路加福音 第 2 章

1

(THR) Tng hit sî Kai-sat A-kó͘-sū-tok ū chhut chiàu, bēng-lēng thiⁿ-ē lóng chō ke-kah.

(BCL) 當彼時，該撒亞古士督有出詔，命令天下攏造家甲。

2

(THR) Che thâu chı̍t pái ê ke-kah sī Ku-lí-liú chòe Sū-lī-a chóng-tok ê sî lâi chòe ê.

(BCL) 這頭一擺的家甲，是居里扭做敘利亞總督的時來做的。

3

(THR) Chèng lâng khì chō ke-kah, ta̍k lâng tò-khì pún siâⁿ.

(BCL) 眾人去造家甲，逐人倒去本城。

4

(THR) Iok-sek ê sè-hē sio̍k tī Tāi-pı̍t ê ke, só͘-í tùi Ka-lī-lī ê Ná-sat-le̍k siâⁿ chiūⁿ-khì Iû-thài, kàu Tāi-pı̍t ê siâⁿ, miâ kiò Pek-lī-hêng ê, beh kap i só͘ phèng-tiāⁿ ê Má-lī-a saⁿ-kap chō ke-kah;

(BCL) 約瑟的世系屬佇大衛的家，所以對加利利的拿撒勒城上去猶太，到大衛的城，名叫伯利恆的，

5

(THR) hit sî Má-lī-a í-keng ū sin-īn.

(BCL) 欲及伊所聘定的馬利亞相及造家甲。彼時馬利亞已經有娠孕。

6

(THR) In tī hia ê sî seng-sán ê kî kàu.

(BCL) In佇遐的時生產的期到，

7

(THR) Chiū siⁿ thâu-chiūⁿ kiáⁿ, ēng pò͘ pau I, hō͘ I khùn tī chô-nı̍h; in-ūi kheh-kóan bô só͘-chāi thang iông-ún in.

(BCL) 就生頭上子，用布包伊，互伊睏佇槽裡，因為客館無所在通容允In。

8

(THR) Hit tōe-hng ū kò͘-iûⁿ ê tòa tī soaⁿ-nı̍h, mî-sî chiú-kiⁿ kò͘ in ê iûⁿ-kûn.

(BCL) 彼地方有顧羊的住佇山裡，暝時守更顧In的羊群。

9

(THR) Chú ê thiⁿ-sài khiā tī in ê sin-piⁿ, Chú ê êng-kng ûi-lûi chiò in; kò͘-iûⁿ ê tōa kiaⁿ.

(BCL) 主的天使徛佇In的身邊，主的榮光圍纍照In；顧羊的大驚。

10

(THR) Thiⁿ-sài kā in kóng, Bo̍h-tit kiaⁿ; in-ūi góa pò lín tōa hoaⁿ-hí ê hó siau-sit, hō͘ peh-sìⁿ lóng ū hūn;

(BCL) 天使給In講：「莫得驚！因為我報恁大歡喜的好消息，互百姓攏有份；

11

(THR) in-ūi kin-á-jı̍t tī Tāi-pı̍t ê siâⁿ í-keng ūi-tio̍h lín siⁿ chı̍t ê Chín-kiù-ê, chiū-sī Chú Ki-tok.

(BCL) 因為今仔日佇大衛的城，已經為著恁生一個拯救者，就是主基督。

12

(THR) Lín beh khòaⁿ-kìⁿ chı̍t ê eⁿ-á ēng pò͘ pau, khùn tī chô-nı̍h ê, chit-ê chiū-sī hō͘ lín chòe kì-hō.

(BCL) 恁欲看見一個嬰仔，用布包，睏佇槽裡的，此個就是互恁做記號。」

13

(THR) Hut-jiân ū chōe-chōe thian-peng kap hit ê thiⁿ-sài saⁿ-kap tī-teh, o-ló Siōng-tè, kóng,

(BCL) 忽然，有多多天兵及彼個天使相及佇teh謳咾上帝講：

14

(THR) Tī ke̍k kôaiⁿ ê ūi êng-kng kui tī Siōng-tè, Tōe-chiūⁿ hô-pêng tī I só͘ hoaⁿ-hí ê lâng ê tiong-kan.

