士師記 第 18 章

1

(THR) Hit-sî Í-sek-lia̍t tiong bô ông; hit-sî Tàn ê lâng ê chi-phài chhē tōe chòe-gia̍p thang khiā-khí; in-ūi kàu hit-jı̍t, tī Í-sek-lia̍t chi-phài-tiong, in iáu-bē tit-tio̍h gia̍p.

(BCL) 彼時，以色列中無王。彼時但的人的支派尋地做業通徛起；因為到彼日，佇以色列支派中猶未得著業。

2

(THR) Tàn ê lâng tùi Só-la̍h kap Í-sı̍t-tô, chhe pún-cho̍k, chèng peh-sìⁿ tiong, gō͘ ê ióng-sū, khì thau-khòaⁿ hit ê tōe lâi chhâ-khó, hoan-hù in kóng, Lín khì chhâ-khó hit ê tōe; in lâi kàu Í-hoat-liân soaⁿ, jı̍p Bí-ka ê chhù, chiū hioh tī-hia.

(BCL) 但的人對瑣拉及以實陶差本族眾百姓中五個勇士，去偷看彼個地來查考，吩咐講：「恁去查考彼個地。」來到以法蓮山，入米迦的厝，就歇佇遐。

3

(THR) In kūn Bí-ka ê chhù, jīn-tio̍h hit ê siàu-liân Lī-bī lâng ê siaⁿ-im, chiū jı̍p-khì mn̄g i, Chī-chūi chhōa lí lâi chia? lí tī-chia chòe sím-mı̍h? lí tī-chia tit-tio̍h sím-mı̍h?

(BCL) 近米迦的厝，認著彼個少年利未人的聲音，就入去問伊：「是誰導你來遮？你佇遮做甚麼？你佇遮得著甚麼？」

4

(THR) I kóng, Bí-ka khóan-thāi góa án-ni, án-ni; i ū chhiàⁿ góa, góa chòe i ê chè-si.

(BCL) 伊講：「米迦款待我按呢按呢，伊有倩我，我做伊的祭司。」

5

(THR) In kā i kóng, Chhiáⁿ lí mn̄g Siōng-tè, hō͘ góan chai góan só͘ teh kiâⁿ ê lō͘, heng-thong á-bô?

(BCL) 給伊講：「請你問上帝，互阮知阮所行的路，亨通抑無？」

6

(THR) Chè-si kā in kóng, Lín thang pêng-an khì; lín só͘ kiâⁿ ê lō͘ sī tī Iâ-hô-hoa ê bīn-chêng.

(BCL) 祭司給講：「恁通平安去，恁所行的路是佇耶和華的面前。」

7

(THR) Gō͘-lâng chiū khí-sin, lâi kàu La̍h-ek, khòaⁿ-kìⁿ hia ê peh-sìⁿ, an-jiân khiā-khí, pêng-an, bô khòa-lū, chhin-chhiūⁿ Se-tùn lâng chı̍t-iūⁿ; tī-hia bô ū chiáng-kôan ēng sím-mı̍h sū lâi kiáu-jiáu in, in lī-khui Se-tùn lâng hn̄g-hn̄g, bô kap pa̍t-lâng óng-lâi.

(BCL) 五人就起身，來到拉億，看見遐的百姓安然徛起平安無掛慮，親像西頓人一樣。佇遐無有掌權用甚麼事來攪擾；離開西頓人遠遠，無及別人往來。

8

(THR) Gō͘-lâng tò-lâi kàu Só-la̍h Í-sı̍t-tô in hiaⁿ-tī hia; hiaⁿ-tī mn̄g in kóng, Lín ū sím-mı̍h ōe?

(BCL) 五人倒來到瑣拉、以實陶，兄弟遐；兄弟問講：「恁有甚麼話？」

9

(THR) In ìn kóng, Khí-lâi, lán chiūⁿ-lâi khì kong-kek in, in-ūi góan í-keng khòaⁿ hit ê tōe; khòaⁿ ah, hit ê tōe chin-hó; lín siáⁿ-sū tiām-tiām? tio̍h lâi khì jı̍p, tit-tio̍h hit ê tōe chòe-gia̍p, m̄-thang iân-chhiân.

(BCL) 應講：「起來，咱上來去攻擊！因為阮已經看彼個地，看啊，彼個地真好。恁啥事恬恬？著來去入，得著彼個地做業，呣通延延。

10

(THR) Lín kàu hia, beh khòaⁿ an-jiân khiā-khí ê peh-sìⁿ, só͘-chāi iā khui-khoah; Siōng-tè í-keng chiong hit só͘-chāi kau tī lín ê chhiú; tōe-chiūⁿ só͘ ū ê mı̍h, hit só͘-chāi bô khiàm chı̍t-hāng.

