路加福音 第 5 章

1

(THR) Tng chèng lâng oe-khoeh I, teh thiaⁿ Siōng-tè ê tō-lí ê sî, Iâ-so͘ khiā tī Kek-nî-sat-le̍k ô͘-piⁿ,

(BCL) 當眾人挨夾伊，teh聽上帝的道理的時，耶穌徛佇革尼撒勒湖邊。

2

(THR) khòaⁿ-kìⁿ nn̄g chiah chûn tī ô͘-piⁿ, thó-hî lâng lī-khui chûn teh sóe bāng.

(BCL) 看見二隻船佇湖邊；討漁人離開船teh洗網。

3

(THR) Kî-tiong chı̍t chiah sī Se-bûn ê, Iâ-so͘ chiūⁿ-khì, chhiáⁿ i chiong chûn pàng khah khui. Chiū chē tī chûn-nı̍h kà-sī chèng lâng.

(BCL) 其中一隻是西門的，耶穌上去，請伊將船放卡開，就坐佇船裡教示眾人。

4

(THR) Kóng soah chiū tùi Se-bûn kóng, Pàng kàu chhim ê só͘-chāi, pha bāng thó-hî.

(BCL) 講息，就對西門講：「放到深的所在，拋網討魚。」

5

(THR) Se-bûn ìn kóng, Sian-siⁿ, góan thong mî tio̍h-bôa, thó lóng bô; chóng-sī in-ūi lí ê ōe, góa chiū beh pha bāng.

(BCL) 西門應講：「先生，阮通暝著磨，討攏無。總是因為你的話，我就欲拋網。」

6

(THR) In pha-lo̍h-khì, chiū ûi-tio̍h hî chin chōe, bāng kàu beh lı̍h;

(BCL) In拋落去，就圍著魚真多，網到欲裂，

7

(THR) chiū ia̍t pa̍t chiah chûn ê tâng-phōaⁿ lâi tàu saⁿ-kāng; in chiū lâi, khioh hî móa nn̄g chiah chûn kàu beh tîm-lo̍h-khì.

(BCL) 就搧別隻船的同伴來鬥相共。In就來，拾魚滿二隻船，到欲沈落去。

8

(THR) Se-bûn Pí-tek khòaⁿ-kìⁿ án-ni, chiū phak tī Iâ-so͘ ê kha-ē kóng, Chú ah, lī-khui góa, góa sī ū chōe ê lâng.

(BCL) 西門彼得看見按呢，就仆佇耶穌的腳下，講：「主啊，離開我，我是有罪的人！」

9

(THR) In-ūi Se-bûn kap tâng tī-teh ê lâng, ūi-tio̍h in chı̍t-ē pha-lo̍h-khì só͘ lia̍h-tio̍h ê hî, bô m̄ gông-ngia̍h;

(BCL) 因為西門及同佇teh的人，為著in一下拋落去所掠著的魚無呣卬愕。

10

(THR) Se-bûn ê tâng-phōaⁿ, Se-pí-thài ê kiáⁿ Ngá-kok, Iok-hān, iā sī án-ni. Iâ-so͘ tùi Se-bûn kóng, Bo̍h-tit kiaⁿ, tùi chit tia̍p liáu-āu lí beh tit-tio̍h lâng.

(BCL) 西門的同伴西庇太的子雅各、約翰，也是按呢。耶穌對西門講：「莫得驚！對此霎了後，你欲得著人。」

11

(THR) In í-keng thoa chûn óa hōaⁿ, chiū pàng-sak it-chhè lâi tè I.

(BCL) In已經拖船倚岸，就放拺一切來隨伊。

12

(THR) Iâ-so͘ tī chı̍t ê siâⁿ, tú-tn̄g ū chı̍t lâng piàn-sin thái-ko, khòaⁿ-kìⁿ I chiū bīn phak tī tōe-nı̍h, kiû kóng, Chú ah, lí nā khéng, chiū ōe hō͘ góa chheng-khì.

(BCL) 耶穌佇一個城，抵當有一人遍身癩，看見伊，就面仆佇地裡，求講：「主啊，你若肯，就會互我清氣。」

13

(THR) I chhun chhiú bong i kóng, Góa khéng, lí thang chheng-khì. Thái-ko chek-sî tû-khì.

(BCL) 伊伸手摸伊講：「我肯，你通清氣！」

14

(THR) Iâ-so͘ hoan-hù i bo̍h-tit kā lâng kóng; to̍k-to̍k tio̍h khì, chiong pún-sin hō͘ chè-si giām, iā ūi-tio̍h lí tit-tio̍h chheng-khì hiàn Mô͘-se só͘ hoan-hù ê, lâi chòe chèng-kù tī lâng.

