約翰福音 第 12 章

1

(THR) Só͘-í Iâ-so͘ tī pôaⁿ-kè-choeh chêng la̍k jı̍t kàu Pek-tāi-nî, chiū-sī Lia̍p-sat-lō͘ só͘ tòa ê só͘-chāi; i sī Iâ-so͘ tùi sí-lâng tiong hō͘ i koh-o̍ah ê.

(BCL) 所以耶穌佇過節前六日，到伯大尼，就是拉撒路所住的所在，伊是耶穌對死人中互伊復活的。

2

(THR) . In chiū tī hia ūi-tio̍h Iâ-so͘ pī-pān ê-hng tǹg; Má-tāi teh su-hāu; Lia̍p-sat-lō͘ ia̍h sī tâng toh ê chı̍t-ê.

(BCL) 就佇遐為著耶穌備辦下昏頓；馬大伺候，拉撒路亦是同桌的一個。

3

(THR) . Má-lī-a chiū the̍h chı̍t kun ke̍k kùi-khì chin ê ná-ta̍t hiuⁿ-iû, boah Iâ-so͘ ê kha, koh ēng ka-kī ê thâu-mn̂g chhit I ê kha, hiuⁿ-iû ê phang móa chhù.

(BCL) 馬利亞就提一斤極貴氣真的哪噠香油，抹耶穌的腳，閣用家己的頭毛拭伊的腳，香油的芳滿厝。

4

(THR) . Ū I ê ha̍k-seng chı̍t ê, beh bōe I ê, chiū-sī Ka-lio̍k lâng Iû-tāi, kóng,

(BCL) 有伊的學生一個，欲賣伊的，就是加略人猶大，

5

(THR) . Siáⁿ-sū m̄ chiong chit ê ko-iû bōe gûn-á saⁿ-pah ê, lâi hō͘ sòng-hiong lâng ah?

(BCL) 講：「啥事呣將此個膏油賣銀仔三百個來互喪鄉人啊？」

6

(THR) . I kóng án-ni, m̄ sī in-ūi i koan-sim tī sòng-hiong lâng; sī in-ūi i sī chha̍t, koh kóan chîⁿ-tē thau-the̍h só͘ hē ê nā-tiāⁿ.

(BCL) 伊講按呢，呣是因為伊關心佇喪鄉人，是因為伊是賊，閣管錢袋，偷提所下的若定。

7

(THR) . Iâ-so͘ chiū kóng, Chhut-chāi i chiong chit-ê lâu-teh, kàu góa bâi-chòng ê jı̍t.

(BCL) 耶穌就講：「出在伊！將此個留到我埋葬的日。

8

(THR) . In-ūi siông-siông ū sòng-hiong lâng kap lín tī-teh; nā-sī góa bô siông-siông kap lín tī-teh.

(BCL) 因為常常有喪鄉人及恁佇，若是我無常常及恁佇。」

9

(THR) . Iû-thài ê peh-sìⁿ chōe-chōe chai Iâ-so͘ tī hia; chiū lâi, m̄ nā in-ūi Iâ-so͘ ê iân-kò͘, ia̍h ài beh khòaⁿ I só͘ hō͘ i tùi sí-lâng tiong koh-o̍ah ê Lia̍p-sat-lō͘.

(BCL) 猶太的百姓多多知耶穌佇遐，就來，呣若因為耶穌的緣故，亦愛欲看伊，所互伊對死人中復活的拉撒路。

10

(THR) . To̍k-to̍k chiah ê chè-si-thâu kè-bô͘ beh sòa thâi-sí Lia̍p-sat-lō͘;

(BCL) 獨獨諸個祭司頭計謀欲續死拉撒路；

11

(THR) . in-ūi Iû-thài lâng chōe-chōe ūi-tio̍h i ê iân-kò͘, khì sìn Iâ-so͘.

