士師記 第 2 章

1

(THR) Iâ-hô-hoa ê sù-chiá tùi Kiat-kah chiūⁿ kàu Pho-kim, kóng, Góa hō͘ lín tùi Ai-kı̍p chiūⁿ-lâi, chhōa lín kàu Góa tùi lín lia̍t-chó͘ chiù-chōa ê tōe; Góa iā bat kóng, só͘ kap lín lı̍p ê iok, Góa éng-óan bô ûi-pōe;

(BCL) 耶和華的使者對吉甲上到波金，講：「我互恁對埃及上來，導恁到我對恁列祖咒誓的地。我也曾講：『所及恁立的約我永遠無違背。

2

(THR) lín iā m̄-thang kap chit só͘-chāi khiā-khí ê peh-sìⁿ lı̍p-iok; tio̍h thiah-húi in ê tôaⁿ. Lín kéng-jiân m̄ thiaⁿ Góa ê ōe, sī cháiⁿ-iūⁿ án-ni kiâⁿ ah?

(BCL) 恁也呣通及此所在徛起的百姓立約，著拆毀的壇。恁竟然呣聽我的話！是怎樣按呢行啊？』

3

(THR) In-ūi án-ni Góa koh kóng, Góa bô beh tùi lín ê bīn-chêng kóaⁿ-chhut in, in beh chòe lín hia̍p-ē ê chhì, in ê siōng-tè beh chòe hāi lín ê lô-bāng.

(BCL) 因為按呢我閣講：『我無欲對恁的面前趕出；欲做恁脅下的茦。的上帝欲做害恁的羅網。』」

4

(THR) Iâ-hô-hoa ê sù-chiá tùi Í-sek-lia̍t chèng-lâng kóng chiah ê ōe ê sî, peh-sìⁿ chiū khui-siaⁿ thî-khàu;

(BCL) 耶和華的使者對以色列眾人講諸個話的時，百姓就開聲啼哭；

5

(THR) chiū hō hit só͘-chāi ê miâ kiò Pho-kim; in tī-hia hiàn-chè hō͘ Iâ-hô-hoa.

(BCL) 就號彼所在的名叫波金。佇遐獻祭互耶和華。

6

(THR) Iok-su-a í-keng chhe Í-sek-lia̍t lâng khì ê sî, in ta̍k-lâng kui in ê gia̍p, lâi tit-tio̍h in ê tōe.

(BCL) 約書亞已經差以色列人去的時，逐人歸的業，來得著的地。

7

(THR) Iok-su-a tī-teh ê jı̍t, kap Iok-su-a sí liáu-āu hiah ê khòaⁿ-kìⁿ Iâ-hô-hoa ūi Í-sek-lia̍t lâng só͘ kiâⁿ tōa-sū ê tióng-ló iáu tī-teh ê sî, peh-sìⁿ ho̍k-sāi Iâ-hô-hoa.

(BCL) 約書亞佇的日及約書亞死了後，許個看見耶和華為以色列人所行大事的長老猶佇的時，百姓服事耶和華。

8

(THR) Iâ-hô-hoa ê lô͘-po̍k, Lùn ê kiáⁿ Iok-su-a, chı̍t-pah it-cha̍p hè, chiū sí.

(BCL) 耶和華的奴僕、嫩的子約書亞，一百一十歲就死。

9

(THR) In chiū bâi-chòng i tī i ê gia̍p ê kài-lāi, chiū-sī tī Í-hoat-liân soaⁿ-tōe ê Têng-ná-hi-lia̍t, tī Ka-sı̍t soaⁿ ê pak--sì.

(BCL) 就埋葬伊佇伊的業的界內，就是佇以法蓮山地的亭拿希烈，佇迦實山的北勢。

10

(THR) Hit-tāi ê lâng lóng tò-chó͘; í-āu koh chı̍t-tāi ê lâng heng-khí, m̄-chai Iâ-hô-hoa, iā m̄-chai ūi Í-sek-lia̍t lâng só͘ kiâⁿ ê sū.

(BCL) 彼代的人攏倒祖。以後閣一代的人興起，呣知耶和華，也呣知為以色列人所行的事。

11

(THR) Í-sek-lia̍t lâng kiâⁿ Iâ-hô-hoa khòaⁿ-chòe pháiⁿ ê sū, khì ho̍k-sāi Pa-le̍k;

(BCL) 以色列人行耶和華看做歹的事，去服事巴力，

12

(THR) khì-sak in lia̍t-chó͘ ê Siōng-tè Iâ-hô-hoa, chiū-sī chhōa in chhut Ai-kı̍p tōe ê; khì tè pa̍t ê siōng-tè, chiū-sī sì-ûi hiah ê peh-sìⁿ ê siōng-tè kūi-pài in, lâi jiá Iâ-hô-hoa ê tōa siū-khì.

(BCL) 棄拺列祖的上帝──耶和華就是導出埃及地的，去隨別個上帝，就是四圍許個百姓的上帝，跪拜，來惹耶和華的大受氣；

13

(THR) In iā khì-sak Iâ-hô-hoa, khì ho̍k-sāi Pa-le̍k kap A-su-tha-lio̍k.