(BCL) 恁到遐，欲看安然徛起的百姓，所在也開闊。上帝已經將彼所在交佇恁的手；地上所有的物，彼所在無欠一項。」

11

(THR) Tùi án-ni Tàn cho̍k ê la̍k-pah lâng, ta̍k-ê tòa kun-khì, tùi Só-la̍h kap Í-sı̍t-tô chìn-chêng khì.

(BCL) 對按呢但族的六百人，逐個帶軍器，對瑣拉及以實陶進前去，

12

(THR) In chiūⁿ-khì chat-iâⁿ tī Iû-tāi ê Ki-lia̍t-iâ-lîm; só͘-í kiò chit só͘-chāi miâ Má-hap-lī-tàn, kàu kin-á-jı̍t; khòaⁿ ah, che sī tī Ki-lia̍t-iâ-lîm ê āu-bīn.

(BCL) 上去紮營佇猶大的基列耶琳。所以叫此所在名瑪哈呢但，到今仔日。看啊，這是佇基列耶琳的後面。

13

(THR) In tùi-hia khì Í-hoat-liân soaⁿ-tōe, kàu Bí-ka ê chhù.

(BCL) 對遐去以法蓮山地，到米迦的厝。

14

(THR) Chiông-chêng thau-khòaⁿ La̍h-ek tōe ê gō͘-lâng, kā in ê hiaⁿ-tī kóng, Chiah ê chhù-lāi ū í-hut-tek, kap ke-lāi ngó͘-siōng, kap tiau-khek ê siōng, chù ê siōng, lín chai mah? Taⁿ lín tio̍h siūⁿ, khòaⁿ beh cháiⁿ-iūⁿ chòe.

(BCL) 從前偷看拉億地的五人給的兄弟講：「諸個厝內有以弗得及家內偶像，及雕刻的像鑄的像，恁知嗎？今恁著想看欲怎樣做。」

15

(THR) In chiū oat-khì hia, kàu hit ê siàu-liân ê Lī-bī lâng ê chhù, chiū-sī Bí-ka ê chhù, mn̄g i pêng-an.

(BCL) 就越去遐，到彼個少年的利未人的厝，就是米迦的厝問伊平安。

16

(THR) Tàn cho̍k hiah ê la̍k-pah lâng tòa kun-khì, lóng khiā tī mn̂g-kháu.

(BCL) 但族許個六百人帶軍器，攏徛佇門口。

17

(THR) Thau-khòaⁿ tōe ê gō͘-lâng chiū jı̍p-khì, chiong tiau-khek ê siōng, í-hut-tek, ke-lāi ê siōng, kap chù ê siōng lóng the̍h-khì; chè-si kap tòa kun-khì ê la̍k-pah lâng saⁿ-kap khiā tī mn̂g-kháu.

(BCL) 偷看地的五人就入去，將雕刻的像、以弗得、家內的像、及鑄的像，攏提去。祭司及帶軍器的六百人，相及徛佇門口。

18

(THR) Hí gō͘-lâng jı̍p Bí-ka ê chhù, the̍h tiau-khek ê ngó͘-siōng, í-hut-tek, ke-lāi ê ngó͘-siōng, kap chù ê siōng, chè-si chiū mn̄g in kóng, Lín chòe sím-mı̍h ah?

(BCL) 彼五人入米迦的厝，提雕刻的偶像、以弗得、家內的偶像，及鑄的像，祭司就問講：「恁做甚麼啊？」

19

(THR) In ìn kóng, Bo̍h-tit chòe-siaⁿ, ēng chhiú ng-chhùi, tè góan lâi khì, chòe góan ê pē, chòe góan ê chè-si; lí chòe chı̍t-lâng ê ke ê chè-si khah-hó, á-sī chòe Í-sek-lia̍t chı̍t chi-phài chı̍t-cho̍k ê chè-si khah-hó ah?

(BCL) 應講：「莫得做聲，用手掩嘴，隨阮來去！做阮的父、做阮的祭司。你做一人的家的祭司卡好？抑是做以色列一支派一族的祭司卡好啊？」

20

(THR) Chè-si sim hoaⁿ-hí, chiū the̍h í-hut-tek, kap ke-lāi ê ngó͘-siōng, kap tiau-khek ê siōng, kiâⁿ tī peh-sìⁿ ê tiong-kan.

