約翰福音 第 4 章

1

(THR) Chú í-keng chai Hoat-lī-sài lâng thiaⁿ-kìⁿ Iâ-so͘ chio-tio̍h ha̍k-seng, ia̍h kā in kiâⁿ sóe-lé, pí Iok-hān khah chōe,

(BCL) 主已經知法利賽人聽見耶穌招著學生，亦給行洗禮，比約翰卡多，（

2

(THR) . (kî-sı̍t Iâ-so͘ ka-kī bô kiâⁿ sóe-lé, sī I ê ha̍k-seng kiâⁿ i),

(BCL) 其實耶穌家己無行洗禮，是伊的學生行伊，）

3

(THR) . chiū lī-khui Iû-thài, koh khì Ka-lī-lī.

(BCL) 就離開猶太，閣去加利利。

4

(THR) . Tio̍h tùi Sat-má-lī-a keng-kè.

(BCL) 著對撒瑪利亞經過，

5

(THR) . Tùi án-ni kàu Sat-má-lī-a chı̍t ê siâⁿ, miâ kiò Sū-ka, kūn Ngá-kok hō͘ i ê kiáⁿ Iok-sek ê tōe; tī hia ū Ngá-kok ê chúi-chíⁿ.

(BCL) 對按呢到撒瑪利亞一個城，名叫敘加，近雅各互伊的子約瑟的地。佇遐有雅各的水井；

6

(THR) . Iâ-so͘ kiâⁿ lō͘ siān, chiū án-ni chē tī chíⁿ-piⁿ. Hit sî iok-lio̍k jı̍t tiong-tàu.

(BCL) 耶穌行路倦，就按呢坐佇井邊。彼時約略日中晝。

7

(THR) . Ū chı̍t ê Sat-má-lī-a ê hū-jîn-lâng lâi chhiūⁿ chúi; Iâ-so͘ kā i kóng, Chhiáⁿ hō͘ góa lim.

(BCL) 有一個撒瑪利亞的婦仁人來汲水，耶穌給伊講：「請互我飲。」（

8

(THR) . In-ūi I ê ha̍k-seng í-keng jı̍p siâⁿ, khì bóe mı̍h thang lâi chia̍h.

(BCL) 因為伊的學生已經入城去買物通來食。）

9

(THR) . Sat-má-lī-a ê hū-jîn-lâng kā I kóng, Lí sī Iû-thài lâng, cháiⁿ-iūⁿ tùi góa Sat-má-lī-a ê hū-jîn-lâng thó chúi lim ah? Sī Iû-thài lâng kap Sat-má-lī-a lâng bô óng-lâi.

(BCL) 撒瑪利亞的婦仁人給伊講：「你是猶太人，怎樣對我撒瑪利亞的婦仁人討水飲啊？」是猶太人及撒瑪利亞人無往來。

10

(THR) . Iâ-so͘ ìn i kóng, Siat-sú lí bat Siōng-tè ê un-sù, kap tùi lí kóng, Hō͘ góa lim ê, sī chī-chūi; lí tek-khak kiû I, I chiū ēng o̍ah chúi hō͘ lí.

(BCL) 耶穌應伊講：「設使你識上帝的恩賜，及對你講『互我飲』的是是誰，你的確求伊，伊就用活水互你。」

11

(THR) . Hū-jîn-lâng kóng, Chú ah, lí bô chhiūⁿ chúi ê khì-kū, chíⁿ koh chhim; tùi tá-lo̍h ū hit ê o̍ah chúi ah?

(BCL) 婦仁人講：「主啊，你無汲水的器具，井閣深，對叨落有彼個活水啊？

12

(THR) . Góan chó͘ Ngá-kok lâu chit ê chíⁿ hō͘ góan, i ka-kī kap kiáⁿ-jî kap cheng-siⁿ lóng lim chit ê chíⁿ ê chúi, lí kiám pí i khah tōa mah?

(BCL) 阮祖雅各留此個井互阮，伊家己及子兒及精牲攏飲此個井的水，你豈比伊卡大嗎？」

13

(THR) . Iâ-so͘ ìn i kóng, Lim chit ê chúi ê, lóng beh koh chhùi-ta; to̍k-to̍k kìⁿ-nā lim góa só͘ beh hō͘ i ê chúi ê éng-óan bōe chhùi-ta;

(BCL) 耶穌應伊講：「飲此個水的攏欲閣嘴乾；

14

(THR) . in-ūi góa só͘ hō͘ i ê chúi beh tī i ê lāi-bīn chiâⁿ-chòe chúi-chôaⁿ, tı̍t-tı̍t chhèng-khí-lâi kàu éng-óan o̍ah.