(BCL) 癩即時除去。耶穌吩咐伊莫得給人講，獨獨著去將本身互祭司驗，也為著你得著清氣，獻摩西所吩咐的，來做證據佇人。」

15

(THR) Chóng-sī I ê miâ-siaⁿ it-hoat pò-iông; kui tōa tīn ê lâng chū-chı̍p beh thiaⁿ, iā beh tit-tio̍h i-hó in ê pīⁿ.

(BCL) 總是伊的名聲益發報揚。歸大陣的人聚集欲聽，也欲得著醫好的病。

16

(THR) Nā-sī Iâ-so͘ thè-khì, tiàm tī khòng-iá kî-tó.

(BCL) 若是耶穌退去佇曠野祈禱。

17

(THR) Ū chı̍t jı̍t Iâ-so͘ teh kà-sī lâng; ū Hoat-lī-sài lâng kap kà lu̍t-hoat ê sian-siⁿ tī hia teh chē, in sī tùi Ka-lī-lī ta̍k hiuⁿ-siā kap Iû-thài kap Iâ-lō͘-sat-léng lâi ê; Chú ê kôan-lêng kap Iâ-so͘ tī-teh, hō͘ I i-hó lâng.

(BCL) 有一日，耶穌教示人，有法利賽人及教律法的先生佇遐坐；是對加利利逐鄉社及猶太及耶路撒冷來的。主的權能及耶穌佇，互伊醫好人。

18

(THR) Tú-tn̄g ū lâng chiong pho͘-á kng piàn-sūi ê lâi, ài beh kng jı̍p-khì hē tī I ê bīn-chêng.

(BCL) 抵當有人將舖仔扛半　的來，愛欲扛入去下佇伊的面前，

19

(THR) In-ūi lâng chōe, chhē bô phāng thang kng jı̍p-khì; chiū chiūⁿ chhù-téng, tùi chhù-kòa tiong chiong lâng liân pho͘-á tūi-lo̍h-khì, hē tī tiong-ng, tī Iâ-so͘ ê bīn-chêng.

(BCL) 因為人多，尋無縫通扛入去，就上厝頂，對厝蓋中將人連舖仔墜落去，下佇中央，佇耶穌的面前。

20

(THR) Iâ-so͘ khòaⁿ-kìⁿ in ê sìn chiū kóng, Bó͘ lâng ah, lí ê chōe sià lah.

(BCL) 耶穌看見的信，就講：「某人啊，你的罪赦啦。」

21

(THR) Keng-ha̍k-sū kap Hoat-lī-sài lâng chiū gī-lūn kóng, Chit ê kóng chhiàm-kôan lām-sám ê ōe ê sī chī-chūi ah? Siōng-tè í-gōa, chī-chūi ōe sià-chōe ah?

(BCL) 經學士及法利賽人就議論講：「此個講僭權濫糝的話的是是誰啊？上帝以外，是誰會赦罪啊？」

22

(THR) Iâ-so͘ chai in ê gī-lūn, chiū ìn kóng, Lín sim-lāi teh gī-lūn sím-mı̍h ah?

(BCL) 耶穌知的議論，就應講：「恁心內議論甚麼啊？

23

(THR) Kóng, Lí ê chōe sià á-sī kóng, Lí khí-lâi kiâⁿ, tá-lo̍h chı̍t hāng khah khòai?

(BCL) 講『你的罪赦』，抑是講『你起來行』，叨落一項卡快？

24

(THR) Chóng-sī beh hō͘ lín chai Jîn-chú tī tōe-nı̍h ū kôan thang sià-bián chōe, (chiū kā piàn-sūi ê kóng), Góa kā lí kóng, Khí-lâi, giâ lí ê pho͘-á tò-khì lí ê chhù.

(BCL) 總是欲互恁知，人子佇地裡有權通赦免罪。就給半　的講：我給你講，起來，夯你的舖仔倒去你的厝！」

25

(THR) Hit lâng tī chèng lâng ê bīn-chêng chek-sî khí-lâi, giâ i só͘ khùn ê, tò-khì i ê chhù, kui êng-kng Siōng-tè.

(BCL) 彼人佇眾人的面前即時起來，夯伊所睏的倒去伊的厝，歸榮光上帝。

26

(THR) Chèng lâng lóng gông-ngia̍h, iā kui êng-kng Siōng-tè; koh móa-sim kiaⁿ-hiâⁿ kóng, Lán kin-á-jı̍t khòaⁿ-kìⁿ ì-gōa ê sū.