(BCL) 因為猶太人多多為著伊的緣故，去信耶穌。

12

(THR) . Keh jı̍t, ū chōe-chōe hù choeh ê lâng, í-keng thiaⁿ-kìⁿ Iâ-so͘ beh kàu Iâ-lō͘-sat-léng,

(BCL) 隔日，有多多赴節的人已經聽見耶穌欲到耶路撒冷，

13

(THR) . chiū kia̍h chang-chhiū ki, chhut-khì ngiâ-chih I, kiò kóng, Hô-sàn-ná, hōng Chú ê miâ lâi ê, chiū-sī Í-sek-lia̍t ê ông, gōan I tit-tio̍h o-ló.

(BCL) 就抬棕樹枝出去迎接伊，叫講：和散那！奉主的名來的就是以色列的王，願伊得著謳咾！

14

(THR) . Iâ-so͘ tit-tio̍h chı̍t chiah sòe chiah lû, khiâ i; chhin-chhiūⁿ sèng-keng só͘ kì, Sûn-siâⁿ ê cha-bó͘-kiáⁿ ah, bo̍h-tit kiaⁿ;

(BCL) 耶穌得著一隻細隻驢，騎伊，親像聖經所記：

15

(THR) . lí ê Ông lâi lah, khiā lû-á-kiáⁿ.

(BCL) 郇城的查某子啊，莫得驚！你的王來啦，騎驢仔子！

16

(THR) . Ha̍k-seng khí-thâu bōe bêng chiah ê sū; kàu Iâ-so͘ í-keng tit-tio̍h êng-kng ê sî, chiah kì-tit ū kì-chài chiah ê sū chí I, ia̍h lâng kó-jiân tùi I kiâⁿ chiah ê sū.

(BCL) 學生起頭明諸個事，到耶穌已經得著榮光的時才記得有記載諸個事指伊，亦人果然對伊行諸個事。

17

(THR) . Tng Iâ-so͘ kiò Lia̍p-sat-lō͘ chhut bōng, hō͘ i tùi sí-lâng tiong koh-o̍ah ê sî, kap I tī-teh ê chèng lâng chòe kan-chèng.

(BCL) 當耶穌叫拉撒路出墓，互伊對死人中復活的時，及伊佇的眾人做干證。

18

(THR) . Tùi án-ni chèng lâng khì ngiâ-chih I, in-ūi thiaⁿ-kìⁿ I ū kiâⁿ chit ê sîn-jiah.

(BCL) 對按呢眾人去迎接伊，因為聽見伊有行此個的神蹟。

19

(THR) . Hoat-lī-sài lâng saⁿ-kap kóng, Khó-kiàn lín lóng bô chhái-kang; lín khòaⁿ, thong sè-kan lóng khì tè I lah.

(BCL) 法利賽人相及講：「可見恁攏無採工，恁看通世間攏去隨伊啦。」

20

(THR) . Tng choeh-kî chiūⁿ lâi kèng-pài ê, tiong-kan ū kúi-nā ê Hi-lī-nî lâng;

(BCL) 當節期上來敬拜的，中間有幾若個希利尼人。

21

(THR) . in chiū-kūn Ka-lī-lī ê Pek-sài-tāi lâng Hui-le̍k, kiû i kóng, Sian-siⁿ ah, góan ài kìⁿ Iâ-so͘.

(BCL) 就近加利利的伯賽大人腓力，求伊講：「先生啊，阮愛見耶穌。」

22

(THR) . Hui-le̍k lâi kā An-tek-lia̍t kóng; An-tek-lia̍t kap Hui-le̍k lâi kā Iâ-so͘ kóng.

(BCL) 腓力來給安得烈講，安得烈及腓力來給耶穌講。

23

(THR) . Iâ-so͘ ìn kóng, Jîn-chú tit-tio̍h êng-kng ê sî kàu lah.

(BCL) 耶穌應講：「人子得著榮光的時到啦。

24

(THR) . Góa sı̍t-sı̍t kā lín kóng, Chı̍t lia̍p be̍h bô lo̍h tī tōe-nı̍h lâi sí, chiū iû-gôan chı̍t lia̍p nā-tiāⁿ; sí, chiū kiat-sı̍t chōe-chōe.

(BCL) 我實實給恁講，一粒麥無落佇地裡來死，就猶原一粒若定，死，就結實多多。

25

(THR) . Thiàⁿ ka-kī ê sìⁿ-miā ê, chiū sòng-sit i; òan-hūn ka-kī ê sìⁿ-miā tī chit sè-kan ê, tek-khak pó i kàu éng-o̍ah.