(BCL) 獨獨見若飲我所欲互伊的水的永遠嘴乾。因為我所互伊的水欲佇伊的內面成做水泉，直直淐起來到永遠活。」

15

(THR) . Hū-jîn-lâng tùi I kóng, Chú ah, ēng chit ê chúi hō͘ góa, hō͘ góa bōe chhùi-ta, ia̍h bián lâi chiah hn̄g chhiūⁿ.

(BCL) 婦仁人對伊講：「主啊，用此個水互我，互我嘴乾，亦免來即遠汲。」

16

(THR) . Iâ-so͘ kā i kóng, Khì kiò lí ê tiōng-hu chiah koh lâi.

(BCL) 耶穌給伊講：「去叫你的丈夫才閣來。」

17

(THR) . Hū-jîn-lâng ìn I kóng, Góa bô tiōng-hu. Iâ-so͘ kā i kóng, Lí kóng, Bô tiōng-hu, sī tio̍h;

(BCL) 婦仁人應伊講：「我無丈夫。」耶穌給伊講：「你講無丈夫是著。

18

(THR) . in-ūi lí bat ū gō͘ ê tiōng-hu; taⁿ só͘ ū ê m̄ sī lí ê tiōng-hu; lí ê ōe chin-chiàⁿ tio̍h.

(BCL) 因為你曾有五個丈夫，今所有的呣是你的丈夫。你的話真正著。」

19

(THR) . Hū-jîn-lâng kā i kóng, Chú ah, góa khòaⁿ lí sī sian-ti.

(BCL) 婦仁人給伊講：「主啊，我看你是先知。

20

(THR) . Góan chó͘ bat tī chit ê soaⁿ kèng-pài; nā-sī lín kóng kèng-pài ê só͘-chāi eng-kai tī Iâ-lō͘-sat-léng.

(BCL) 阮祖曾佇此個山敬拜，若是恁講敬拜的所在應該佇耶路撒冷。」

21

(THR) . Iâ-so͘ kā i kóng, Hū-jîn-lâng ah, tio̍h sìn góa, sî beh kàu lah, lín kèng-pài Pē ia̍h bô tī chit ê soaⁿ, ia̍h bô tī Iâ-lō͘-sat-léng.

(BCL) 耶穌給伊講：「婦仁人啊，著信我。時欲到啦，恁敬拜父，亦無佇此個山，亦無佇耶路撒冷。

22

(THR) . Lín kèng-pài lín só͘ m̄ chai ê; góan kèng-pài góan só͘ chai ê; in-ūi chín-kiù sī tùi Iû-thài lâng chhut.

(BCL) 恁敬拜恁所呣知的；阮敬拜阮所知的，因為拯救是對猶太人出。

23

(THR) . Nā-sī sî beh kàu, hiān-kim chiū-sī, chin-sı̍t kèng-pài ê beh ēng sîn ēng chin-sı̍t kèng-pài Pē; in-ūi Pē sī ài chit hō lâng kèng-pài I.

(BCL) 若是時欲到，現今就是，真實敬拜的，欲用神用真實敬拜父，因為父是愛此號人敬拜伊。」

24

(THR) . Siōng-tè sī Sîn; kèng-pài I ê lâng, tio̍h ēng sîn ēng chin-sı̍t lâi kèng-pài.

(BCL) 上帝是神，敬拜伊的人著用神用真實來敬拜。

25

(THR) . Hū-jîn-lâng kā I kóng, Góa chai Bí-sài-a teh-beh kàu; I nā kàu beh ēng it-chhè ê sū kā góan kóng. (Bí-sài-a hoan-e̍k chiū-sī Ki-tok).

(BCL) 婦仁人給伊講：「我知彌賽亞欲到；伊若到，欲用一切的事給阮講。」（彌賽亞翻譯就是基督）。

26

(THR) . Iâ-so͘ kā i kóng, Góa chit ê teh kap lí kóng ōe ê, chiū-sī.

