士師記 第 9 章

1

(THR) Iâ-lō͘-pa-le̍k ê kiáⁿ A-pí-bí-le̍k kàu Sī-kiàm, kìⁿ i ê chèng bú-kū, tùi in kap i gōa-kong chôan-ke ê lâng kóng,

(BCL) 耶路巴力的子亞比米勒到示劍見伊的眾母舅，對及伊外公全家的人講：

2

(THR) Chhiáⁿ lín kóng hō͘ Sī-kiàm ê chèng-lâng thiaⁿ, khòaⁿ sī Iâ-lō͘-pa-le̍k ê chèng-kiáⁿ, chhit-cha̍p lâng kóan lín, á-sī chı̍t-lâng kóan lín, tah-lo̍h chı̍t-hāng khah-hó? Lín iā tio̍h siàu-liām góa sī lín ê kut-jio̍k.

(BCL) 「請恁講互示劍的眾人聽，看是耶路巴力的眾子七十人管恁，抑是一人管恁，叨落一項卡好？恁也著數念我是恁的骨肉。」

3

(THR) I hiah ê bú-kū chiū chiong chit ê it-chhè ê ōe, thòe i kóng hō͘ Sī-kiàm ê lâng thiaⁿ; in ê sim chiū kui-ǹg A-pí-bí-le̍k; in-ūi kóng, I sī lán ê hiaⁿ-tī.

(BCL) 伊許個母舅就將此個一切的話替伊講互示劍的人聽，的心就歸向亞比米勒。因為講：「伊是咱的兄弟」；

4

(THR) Chiū tùi Pa-le̍k-pí-lī-thó͘ ê chhù the̍h chhit-cha̍p ê gûn-á hō͘ A-pí-bí-le̍k; i chiū ēng i lâi kò͘ chiah ê bô hē-lo̍h ê húi-lūi; hiah ê lâng lâi tè i.

(BCL) 就對巴力比利土的厝提七十個銀仔互亞比米勒；伊就用伊來雇諸個無下落的匪類，許個人來隨伊。

5

(THR) I khì Gô-hut-la̍h kàu i ê lāu-pē ê ke, chiong Iâ-lō͘-pa-le̍k ê kiáⁿ, chiū-sī i ê hiaⁿ-tī chhit-cha̍p lâng, lóng thâi-sí tī chı̍t tè chio̍h-pôaⁿ-téng; chí-ū Iâ-lō͘-pa-le̍k ê soah-bé kiáⁿ Iok-thán lâu--teh; in-ūi i ū cháu khì bih.

(BCL) 伊去俄弗拉到伊的老父的家，將耶路巴力的子，就是伊的兄弟七十人攏死佇一塊石磐頂；只有耶路巴力的煞尾子約坦留，因為伊有走去匿。

6

(THR) Sī-kiàm lâng kap Bí-lô ê ke, lóng chū-chı̍p, khì siat-lı̍p A-pí-bí-le̍k chòe-ông, tī Sī-kiàm chhāi-thiāu ê siōng-chhiū-kha.

(BCL) 示劍人及米羅的家攏聚集，去設立亞比米勒做王，佇示劍祀柱的橡樹腳。

7

(THR) Ū lâng kā Iok-thán kóng chit ê sū, i chiū khì khiā tī Ki-lī-sim soaⁿ-téng, tōa-siaⁿ hoah, kā in kóng, Sī-kiàm lâng ah, lín tio̍h thiaⁿ góa ê ōe, hō͘ Siōng-tè iā thiaⁿ lín.

(BCL) 有人給約坦講此個事，伊就去徛佇基利心山頂，大聲喝給講：「示劍人啊，恁著聽我的話，互上帝也聽恁。

8

(THR) Bat ū chı̍t-pái, chiah ê chhiū lóng khì, beh siat-lı̍p chı̍t châng chhiū chòe in ê ông; chiū khì tùi kaⁿ-ná-chhiū kóng, Chhiáⁿ lí chòe góan ê ông.

