約書亞記 第 22 章

1

(THR) Hit-sî Iok-su-a kiò Liû-piān lâng, Ka-tek lâng, Kap Má-ná-se pòaⁿ-chi-phài ê lâng lâi,

(BCL) 彼時，約書亞叫流便人、迦得人，及瑪拿西半支派的人來，

2

(THR) tùi in kóng, Iâ-hô-hoa ê lô͘-po̍k Mô͘-se só͘ bēng-lēng lín ê, lín lóng chun-siú, góa só͘ bēng-lēng lín ê, lín iā lóng thiaⁿ-thàn;

(BCL) 對講：「耶和華的奴僕摩西所命令恁的，恁攏遵守；我所命令恁的，恁也攏聽趁。

3

(THR) lín chiah-chōe jı̍t, lóng bô lī-khui lín ê hiaⁿ-tī, tı̍t-kàu kin-á-jı̍t, lín iā ū siú Iâ-hô-hoa lín Siōng-tè só͘ bēng-lēng lín tio̍h siú ê.

(BCL) 恁即多日，攏無離開恁的兄弟，直到今仔日，恁也有守耶和華──恁上帝所命令恁著守的。

4

(THR) Taⁿ Iâ-hô-hoa lín Siōng-tè chiàu I só͘ èng-ún-ê, hō͘ lín hiaⁿ-tī tit-tio̍h pêng-an; taⁿ lín thang tò-tńg-khì lín ê pò͘-pîⁿ, kàu Iâ-hô-hoa ê lô͘-po̍k Mô͘-se tī Iok-tàn hit-pêng só͘ sù-hō͘ lín chòe-gia̍p ê tōe.

(BCL) 今耶和華──恁上帝照伊所應允的，互恁兄弟得著平安，今恁通倒轉去恁的布棚，到耶和華的奴僕摩西佇約但彼旁所賜互恁作業的地。

5

(THR) Chóng-sī lín chhiat-chhiat tio̍h kín-sīn, chun-thàn Iâ-hô-hoa ê lô͘-po̍k Mô͘-se só͘ bēng-lēng lín ê kài-bēng lu̍t-hoat, thiàⁿ Iâ-hô-hoa lín ê Siōng-tè, kiâⁿ I it-chhè ê tō-lō͘, siú I ê kài-bēng, kiat-liân tī I, chīn-sim chīn-sèng ho̍k-sāi I.

(BCL) 總是恁切切著謹慎遵趁耶和華的奴僕摩西所命令恁的誡命律法，疼耶和華──恁的上帝，行伊一切的道路，守伊的誠命，結聯佇伊，盡心盡性服事伊。」

6

(THR) Tùi án-ni Iok-su-a kā in chiok-hok, chhe in khì; in chiū tò-khì in ê pò͘-pîⁿ.

(BCL) 對按呢約書亞給祝福，差去，就倒去的布棚。

7

(THR) Má-ná-se pòaⁿ-chi-phài, Mô͘-se í-keng tī Pa-san pun-gia̍p hō͘ in; iáu pòaⁿ-chi-phài Iok-su-a tī Iok-tàn hit-pêng sai-sì, tī in hiaⁿ-tī-tiong pun-gia̍p hō͘ in; Iok-su-a chhe in tò-khì pò͘-pîⁿ ê sî, kā in chiok-hok;

(BCL) 瑪拿西半支派，摩西已經佇巴珊分業互。猶半支派，約書亞佇約但彼旁西勢，佇兄弟中，分業互。約書亞差倒去布棚的時給祝福，

8

(THR) hoan-hù in kóng, Lín tio̍h tòa chōe-chōe châi-bu̍t, chōe-chōe cheng-siⁿ, kap gûn, kim, tâng, thih, kap chōe-chōe i-ho̍k, tò-khì lín ê pò͘-pîⁿ; chiong lín só͘ chhiúⁿ tùi-te̍k ê chong-bu̍t, kap lín ê hiaⁿ-tī saⁿ-kap pun.

(BCL) 吩咐講：「恁著帶多多財物，多多精牲及銀、金、銅、鐵，及多多衣服，倒去恁的布棚，將恁所搶對敵的贓物，及恁的兄弟相及分。」

9

(THR) Tùi án-ni Liû-piān lâng, Ka-tek lâng, Má-ná-se pòaⁿ-chi-phài ê lâng, tùi Ka-lâm tōe ê Sī-lô khí-sin, lī-khui Í-sek-lia̍t lâng, beh tò-khì in tit-tio̍h Ki-lia̍t tōe; chiū-sī chiàu Iâ-hô-hoa thok Mô͘-se só͘ bēng-lēng ê, tit-tio̍h chòe-gia̍p ê tōe.

