai-lo̍k.

(BCL) 伊的主人給伊講：『好啊，好閣盡忠的奴僕，你佇少的已經盡忠，我欲設立你來管多的；通入你的主人的快樂。』

22

(THR) Niá nn̄g chheng ê ia̍h lâi, kóng, Chú ah, lí kau-tāi góa nn̄g chheng; lí khòaⁿ, góa ū koh thàn nn̄g chheng.

(BCL) 領二千的亦來，講：『主啊，你交代我二千。你看，我有閣趁二千。』

23

(THR) I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-lı̍p lí lâi kóan chōe-ê; thang jı̍p lí ê chú-lâng ê khòai-lo̍k.

(BCL) 伊的主人給伊講：『好啊，好閣盡忠的奴僕，你佇少的已經盡忠，我欲設立你來管多的；通入你的主人的快樂。』

24

(THR) Niá chı̍t chheng ê ia̍h lâi, kóng, Chú ah, góa chai lí sī giâm-ha̍t ê lâng; bē iā ê só͘-chāi, chiū beh siu-koah; bē hun-sòaⁿ ê só͘-chāi, chiū beh khioh chòe tui.

(BCL) 領一千的亦來，講：『主啊，我知你是嚴轄的人，未撒的所在就欲收割，未分散的所在就欲拾做堆，

25

(THR) Só͘-í góa kiaⁿ, chiū chiong lí chı̍t chheng gûn khì tâi tī tōe-nı̍h; taⁿ lí ê gôan-mı̍h hêng lí.

(BCL) 所以我驚，就將你一千銀去埋佇地裡。今你的原物還你。』

26

(THR) I ê chú-lâng chiū ìn i kóng, Pháiⁿ koh pîn-tōaⁿ ê lô͘-po̍k ah, lí kì-jiân chai góa bē iā ê só͘-chāi, chiū beh siu-koah, bē hun-sòaⁿ ê só͘-chāi, chiū beh khioh chòe tui.

(BCL) 伊的主人就應伊講：『歹閣貧憚的奴僕啊，你既然知我無撒的所在就欲收割，未分散的所在就欲拾做堆，

27

(THR) Chiū tio̍h chiong góa ê gûn hē tī chîⁿ-tiàm; góa lâi ê sî thang tit-tio̍h góa ê pún-gûn kap lī-sek.

(BCL) 就著將我的銀下佇錢店，我來的時，通得著我的本銀及利息。

28

(THR) Só͘-í tio̍h tùi i the̍h hit chı̍t chheng, lâi hō͘ hit ê ū cha̍p chheng ê.

(BCL) 所以著對伊提彼一千來，互彼個有十千的。

29

(THR) In-ūi kìⁿ-nā ū ê, beh hō͘ i, hō͘ i ū chhun; bô ê, liân i só͘ ū ê, ia̍h beh the̍h i.

(BCL) 因為見若有的，欲互伊，互伊有剩；無的，連伊所有的亦欲提伊。

30

(THR) Ia̍h hit ê bô lī-ek ê lô͘-po̍k, kóaⁿ i tī gōa-bīn o͘-àm ê só͘-chāi; tī hia beh ū thî-khàu, kā-gê chhiat-chhí.

(BCL) 亦彼個無利益的奴僕趕伊佇外面黑暗的所在；佇遐欲有啼哭咬牙切齒。』」

31

(THR) Tng Jîn-chú tī I ê êng-kng, kap lóng-chóng ê thiⁿ-sài lâi ê sî, I beh chē I êng-kng ê chō-ūi,

(BCL) 「當人子佇伊的榮光，及攏總的天使來的時，伊欲坐伊榮光的座位。

32

(THR) chū-chı̍p bān pang tī I ê bīn-chêng; I chiū beh hun-piat in, chhin-chhiūⁿ bo̍k-chiá hun-piat mî-iûⁿ lī-khui soaⁿ-iûⁿ.

(BCL) 聚集萬邦佇伊的面前。伊就欲分別，親像牧者分別綿羊離開山羊，

33

(THR) Chiong mî-iûⁿ hē tī I ê chiàⁿ-pêng, soaⁿ-iûⁿ hē tī I ê tò-pêng.

(BCL) 將綿羊下佇伊的正旁，山羊下佇伊的倒旁。

34

(THR) Hit sî Ông beh kā chiàⁿ-pêng ê kóng, Lín tùi góa ê Pē tit-tio̍h un-tián ê, chìn-chêng lâi sêng-chiap kok, chiū-sī tùi chhòng-chō sè-kan í-lâi kā lín pī-pān ê.