(BCL) 耶穌給伊講：「我此個及你講話的就是！」

27

(THR) . Hit-sî I ê ha̍k-seng kàu; kî-kòai I kap hū-jîn-lâng kóng ōe; to̍k-to̍k bô lâng kóng, Lí beh sím-mı̍h tāi-chì? á-sī kóng, Lí siáⁿ-sū kap hū-jîn-lâng kóng ōe?

(BCL) 彼時伊的學生到，奇怪伊及婦仁人講話；獨獨無人講：「你欲甚麼代誌？」抑是講：「你啥事及婦仁人講話？」

28

(THR) . Hū-jîn-lâng sûi-sî pàng-hē i ê chúi-pân, jı̍p siâⁿ, kā lâng kóng,

(BCL) 婦仁人隨時放下伊的水瓶，入城，給人講：

29

(THR) . Lâi khòaⁿ chı̍t lâng, góa pêng-sò͘ kiâⁿ ê sū, I lóng kā góa kóng; chit-ê chóng bô sī Ki-tok ah?

(BCL) 「來看！一人我平素行的事，伊攏給我講，此個總無是基督啊？」

30

(THR) . In chiū chhut siâⁿ, lâi chiū-kūn Iâ-so͘.

(BCL) 就出城，來就近耶穌。

31

(THR) . Tng sî ha̍k-seng kiû I kóng, Lia̍p-pí lâi chia̍h.

(BCL) 當時，學生求伊講：「拉比，來食。」

32

(THR) . Nā-sī I kā in kóng, Góa ū bí-niû thang chia̍h, lín só͘ m̄ chai ê.

(BCL) 若是伊給講：「我有米糧通食，恁所呣知的。」

33

(THR) . Ha̍k-seng chiū saⁿ-kap kóng, Kiám ū lâng hō͘ I chia̍h mah?

(BCL) 學生就相及講：「豈有人互伊食嗎？」

34

(THR) . Iâ-so͘ kā in kóng, Kiâⁿ chhe góa ê ê chí-ì, lâi bêng-pe̍k I ê kang, chiū-sī góa ê bí-niû.

(BCL) 耶穌給講：「行差我者的旨意，來明白伊的工，就是我的米糧。

35

(THR) . Lín kiám bô kóng, Iáu ū sì ge̍h jı̍t, chiū siu-koah ê sî kàu mah? Góa kā lín kóng, Kia̍h ba̍k khòaⁿ hn̂g, í-keng se̍k, thang koah lah.

(BCL) 恁豈無講『猶有四月日就收割的時到』嗎？我給恁講，抬目看園，已經熟，通割啦。

36

(THR) . Siu-koah ê lâng tit-tio̍h kang-chîⁿ, chek-chū gō͘-kak kàu éng-o̍ah; hō͘ iā-chéng ê, siu-koah ê, saⁿ-kap hoaⁿ-hí.

(BCL) 收割的人得著工錢，積聚五穀到永活，互撒種的、收割的相及歡喜。

37

(THR) . In-ūi sio̍k-gú só͘ kóng, Chit-ê iā-chéng, hit-ê siu-koah, tùi án-ni chin-chiàⁿ ū iáⁿ.

(BCL) 因為俗語所講：『此個撒種，彼個收割』，對按呢真正有影。

38

(THR) . Góa chhe lín siu-koah lín só͘ bô tio̍h-bôa ê; pa̍t lâng í-keng tio̍h-bôa, lín hióng-siū in só͘ tio̍h-bôa ê.

(BCL) 我差恁收割恁所無著磨的；別人已經著磨，恁享受所著磨的。」

39

(THR) . Hit ê siâⁿ ū Sat-má-lī-a lâng chōe-chōe sìn I, sī in-ūi hū-jîn-lâng kan-chèng, kóng, Góa pêng-sò͘ kiâⁿ ê sū, I lóng kā góa kóng.

(BCL) 彼個城有撒瑪利亞人多多信伊，是因為婦仁人干證講：「我平素行的事伊攏給我講。」

40

(THR) . Tùi án-ni, Sat-má-lī-a lâng chiū-kūn Iâ-so͘ ê sî, kiû I kap in tòa; I chiū tòa hia nn̄g jı̍t.

(BCL) 對按呢撒瑪利亞人就近耶穌的時，求伊及住，伊就住遐二日。

41

(THR) . In-ūi I ê ōe lâi sìn ê lâng koh khah chōe;

(BCL) 因為伊的話，來信的人閣卡多，

42

(THR) . kā hū-jîn-lâng kóng, Góan taⁿ m̄ sī tùi lí ê ōe lâi sìn; sī chhin-sin thiaⁿ-kìⁿ, chai I chin-chiàⁿ sī sè-kan ê Kiù-chú.

