路加福音 第 10 章

1

(THR) Chiah ê tāi-chì liáu-āu, Chú koh siat-lı̍p chhit-cha̍p lâng, chı̍t tùi chı̍t tùi chhe in chòe-thâu khì I só͘ beh kàu ta̍k ê siâⁿ, ta̍k ê só͘-chāi;

(BCL) 諸個代誌了後，主閣設立七十人，一對一對差做頭去伊所欲到逐個城，逐個所在，

2

(THR) tùi in kóng, Thang siu-sêng ê sī chōe, chòe-kang ê sī chió; só͘-í lín tio̍h kiû hn̂g Chú pek kang khì kā I siu-sêng.

(BCL) 對講：「通收成的是多，做工的是少。所以，恁著求園主迫工去給伊收成。

3

(THR) Lín khì ah, góa chhe lín chhin-chhiūⁿ iûⁿ-á jı̍p chhâi-lông ê tiong-kan.

(BCL) 恁去啊！我差恁，親像羊仔入豺狼的中間。

4

(THR) Bo̍h-tit tòa chîⁿ-tē, bo̍h-tit tah-liân, bo̍h-tit ôe; lō͘-nı̍h bo̍h-tit kā lâng chhéng-an.

(BCL) 莫得帶錢袋，莫得褡褳，莫得鞋；路裡莫得給人請安。

5

(THR) Bô lūn jı̍p sím-mı̍h chhù, tio̍h tāi-seng kóng, Gōan chit ke pêng-an.

(BCL) 無論入甚麼厝，著代先講：『願此家平安。』

6

(THR) Siat-sú ū ha̍p-gî tit-tio̍h pêng-an ê lâng tī hia, chiū lín ê pêng-an ōe kàu tī i; nā bô, chiū tò kui tī lín.

(BCL) 設使有合宜得著平安的人佇遐，就恁的平安會到佇伊；若無，就倒歸佇恁。

7

(THR) Tio̍h tiàm tī hit ke, lim-chia̍h in só͘ kiong-kip ê, in-ūi chòe-kang lâng kham-tit tit-tio̍h i ê kang-chîⁿ; bo̍h-tit tùi chit ke sóa khì hit ke.

(BCL) 著佇彼家，飲食所供給的，因為做工人堪得得著伊的工錢；莫得對此家徙去彼家。

8

(THR) Bô lūn jı̍p sím-mı̍h siâⁿ, lâng nā chiap-la̍p lín, tio̍h chia̍h in só͘ pâi tī lín bīn-chêng ê.

(BCL) 無論入甚麼城，人若接納恁，著食所排佇恁面前的。

9

(THR) Siâⁿ-lāi ū pīⁿ ê, tio̍h i-hó in, sòa kā in kóng, Siōng-tè kok kūn lín lah.

(BCL) 城內有病的著醫好，續給講：『上帝國近恁啦。』

10

(THR) Nā-sī bô lūn jı̍p sím-mı̍h siâⁿ, lâng m̄ chiap-la̍p lín, chiū tio̍h chhut-khì in ê tōa koe-lō͘ kóng,

(BCL) 若是無論入甚麼城，人呣接納恁，就著出去的大街路，講：

11

(THR) Liân lín ê siâⁿ ê thô͘-hún, tiâu tī góan ê kha ê, góan iā tùi lín chhit-khì; chóng-sī lín tio̍h chai Siōng-tè ê kok kūn lah.

(BCL) 『連恁的城的土粉住佇阮的腳的，阮也對恁拭去。總是恁著知上帝的國近啦。』

12

(THR) Góa kā lín kóng, Tī hit jı̍t Só͘-to-má pí hit ê siâⁿ iáu khah khòai tam-tng.

(BCL) 我給恁講，佇彼日，所多瑪比彼個城猶卡快擔當！」

13

(THR) Ko-lia̍p-sìn ah, lí ū chai-ē! Pek-sài-tāi ah, lí ū chai-ē! in-ūi tī lín tiong-kan só͘ kiâⁿ chiah ê kôan-lêng, nā ū kiâⁿ tī Chhui-lô kap Se-tùn, chiū in chá-chá chhēng môa-saⁿ sám hé-hu chē-teh lâi hóan-hóe.

(BCL) 「哥拉汛啊，你有災禍！伯賽大啊，你有災禍！因為佇恁中間所行諸個權能若有行佇推羅及西頓，就早早穿麻衫摻火灰，坐來反悔。

14

(THR) Nā-sī tng sím-phòaⁿ ê sî Chhui-lô kap Se-tùn pí lín iáu khah khòai tam-tng.

(BCL) 若是當審判的時，推羅及西頓比恁猶卡快擔當！

15

(THR) Ka-pek-lông ah, lí kiám ōe tit-tio̍h kú-khí kàu thiⁿ mah? Lí beh chhia lo̍h im-hú.

(BCL) 迦百農啊，你豈會得著舉起到天嗎？你欲捙落陰府。

16

(THR) Thiaⁿ lín ê chiū-sī thiaⁿ góa; khì-sak lín ê chiū-sī khì-sak góa; khì-sak góa ê chiū-sī khì-sak chhe góa ê.

