馬太福音 第 14 章

1

(THR) Tng hit sî, hun-hong ê jîn-kun Hi-lu̍t thiaⁿ-kìⁿ Iâ-so͘ ê miâ-siaⁿ;

(BCL) 當彼時，分封的人君希律聽見耶穌的名聲，

2

(THR) chiū kā i ê chhe-ēng kóng, Chit-ê chiū-sī kiâⁿ sóe-lé ê Iok-hān, i sī tùi sí-lâng tiong koh-o̍ah; só͘-í ū chiah ê kôan-lêng tùi i hián-chhut.

(BCL) 就給伊的差用講：「此個就是行洗禮的約翰，伊是對死人中復活，所以有諸個權能對伊顯出。」

3

(THR) In-ūi chêng Hi-lu̍t ūi-tio̍h i ê hiaⁿ-tī Hui-le̍k ê bó͘ Hi-lô-tí ê iân-kò͘, ū lia̍h Iok-hān pa̍k i, koaiⁿ lo̍h kaⁿ.

(BCL) 因為前希律為著伊的兄弟腓力的某希羅底的緣故，有掠約翰縛伊，關落監。

4

(THR) In-ūi Iok-hān bat kā i kóng, Lí chiap-la̍p chit ê hū-jîn-lâng sī put-hoat.

(BCL) 因為約翰曾給伊講：「你接納此個婦仁人是不法。」

5

(THR) Hi-lu̍t ài thâi i, to̍k-to̍k kiaⁿ peh-sìⁿ; in-ūi in lia̍h Iok-hān chòe sian-ti.

(BCL) 希律愛伊，獨獨驚百姓，因為掠約翰做先知。

6

(THR) Tú-tio̍h Hi-lu̍t chòe siⁿ-jı̍t, Hi-lô-tí ê cha-bó͘-kiáⁿ thiàu-bú tī in tiong-kan, lâi hō͘ Hi-lu̍t hoaⁿ-hí.

(BCL) 抵著希律做生日，希羅底的查某子跳舞佇中間，來互希律歡喜。

7

(THR) Tùi án-ni chiù-chōa, ún beh chiàu i só͘ ài kiû ê lóng hō͘ i.

(BCL) 對按呢咒誓，允欲照伊所愛求的攏互伊。

8

(THR) I hō͘ in lāu-bú sái-sō, chiū kóng, Chiong kiâⁿ sóe-lé Iok-hān ê thâu-khak tóe tī pôaⁿ-nı̍h, chiū chia hō͘ góa.

(BCL) 伊互老母使唆，就講：「將行洗禮約翰的頭殼貯佇盤裡，就遮互我。」

9

(THR) Ông chin iu-būn; chóng-sī ūi-tio̍h só͘ chiù ê chōa, koh ū tâng toh ê lâng tī-teh, chiū bēng-lēng hō͘ i;

(BCL) 王真憂悶，總是為著所咒的誓，閣有同桌的人佇，就命令互伊；

10

(THR) chhe lâng khì kaⁿ-nı̍h thâi Iok-hān.

(BCL) 差人去監裡約翰。

11

(THR) Chiong i ê thâu-khak tóe tī pôaⁿ-nı̍h, lâi hō͘ cha-bó͘ gín-ná; i chiū phâng-khì hō͘ i ê lāu-bú.

(BCL) 將伊的頭殼貯佇盤裡，來互查某囝仔；伊就捧去互伊的老母。

12

(THR) I ê ha̍k-seng lâi siu i ê sin-si, khì bâi-chòng; chiū khì kā Iâ-so͘ kóng.

(BCL) 伊的學生來，收伊的身屍去埋葬，就去給耶穌講。

13

(THR) Iâ-so͘ thiaⁿ-kìⁿ chiū chiūⁿ chûn, tùi hia thè-khì khòng-iá, ka-kī tòa; chèng lâng thiaⁿ-kìⁿ, chiū tùi chiah ê siâⁿ pō͘-kiâⁿ tè I.

(BCL) 耶穌聽見，就上船對遐退去曠野，家己住。眾人聽見，就對諸個城步行隨伊。

14

(THR) I chhut-khì, khòaⁿ-kìⁿ kui tōa tīn ê lâng, chiū lîn-bín in, i-hó in tiong-kan ū pīⁿ ê.

(BCL) 伊出去，看見歸大陣的人，就憐憫，醫好中間有病的。

15

(THR) Jı̍t mńg-po͘, ha̍k-seng chiū- kūn I kóng, Chia sī khòng-iá, koh sî í-keng kè; tio̍h hō͘ chèng lâng sì-sòaⁿ, thang khì hiuⁿ-siā bóe chia̍h.

(BCL) 日晚晡，學生就近伊，講：「遮是曠野，閣時已經過，著互眾人四散，通去鄉社買食。」

16

(THR) Iâ-so͘ kā in kóng, In m̄ bián khì, lín hō͘ in chia̍h.

(BCL) 耶穌給講：「呣免去，恁互食！」

17

(THR) In kā I kóng, Góan tī chia chí ū gō͘ ê piáⁿ, nn̄g bé hî.