(BCL) 對按呢流便人、迦得人、瑪拿西半支派的人對迦南地的示羅起身，離開以色列人，欲倒去得著基列地，就是照耶和華託摩西所命令的得著做業的地。

10

(THR) Liû-piān lâng, Ka-tek lâng, kap Má-ná-se pòaⁿ-chi-phài, kàu Iok-tàn hô-piⁿ it-tài ê Ka-lâm tōe, chiū tī kūn Iok-tàn hia, khí chı̍t chō tôaⁿ, hit ê tôaⁿ khòaⁿ-liáu chin-tōa.

(BCL) 流便人、迦得人，及瑪拿西半支派到約但河邊一帶的迦南地，就佇近約但遐起一座壇；彼個壇看了真大。

11

(THR) Í-sek-lia̍t lâng thiaⁿ-kìⁿ kóng, Khòaⁿ ah, Liû-piān lâng, Ka-tek lâng, kap Má-ná-se pòaⁿ-chi-phài ū khí chı̍t chō tôaⁿ tī Ka-lâm tōe ê thâu-chêng, Iok-tàn ê piⁿ-á, Í-sek-lia̍t lâng kè-khì ê só͘-chāi.

(BCL) 以色列人聽見講，看啊，流便人、迦得人，及瑪拿西半支派有起一座壇佇迦南地的頭前約但的邊仔，以色列人過去的所在。

12

(THR) Í-sek-lia̍t lâng thiaⁿ-kìⁿ, Í-sek-lia̍t lâng chôan-hōe lóng chū-chı̍p tī Sī-lô, beh chiūⁿ-khì kap in kau-chiàn.

(BCL) 以色列人聽見，以色列人全會攏聚集佇示羅，欲上去及交戰。

13

(THR) Í-sek-lia̍t lâng chhe chè-si Í-lī-a-sat ê kiáⁿ Hui-nî-hap khì Ki-lia̍t tōe kìⁿ Liû-piān lâng, Ka-tek lâng, Má-ná-se pòaⁿ-chi-phài;

(BCL) 以色列人差祭司以利亞撒的子非尼哈，去基列地見流便人、迦得人、瑪拿西半支派；

14

(THR) koh chhe cha̍p ê siú-léng kap i khì, chiū-sī Í-sek-lia̍t ta̍k chi-phài ta̍k-cho̍k chı̍t ê siú-léng ta̍k-lâng tī Í-sek-lia̍t kun-tūi-tiong chòe cho̍k-tiúⁿ.

(BCL) 閣差十個首領及伊去，就是以色列逐支派逐族一個首領，逐人佇以色列軍隊中做族長。

15

(THR) In kàu Ki-lia̍t tōe, kìⁿ Liû-piān lâng, Ka-tek lâng, kap Má-ná-se pòaⁿ-chi-phài, tùi in kóng,

(BCL) 到基列地，見流便人、迦得人，及瑪拿西半支派，對講：

16

(THR) Iâ-hô-hoa chôan-hōe ê chèng-lâng án-ni kóng, Lín kan-hōan Í-sek-lia̍t ê Siōng-tè, kin-á-jı̍t o̍at-tńg bô tè Iâ-hô-hoa, ūi ka-kī khí chı̍t chō tôaⁿ, tì-kàu kin-á-jı̍t pōe-ge̍k Iâ-hô-hoa, hōan-tio̍h che sī sím-mı̍h chōe ah?

(BCL) 「耶和華全會的眾人按呢講，恁干犯以色列的上帝，今仔日越轉無隨耶和華，為家己起一座壇，致到今仔日悖逆耶和華，犯著這是甚麼罪啊？

17

(THR) Chá tùi tī Pí-jíⁿ ê chōe, lán iáu lia̍h-chòe sió-khóa mah? Sui-jiân un-e̍k kàu Iâ-hô-hoa ê hōe-chiòng, kàu kin-á-jı̍t lán iáu-bē chheng-khì;

(BCL) 早對佇毗珥的罪，咱猶掠做小可嗎？雖然瘟疫到耶和華的會眾，到今仔日咱猶未清氣。

18

(THR) lín kin-á-jı̍t kéng-jiân o̍at-tńg bô tè Iâ-hô-hoa ah! lín kin-á-jı̍t pōe-ge̍k Iâ-hô-hoa, bîn-á-jı̍t I beh siū-khì Í-sek-lia̍t ê chôan-hōe.

(BCL) 恁今仔日竟然越轉無隨耶和華啊？恁今仔日悖逆耶和華，明仔日伊欲受氣以色列的全會。

19

(THR) Lín só͘ tit-tio̍h chòe-gia̍p ê tōe, nā bô chheng-khì, chiū thang kè-lâi Iâ-hô-hoa ê tōe ê gia̍p, chiū-sī Iâ-hô-hoa hōe-bō͘ só͘ tiàm ê só͘-chāi, tī góan tiong-kan tit-tio̍h gia̍p; chóng-sī m̄-thang pōe-ge̍k Iâ-hô-hoa, iā m̄-thang pōe-ge̍k góan, m̄-thang tī Iâ-hô-hoa lán Siōng-tè ê tôaⁿ í-gōa, ūi ka-kī koh khí tôaⁿ.