(BCL) 聽恁的就是聽我；棄拺恁的就是棄拺我；棄拺我的就是棄拺差我的。」

17

(THR) Hiah ê chhit-cha̍p lâng tò-tńg-lâi teh hoaⁿ-hí kóng, Chú ah, ēng lí ê miâ kúi iā hâng-ho̍k góan.

(BCL) 許個七十人倒轉來歡喜，講：「主啊！用你的名，鬼也降服阮。」

18

(THR) Iâ-so͘ kā in kóng, Góa ū khòaⁿ-kìⁿ Sat-tàn chhin-chhiūⁿ sih-nà tùi thiⁿ po̍ah-lo̍h-lâi.

(BCL) 耶穌給講：「我有看見撒但，親像閃爁對天跋落來。

19

(THR) Góa í-keng hō͘ lín ū kôan thang ta̍h chôa kap giat-á-thâng, koh iâⁿ-kè tùi-te̍k lóng-chóng ê khùi-la̍t; koat-tòan bô chı̍t hāng ōe hāi-tio̍h lín.

(BCL) 我已經互恁有權通踏蛇及蠍仔蟲，閣贏過對敵攏總的氣力，決斷無一項會害著恁。

20

(THR) Chóng-sī bo̍h-tit in-ūi chiah ê sîn hâng-ho̍k lín lâi hoaⁿ-hí; tio̍h in-ūi lín ê miâ kì tī thiⁿ-nı̍h lâi hoaⁿ-hí.

(BCL) 總是，莫得因為諸個神降服恁來歡喜，著因為恁的名記佇天裡來歡喜。」

21

(THR) Tng hit sî Iâ-so͘ tī Sèng Sîn khòai-lo̍k, kóng, Pē ah, thiⁿ tōe ê Chú, góa o-ló lí, in-ūi lí chiong chiah ê sū tùi tì-hūi chhang-miâ ê ū ún-ba̍t i, tùi sòe-kiáⁿ ū hián-bêng i; Pē ah, sī lah, in-ūi lí khòaⁿ án-ni chòe hoaⁿ-hí. Bān-hāng-ū tùi góa ê Pē lóng kau-hù góa;

(BCL) 當彼時，耶穌佇聖神快樂，講：「父啊，天地的主，我謳咾你！因為你將諸個事對智慧聰明的有隱密伊，對細子有顯明伊。父啊！是啦，因為你看按呢做歡喜。

22

(THR) Pē í-gōa bô chı̍t-ê bat Kiáⁿ sī chī-chūi; Kiáⁿ kap Kiáⁿ só͘ ài beh chí-sī ê í-gōa, iā bô chı̍t-ê bat Pē sī chī-chūi.

(BCL) 萬項有對我的父攏交付我；父以外，無一個識子是是誰；子及子所愛欲指示的以外，也無一個識父是是誰。」

23

(THR) Chiū o̍at-tńg-sin àm-chīⁿ tùi ha̍k-seng kóng, Khòaⁿ-kìⁿ lín só͘ khòaⁿ-kìⁿ ê, hiah ê ba̍k-chiu ū hok-khì.

(BCL) 就越轉身暗靜對學生講：「看見恁所看見的，許個目睭有福氣。

24

(THR) In-ūi góa kā lín kóng, Chêng ū chōe-chōe sian-ti kap kun-ông ài khòaⁿ lín só͘ khòaⁿ-kìⁿ ê, iā bô khòaⁿ-kìⁿ, ài thiaⁿ lín só͘ thiaⁿ-kìⁿ ê , iā bô thiaⁿ-kìⁿ.

(BCL) 因為我給恁講，前有多多，先知及君王愛看恁所看見的，也無看見，愛聽恁所聽見的，也無聽見。」

25

(THR) Ū chı̍t ê kà lu̍t-hoat ê sian-siⁿ khí-lâi chhì I kóng, Sian-siⁿ ah, góa tio̍h cháiⁿ-iūⁿ chòe chiah ōe tit-tio̍h éng-o̍ah?

(BCL) 有一個教律法的先生起來試伊，講：「先生啊！我著怎樣做才會得著永活？」

26

(THR) Iâ-so͘ tùi i kóng, Tī lu̍t-hoat ū kì sím-mı̍h? Lí tha̍k-liáu cháiⁿ-iūⁿ?

(BCL) 耶穌對伊講：「佇律法有記甚麼？你讀了怎樣？」

27

(THR) I ìn kóng, Lí tio̍h chīn-sim, chīn-sèng, chīn-la̍t, chīn-ì thiàⁿ Chú lí ê Siōng-tè; iā tio̍h thiàⁿ chhù-piⁿ chhin-chhiūⁿ ka-kī.

(BCL) 伊應講：「你著盡心、盡性、盡力、盡意疼主──你的上帝；也著疼厝邊親像家己。」

28

(THR) Iâ-so͘ kā i kóng, Lí só͘ ìn ê sī tio̍h; kiâⁿ chit-ê, chiū ōe o̍ah.

