約拿書 第 1 章

1

(THR) Iâ-hô-hoa ê ōe lîm-kàu A-bí-thài ê kiáⁿ Iok-ná kóng,

(BCL) 耶和華的話臨到亞米太的子約拿，講：

2

(THR) Lí khí-lâi khì Nî-nî-bî hit ê tōa-siâⁿ, chhut-siaⁿ kéng-kài in; in-ūi in ê chōe-ok thàu-kàu Góa bīn-chêng.

(BCL) 「你起來去尼尼微彼個大城，出聲警戒，因為的罪惡透到我面前。」

3

(THR) Nā-sī Iok-ná khí-lâi, ài-cháu khì Tha-si, siám-pī Iâ-hô-hoa; lo̍h-khì Iok-phàⁿ, tú-tio̍h chı̍t chiah chûn beh khì Tha-si; i chiū hō͘ i chûn-sè, tah hit chiah chûn beh kap in khì Tha-si, siám-pī Iâ-hô-hoa.

(BCL) 若是約拿起來，愛走去他施閃避耶和華；落去約帕，抵著一隻船，欲去他施。伊就互伊船稅，搭彼隻船，欲及去他施閃避耶和華。

4

(THR) Chóng-sī Iâ-hô-hoa hō͘ hái khí tōa-hong, hái-tiong hong-éng chin-thàu, tì-kàu chûn beh phòa.

(BCL) 總是耶和華互海起大風，海中風湧真透，致到船欲破。

5

(THR) Chúi-siú chin kiaⁿ, ta̍k-lâng ai-kiû i ê siōng-tè; in ēng chûn-lāi ê hè-mı̍h hiat-lo̍h hái, in-ūi beh hō͘ chûn khah-khin; to̍k-to̍k Iok-ná í-keng lo̍h chûn-tó͘-tóe, tó-teh hó-khùn.

(BCL) 水手真驚，逐人哀求伊的上帝。用船內的貨物落海，因為欲互船卡輕。獨獨約拿已經落船肚底，倒好睏。

6

(THR) Tāi-kong kàu i hia, tùi i kóng, Lí chit-ê hó-khùn ê lâng ah, siáⁿ-sū án-ni? khí-lâi, kiû-kiò lí ê siōng-tè; kiám-chhái Siōng-tè khòaⁿ-kò͘ lán, hō͘ lán bián bia̍t-bô.

(BCL) 舵公到伊遐對伊講：「你此個好睏的人啊，啥事按呢？起來，求叫你的上帝，豈採上帝看顧咱，互咱免滅無。」

7

(THR) In saⁿ-kap kóng, Lâi ah, lán lâi liam-khau, khòaⁿ lán tú-tio̍h chit ê chai-ē, sī in-ūi sím-mı̍h lâng ê iân-kò͘.

(BCL) 相及講：「來啊，咱來拈鬮，看咱抵著此個災禍是因為甚麼人的緣故。」對按呢拈鬮，就拈著約拿。

8

(THR) Tùi án-ni in liam-khau, chiū liam-tio̍h Iok-ná. In tùi i kóng, Chhiáⁿ lí kā góan kóng, lán tú-tio̍h chit ê chai-ē, sī in-ūi sím-mı̍h lâng ê iân-kò͘; lí chòe sím-mı̍h sū-gia̍p? Lí tùi toh-lo̍h lâi? Lí ê pún só͘-chāi tī toh-lo̍h? Lí sio̍k sím-mı̍h cho̍k?

(BCL) 對伊講：「請你給阮講，咱抵著此個災禍是因為甚麼人的緣故？你做甚麼事業？你對叨落來？你的本所在佇叨落？你屬甚麼族？」

9

(THR) I ìn kóng, Góa sī Hi-pek-lâi lâng; góa kèng-ùi thiⁿ-téng ê Siōng-tè Iâ-hô-hoa, chhòng-chō tōa-hái kap ta-tōe--ê.

(BCL) 伊應講：「我是希伯來人。我敬畏天頂的上帝耶和華──創造大海及乾地者。」

10

(THR) Hiah ê lâng chiū tōa-kiaⁿ, tùi i kóng, Lí só͘ chòe--ê sī sím-mı̍h sū ah? In-ūi hiah ê lâng chai i siám-pī Iâ-hô-hoa, sī i í-keng kā in kóng lah.

(BCL) 許個人就大驚，對伊講：「你所做的是甚麼事啊？」因為許個人知伊閃避耶和華，是伊已經給講啦。

11

(THR) In kā i kóng, Góan tio̍h cháiⁿ-iūⁿ khóan-thāi lí, hō͘ hái pîⁿ-tiāⁿ? in-ūi hái-éng ná-khí ná-tōa.

(BCL) 給伊講：「阮著怎樣款待你，互海平定？」因為海湧愈起愈大。

12

(THR) I kā in kóng, Lín lia̍h góa hiat--lo̍h hái, hái chiū pîⁿ-tiāⁿ; in-ūi góa chai lín tú-tio̍h chit ê tōa-hong sī ūi-tio̍h góa ê iân-kò͘.

(BCL) 伊給講：「恁掠我落海，海就平定；因為我知恁抵著此個大風是為著我的緣故。」

13

(THR) Nā-sī hiah ê lâng chīn-la̍t kò-chiúⁿ, ài óa-kūn soaⁿ; chóng-sī bōe-ōe; in-ūi hái-éng ná-khí ná-tōa.

(BCL) 若是許個人盡力划槳，愛倚近山，總是會，因為海湧愈起愈大。

14

(THR) Tùi án-ni in kiû-kiò Iâ-hô-hoa kóng, Iâ-hô-hoa ah, góan chhiat-chhiat kiû Lí, bo̍h-tit in-ūi chit-lâng ê sìⁿ-miā, hō͘ góan sí-bô; bo̍h-tit ēng bô-chōe ê huih kui tī góan; in-ūi Iâ-hô-hoa Lí sī chiàu ka-kī ê ì-sù lâi kiâⁿ.

(BCL) 對按呢求叫耶和華講：「耶和華啊，阮切切求你，莫得因為此人的生命互阮死無，莫得用無罪的血歸佇阮；因為耶和華──你是照家己的意思來行。」

15

(THR) In chiū lia̍h Iok-ná hiat-lo̍h hái; hái ê tōa-éng chiū pêng-tiāⁿ.

(BCL) 就掠約拿落海，海的大湧就平定。

16

(THR) Hiah ê lâng chiū tōa-tōa kèng-ùi Iâ-hô-hoa, hiàn-chè hō͘ Iâ-hô-hoa, koh hē-gōan.

(BCL) 許個人就大大敬畏耶和華，獻祭互耶和華，閣下願。

17

(THR) Iâ-hô-hoa pī-pān tōa-hî thun Iok-ná; Iok-ná tī hî pak-tó͘-lāi saⁿ-jı̍t saⁿ-mî.

(BCL) 耶和華備辦大魚吞約拿，約拿佇魚腹肚內三日三暝。

Bible Color Mark

• 台語漢字羅馬本
• 巴克禮全羅