(BCL) 恁所得著做業的地，若無清氣，就通過來耶和華的地的業，就是耶和華會幕所踮的所在，佇阮中間得著業。總是呣通悖逆耶和華，也呣通悖逆阮，呣通佇耶和華──咱上帝的壇以外，為家己閣起壇。

20

(THR) Chêng Siā-la̍h ê cheng-sun A-kan, kiám bô tī hit ê eng-kai hiàn ê mı̍h hōan-chōe, chiū ū siū-khì lîm-kàu tī Í-sek-lia̍t ê chôan-hōe mah? hit ê lâng tī i só͘ hōan ê chōe, m̄-nā i ka-kī chı̍t-lâng sí.

(BCL) 前謝拉的曾孫亞干豈無佇彼個應該獻的物犯罪，就有受氣臨到佇以色列的全會嗎？彼個人佇伊所犯的罪，呣若伊家己一人死。」

21

(THR) Tùi án-ni Liû-piān lâng, Ka-tek lâng, Má-ná-se pòaⁿ-chi-phài ìn Í-sek-lia̍t kun-tūi ê thâu-lâng kóng,

(BCL) 對按呢流便人、迦得人、瑪拿西半支派應以色列軍隊的頭人講：

22

(THR) Chôan-lêng ê Siōng-tè Iâ-hô-hoa, chôan-lêng ê Siōng-tè Iâ-hô-hoa, I chai, Í-sek-lia̍t iā beh chai, góan nā ū pōe-ge̍k ê ì-sù, á-sī kan-hōan Iâ-hô-hoa,

(BCL) 「全能的上帝耶和華！全能的上帝耶和華！伊知！以色列也欲知！阮若有悖逆的意思，抑是干犯耶和華（今仔日無救阮），

23

(THR) (kin-á-jı̍t bô kiù góan), ūi ka-kī khí tôaⁿ, beh o̍at-tńg bô tè Iâ-hô-hoa, á-sī beh hiàn sio-chè, sò͘-chè, siā-un chè, tī hí téng-bīn, Iâ-hô-hoa beh kui-kiū i;

(BCL) 為家己起壇，欲越轉無隨耶和華，抑是欲獻燒祭、素祭、謝恩祭佇彼頂面，耶和華欲歸咎伊。

24

(THR) góan chòe chit ê tāi-chì sī ūi-tio̍h tî-hông chiah kò͘-ì chòe; sī kiaⁿ-liáu āu-jı̍t lín ê kiáⁿ-sun tùi góan ê kiáⁿ-sun kóng, Lín kap Iâ-hô-hoa Í-sek-lia̍t ê Siōng-tè ū sím-mı̍h koan-hē ah?

(BCL) 阮做此個代誌是為著持防，才故意做，是驚了後日恁的子孫對阮的子孫講：『恁及耶和華──以色列的上帝有甚麼關係啊？

25

(THR) Liû-piān lâng, Ka-tek lâng ah, Iâ-hô-hoa siat chit ê Iok-tàn, tī lín kap góan ê tiong-kan chòe kài-hān; taⁿ lín tī Iâ-hô-hoa bô hūn; án-ni chiū lín ê kiáⁿ-sun ōe hō͘ góan ê kiáⁿ-sun bô koh kèng-ùi Iâ-hô-hoa.

(BCL) 流便人、迦得人啊，耶和華設此個約但，佇恁及阮的中間做界限，今恁佇耶和華無分。』按呢，就恁的子孫會互阮的子孫無閣敬畏耶和華。

26

(THR) Só͘-í góan saⁿ-kap kóng, Taⁿ lán tio̍h ūi ka-kī khí chı̍t chō tôaⁿ, m̄-sī ūi-tio̍h sio-chè, iā m̄-sī ūi-tio̍h pa̍t-hō ê chè;

(BCL) 所以阮相及講：『今咱著為家己起一座壇，呣是為著燒祭，也呣是為著別號的祭，

27

(THR) chiū-sī ūi-tio̍h lín góan ê tiong-kan, í-kı̍p lín kap góan āu-tāi ê tiong-kan chòe chèng-kù; hō͘ góan thang tī Iâ-hô-hoa ê bīn-chêng, ēng góan ê sio-chè, siā-un-chè, kap pa̍t-hō chè, lâi ho̍k-sāi I; bián-tit lín ê kiáⁿ-sun āu-jı̍t tùi góan ê kiáⁿ-sun kóng, Lín bô hūn tī Iâ-hô-hoa.