(BCL) 給伊講：「阮佇遮只有五個餅，二尾魚。」

18

(THR) I kóng, The̍h lâi hō͘ góa.

(BCL) 伊講：「提來互我。」

19

(THR) Chiū hoan-hù chèng lâng chē tī chháu-po͘, chiū the̍h hit gō͘ ê piáⁿ, nn̄g bé hî, ǹg thiⁿ lâi chiok-siā, peh piáⁿ hō͘ ha̍k-seng, ha̍k-seng hō͘ chèng lâng.

(BCL) 就吩咐眾人坐佇草埔，就提彼五個餅，二尾魚，向天來祝謝，擘餅互學生，學生互眾人。

20

(THR) Lóng chia̍h kàu pá; khioh só͘ chhun ê sut-á, móa cha̍p-jī kheng.

(BCL) 攏食到飽，拾所剩的屑仔，滿十二筐。

21

(THR) Chia̍h ê lâng, hū-jîn-lâng gín-ná í-gōa, iok-lio̍k gō͘ chheng.

(BCL) 食的人，婦仁人囝仔以外，約略五千。

22

(THR) I sûi-sî pek ha̍k-seng chiūⁿ chûn, tāi-seng kè-khì hit pêng, thèng-hāu I sì-sòaⁿ chèng lâng.

(BCL) 伊隨時迫學生上船，代先過去彼旁，聽候伊四散眾人。

23

(THR) Sì-sòaⁿ chèng lâng liáu-āu, chiū ka-kī chiūⁿ soaⁿ kî-tó; í-keng àm, chí ū I ka-kī tī hia.

(BCL) 四散眾人了後，就家己上山祈禱。已經暗，只有伊家己佇遐。

24

(THR) Hit sî chûn tī hái-tiong, hō͘ éng iô-choah; in-ūi sī tùi-thâu hong.

(BCL) 彼時船佇海中，互湧搖泏，因為是對頭風。

25

(THR) Mî-sî sì kiⁿ, Iâ-so͘ tùi hái-bīn kiâⁿ, chiū-kūn in.

(BCL) 暝時四更，耶穌對海面行，就近。

26

(THR) Ha̍k-seng khòaⁿ-kìⁿ I kiâⁿ tī hái-bīn, chiū chhiⁿ-kiaⁿ, kóng, Sī kòai mı̍h; in-ūi kiaⁿ chiū âu-kiò.

(BCL) 學生看見伊行佇海面，就生驚，講：「是怪物！」因為驚，就喉叫。

27

(THR) Iâ-so͘ liâm-piⁿ kap in kóng ōe, kóng, An lín ê sim; sī góa; m̄ bián kiaⁿ.

(BCL) 耶穌連鞭及講話，講：「安恁的心，是我，呣免驚！」

28

(THR) Pí-tek ìn I kóng, Chú ah, kó-jiân sī lí, chiū bēng-lēng góa kiâⁿ chúi-bīn chiū-kūn lí.

(BCL) 彼得應伊講：「主啊！果然是你，就命令我行水面就近你。」

29

(THR) I kóng, Lâi. Pí-tek chiū tùi chûn-nı̍h lo̍h-khì, kiâⁿ chúi-bīn, beh chiū-kūn Iâ-so͘.

(BCL) 伊講：「來。」彼得就對船裡落去，行水面，欲就近耶穌；

30

(THR) Chóng-sī khòaⁿ-kìⁿ hong, chiū kiaⁿ; teh-beh tîm-lo̍h-khì, chiū âu-kiò kóng, Chú ah, kiù góa.

(BCL) 總是看見風，就驚，欲沈落去，就喉叫講：「主啊，救我！」

31

(THR) Iâ-so͘ sûi-sî chhun chhiú khan i, kóng, Sió-sìn ê lâng, siáⁿ-sū giâu-gî?

(BCL) 耶穌隨時伸手牽伊，講：「小信的人，啥事僥疑？」

32

(THR) In chiūⁿ chûn, hong chiū tiāⁿ.

(BCL) 上船，風就定。

33

(THR) Chûn-nı̍h ê lâng pài I kóng, Lí chin-chiàⁿ sī Siōng-tè ê Kiáⁿ.

(BCL) 船裡的人拜伊，講：「你真正是上帝的子。」

34

(THR) Í-keng kè-khì, chiū kàu Kek-nî-sat-le̍k tōe.

(BCL) 已經過去，就到革尼撒勒地。

35

(THR) Hit ūi ê lâng bat I, chhe lâng khì sì-hng, chhōa it-chhè ū pīⁿ ê lâi chiū-kūn I;

(BCL) 彼位的人識伊，差人去四方，導一切有病的來就近伊，

36

(THR) kiû I nā sái hō͘ in bong I ê saⁿ-á-ku ê chhiu; kìⁿ-nā bong ê lâng chiâu-chn̂g hó.

(BCL) 求伊若使互摸伊的衫仔裾的鬚；見若摸的人齊全好。

Bible Color Mark

• 台語漢字羅馬本
• 巴克禮全羅