(BCL) 也棄拺耶和華，去服事巴力及亞斯他錄。

14

(THR) Iâ-hô-hoa siū-khì Í-sek-lia̍t ê lâng, chiong in kau tī chhiúⁿ-lia̍h in ê lâng ê chhiú, in chiū chhiúⁿ in; I koh bōe in hō͘ sì-ûi tùi-te̍k ê chhiú; tì-kàu in tī in ê tùi-te̍k ê thâu-chêng bô koh khiā-ōe-tiâu;

(BCL) 耶和華受氣以色列的人，將交佇搶掠的人的手，就搶，伊閣賣互四圍對敵的手，致到佇的對敵的頭前無閣徛會住。

15

(THR) in bô-lūn khì toh-lo̍h, Iâ-hô-hoa chhun-chhiú kàng chai-ē hō͘ in, chiàu Iâ-hô-hoa só͘ kóng ê ōe, koh chiàu Iâ-hô-hoa tùi in só͘ chiù-chōa ê; in chiū ke̍k khùn-khó͘.

(BCL) 無論去叨落，耶和華伸手降災禍互，照耶和華所講的話，閣照耶和華對所咒誓的；就極困苦。

16

(THR) Iâ-hô-hoa chiū heng-khí sū-su; in chiū kiù peh-sìⁿ thoat-lī chhiúⁿ-lia̍h in ê lâng ê chhiú.

(BCL) 耶和華就興起士師，就救百姓脫離搶掠的人的手。

17

(THR) Chóng-sī in bô thiaⁿ-thàn in ê sū-su, kéng-jiân kiâⁿ siâ-îm, tè pa̍t ê siōng-tè lâi kūi-pài in; in ê lia̍t-chó͘ thàn Iâ-hô-hoa ê bēng-lēng só͘ kiâⁿ ê lō͘, in kín-kín oai-chho̍ah i, bô chiàu án-ni kiâⁿ.

(BCL) 總是無聽趁的士師，竟然行邪淫，隨別個上帝來跪拜，的列祖趁耶和華的命令所行的路，緊緊歪斜伊無照按呢行。

18

(THR) Iâ-hô-hoa kā in heng-khí sū-su ê sî, Iâ-hô-hoa chiū kap sū-su tī-teh; iā tī sū-su o̍ah tī--teh it-chhè ê jı̍t, kiù in thoat-lī tùi-te̍k ê chhiú; in in-ūi siū ap-chè khó͘-chhó͘, chiū thó͘-khùi, só͘-í Iâ-hô-hoa chiū thè-hóe.

(BCL) 耶和華給興起士師的時，耶和華就及士師佇。也佇士師活佇一切的日，救脫離對敵的手。因為受壓制苦楚，就吐氣，所以耶和華就退悔。

19

(THR) Kàu sū-su sí-liáu, in chiū o̍at-tńg khì kiâⁿ, pí in ê pē-kong koh khah-pháiⁿ, tè pa̍t ê siōng-tè lâi ho̍k-sāi in, kūi-pài in, lóng bô kóe in ê só͘-kiâⁿ kap in kò͘-chip ê lō͘.

(BCL) 到士師死了，就越轉去行，比的父公閣卡歹，隨別個上帝來服事跪拜，攏無改的所行及固執的路。

20

(THR) Iâ-hô-hoa chiū siū-khì Í-sek-lia̍t lâng, kóng, In-ūi chit ê peh-sìⁿ ûi-pōe Góa ê iok, chiū-sī Góa só͘ bēng-lēng in ê lia̍t-chó͘ ê, iā bô thiaⁿ-thàn Góa ê ōe;

(BCL) 耶和華就受氣以色列人。講：「因為此個百姓違背我的約就是我所命令的列祖的，也無聽趁我的話，

21

(THR) só͘-í Iok-su-a sí ê sî só͘ chhun ê ta̍k-cho̍k, í-āu Góa bô beh koh tī in ê bīn-chêng kóaⁿ-chhut chı̍t-cho̍k;

(BCL) 所以約書亞死的時所剩的逐族，以後我無欲閣佇的面前趕出一族，

22

(THR) thang ēng chiah-ê lâi chhì-giām Í-sek-lia̍t lâng, khòaⁿ in khéng chip-siú Iâ-hô-hoa ê tō-lō͘ lâi kiâⁿ i, chhin-chhiūⁿ in ê lia̍t-chó͘ bat siú i, á-bô.

(BCL) 通用諸個來試驗以色列人，看肯執守耶和華的道路來行伊，親像的列祖曾守伊抑無。」

23

(THR) Só͘-í Iâ-hô-hoa lâu chiah ê cho̍k, bô kín-kín kóaⁿ in chhut, iā bô chiong in kau tī Iok-su-a ê chhiú.

(BCL) 所以耶和華留諸個族，無緊緊趕出，也無將交佇約書亞的手。

Bible Color Mark

• 台語漢字羅馬本
• 巴克禮全羅