(BCL) 曾有一擺諸個樹攏去，欲設立一欉樹做的王，就去對橄欖樹講：『請你做阮的王。』

9

(THR) Kaⁿ-ná-chhiū ìn kóng, Góa kiám thang pàng-sak góa ê iû, chiū-sī lâng só͘ ēng lâi chun-tiōng Siōng-tè kap lâng ê, khì iô tī chèng-chhiū ê téng-bīn mah?

(BCL) 橄欖樹應講：『我豈通放拺我的油就是人所用來尊重上帝及人的，去搖佇眾樹的頂面嗎？』

10

(THR) Chiah ê chhiū tùi bû-hoa-kó-chhiū kóng, Lí lâi, lâi chòe góan ê ông.

(BCL) 諸個樹對無花果樹講：『你來，來做阮的王。』

11

(THR) Bû-hoa-kó-chhiū ìn kóng, Góa kiám thang pàng-sak góa ê tiⁿ koh hó ê ké-chí, khì iô tī chèng-chhiū ê téng-bīn mah?

(BCL) 無花果樹應講：『我豈通放拺我的甜閣好的果子，去搖佇眾樹的頂面嗎？』

12

(THR) Chiah ê chhiū tùi phû-tô-chhiū kóng, Lí lâi, lâi chòe góan ê ông.

(BCL) 諸個樹對葡萄樹講：『你來，來做阮的王。』

13

(THR) Phû-tô-chhiū ìn kóng, Góa kiám thang pàng-sak góa ê sin-chiú, chiū-sī hō͘ Siōng-tè kap lâng hoaⁿ-hí-ê khì iô tī chèng-chhiū ê téng-bīn mah?

(BCL) 葡萄樹應講：『我豈通放拺我的新酒就是互上帝及人歡喜的，去搖佇眾樹的頂面嗎？』

14

(THR) Chiah ê chhiū tùi chhì-á kóng, Lí lâi, lâi chòe góan ê ông.

(BCL) 諸個樹對莿仔講：『你來，來做阮的王。』

15

(THR) Chhì-á ìn hiah ê chhiū kóng, Lín nā sı̍t-chāi siat-lı̍p góa chòe lín ê ông, chiū tio̍h siám-bih tī góa ê ìm-ńg-ē; nā m̄, gōan hé tùi chhì-á chhut, sio-bia̍t Lī-pa-lùn ê pek-hiuⁿ-chhiū.

(BCL) 莿仔應許個樹講：『恁若實在設立我做恁的王，就著閃匿佇我的蔭影下；若呣，願火對莿仔出，燒滅黎巴嫩的柏香樹。』

16

(THR) Taⁿ lín siat-lı̍p A-pí-bí-le̍k chòe-ông, nā chiàu sêng-sı̍t kong-gī lâi kiâⁿ, koh hó khóan-thāi Iâ-lō͘-pa-le̍k kap i ê ke, chiàu i ê chhiú só͘ tio̍h-bôa-ê pò-tap i;

(BCL) 「今恁設立亞比米勒做王，若照誠實公義來行閣好款待耶路巴力及伊的家，照伊的手所著磨的報答伊。

17

(THR) in-ūi góa ê lāu-pē bat phe-sí, ūi lín kau-chiàn, kiù lín thoat-lī Bí-tiân lâng ê chhiú;

(BCL) 因為我的老父曾拼死為恁交戰，救恁脫離米甸人的手。

18

(THR) lín kin-á-jı̍t khí-lâi kong-kek góa lāu-pē ê ke, thâi-sí i ê kiáⁿ, chhit-cha̍p lâng, tī chı̍t tè chio̍h-pôaⁿ-téng, koh siat-lı̍p i ê lú-pī ê kiáⁿ A-pí-bí-le̍k chòe Sī-kiàm lâng ê ông, in-ūi i sī lín ê hiaⁿ-tī;

(BCL) 恁今仔日起來攻擊我老父的家，死伊的子七十人佇一塊石磐頂，閣設立伊的女婢的子亞比米勒做示劍人的王；因為伊是恁的兄弟。

19

(THR) lín kin-á-jı̍t nā chiàu sêng-sı̍t kong-gī khóan-thāi Iâ-lō͘-pa-le̍k kap i ê ke, chiū lín thang tùi A-pí-bí-le̍k lâi hoaⁿ-hí, i iā thang tùi lín lâi hoaⁿ-hí;

