瑪拉基書 第 2 章

1

(THR) Lín chiah ê chè-si ah, chit ê bēng-lēng sī hō͘ lín--ê.

(BCL) 「恁諸個祭司啊，此個命令是互恁的。

2

(THR) Bān-kun ê Iâ-hô-hoa kóng, Lín nā m̄-thiaⁿ, m̄ hē tī sim--nih, lâi kui êng-kng Góa ê miâ, Góa chiū hō͘ chiù-chó͘ kàu tī lín, hō͘ lín ê hok-khì piàn-chòe chiù-chó͘; Góa í-keng chiù-chó͘, in-ūi lín bô chiong bēng-lēng hē tī sim--nih.

(BCL) 萬軍的耶和華講：恁若呣聽，呣下佇心裡，來歸榮光我的名，我就互咒詛到佇恁，互恁的福氣變做咒詛；我已經咒詛，因為恁無將命令下佇心裡。

3

(THR) Khòaⁿ ah, Góa beh ūi-tio̍h lín lâi phah-pháiⁿ chéng-chí, koh ēng pùn kô͘ lín ê bīn, chiū-sī lín ê seng-lé ê pùn; lín beh kap i pîⁿ-pîⁿ tû--khì.

(BCL) 看啊，我欲為著恁來拍歹種子，閣用糞糊恁的面就是恁的牲禮的糞；恁欲及伊平平除去。

4

(THR) Lín chiū chai Góa ēng chit ê bēng-lēng hō͘ lín, thang chòe Góa kap Lī-bī só͘ lı̍p ê iok; che sī bān-kun ê Iâ-hô-hoa kóng--ê.

(BCL) 恁就知我用此個命令互恁，通做我及利未所立的約。這是萬軍的耶和華講的。

5

(THR) Góa kap i só͘ lı̍p--ê, sī o̍ah-miā kap pêng-an ê iok; Góa chiong che hō͘ i, hō͘ i kiaⁿ-ùi; i chiū kiaⁿ-ùi Góa, kèng-ùi Góa ê miâ.

(BCL) 我及伊所立的是活命及平安的約。我將這互伊，互伊驚畏；伊就驚畏我，敬畏我的名。

6

(THR) Chin-lí ê lu̍t-hoat tī i ê chhùi-lāi; tī i ê chhùi-tûn chhē bô put-gī; i ēng pêng-an chèng-tı̍t kap Góa tâng-kiâⁿ, hō͘ chōe-chōe lâng o̍at-tńg lī-khui pháiⁿ.

(BCL) 真理的律法佇伊的嘴內，佇伊的嘴唇尋無不義。伊用平安正直及我同行，互多多人越轉離開歹。

7

(THR) In-ūi chè-si ê chhùi-tûn tio̍h chûn tì-sek, lâng tio̍h tùi i ê chhùi chhéng-kàu lu̍t-hoat, in-ūi i sī bān-kun ê Iâ-hô-hoa ê sù-chiá.

(BCL) 因為祭司的嘴唇著存智識，人著對伊的嘴請教律法，因為伊是萬軍的耶和華的使者。

8

(THR) Chóng-sī lín ū lī-khui hit tiâu lō͘, hō͘ chōe-chōe lâng tī lu̍t-hoat tio̍h-tak; lín pāi-hōai Lī-bī ê iok; che sī bān-kun ê Iâ-hô-hoa kóng--ê.

(BCL) 總是恁有離開彼條路，互多多人佇律法著觸。恁敗壞利未的約。這是萬軍的耶和華講的。

9

(THR) Só͘-í Góa hō͘ lín siū chèng-lâng khòaⁿ-khin, khòaⁿ-chòe hā-chiān; in-ūi lín bô siú Góa ê tō-lō͘, tī lu̍t-hoat ēng phian-su khóan-thāi lâng.

(BCL) 所以我互恁受眾人看輕，看做下賤；因為恁無守我的道路，佇律法用偏私款待人。」

10

(THR) Lán kiám-m̄-sī tâng chı̍t ê pē mah? Kiám-m̄-sī chı̍t ūi Siōng-tè chhòng-chō lán mah? Lán ta̍k-lâng siáⁿ-sū ēng khúi-chà khóan-thāi hiaⁿ-tī, pāi-hōai lia̍t-chó͘ ê iok ah?

