約書亞記 第 3 章

1

(THR) Thiⁿ-kng Iok-su-a thàu-chá khí-lâi, kap Í-sek-lia̍t chèng lâng lóng lī-khui Sı̍p-têng, lâi kàu Iok-tàn; iáu-bē kè-khì, chiū hioh tī-hia, thèng-hāu kè-hô.

(BCL) 天光約書亞透早起來，及以色列眾人攏離開什亭，來到約但，猶未過去就歇佇遐，聽候過河。

2

(THR) Kè saⁿ-jı̍t, koaⁿ-tiúⁿ piàn-kiâⁿ iâⁿ-tiong;

(BCL) 過三日，官長遍行營中，

3

(THR) bēng-lēng peh-sìⁿ kóng, Lín khòaⁿ-kìⁿ Iâ-hô-hoa lín Siōng-tè ê iok-kūi, koh khòaⁿ-kìⁿ chè-si Lī-bī lâng kng i ê sî, tio̍h lī-khui lín ê só͘-chāi, lâi tè in ê āu-bīn.

(BCL) 命令百姓講：「恁看見耶和華──恁上帝的約櫃，閣看見祭司利未人扛伊的時，著離開恁的所在，來隨的後面。

4

(THR) Chóng-sī lín kap iok-kūi saⁿ-lī, iok-lio̍k tio̍h niû nn̄g-chheng tiú ê hn̄g; m̄-thang pek-kūn i, hō͘ lín chai só͘ tio̍h kiâⁿ ê lō͘; in-ūi lín pêng-sî m̄-bat kiâⁿ chit tiâu lō͘.

(BCL) 總是恁及約櫃相離約略著量二千肘的遠，呣通迫近伊，互恁知所著行的路，因為恁平時呣曾行此條路。」

5

(THR) Iok-su-a tùi peh-sìⁿ kóng, Lín tio̍h ka-kī sèng-kiat, in-ūi bîn-á-jı̍t Iâ-hô-hoa beh tī lín tiong-kan kiâⁿ kî-sū.

(BCL) 約書亞對百姓講：「恁著家己聖潔，因為明仔日耶和華欲佇恁中間行奇事。」

6

(THR) Iok-su-a koh hoan-hù chè-si kóng, Lín kng iok-kūi khí-lâi, tī peh-sìⁿ ê thâu-chêng kiâⁿ; in chiū kng iok-kūi khí-lâi, kiâⁿ tī peh-sìⁿ ê thâu-chêng.

(BCL) 約書亞閣吩咐祭司講：「恁扛約櫃起來，佇百姓的頭前行。」就扛約櫃起來，行佇百姓的頭前。

7

(THR) Iâ-hô-hoa tùi Iok-su-a kóng, Tùi kin-á-jı̍t khí, Góa beh hō͘ lí tī Í-sek-lia̍t chèng-lâng ê ba̍k-chiu-chêng chòe-tōa, hō͘ in chai Góa kap lí tī-teh, chhin-chhiūⁿ chêng kap Mô͘-se tī-teh chı̍t-iūⁿ.

(BCL) 耶和華對約書亞講：「對今仔日起，我欲互你佇以色列眾人的目睭前做大，互知我及你佇，親像前及摩西佇一樣。

8

(THR) Lí tio̍h hoan-hù kng iok-kūi ê chè-si kóng, Lín kàu Iok-tàn chúi-piⁿ ê sî, tio̍h thêng-kha tī Iok-tàn.

(BCL) 你著吩咐扛約櫃的祭司講：『恁到約但水邊的時，著停腳佇約但。』」

9

(THR) Iok-su-a tùi Í-sek-lia̍t lâng kóng, Lín kūn-chêng lâi, thiaⁿ Iâ-hô-hoa lín Siōng-tè ê ōe.