(BCL) 耶穌給伊講：「你所應的是著；行此個，就會活。」

29

(THR) Nā-sī i ài hián-bêng ka-kī chòe tio̍h, chiū tùi Iâ-so͘ kóng, Chī-chūi sī góa ê chhù-piⁿ?

(BCL) 若是伊愛顯明家己做著，就對耶穌講：「是誰是我的厝邊？」

30

(THR) Iâ-so͘ ìn i kóng, Ū chı̍t lâng tùi Iâ-lō͘-sat-léng lo̍h-khì Iâ-lī-ko, tú-tio̍h chha̍t pak i ê i-chiûⁿ, phah i kàu pòaⁿ-sí, pàng hē-teh, chòe in khì.

(BCL) 耶穌應伊講：「有一人對耶路撒冷落去耶利哥，抵著賊剝伊的衣裳，拍伊到半死，放下做去。

31

(THR) Chhàu-khám ū chı̍t ê chè-si tùi hit tiâu lō͘ lo̍h-khì, khòaⁿ-kìⁿ i, chiū siám tùi hit pêng kè-khì.

(BCL) 湊巧有一個祭司對彼條路落去，看見伊，就閃對彼旁過去。

32

(THR) Koh ū chı̍t ê Lī-bī lâng kàu hit só͘-chāi, khòaⁿ-liáu iû-gôan tùi hit pêng kè-khì.

(BCL) 閣有一個利未人到彼所在，看了，猶原對彼旁過去。

33

(THR) To̍k-to̍k ū chı̍t ê Sat-má-lī-a lâng kiâⁿ lō͘ tùi hia kè, khòaⁿ-kìⁿ chiū lîn-bín i;

(BCL) 獨獨有一個撒瑪利亞人行路對遐過，看見就憐憫伊，

34

(THR) kūn-óa, ēng chiú thîn tī i tio̍h-siong ê só͘-chāi, kā i pau-teh, chiong ka-kī ê cheng-siⁿ hō͘ i khiâ, chhōa i kàu kheh-tiàm, lâi chiàu-kò͘ i.

(BCL) 近倚用酒斟佇伊著傷的所在，給伊包，將家己的精牲互伊騎，導伊到客店來照顧伊。

35

(THR) Keh jı̍t the̍h gûn-á nn̄g-ê hō͘ tiàm-chú, kóng, Tio̍h chiàu-kò͘ chit lâng; só͘-hùi nā khah ke, góa tò-tńg-lâi chiah hêng lí.

(BCL) 隔日提銀仔二個，互店主，講：『著照顧此人；所費若卡加，我倒轉來才還你。』

36

(THR) Chit saⁿ lâng tiong lí phah-sǹg tá-lo̍h chı̍t-ê chòe tú-tio̍h chha̍t hit lâng ê chhù-piⁿ?

(BCL) 此三人中你拍算叨落一個做抵著賊彼人的厝邊？」

37

(THR) I kóng, Lîn-bín i ê, chiū-sī. Iâ-so͘ kā i kóng, Lí khì, chiàu án-ni lâi kiâⁿ.

(BCL) 伊講：「憐憫伊的就是。」耶穌給伊講：「你去照按呢來行。」

38

(THR) In kiâⁿ ê sî, Iâ-so͘ jı̍p chı̍t ê hiuⁿ-siā; ū chı̍t ê hū-jîn-lâng, miâ Má-tāi, chiap-la̍p I tī i ê chhù.

(BCL) 行的時，耶穌入一個鄉社。有一個婦仁人，名馬大，接納伊佇伊的厝。

39

(THR) I ū chı̍t ê chí-bē, kiò chòe Má-lī-a, chē tī Chú ê kha-ē, lâi thiaⁿ I ê ōe.

(BCL) 伊有一個姊妹，叫做馬利亞，坐佇主的腳下來聽伊的話。

40

(THR) Má-tāi in-ūi chiap-thāi in, tāi-chì chōe, sim bâng; chiū-kūn Iâ-so͘ kóng, Chú ah, góa ê chí-bē pàng góa ka-kī teh bong, lí bô iàu-kín mah? Tio̍h kah i lâi chān góa.

(BCL) 馬大因為接待，代誌多，心忙，就近耶穌，講：「主啊，我的姊妹放我家己摸，你無要緊嗎？著教伊來助我。」

41

(THR) Nā-sī Chú ìn kóng, Má-tāi ah, Má-tāi ah, lí ūi-tio̍h chōe-chōe tāi-chì khòa-lū hun-cha̍p;

(BCL) 若是主應講：「馬大啊！馬大啊！你為著多多代誌掛慮紛雜，

42

(THR) nā-sī só͘ khiàm-ēng ê sī chı̍t hāng nā-tiāⁿ; in-ūi Má-lī-a í-keng kéng-tio̍h hó ê hūn-gia̍h, chiū-sī bōe kā i chhiúⁿ-tit ê.

(BCL) 若是所欠用的是一項若定；因為馬利亞已經揀著好的份額，就是給伊搶得的。」

Bible Color Mark

• 台語漢字羅馬本
• 巴克禮全羅