(BCL) 眾人攏卬愕，也歸榮光上帝，閣滿心驚惶，講：「咱今仔日看見意外的事。」

27

(THR) Chiah ê tāi-chì liáu-āu, Iâ-so͘ chhut-khì, khòaⁿ-kìⁿ chı̍t ê thiu-hiòng ê, miâ kiò Lī-bī, chē tī hiòng-koan; chiū kā i kóng, Tè góa.

(BCL) 諸個代誌了後，耶穌出去，看見一個抽餉的，名叫利未，坐佇餉關，就給伊講：「隨我。」

28

(THR) I chiū pàng-sak it-chhè, khí-lâi tè I.

(BCL) 伊就放拺一切，起來，隨伊。

29

(THR) Lī-bī ūi-tio̍h I pān tōa iân-sia̍h tī in tau; ū thiu-hiòng ê í-kı̍p pa̍t lâng chōe-chōe kap in tâng chē toh.

(BCL) 利未為著伊辦大筵席佇兜，有抽餉的以及別人多多及同坐桌。

30

(THR) Hoat-lī-sài lâng kap in ê keng-ha̍k-sū tùi I ê ha̍k-seng nga̍uh-nga̍uh-liām, kóng, Lín siáⁿ-sū kap thiu-hiòng ê í-kı̍p pháiⁿ lâng lim-chia̍h ah?

(BCL) 法利賽人及的經學士對伊的學生耦耦唸講：「恁啥事及抽餉的以及歹人飲食啊？」

31

(THR) Iâ-so͘ ìn kóng, Ióng-chòng ê lâng bô khiàm-ēng i-seng, nā-sī phòa-pīⁿ ê lâng chiū tio̍h;

(BCL) 耶穌應講：「勇壯的人無欠用醫生；若是破病的人就著。

32

(THR) góa lâi m̄ sī beh chio gī lâng, sī beh chio pháiⁿ lâng lâi hóan-hóe.

(BCL) 我來呣是欲招義人，是欲召歹人來反悔。」

33

(THR) In tùi I kóng, Iok-hān ê ha̍k-seng ta̍uh-ta̍uh kìm-chia̍h kî-tó; Hoat-lī-sài ê ha̍k-seng iā sī án-ni; nā-sī lí ê ha̍k-seng iā lim iā chia̍h.

(BCL) 對伊講：「約翰的學生沓沓禁食祈禱，法利賽的學生也是按呢；若是你的學生也飲也食。」

34

(THR) Iâ-so͘ tùi in kóng, Sin-kiáⁿ-sài kap hō-chhōa ê lâng saⁿ-kap tī-teh, kiám ōe hō͘ hō-chhōa ê lâng kìm-chia̍h mah?

(BCL) 耶穌對講：「新子婿及賀娶的人相及佇，豈會互賀娶的人禁食嗎？

35

(THR) Nā-sī jı̍t-chí beh kàu, sin-kiáⁿ-sài tùi in tiong-kan bô--khì; tī hiah ê jı̍t in chiū beh kìm-chia̍h.

(BCL) 若是日子欲到，新子婿對中間無去，佇許個日就欲禁食。」

36

(THR) Koh ēng phì-jū tùi in kóng, Bô lâng thiah sin saⁿ lâi pó͘ kū saⁿ; nā án-ni, chiū thiah-phòa sin saⁿ, koh só͘ pó͘ hit tè sin ê bô ha̍h tī kū ê.

(BCL) 閣用譬喻對講：「無人拆新衫來補舊衫；若按呢，就拆破新衫，閣所補彼塊新的無合佇舊的。

37

(THR) Iā bô lâng ēng sin chiú tóe tī kū phê-lông; nā án-ni, chiū sin chiú beh piak-lı̍h phê-lông, chiú lāu, lông iā phah pháiⁿ.

(BCL) 也無人用新酒貯佇舊皮囊；若按呢，就新酒欲爆裂皮囊，酒漏，囊也拍歹。

38

(THR) To̍k-to̍k sin chiú tio̍h jı̍p tī sin ê phê-lông.

(BCL) 獨獨新酒著入佇新的皮囊。

39

(THR) Koh bô lâng lim kū chiú iā ài hit ê sin ê; in-ūi kóng, Kū ê sī hó.

(BCL) 閣無人飲舊酒也愛彼個新的；因為講舊的是好。」

Bible Color Mark

• 台語漢字羅馬本
• 巴克禮全羅