(BCL) 彼時王欲給正旁的講：『恁對我的父得著恩典的，進前來承接國，就是對創造世間以來給恁備辦的；

35

(THR) In-ūi góa iau, lín bat hō͘ góa chia̍h; góa chhùi-ta, lín hō͘ góa lim; góa chhut-gōa, lín hō͘ góa tòa; góa thǹg-pak-theh, lín hō͘ góa chhēng;

(BCL) 因為我枵，恁曾互我食，我嘴乾，恁互我飲；我出外，恁互我住；我褪腹裼，恁互我穿；

36

(THR) góa phòa-pīⁿ, lín khòaⁿ-kò͘ góa; góa tī kaⁿ-nı̍h, lín lâi chhē góa.

(BCL) 我破病，恁看顧我；我佇監裡，你來尋我。』

37

(THR) Hit sî gī lâng beh ìn I kóng, Chú ah, góan sím-mı̍h sî khòaⁿ-kìⁿ lí iau, lâi hō͘ lí chia̍h? chhùi-ta, lâi hō͘ lí lim?

(BCL) 彼時義人欲應伊講：『主啊，阮甚麼時看見你枵，來互你食，嘴乾，來互你飲？

38

(THR) Sím-mı̍h sî khòaⁿ-kìⁿ lí chhut-gōa, lâi hō͘ lí tòa? thǹg-pak-theh, lâi hō͘ lí chhēng?

(BCL) 甚麼時看見你出外，來互你住，褪腹裼，來互你穿？

39

(THR) Sím-mı̍h sî khòaⁿ-kìⁿ lí phòa-pīⁿ, á-sī tī kaⁿ-nı̍h, lâi chhē lí?

(BCL) 甚麼時看見你破病，抑是佇監裡，來尋你？』

40

(THR) Ông beh ìn i kóng, Góa sı̍t-chāi kā lín kóng, Lín kì-jiân kiâⁿ i tī góa ê hiaⁿ-tī chì-bî-sòe ê ê chı̍t-ê, chiū-sī kiâⁿ i tī góa.

(BCL) 王欲應伊講：『我實在給恁講，恁既然行伊佇我的兄弟至微細的的一個，就是行伊佇我。』

41

(THR) Koh beh kā tò-pêng ê kóng, Lín siū chiù-chó͘ ê, tio̍h lī-khui góa, jı̍p éng-óan ê hé, chiū-sī ūi-tio̍h Mô͘-kúi kap i chiah ê sù-chiá só͘ pī-pān ê.

(BCL) 閣欲給倒旁的講：『恁受咒詛的，著離開我！入永遠的火就是為著魔鬼及伊諸個使者所備辦的！

42

(THR) In-ūi góa iau, lín m̄ bat hō͘ góa chia̍h; góa chhùi-ta, lín m̄ bat hō͘ góa lim; góa chhut-gōa, lín m̄ bat hō͘ góa tòa;

(BCL) 因為我枵，恁呣曾互我食，我嘴乾，恁呣曾互我飲；

43

(THR) góa thǹg-pak-theh, lín m̄ bat hō͘ góa chhēng; góa phòa-pīⁿ kap tī kaⁿ-nı̍h, lín m̄ bat khòaⁿ-kò͘ góa.

(BCL) 我出外，恁呣曾互我住；我褪腹裼，恁呣曾互我穿；我破病，及佇監裡，恁呣曾看顧我。』

44

(THR) In ia̍h beh ìn kóng, Chú ah, góan sím-mı̍h sî khòaⁿ-kìⁿ lí iau, á-sī chhùi-ta, á-sī chhut-gōa, á-sī thǹg-pak-theh, á-sī phòa-pīⁿ, á-sī tī kaⁿ-nı̍h, lâi bô ho̍k-sāi lí ah?

(BCL) 亦欲應講：『主啊，阮甚麼時看見你枵，抑是嘴乾，抑是出外，抑是褪腹裼，抑是破病，抑是佇監裡，來無服事你啊？』

45

(THR) I chiū beh ìn i kóng, Góa sı̍t-chāi kā lín kóng, Lín kì-jiân bô kiâⁿ i tī chiah ê chì-bî-sòe ê ê chı̍t ê, chiū-sī bô kiâⁿ i tī góa.

(BCL) 伊就欲應伊講：『我實在給恁講，恁既然無行伊佇諸個至微細者的一個，就是無行伊佇我。』

46

(THR) Chiah ê lâng beh khì jı̍p éng-óan ê hêng-ho̍at; nā-sī gī ê lâng jı̍p éng-óan o̍ah.

(BCL) 諸個人欲去入永遠的刑罰；若是義的人入永遠活。」

Bible Color Mark

• 台語漢字羅馬本
• 巴克禮全羅