(BCL) 恁今仔日若照誠實公義款待耶路巴力及伊的家，就恁通對亞比米勒來歡喜，伊也通對恁來歡喜；

20

(THR) nā bô, gōan hé tùi A-pí-bí-le̍k chhut, sio Sī-kiàm lâng kap Bí-lô ê ke; koh gōan hé tùi Sī-kiàm lâng kap Bí-lô ê ke chhut, sio A-pí-bí-le̍k.

(BCL) 若無，願火對亞比米勒出，燒示劍人及米羅的家，閣願火對示劍人及米羅的家出，燒亞比米勒。」

21

(THR) Iok-thán, in-ūi kiaⁿ i ê hiaⁿ-tī, chiū tô-cháu; cháu-khì bih tī Pí-jíⁿ, tiàm tī-hia.

(BCL) 約坦因為驚伊的兄弟，就逃走，走去匿佇比珥，踮佇遐。

22

(THR) A-pí-bí-le̍k kóan Í-sek-lia̍t saⁿ-nî.

(BCL) 亞比米勒管以色列三年。

23

(THR) Siōng-tè chhe pháiⁿ-sîn tī A-pí-bí-le̍k kap Sī-kiàm lâng ê tiong-kan. Sī-kiàm lâng chiū ēng khúi-chà khóan-thāi A-pí-bí-le̍k;

(BCL) 上帝差歹神佇亞比米勒及示劍人的中間，示劍人就用詭詐款待亞比米勒。

24

(THR) lâi pò-èng Iâ-lō͘-pa-le̍k chhit-cha̍p ê kiáⁿ só͘ siū ê chân-hāi; iā hō͘ in ê huih kui tī thâi-sí in ê, chiū-sī in ê hiaⁿ-tī A-pí-bí-le̍k, iā kui tī Sī-kiàm lâng, chiū-sī chān i ê chhiú thâi-sí i ê hiaⁿ-tī ê.

(BCL) 來報應耶路巴力七十個子所受的殘害也互的血歸佇死的，就是的兄弟亞比米勒，也歸佇示劍人就是助伊的手死伊的兄弟者。

25

(THR) Sī-kiàm lâng tī soaⁿ-téng siat bâi-ho̍k, lâi tng-tán i; kìⁿ-nā tùi hit tiâu lō͘ kè ê lâng, in chiū chhiúⁿ i; ū lâng chiū chiong che sū khì pò A-pí-bí-le̍k.

(BCL) 示劍人佇山頂設埋伏，來當等伊。見若對彼條路過的人，就搶伊。有人就將這事去報亞比米勒。

26

(THR) Í-piat ê kiáⁿ Ka-le̍k, kap i ê hiaⁿ-tī, lâi kàu Sī-kiàm; Sī-kiàm lâng lóng sìn-khò i.

(BCL) 以別的子迦勒及伊的兄弟來到示劍，示劍人攏信靠伊。

27

(THR) In chhut-khì hn̂g--nih, siu phû-tô-hn̂g, lâi ta̍h chiú, siat iân-sia̍h, jı̍p in ê siōng-tè ê biō lim-chia̍h, chiù-chó͘ A-pí-bí-le̍k.

(BCL) 出去園裡，收葡萄園，來踏酒，設筵席，入的上帝的廟飲食，咒詛亞比米勒。

28

(THR) Í-piat ê kiáⁿ Ka-le̍k kóng, A-pí-bí-le̍k sī chī-chūi, Sī-kiàm sī chī-chūi, hō͘ lán ho̍k-sāi i ah? i kiám m̄-sī Iâ-lō͘-pa-le̍k ê kiáⁿ mah? i ê kun-tiúⁿ kiám m̄-sī Se-pò͘-le̍k mah? lín tio̍h ho̍k-sāi Sī-kiàm ê lāu-pē Hap-bo̍at ê lâng; lán siáⁿ-sū ho̍k-sāi i ah?