(BCL) 就是為著恁阮的中間以及恁及阮後代的中間做證據，互阮通佇耶和華的面前用阮的燒祭、謝恩祭，及別號祭來服事伊，免得恁的子孫後日對阮的子孫講，恁無份佇耶和華。』

28

(THR) Só͘-í góan kóng, Pa̍t-jı̍t in nā tùi góan, á-sī góan ê āu-tāi, án-ni kóng, góan thang ìn kóng, Lín thang khòaⁿ Iâ-hô-hoa ê tôaⁿ ê khóan-sit, chiū-sī góan ê lia̍t-chó͘ chêng só͘ khí-ê; m̄-sī ūi-tio̍h sio-chè kap pa̍t-hō ê chè, chiū-sī ūi-tio̍h beh chòe lín góan tiong-kan ê chèng-kù.

(BCL) 所以阮講：『別日若對阮，抑是阮的後代按呢講，阮通應講，恁通看耶和華的壇的款式，就是阮的列祖前所起的；呣是為著燒祭，及別號的祭，就是為著欲做恁阮中間的證據。』

29

(THR) Góan tī Iâ-hô-hoa lán Siōng-tè hōe-bō͘-chêng í-gōa, lēng-gōa koh khí chı̍t chō tôaⁿ, ūi-tio̍h sio-chè, sò͘-chè, kap pa̍t-hō ê chè, lâi pōe-ge̍k Iâ-hô-hoa, kin-á-jı̍t o̍at-tńg bô tè Iâ-hô-hoa, góan koat-tòan bô chit-hō ì-sù.

(BCL) 阮佇耶和華──咱上帝會幕前以外，另外閣起一座壇，為著燒祭、素祭，及別號的祭，來悖逆耶和華，今仔日越轉無隨耶和華，阮決斷無此號意思。」

30

(THR) Chè-si Hui-nî-hap kap hōe-tiong hiah ê siú-léng, í-kı̍p kap i saⁿ-kap lâi Í-sek-lia̍t tiong kun-tūi ê thâu-lâng, chiū-sī kap i saⁿ-kap lâi-ê, thiaⁿ-kìⁿ Liû-piān lâng, Ka-tek lâng, Má-ná-se lâng, só͘ kóng ê ōe, chiū lóng lia̍h-chòe hó.

(BCL) 祭司非尼哈及會中許個首領，以及及伊相及來以色列中軍隊的頭人，就是及伊相及來的，聽見流便人、迦得人、瑪拿西人所講的話，就攏掠做好。

31

(THR) Chè-si Í-lī-a-sat ê kiáⁿ Hui-nî-hap tùi Liû-piān lâng, Ka-tek lâng, Má-ná-se lâng kóng, Kin-á-jı̍t góan chai Iâ-hô-hoa tī lán ê tiong-kan, in-ūi lín bô hōan-tio̍h chit ê chōe lâi tek-chōe Iâ-hô-hoa; taⁿ lín ū kiù Í-sek-lia̍t lâng thoat-lī Iâ-hô-hoa ê chhiú.

(BCL) 祭司以利亞撒的子非尼哈對流便人、迦得人、瑪拿西人講：「今仔日阮知耶和華佇咱的中間，因為恁無犯著此個罪來得罪耶和華。今恁有救以色列人脫離耶和華的手。」

32

(THR) Chè-si Í-lī-a-sat ê kiáⁿ Hui-nî-hap, kap hiah ê siú-léng, lī-pia̍t Liû-piān lâng, Ka-tek lâng, tùi Ki-lia̍t tōe tò-khì Ka-lâm tōe, kàu Í-sek-lia̍t lâng hia, hê-hok in.

(BCL) 祭司以利亞撒的子非尼哈及許個首領離別流便人、迦得人，對基列地倒去迦南地，到以色列人遐，回覆。

33

(THR) Í-sek-lia̍t lâng lia̍h chit ê sū chòe-hó; tùi án-ni Í-sek-lia̍t lâng o-ló Siōng-tè, bô koh thê-khí beh chiūⁿ-khì kap Liû-piān lâng Ka-tek lâng kau-chiàn, lâi húi-hōai in só͘ khiā-khí ê tōe.

(BCL) 以色列人掠此個事做好，對按呢以色列人謳咾上帝，無閣提起欲上去及流便人、迦得人交戰，來毀壞所徛起的地。

34

(THR) Liû-piān lâng Ka-tek lâng kiò hit ê tôaⁿ miâ chòe Chèng-kù; in-ūi kóng, Chit ê tôaⁿ tī lán tiong-kan chèng-bêng Iâ-hô-hoa sī Siōng-tè.

(BCL) 流便人、迦得人叫彼個壇名做證據，因為講，此個壇佇咱中間證明耶和華是上帝。

Bible Color Mark

• 台語漢字羅馬本
• 巴克禮全羅