(BCL) 咱豈呣是同一個父嗎？豈呣是一位上帝創造咱嗎？咱逐人啥事用詭詐款待兄弟，敗壞列祖的約啊？

11

(THR) Iû-tāi kiâⁿ khúi-chà koh tī Í-sek-lia̍t kap Iâ-lō͘-sat-léng ê tiong-kan kiâⁿ khó-ò͘ⁿ ê sū; in-ūi Iû-tāi siat-to̍k Iâ-hô-hoa só͘ thiàⁿ ê sèng-só͘; chhōa ho̍k-sāi gōa-pang ê siōng-tè ê cha-bó͘-kiáⁿ chòe bó͘.

(BCL) 猶大行詭詐，閣佇以色列及耶路撒冷的中間行可惡的事；因為猶大褻瀆耶和華所疼的聖所，娶服事外邦的上帝的查某子做某。

12

(THR) Kiâⁿ chit-hō sū ê lâng, gōan Iâ-hô-hoa tùi Ngá-kok ê pò͘-pîⁿ-tiong, tû-khì i só͘-ū ê lâng, he̍k-sī chhíⁿ--ê, he̍k-sī ìn--ê, í-kı̍p hiàn lé-mı̍h hō͘ bān-kun ê Iâ-hô-hoa--ê.

(BCL) 行此號事的人，願耶和華對雅各的布棚中除去伊所有的人，或是醒者，或是應者，以及獻禮物互萬軍的耶和華者。

13

(THR) Lín koh án-ni chòe, hō͘ ba̍k-sái thî-khàu kap thó͘-khùi piàn-móa Iâ-hô-hoa ê tôaⁿ, tì-kàu I bô koh khòaⁿ-kò͘ lé-mı̍h, iā bô hoaⁿ-hí tùi lín ê chhiú chiap-la̍p.

(BCL) 恁閣按呢做，互目屎啼哭及吐氣遍滿耶和華的壇，致到伊無閣看顧禮物，也無歡喜對恁的手接納。

14

(THR) Lín iáu-kú kóng, Che sī siáⁿ-sū? In-ūi Iâ-hô-hoa tī lí kap lí siàu-liân só͘ chhōa ê bó͘ ê tiong-kan chòe kan-chèng; i sui-jiân sī lí ê phit-phòe, koh sī lí bêng-iok ê bó͘, lí iáu-kú ēng khúi-chà khóan-thāi i.

(BCL) 恁猶久講：「這是啥事？」因為耶和華佇你及你少年所娶的某的中間做干證。伊雖然是你的匹配，閣是你盟約的某，你猶久用詭詐款待伊。

15

(THR) I ê sîn sui-jiân ū chhun, kiám-m̄-sī chō chı̍t-ê mah? Siáⁿ-sū chí-ū chı̍t-ê? chiū-sī beh kiû sèng ê hō͘-è. Só͘-í tio̍h kín-siú lín ê sim, ta̍k-lâng m̄-thang ēng khúi-chà khóan-thāi siàu-liân só͘ chhōa ê bó͘.

(BCL) 伊的神雖然有剩，豈呣是造一個嗎？啥事只有一個？就是欲求聖的後裔。所以著謹守恁的心，逐人呣通用詭詐款待少年所娶的某。

16

(THR) Iâ-hô-hoa Í-sek-lia̍t ê Siōng-tè kóng, Lî-bó͘ ê sū, kap ēng kiông-pō khóan-thāi bó͘ ê lâng, Góa òan-hūn i; só͘-í tio̍h kín-sīn siú lín ê sim, m̄-thang kiâⁿ khúi-chà; che sī bān-kun ê Iâ-hô-hoa kóng--ê.

(BCL) 耶和華──以色列的上帝講：「離某的事及用強暴款待某的人，我怨恨伊！所以著謹慎守恁的心，呣通行詭詐。」這是萬軍的耶和華講的。

17

(THR) Lín ēng ōe thiau-lân Iâ-hô-hoa. Lín iáu-kú kóng, Góan ēng sím-mı̍h thiau-lân I ah? In-ūi lín kóng, Hōan-nā chòe-pháiⁿ--ê, Iâ-hô-hoa khòaⁿ i chòe hó, koh hoaⁿ-hí i; á-sī kong-gī ê Siōng-tè tī toh-lo̍h ah?

(BCL) 恁用話刁難耶和華，恁猶久講：「阮用甚麼刁難伊啊？」因為恁講：「凡若做歹者，耶和華看伊做好，閣歡喜伊；抑是公義的上帝佇叨落啊？」

Bible Color Mark

• 台語漢字羅馬本
• 巴克禮全羅