(BCL) 祭司心歡喜，就提以弗得及家內的偶像，及雕刻的像，行佇百姓的中間。

21

(THR) In chiū o̍at-tńg-sin lī-khui hia, hō͘ gín-ná, cheng-siⁿ, hè-châi, chòe thâu-chêng.

(BCL) 就越轉身離開遐，互囝仔、精牲、貨財做頭前。

22

(THR) Lī-khui Bí-ka ê chhù chám-jiân hn̄g, Bí-ka hiah ê chhù-piⁿ lóng chū-chı̍p, tui-kóaⁿ Tàn ê lâng; âu-kiò Tàn ê lâng.

(BCL) 離開米迦的厝嶄然遠，米迦許個厝邊攏聚集，追趕但的人，喉叫但的人。

23

(THR) Tàn ê lâng o̍at-thâu khòaⁿ, mn̄g Bí-ka kóng, Lí chū-chı̍p hiah ê lâng lâi, sī sím-mı̍h tāi-chì ah?

(BCL) 但的人越頭看問米迦講：「你聚集許個人來是甚麼代誌啊？」

24

(THR) I kóng, Góa só͘ chng ê siōng-tè kap chè-si, lín lóng tòa-khì, góa iáu ū chhun sím-mı̍h? cháiⁿ-iūⁿ iáu mn̄g góa kóng, Lí sím-mı̍h tāi-chì ah?

(BCL) 伊講：「我所妝的上帝及祭司恁攏帶去，我猶有剩甚麼？怎樣猶問我講『你甚麼代誌』啊？」

25

(THR) Tàn ê lâng kā i kóng, Lí m̄-thang hō͘ góan thiaⁿ-kìⁿ lí ê siaⁿ, kiaⁿ-liáu sò-sèng ê lâng lâi kāng lín, tì-kàu lí kap chôan-ke lóng sit-lo̍h sìⁿ-miā.

(BCL) 但的人給伊講：「你呣通互阮聽見你的聲，驚了躁性的人來共恁，致到你及全家攏失落生命。」

26

(THR) Tàn ê lâng chòe in kiâⁿ; Bí-ka khòaⁿ-kìⁿ in pí i khah-kiông, chiū o̍at-tńg-sin tò-khì i ê chhù.

(BCL) 但的人做行。米迦看見比伊卡強，就越轉身倒去伊的厝。

27

(THR) In tòa Bí-ka só͘-chòe-ê, kap i só͘ ū ê chè-si, kàu La̍h-ek, khòaⁿ-kìⁿ an-jiân bô khòa-lū ê peh-sìⁿ, chiū ēng to thâi-sí in, koh pàng hé sio hit ê siâⁿ;

(BCL) 帶米迦所做的及伊所有的祭司到拉億，看見安然無掛慮的百姓，就用刀死，閣放火燒彼個城，

28

(THR) iā bô lâng chín-kiù, in-ūi lī-khui Se-tùn chin hn̄g, in koh bô kap pa̍t-lâng óng-lâi; hit ê siâⁿ tī hit ê óa-kūn Pek-lī-ha̍p ê soaⁿ-kok.

(BCL) 也無人拯救；因為離開西頓真遠，閣無及別人往來。彼個城佇彼個倚近伯利合的山谷。

29

(THR) Tàn ê lâng koh tī-hia khí siâⁿ lâi khiā-khí; chiàu in chó͘-kong Í-sek-lia̍t ê kiáⁿ Tàn ê miâ, kiò hit ê siâⁿ miâ Tàn; hit ê siâⁿ khí-thâu miâ-kiò La̍h-ek.

(BCL) 但的人閣佇遐起城來徛起，照祖公以色列的子但的名，叫彼個城名但；彼個城起頭名叫拉億。

30

(THR) Tàn ê lâng chiū ūi ka-kī chhāi hit ê tiau-khek ê siōng; Mô͘-se ê sun, Kek-sūn ê kiáⁿ, Iok-ná-tan, kap i ê kiáⁿ-sun, chòe Tàn ê chi-phài ê chè-si, tı̍t-kàu hit tōe-hng ê lâng tú-tio̍h lia̍h ê jı̍t.

(BCL) 但的人就為家己祀彼個雕刻的像。摩西的孫、革舜的子約拿單，及伊的子孫做但的支派的祭司，直到彼地方的人抵著掠的日。

31

(THR) Siōng-tè ê chhù tī Sī-lô hiah ê jı̍t, Tàn ê lâng ūi ka-kī chhāi Bí-ka só͘ chòe tiau-khek ê siōng.

(BCL) 上帝的厝佇示羅許個日，但的人為家己祀米迦所做雕刻的像。

Bible Color Mark

• 台語漢字羅馬本
• 巴克禮全羅