瑪拉基書 第 4 章

1

(THR) Bān-kun ê Iâ-hô-hoa kóng, Khòaⁿ ah, hit-jı̍t beh kàu, chhin-chhiūⁿ hé-lô͘ teh to̍h; kìⁿ-nā kiau-ngō͘--ê kap kiâⁿ-pháiⁿ--ê, beh chhin-chhiūⁿ chháu-iù; hit-ê beh lâi ê jı̍t beh it-chīn sio i, kun kap ki lóng bô lâu-teh.

(BCL) 萬軍的耶和華講：「看啊，彼日欲到，親像火爐，見若驕傲者及行歹者欲親像草幼，彼個欲來的日欲一盡燒伊，根及枝攏無留。

2

(THR) To̍k-to̍k lín kèng-ùi Góa ê miâ ê lâng, beh ū kong-gī ê jı̍t khí-lâi chiò lín; i ê sı̍t ū i-tī ê kong-hāu; lín beh chhut-lâi tiô-thiàu, chhin-chhiūⁿ tiâu-lāi pûi ê gû-á.

(BCL) 獨獨恁敬畏我的名的人，欲有公義的日起來照恁，伊的翅有醫治的功效。恁欲出來趒跳親像　內肥的牛仔。

3

(THR) Tī Góa só͘ tiāⁿ-tio̍h ê jı̍t, lín beh thún-ta̍h pháiⁿ-lâng, in-ūi in beh chòe hé-hu tī lín ê kha-ē. Che sī bān-kun ê Iâ-hô-hoa kóng--ê.

(BCL) 佇我所定著的日，恁欲睭踏歹人，因為欲做火灰佇恁的腳下。這是萬軍的耶和華講的。

4

(THR) Lín tio̍h kì-tit Góa ê lô͘-po̍k Mô͘-se ê lu̍t-hoat, chiū-sī Góa tī Hô-lia̍t ūi-tio̍h Í-sek-lia̍t chèng-lâng só͘ hoan-hù i--ê, chiū-sī lu̍t-lē kap hoat-tō͘.

(BCL) 「恁著記得我的奴僕摩西的律法，就是我佇何烈為著以色列眾人所吩咐伊的，就是律例及法度。

5

(THR) Khòaⁿ ah, Iâ-hô-hoa tōa koh thang kiaⁿ ê jı̍t bē kàu ê tāi-seng, Góa beh chhe sian-ti Í-lī-a kàu lín hia;

(BCL) 「看啊，耶和華大閣通驚的日未到的代先，我欲差先知以利亞到恁遐。

6

(THR) i beh hō͘ chòe lāu-pē-ê ê sim o̍at-tńg ǹg i ê kiáⁿ, chòe kiáⁿ--ê ê sim, o̍at-tńg ǹg i ê lāu-pē, bián-tit Góa lâi chiù-chó͘ chit ê tōe.

(BCL) 伊欲互做老父者的心越轉向伊的子，做子者的心，越轉向伊的老父，免得我來咒詛此個地。」

Bible Color Mark

• 台語漢字羅馬本
• 巴克禮全羅