(BCL) 以別的子迦勒講：「亞比米勒是是誰？示劍是是誰？互咱服事伊啊？伊豈呣是耶路巴力的子嗎？伊的軍長豈呣是西布勒嗎？恁著服事示劍的老父哈抹的人。咱啥事服事伊啊？

29

(THR) Gōan chiah ê peh-sìⁿ kui góa ê chhiú-ē, góa chiū tû A-pí-bí-le̍k; i chiū kā A-pí-bí-le̍k kóng, Ke-thiⁿ lí ê kun-peng chhut-lâi.

(BCL) 願諸個百姓歸我的手下，我就除亞比米勒。」伊就給亞比米勒講：「加添你的軍兵出來。」

30

(THR) Siâⁿ-siú Se-pò͘-le̍k thiaⁿ-kìⁿ Í-piat ê kiáⁿ Ka-le̍k ê ōe, chiū siū-khì;

(BCL) 城守西布勒聽見以別的子迦勒的話，就受氣，

31

(THR) àm-chīⁿ chhe lâng khì kìⁿ A-pí-bí-le̍k, kóng, Í-piat ê kiáⁿ Ka-le̍k kap i ê hiaⁿ-tī kàu Sī-kiàm, iú-he̍k siâⁿ-lāi ê peh-sìⁿ kong-kek lí;

(BCL) 暗靜差人去見亞比米勒，講：「以別的子迦勒及伊的兄弟到示劍，誘惑城內的百姓攻擊你。

32

(THR) só͘-í lí kap tè lí ê lâng, tio̍h thàu-mî khí-lâi, bâi-ho̍k tī chhân--nih;

(BCL) 所以你及隨你的人，著透暝起來，埋伏佇田裡。

33

(THR) chá-khí-sî, jı̍t tú-á chhut; lí tio̍h chá-chá khí-lâi, chhiong-óa kong siâⁿ; Ka-le̍k kap tè i ê lâng chhut-lâi kong-kek lí ê sî, lí chiū thang siòng ki-hōe lâi khóan-thāi in.

(BCL) 早起時日抵仔出，你著早早起來衝倚攻城。迦勒及隨伊的人出來攻擊你的時，你就通相機會來款待。」

34

(THR) A-pí-bí-le̍k kap tè i ê chèng-lâng thàu-mî khí-lâi, pun chòe sì-tūi, ǹg Sī-kiàm bâi-ho̍k.

(BCL) 亞比米勒及隨伊的眾人透暝起來，分做四隊，向示劍埋伏。

35

(THR) Í-piat ê kiáⁿ Ka-le̍k chhut-khì, khiā tī siâⁿ-mn̂g-kháu; A-pí-bí-le̍k kap tè ê lâng tùi bâi-ho̍k ê só͘-chāi khí-lâi.

(BCL) 以別的子迦勒出去，徛佇城門口。亞比米勒及隨的人對埋伏的所在起來。

36

(THR) Ka-le̍k khòaⁿ-kìⁿ hiah ê lâng, chiū tùi Se-pò͘-le̍k kóng, Khòaⁿ ah, ū lâng tùi soaⁿ-téng lo̍h--lâi. Se-pò͘-le̍k kóng, Lí khòaⁿ-kìⁿ soaⁿ ê iáⁿ, lia̍h-chòe sī lâng.

(BCL) 迦勒看見許個人，就對西布勒講：「看啊，有人對山頂落來。」西布勒講：「你看見山的影，掠做是人。」

37

(THR) Ka-le̍k koh kóng, Khòaⁿ ah, ū lâng tùi kôaiⁿ-tōe lo̍h-lâi, koh ū chı̍t-tūi tùi Bí-ok-nî-nî siōng-chhiū ê lō͘ chiūⁿ-lâi.