(BCL) 約書亞對以色列人講：「恁近前來，聽耶和華──恁上帝的話。」

10

(THR) Iok-su-a koh kóng, Tùi án-ni lín thang chai o̍ah ê Siōng-tè tī lín tiong-kan, beh tī lín ê thâu-chêng kóaⁿ-tio̍k Ka-lâm lâng, Hek lâng, Hi-bī lâng, Pí-lī-sé lâng, Kek-ka-sat lâng, A-mô͘-lī lâng, Iâ-pò͘-su lâng.

(BCL) 約書亞閣講：「對按呢恁通知，活的上帝佇恁中間，欲佇恁的頭前趕逐迦南人、赫人、希未人、比利洗人、革迦撒人、亞摩利人、耶布斯人；

11

(THR) Khòaⁿ ah, phó͘-thiⁿ-ē ê Chú-cháiⁿ ê iok-kūi beh tī lín ê thâu-chêng kè-khì, jı̍p Iok-tàn.

(BCL) 看啊，普天下的主宰的約櫃欲佇恁的頭前過去，入約但。

12

(THR) Lín taⁿ tio̍h tùi Í-sek-lia̍t chi-phài-tiong kéng cha̍p-jī lâng, múi chi-phài chı̍t ê lâng;

(BCL) 恁今著對以色列支派中揀十二人，每支派一個人，

13

(THR) kàu kng phó͘-thiⁿ-ē ê Chú Iâ-hô-hoa ê iok-kūi ê chè-si, in ê kha khiā tī Iok-tàn hô ê chúi, Iok-tàn hô ê chúi, chiū-sī tùi téng-bīn lâu-lo̍h-lâi ê chúi, beh chia̍t-tn̄g, khiā-khí-lâi kui-tui.

(BCL) 到扛普天下的主耶和華的約櫃的祭司，的腳徛佇約但河的水，約但河的水，就是對頂面流落來的水，欲截斷，　起來歸堆。」

14

(THR) Peh-sìⁿ lī-khui pò͘-pîⁿ, beh kè Iok-tàn ê sî, chè-si chiū kng iok-kūi tī peh-sìⁿ ê thâu-chêng.

(BCL) 百姓離開布棚欲過約但的時，祭司就扛約櫃佇百姓的頭前。

15

(THR) Tī siu-sêng ê sî, Iok-tàn ê chúi siông-siông pôaⁿ-kè i ê hōaⁿ. Kng iok-kūi-ê kàu Iok-tàn, kng iok-kūi ê chè-si,

(BCL) （佇收成的時約但的水常常過伊的岸。）扛約櫃的到約但，扛約櫃的祭司，腳一下搵著水，

16

(THR) kha chı̍t-ē ùn-tio̍h chúi, hit-ê tùi téng-bīn lâu-lo̍h-lâi ê chúi, chiū khiā-khí-lâi kui-tui, saⁿ-lī chin-hn̄g, tī Sat-la̍h-tàn piⁿ-thâu ê A-tong siâⁿ; hit ê lâu tī A-la̍h-pa hái, chiū-sī Iâm-hái, hiah ê chúi chôan-jiân chia̍t-tn̄g; peh-sìⁿ chiū tī Iâ-lī-ko ê tùi-bīn kè-khì.

(BCL) 彼個對頂面流落來的水，就　起來歸堆，相離真遠、佇撒拉但邊頭的亞當城；彼個流佇亞拉巴海，就是鹽海，許個水全然截斷。百姓就佇耶利哥的對面過去。

17

(THR) Kng Iâ-hô-hoa iok-kūi ê chè-si tī Iok-tàn ê ta-tōe tiāⁿ-tiāⁿ khiā-teh; Í-sek-lia̍t chèng-lâng lóng tùi ta-tōe kè-khì, tı̍t-kàu peh-sìⁿ it-chīn kè Iok-tàn.

(BCL) 扛耶和華約櫃的祭司佇約但的乾地定定徛，以色列眾人攏對乾地過去，直到百姓一盡過約但。

Bible Color Mark

• 台語漢字羅馬本
• 巴克禮全羅