(BCL) 給婦仁人講：「阮今呣是對你的話來信，是親身聽見，知伊真正是世間的救主。」

43

(THR) . Kè nn̄g jı̍t, Iâ-so͘ lī-khui hia, khì Ka-lī-lī.

(BCL) 過二日，耶穌離開遐，去加利利。

44

(THR) . In-ūi Iâ-so͘ ka-kī kan-chèng, kóng, Sian-ti lâng tī pún só͘-chāi bô chun-kùi.

(BCL) 因為耶穌家己干證講：「先知人佇本所在無尊貴。」

45

(THR) . Kàu Ka-lī-lī ê sî, Ka-lī-lī lâng chiap-la̍p I, in-ūi bat khòaⁿ I tī Iâ-lō͘-sat-léng tng choeh-kî tiong só͘ kiâⁿ it-chhè ê tāi-chì; in-ūi in pún-sin ia̍h ū khì hù choeh-kî.

(BCL) 到加利利的時，加利利人接納伊，因為曾看伊佇耶路撒冷當節期中所行一切的代誌，因為本身亦有去赴節期。

46

(THR) . Iâ-so͘ koh kàu Ka-lī-lī ê Ka-ná, chiū-sī I ēng chúi piàn chiú ê só͘-chāi. Ū ông ê jîn-sîn, i ê kiáⁿ phòa-pīⁿ tī Ka-pek-lông.

(BCL) 耶穌閣到加利利的迦拿，就是伊用水變酒的所在。有王的人臣，伊的子破病佇迦百農。

47

(THR) . Thiaⁿ-kìⁿ Iâ-so͘ tùi Iû-thài kàu Ka-lī-lī, chiū khì chiū-kūn I, kiû I lo̍h-khì i-tī i ê kiáⁿ; in-ūi teh-beh sí lah.

(BCL) 聽見耶穌對猶太到加利利，就去就近伊，求伊落去醫治伊的子，因為欲死啦。

48

(THR) . Iâ-so͘ tùi i kóng, Nā bô khòaⁿ-kìⁿ sîn-jiah kî-sū, lín tek-khak m̄ sìn.

(BCL) 耶穌對伊講：「若無看見神蹟奇事，恁的確呣信。」

49

(THR) . Ông ê jîn-sîn tùi I kóng, Chú ah, thàn góa ê sòe-kiáⁿ iáu-bē sí, lo̍h-lâi-khì.

(BCL) 王的人臣對伊講：「主啊，趁我的細子猶未死落來去。」

50

(THR) . Iâ-so͘ kā i kóng, Khì ah, lí ê kiáⁿ o̍ah lah. Hit lâng sìn Iâ-so͘ kā i kóng ê ōe, chiū khì.

(BCL) 耶穌給伊講：「去啊，你的子活啦！」彼人信耶穌給伊講的話就去。

51

(THR) . Tú-tú lo̍h-khì ê sî, i ê lô͘-po̍k kúi-nā lâng tú-tio̍h i, kā i kóng i ê kiáⁿ o̍ah lah.

(BCL) 抵抵落去的時，伊的奴僕幾若人抵著伊，給伊講伊的子活啦。

52

(THR) . Chiū mn̄g in, Sím-mı̍h sî chiah khah hó? In chiū kā i kóng, Chā-jı̍t-tàu chı̍t tiám cheng jia̍t thè.

(BCL) 就問甚麼時才卡好。就給伊講：「昨日晝一點鐘熱退。」

53

(THR) . Lāu-pē chai hit sî tú-tú sī Iâ-so͘ kóng, Lí ê kiáⁿ o̍ah lah, ê sî; i ka-kī kap chôan-ke chiū lóng sìn.

(BCL) 老父知彼時抵抵是耶穌講「你的子活啦」的時；伊家己及全家就攏信。

54

(THR) . Chit ê tē jī pái ê sîn-jiah, sī Iâ-so͘ tùi Iû-thài kàu Ka-lī-lī í-āu só͘ kiâⁿ ê.

(BCL) 此個第二擺的神蹟，是耶穌對猶太到加利利以後所行的。

Bible Color Mark

• 台語漢字羅馬本
• 巴克禮全羅