約翰福音 第 14 章

1

(THR) Lín ê sim bo̍h-tit peh-pak; lín tio̍h sìn Siōng-tè, ia̍h tio̍h sìn góa.

(BCL) 「恁的心莫得迫腹；恁著信上帝，亦著信我。

2

(THR) . Tī góa ê Pē ê ke, ū chōe-chōe chhù-the̍h; nā bô, chiū góa í-keng kā lín kóng lah; in-ūi góa khì, sī kā lín pī-pān só͘-chāi.

(BCL) 佇我的父的家有多多厝宅；若無，就我已經給恁講啦。因為我去是給恁備辦所在。

3

(THR) . Nā khì kā lín pī-pān só͘-chāi, chiū beh koh lâi, chiap-la̍p lín kui tī góa; hō͘ góa só͘ tī-teh ê, lín ia̍h tī hia.

(BCL) 若去給恁備辦所在，就欲閣來接納恁歸佇我，互我所佇的，恁亦佇遐。

4

(THR) . Góa só͘ khì ê só͘-chāi, lín bat hit tiâu lō͘.

(BCL) 我所去的所在，恁識彼條路。」

5

(THR) . To-má kā I kóng, Chú ah, lí khì ê só͘-chāi, góan to m̄ chai; thái ōe chai hit tiâu lō͘ ah?

(BCL) 多馬給伊講：「主啊，你去的所在阮都呣知，豈會知彼條路啊？」

6

(THR) . Iâ-so͘ kā i kóng, Góa chiū-sī lō͘, sī chin-lí, sī o̍ah-miā; nā bô tùi góa, chiū bô lâng chiū-kūn Pē.

(BCL) 耶穌給伊講：「我就是路、是真理、是活命；若無對我，就無人就近父。

7

(THR) . Lín nā í-keng bat góa, chiū ia̍h bat góa ê Pē; taⁿ liáu-āu lín bat I, ia̍h bat khòaⁿ-kìⁿ I.

(BCL) 恁若已經識我，就亦識我的父。今了後，恁識伊，亦曾看見伊。」

8

(THR) . Hui-le̍k kā I kóng, Chú ah, ēng Pē hō͘ góan khòaⁿ, chiū kàu-gia̍h.

(BCL) 腓力給伊講：「主啊，用父互阮看，就夠額。」

9

(THR) . Iâ-so͘ kā i kóng, Hui-le̍k, góa kap lín tiàm kàu chiah kú, lí iáu m̄ bat góa mah? í-keng khòaⁿ-kìⁿ góa ê, chiū-sī khòaⁿ-kìⁿ Pē; lí cháiⁿ-iūⁿ kóng, Ēng Pē hō͘ góan khòaⁿ ah?

(BCL) 耶穌給伊講：「腓力，我及恁到即久，你猶呣識我嗎？已經看見我的，就是看見父；你怎樣講『用父互阮看』啊？

10

(THR) . Góa tiàm-tī Pē, Pē ia̍h tiàm-tī góa, lí m̄ sìn mah? Góa só͘ kā lín kóng ê ōe, m̄ sī chhut tī ka-kī lâi kóng; chiū-sī Pē tòa tī góa lâi kiâⁿ I ê tāi-chì.

(BCL) 我佇父，父亦佇我，你呣信嗎？我所給恁講的話，呣是出佇家己來講，就是父住佇我來行伊的代誌。

11

(THR) . Góa tiàm-tī Pē, Pē tiàm-tī góa, lín tio̍h sìn góa; nā bô, chiū tio̍h in-ūi só͘ kiâⁿ ê sū lâi sìn góa.

(BCL) 我佇父，父佇我，恁著信我；若無，就著因為所行的事來信我。

12

(THR) . Góa sı̍t-sı̍t kā lín kóng, Sìn góa ê lâng, góa só͘ kiâⁿ ê, i beh kiâⁿ i; chiū pí chiah ê sū khah tōa ê, ia̍h beh kiâⁿ i; in-ūi góa kui tī Pē.

(BCL) 我實實給恁講，信我的人，我所行的伊欲行伊，就比諸個事卡大的亦欲行伊，因為我歸佇父。

13

(THR) . Lín tī góa ê miâ, hōan só͘ kiû ê, góa beh kiâⁿ i; hō͘ Pē tī Kiáⁿ tit-tio̍h êng-kng.

(BCL) 恁佇我的名凡所求的，我欲行伊，互父佇子得著榮光。

14

(THR) . Lín nā tī góa ê miâ ū só͘ kiû góa ê, góa beh kiâⁿ i.

(BCL) 恁若佇我的名有所求我的，我欲行伊。」

15

(THR) . Lín nā thiàⁿ góa, chiū beh siú góa ê bēng-lēng.

(BCL) 「恁若疼我，就欲守我的命令。

16

(THR) . Góa ia̍h beh tùi Pē kiû, chiū I beh ēng koh chı̍t ê Pó-hūi-su hō͘ lín, hō͘ I éng-óan kap lín tòa;

(BCL) 我亦欲對父求，就伊欲用閣一個保惠師互恁，互伊永遠及恁住，

17

(THR) . chiū-sī chin-lí ê Sîn; sè-kan só͘ bōe chiap-la̍p ê, in-ūi bô khòaⁿ-kìⁿ I, koh m̄ bat I; to̍k-to̍k lín bat I; in-ūi I kap lín saⁿ-kap tòa, koh beh tiàm-tī lín.