(BCL) 迦勒閣講：「看啊，有人對高地落來，閣有一隊對米惡尼尼橡樹的路上來。」

38

(THR) Se-pò͘-le̍k tùi i kóng, Lí bat kóng, A-pí-bí-le̍k sī chī-chūi, hō͘ lán ho̍k-sāi i, lí kóng chiah ê ōe ê chhùi tī tah-lo̍h? che kiám m̄-sī lí só͘ biáu-sī ê peh-sìⁿ mah? lí taⁿ tio̍h chhut-khì, kap in kau-chiàn.

(BCL) 西布勒對伊講：「你曾講，亞比米勒是是誰，互咱服事伊？你講諸個話的嘴佇叨落？這豈呣是你所藐視的百姓嗎？你今著出去，及交戰！」

39

(THR) Ka-le̍k chiū tùi Sī-kiàm lâng ê thâu-chêng chhut-khì, kap A-pí-bí-le̍k kau-chiàn.

(BCL) 迦勒就對示劍人的頭前出去，及亞比米勒交戰。

40

(THR) A-pí-bí-le̍k tui-kóaⁿ i; i tī i ê bīn-chêng tô-cháu, ū chōe-chōe lâng tio̍h-siong tó--teh, tı̍t-kàu siâⁿ-mn̂g-kháu.

(BCL) 亞比米勒追趕伊；伊佇伊的面前逃走，有多多人著傷倒，直到城門口。

41

(THR) A-pí-bí-le̍k tiàm tī A-ló͘-má; Se-pò͘-le̍k kóaⁿ Ka-le̍k kap i ê hiaⁿ-tī, m̄-chún i tiàm tī Sī-kiàm.

(BCL) 亞比米勒踮佇亞魯瑪。西布勒趕迦勒及伊的兄弟，呣准伊踮佇示劍。

42

(THR) Keh-jı̍t peh-sìⁿ chhut-khì kàu chhân--nih; ū lâng kā A-pí-bí-le̍k kóng.

(BCL) 隔日，百姓出去到田裡，有人給亞比米勒講；

43

(THR) I chiū chiong i ê lâng pun chòe saⁿ-tūi, bâi-ho̍k tī chhân--nih; khòaⁿ-kìⁿ Sī-kiàm lâng tùi siâⁿ--nih chhut-lâi, chiū khí-lâi kong-kek in, thâi in.

(BCL) 伊就將伊的人分做三隊，埋伏佇田裡，看見示劍人對城裡出來，就起來攻擊。

44

(THR) A-pí-bí-le̍k kap tè i hit chı̍t-tūi chhiong chìn-chêng, khiā tī siâⁿ-mn̂g-kháu; hit nn̄g-tūi tı̍t-tı̍t chhiong kàu chhân--nih hiah ê lâng, lâi thâi in.

(BCL) 亞比米勒及隨伊彼一隊衝進前，徛佇城門口；彼二隊直直衝到田裡許個人，來。

45

(THR) A-pí-bí-le̍k thong-jı̍t kong-kek siâⁿ; chhú hit ê siâⁿ, thâi-sí hí lāi-bīn ê peh-sìⁿ; thiah-húi hit ê siâⁿ, ēng iâm iā i.

(BCL) 亞比米勒通日攻擊城，取彼個城，死彼內面的百姓，拆毀彼個城，用鹽撒伊。

46

(THR) Tiàm tī Sī-kiàm tâi ê lâng thiaⁿ-kìⁿ, chiū siám-jı̍p Pa-le̍k-pí-lī-thó͘ ê chhù ê ōe-só͘.

(BCL) 踮佇示劍台的人聽見，就閃入巴力比利土的厝的衛所。

47

(THR) Ū lâng kā A-pí-bí-le̍k kóng, Sī-kiàm tâi ê lâng lóng chū-chı̍p tī chı̍t só͘-chāi.

(BCL) 有人給亞比米勒講：「示劍台的人攏聚集佇一所在。」

48

(THR) A-pí-bí-le̍k kap tè i ê lâng chiū lóng chiūⁿ Sat-bûn soaⁿ; A-pí-bí-le̍k chhiú the̍h pó͘-thâu, chhò chı̍t châng chhiū-ki, giâ tī keng-thâu-téng; tùi tè i ê lâng kóng, Lín khòaⁿ góa só͘-kiâⁿ-ê, iā tio̍h kín-kín o̍h góa lâi kiâⁿ.