(BCL) 佇極高的位榮光歸佇上帝！地上和平佇伊所歡喜的人的中間！

15

(THR) Chiah ê thiⁿ-sài lī-khui in chiūⁿ thiⁿ ê sî, kò͘-iûⁿ ê saⁿ-kap kóng, Taⁿ lán lâi khì Pek-lī-hêng, khòaⁿ só͘ chiâⁿ ê sū, chiū-sī Chú só͘ pò lán chai ê.

(BCL) 諸個天使離開In，上天的時，顧羊的相及講：「今咱來去伯利恆，看所成的事，就是主所報咱知的。」

16

(THR) Chiū kín-kín khì, chhē-tio̍h Má-lī-a kap Iok-sek, koh khòaⁿ-kìⁿ eⁿ-á khùn tī chô-nı̍h.

(BCL) 就緊緊去，尋著馬利亞及約瑟，閣看見嬰仔睏佇槽裡；

17

(THR) Khòaⁿ-liáu, chiū chiong thiⁿ-sài só͘ tùi in kóng chit ê eⁿ-á ê sū pò lâng chai.

(BCL) 看了，就將天使所對In講此個嬰仔的事報人知。

18

(THR) Thiaⁿ-kìⁿ ê lâng lóng kî-kòai kò͘-iûⁿ ê só͘ tùi in kóng ê sū.

(BCL) 聽見的人攏奇怪顧羊的所對In講的事。

19

(THR) To̍k-to̍k Má-lī-a chiong chiah ê ōe kì tiâu-tiâu, sim-lāi siông-siông teh siūⁿ.

(BCL) 獨獨馬利亞將諸個話記住住，心內常常teh想。

20

(THR) Kò͘-iûⁿ ê tò-khì, ūi-tio̍h só͘ thiaⁿ-kìⁿ ê, só͘ khòaⁿ-kìⁿ ê, chiū-sī thiⁿ-sài só͘ tùi in kóng ê, lâi kui êng-kng o-ló Siōng-tè.

(BCL) 顧羊的倒去，為著所聽見的所看見的，就是天使所對In講的，來歸榮光謳咾上帝。

21

(THR) Kàu tē poeh jı̍t, kā eⁿ-á kiâⁿ kat-lé ê kî, chiū hō I ê miâ kiò Iâ-so͘, chiū-sī I bē tâu-thai ê sî thiⁿ-sài só͘ hō ê.

(BCL) 到第八日，給嬰仔行割禮的期，就號伊的名叫耶穌；就是伊未投胎的時，天使所號的。

22

(THR) Chiàu Mô͘-se ê lu̍t-lē, in chheng-khì ê jı̍t í-keng móa, chiū phō eⁿ-á chiūⁿ Iâ-lō͘-sat-léng, beh hiàn hō͘ Chú,

(BCL) 照摩西的律例，清氣的日已經滿，就抱嬰仔上耶路撒冷，欲獻互主。（

23

(THR) (chiàu Chú ê lu̍t-lē só͘ kì-chài kóng, Kìⁿ-nā thâu-chiūⁿ ê ta-po͘-kiáⁿ beh chheng chòe sèng, kui tī Chú),

(BCL) 照主的律例所記載講：「見若頭上的查甫子欲稱做聖歸佇主；」）

24

(THR) iā beh hiàn-chè, chiàu Chú ê lu̍t-lē só͘ kóng, Ēng chı̍t tùi ê ka-chui, á-sī nn̄g chiah chíⁿ-á-kiáⁿ.

(BCL) 也欲獻祭，照主的律例所講，用一對的鳩鵻，抑是二隻鴿仔子。

25

(THR) Tú-tn̄g tī Iâ-lō͘-sat-léng ū chı̍t lâng, miâ kiò Se-biān; chit lâng gī koh kèng-khiân, pêng-sî him-bō͘ hit ê an-ùi Í-sek-lia̍t ê; Sèng Sîn tiàm tī i.