(BCL) 就是真理的神，世間所接納的；因為無看見伊，閣呣識伊。獨獨恁識伊，因為伊及恁相及住，閣欲佇恁。

18

(THR) . Góa bô beh pàng lín chòe bô pē ê kiáⁿ; góa lâi chiū-kūn lín.

(BCL) 我無欲放恁做無父的子，我來就近恁。

19

(THR) . Iáu tiap-á-kú, sè-kan bô koh khòaⁿ-kìⁿ góa; to̍k-to̍k lín khòaⁿ-kìⁿ góa; in-ūi góa o̍ah, lín ia̍h o̍ah.

(BCL) 猶霎仔久，世間無閣看見我，獨獨恁看見我；因為我活，恁亦活。

20

(THR) . Hit jı̍t lín beh chai góa tiàm-tī góa ê Pē, lín tiàm-tī góa, góa tiàm-tī lín.

(BCL) 彼日，恁欲知我佇我的父，恁佇我，我佇恁。

21

(THR) . Ū góa ê bēng-lēng, koh siú i ê lâng, chit-ê chiū-sī thiàⁿ góa; thiàⁿ góa ê lâng, beh tit-tio̍h góa ê Pē thiàⁿ i, góa ia̍h beh thiàⁿ i, koh chiong pún-sin hián-bêng tī i.

(BCL) 有我的命令閣守伊的人，此個就是疼我；疼我的人欲得著我的父疼伊，我亦欲疼伊，閣將本身顯明佇伊。」

22

(THR) . Ū Iû-tāi, (m̄ sī Ka-lio̍k lâng ê), kā I kóng, Chú ah, ū sím-mı̍h sū lí beh chiong pún-sin hián-bêng tī góan, bô hián-bêng tī sè-kan ah?

(BCL) 有猶大（呣是加略人的）給伊講：「主啊，有甚麼事你欲將本身顯明佇阮，無顯明佇世間啊？」

23

(THR) . Iâ-so͘ ìn i kóng, lâng nā thiàⁿ góa, i beh siú góa ê tō-lí, góa ê Pē beh thiàⁿ i, góan ia̍h beh chiū-kūn i, koh kap i tâng khiā-khí.

(BCL) 耶穌應伊講：「人若疼我，伊欲守我的道理；我的父欲疼伊，阮亦欲就近伊，閣及伊同徛起。

24

(THR) . Bô thiàⁿ góa ê lâng, chiū bô siú góa chiah ê ōe; koh lín só͘ thiaⁿ ê tō-lí, m̄ sī góa ê, chiū-sī chhe góa ê Pē ê.

(BCL) 無疼我的人就無守我諸個話。閣恁所聽的道理呣是我的，就是差我的父的。

25

(THR) . Góa iáu kap lín tòa ê sî, ū chiong chiah ê ōe kā lín kóng.

(BCL) 「我猶及恁住的時，有將諸個話給恁講。

26

(THR) . Nā-sī Pó-hūi-su, chiū-sī Sèng Sîn, Pē tī góa ê miâ só͘ beh chhe ê, I beh chiong it-chhè ê sū kà-sī lín, koh beh hō͘ lín kì-tit góa it-chhè só͘ kā lín kóng ê.

(BCL) 若是保惠師就是聖神，父佇我的名所欲差的，伊欲將一切的事教示恁，閣欲互恁記得我一切所給恁講的。

27

(THR) . Góa ēng pêng-an lâu-teh hō͘ lín; góa chiong góa ê pêng-an siúⁿ-sù lín; góa teh hō͘ lín, m̄ sī chhin-chhiūⁿ sè-kan teh hō͘ lâng ê khóan. Lín ê sim bo̍h-tit peh-pak, ia̍h bo̍h-tit kiaⁿ-hiâⁿ.

(BCL) 我用平安留互恁；我將我的平安賞賜恁。我互恁，呣是親像世間互人的款。恁的心莫得迫腹，亦莫得驚惶。

28

(THR) . Lín í-keng thiaⁿ-kìⁿ góa ū kā lín kóng, Góa khì, koh lâi chiū-kūn lín. Lín nā thiàⁿ góa, chiū in-ūi góa kui tī Pē lín ōe hoaⁿ-hí; in-ūi Pē pí góa khah tōa.

(BCL) 恁已經聽見我有給恁講，我去閣來就近恁。恁若疼我，就因為我歸佇父，恁會歡喜，因為父比我卡大。

29

(THR) . Taⁿ sū iáu-bē chiâⁿ, góa í-keng kā lín kóng, hō͘ lín tī sū chiâⁿ ê sî thang sìn.

(BCL) 今事猶未成，我已經給恁講，互恁佇事成的時通信。

30

(THR) . Í-āu góa bô kap lín kóng chōe-chōe ōe, in-ūi sè-kan ê jîn-kun teh lâi lah; i tī góa bô só͘ ū;

(BCL) 以後我無及恁講多多話，因為世間的人君來啦。伊佇我無所有；

31

(THR) . to̍k-to̍k beh hō͘ sè-kan chai góa thiàⁿ Pē, ia̍h chiàu Pē só͘ bēng-lēng góa ê, góa án-ni lâi kiâⁿ. Khí-lâi, lán tùi chia lâi khì.

(BCL) 獨獨欲互世間知我疼父，亦照父所命令我的，我按呢來行。起來，咱對遮來去！」

Bible Color Mark

• 台語漢字羅馬本
• 巴克禮全羅