(BCL) 亞比米勒及隨伊的人就攏上撒們山。亞比米勒手提斧頭，剉一欉樹枝，夯佇肩頭頂，對隨伊的人講：「恁看我所行的，也著緊緊學我來行。」

49

(THR) Chèng-lâng chiū ta̍k-ê chhò chı̍t-ki, lâi tè A-pí-bí-le̍k, chiong chhiū-ki thia̍p tī ōe-só͘, pàng-hé sio ōe-só͘ tī hiah ê lâng ê téng-bīn, tì-kàu Sī-kiàm tâi ê lâng lóng sí; lâm-lú iok-lio̍k chı̍t-chheng lâng.

(BCL) 眾人就逐個剉一枝，來隨亞比米勒，將樹枝疊佇衛所，放火燒衛所佇許個人的頂面，致到示劍台的人攏死，男女約略一千人。

50

(THR) A-pí-bí-le̍k khì kàu Thê-pī-su, chat-iâⁿ tī Thê-pī-su, lâi chhú i.

(BCL) 亞比米勒去到提備斯，紮營佇提備斯，來取伊。

51

(THR) Siâⁿ-lāi ū kian-kò͘ ê tâi; siâⁿ-lāi ê chèng-lâng, bô-lūn lâm-lú, lóng cháu-khì hia, koaiⁿ-mn̂g, chiūⁿ tâi-téng.

(BCL) 城內有堅固的台；城內的眾人，無論男女，攏走去遐，關門，上台頂。

52

(THR) A-pí-bí-le̍k kàu hit ê tâi kong-kek i, óa-kūn tâi-mn̂g, beh ēng hé sio i.

(BCL) 亞比米勒到彼個台攻擊伊，倚近台門，欲用火燒伊。

53

(THR) Ū chı̍t ê hū-jîn-lâng chiong chı̍t-tè téng-tún ê bō-chio̍h, tìm-tio̍h A-pí-bí-le̍k ê thâu-khak, phah-phòa i ê thâu-khak-óaⁿ;

(BCL) 有一個婦仁人將一塊頂礅的磨石，擲著亞比米勒的頭殼，拍破伊的頭殼碗。

54

(THR) i chiū kín-kín kiò kia̍h i ê kun-khì ê siàu-liân lâng, kā i kóng, Pu̍ih lí ê to thâi góa, bián-tit lâng kóng góa, I sī hū-jîn-lâng só͘ thâi-ê; siàu-liân lâng chiū kā i chha̍k-thàu, i chiū sí.

(BCL) 伊就緊緊叫抬伊的軍器的少年人，給伊講：「拔你的刀，我！免得人講我，伊是婦仁人所的。」少年人就給伊鑿透，伊就死。

55

(THR) Í-sek-lia̍t lâng khòaⁿ-kìⁿ A-pí-bí-le̍k í-keng sí, ta̍k-ê chiū tò-khì i ê só͘-chāi.

(BCL) 以色列人看見亞比米勒已經死，逐個就倒去伊的所在。

56

(THR) Án-ni, Siōng-tè pò-èng A-pí-bí-le̍k ǹg i ê lāu-pē só͘ kiâⁿ ê pháiⁿ, chiū-sī thâi-sí i ê hiaⁿ-tī chhit-cha̍p lâng.

(BCL) 按呢，上帝報應亞比米勒向伊的老父所行的歹，就是死伊的兄弟七十人。

57

(THR) Sī-kiàm lâng it-chhè ê pháiⁿ, Siōng-tè iā lóng pò-èng tī in ê thâu-khak-téng; Iâ-lō͘-pa-le̍k ê kiáⁿ Iok-thán ê chiù-chó͘ kui tī in ê téng-bīn.

(BCL) 示劍人一切的歹，上帝也攏報應佇的頭殼頂；耶路巴力的子約坦的咒詛歸佇　的頂面。

Bible Color Mark

• 台語漢字羅馬本
• 巴克禮全羅