(BCL) 抵當佇耶路撒冷有一人，名叫西面；此人義閣敬虔，平時欣慕彼個安慰以色列的，聖神佇伊。

26

(THR) I bat tit-tio̍h Sèng Sîn chí-sī, chai i iáu-bē sí beh tāi-seng khòaⁿ-kìⁿ Chú ê Ki-tok.

(BCL) 伊曾得著聖神指示，知伊猶未死欲代先看見主的基督。

27

(THR) I hō͘ Sèng Sîn kám-tōng chiū jı̍p tiān; tú-á Iâ-so͘ ê pē-bú phō eⁿ-á jı̍p-lâi, beh kā I chiàu lu̍t-hoat ê lē lâi kiâⁿ,

(BCL) 伊互聖神感動，就入殿，抵仔耶穌的父母抱嬰仔入來，欲給伊照律法的例來行。

28

(THR) hit sî Se-biān ēng chhiú chih eⁿ-á, o-ló Siōng-tè kóng,

(BCL) 彼時西面用手接嬰仔，謳咾上帝講：

29

(THR) Chú ah, taⁿ chiàu lí ê ōe teh tháu-pàng lí ê lô͘-po̍k An-jiân kè-sì.

(BCL) 主啊！今照你的話，解放你的奴僕安然過世；

30

(THR) In-ūi góa ê ba̍k-chiu í-keng khòaⁿ-kìⁿ lí ê chín-kiù,

(BCL) 因為我的目睭已經看見你的拯救

31

(THR) Chiū-sī lí só͘ pī-pān tī bān peh-sìⁿ ê bīn-chêng ê,

(BCL) --就是你所備辦佇萬百姓的面前的：

32

(THR) Chòe kng lâi chiò gōa-pang, Koh chòe lí Í-sek-lia̍t peh-sìⁿ ê êng-kng.

(BCL) 做光來照外邦，閣做你以色列百姓的榮光。

33

(THR) I ê pē kap I ê bú teh kî-kòai só͘ lūn eⁿ-á ê ōe;

(BCL) 伊的父及伊的母奇怪所論嬰仔的話。

34

(THR) Se-biān kā in chiok-hok, koh tùi I ê lāu-bú Má-lī-a kóng, Chit ê eⁿ-á siū siat-lı̍p beh hō͘ Í-sek-lia̍t tiong chōe-chōe lâng po̍ah-tó, chōe-chōe lâng khí-lâi, iā chòe siū piān-pok ê kì-hō;

(BCL) 西面給祝福，閣對伊的老母馬利亞講：「此個嬰仔受設立，欲互以色列中多多人跋倒，多多人起來；也做受辯駁的記號，

35

(THR) (koh lí ka-kī ê sim iā beh ū kiàm chha̍k thàu-kè); hō͘ chōe-chōe lâng sim-lāi ê liām-thâu ōe lō͘-chhut.

(BCL) 閣你家己的心也欲有劍鑿透過，互多多人心內的念頭會露出。」

36

(THR) Koh ū A-siat ê chi-phài, Hoat-lōe-le̍k ê cha-bó͘-kiáⁿ, A-ná, i sī chòe sian-ti, (nî-hè í-keng lāu, tùi chāi-sek-lú ê sî kè hō͘ tiōng-hu chhit nî kú,

(BCL) 閣有亞設的支派，法內力的查某子亞拿，伊是做先知，年歲已經老，對在室女的時，嫁互丈夫七年久，

37

(THR) chiū chiú-kóaⁿ poeh-cha̍p-sì nî), lóng bô lī-khui tiān, kìm-chia̍h kî-tó, mî-jı̍t ho̍k-sāi.

(BCL) 就守寡八十四年，攏無離開殿，禁食祈禱，暝日服事。

38

(THR) Tú-tú hit sî i chìn-chêng, chheng-siā Siōng-tè, tùi kìⁿ-nā him-bō͘ Iâ-lō͘-sat-léng tit-tio̍h sio̍k-hôe ê lâng kóng-khí chit ê eⁿ-á ê sū.

(BCL) 抵抵彼時，伊進前稱謝上帝，對見若欣慕耶路撒冷得著贖回的人講起此個嬰仔的事。

39

(THR) In chiàu Chú ê lu̍t-hoat kiâⁿ ta̍k hāng tāi-chì bêng-pe̍k, tò-khì Ka-lī-lī, kàu pún siâⁿ Ná-sat-le̍k.

(BCL) 照主的律法行逐項代誌明白，倒去加利利，到本城拿撒勒。

40

(THR) Eⁿ-á chiām-chiām tōa, jı̍t-jı̍t ióng-chòng, tì-hūi chhiong-móa; Siōng-tè ê un-tián kap I tī-teh.

(BCL) 嬰仔漸漸大，日日勇壯，智慧充滿，上帝的恩典及伊佇。

41

(THR) Ta̍k nî pôaⁿ-kè-choeh ê sî I ê pē-bú khì Iâ-lō͘-sat-léng.

(BCL) 逐年過節的時，伊的父母去耶路撒冷。

42

(THR) Kàu I cha̍p-jī hè ê sî, chiàu choeh-kî ê lē lóng chiūⁿ Iâ-lō͘-sat-léng.

(BCL) 到伊十二歲的時，照節期的例攏上耶路撒冷。

43

(THR) Choeh-kî í-keng bêng-pe̍k, in tò-khì ê sî, gín-ná Iâ-so͘ iáu tòa tī Iâ-lō͘-sat-léng; I ê pē-bú m̄ chai.

(BCL) 節期已經明白，倒去的時，囝仔耶穌猶住佇耶路撒冷。伊的父母呣知，

44

(THR) Phah-sǹg I tī tâng kiâⁿ ê lâng ê tiong-kan, kiâⁿ chı̍t jı̍t ê lō͘-chām; chiah tī chhin-chhek kap saⁿ-bat ê lâng ê tiong-kan chhē I.

(BCL) 拍算伊佇同行的人的中間，行一日的路站，才佇親戚及相識的人的中間尋伊，

45

(THR) Chhē bô tio̍h, chiū tò-tńg khì Iâ-lō͘-sat-léng chhē I.

(BCL) 尋無著，就倒轉去耶路撒冷尋伊。

46

(THR) Saⁿ jı̍t āu chhē-tio̍h I tī tiān-nı̍h, chē tī hiah ê sian-siⁿ ê tiong-kan, iā teh thiaⁿ, iā teh mn̄g.

(BCL) 三日後，尋著伊佇殿裡，坐佇許個先生的中間，也聽，也問。

47

(THR) Thiaⁿ I ê lâng lóng kî-kòai I ê chhang-miâ kap I ê ìn-tap.

(BCL) 聽伊的人，攏奇怪伊的聰明及伊的應答。

48

(THR) Pē-bú khòaⁿ-kìⁿ I chiū gông-ngia̍h; I ê lāu-bú tùi I kóng, Kiáⁿ ah, lí siáⁿ-sū án-ni khóan-thāi góan? lí khòaⁿ, lí ê pē kap góa siong-sim chhē lí.

(BCL) 父母看見伊就卬愕。伊的老母對伊講：「子啊！你啥事按呢款待阮？你看，你的父及我傷心尋你！」

49

(THR) I kā in kóng, Siáⁿ-sū chhē góa? Kiám m̄ chai góa eng-kai tī góa ê Pē ê chhù mah?

(BCL) 伊給講：「啥事尋我？豈呣知我應該佇我的父的厝嗎？」

50

(THR) In bōe hiáu-tit I só͘ kā in kóng ê ōe.

(BCL) 曉得，伊所給講的話。

51

(THR) Iâ-so͘ chiū kap in lo̍h-khì kàu Ná-sat-le̍k, lâi sêng-sūn in. I ê lāu-bú chiong chiah ê ōe lóng kì tī sim-nı̍h.

(BCL) 耶穌就及落去，到拿撒勒，來承順。伊的老母將諸個話攏記佇心裡。

52

(THR) Iâ-so͘ ê tì-hūi kap nî-hè ná ke-thiⁿ, Siōng-tè kap lâng ná thiàⁿ I.

(BCL) 耶穌的智慧及年歲愈加添，上帝及人愈疼伊。

Bible Color Mark

• 台語漢字羅馬本
• 巴克禮全羅