(BCL) 疼家己的生命的，就喪失伊；怨恨家己的生命佇此世間的，的確保伊到永活。

26

(THR) . Lâng nā ho̍k-sāi góa, chiū tio̍h tè góa; góa só͘ tī-teh ê só͘-chāi, ho̍k-sāi góa ê lâng ia̍h beh tī hia; lâng nā ho̍k-sāi góa, góa ê Pē beh tùi-tiōng i.

(BCL) 人若服事我，就著隨我；我所佇的所在，服事我的人亦欲佇遐；人若服事我，我的父欲對重伊。」

27

(THR) . Taⁿ góa ê sim tōa peh-pak; beh cháiⁿ-iūⁿ kóng? Pē ah, kiù góa chhut chit ê sî. Chóng-sī góa ūi-tio̍h chit-ê, chiah kàu tī chit sî.

(BCL) 「今我的心大迫腹，欲怎樣講？父啊，救我出此個時；總是我為著此個才到佇此時。

28

(THR) . Pē ah, gōan lí êng-hián lí ê miâ. Chiū tùi thiⁿ ū siaⁿ kóng, Góa í-keng êng-hián, beh koh-chài êng-hián i.

(BCL) 父啊，願你榮顯你的名！」就對天有聲，講：「我已經榮顯，欲閣再榮顯伊。」

29

(THR) . Khiā tī piⁿ-á ê chèng lâng thiaⁿ-kìⁿ chiū kóng, Sī lûi tân; ū lâng kóng, sī thiⁿ-sài kā I kóng ōe.

(BCL) 徛佇邊仔的眾人聽見，就講：「是雷鳴。」有人講：「是天使給伊講話。」

30

(THR) . Iâ-so͘ ìn kóng, Chit ê siaⁿ lâi, m̄ sī ūi-tio̍h góa, chiū-sī ūi-tio̍h lín.

(BCL) 耶穌應講：「此個聲來呣是為著我，就是為著恁。

31

(THR) . Tī chit tia̍p chit sè-kan siū sím-phòaⁿ; tī chit tia̍p chit sè-kan ê jîn-kun beh siū kóaⁿ-tio̍k.

(BCL) 佇此霎此世間受審判，佇此霎此世間的人君欲受趕逐。

32

(THR) . Góa nā siū kú-khí lī-khui tōe, chiū beh ín-chhōa chèng lâng chiū-kūn góa.

(BCL) 我若受舉起離開地，就欲引導眾人就近我。」

33

(THR) . I kóng chit ê ōe, sī chí I beh sím-mı̍h khóan lâi sí.

(BCL) 伊講此個話，是指伊欲甚麼款來死。

34

(THR) . Chèng lâng chiū ìn I kóng, Góan thiaⁿ-kìⁿ lu̍t-hoat ū kóng, Ki-tok éng-éng tī-teh; lí cháiⁿ-iūⁿ kóng, Jîn-chú tio̍h siū kú-khí? chit ê Jîn-chú sī chī-chūi ah?

(BCL) 眾人就應伊講：「阮聽見律法有講，基督永永佇，你怎樣講『人子著受舉起』？此個人子是是誰啊？」

35

(THR) . Iâ-so͘ chiū kā in kóng, Kng tī lín ê tiong-kan iáu ū tiap-á kú ê sî. Lín ū kng ê sî, chiū tio̍h kiâⁿ, bián-tit àm kàu tī lín; hit-ê kiâⁿ tī àm ê, i m̄ chai kiâⁿ kàu tá-lo̍h.

(BCL) 耶穌就給講：「光佇恁的中間猶有霎仔久的時，恁有光的時，就著行，免得暗到佇恁；彼個行佇暗的，伊呣知行到叨落。

36

(THR) . Lín ū kng ê sî, chiū tio̍h sìn kng, hō͘ lín chiâⁿ-chòe kng-bêng ê lâng. Iâ-so͘ kóng chiah ê ōe, chiū lī-khui in, ka-kī ún-ba̍t.

(BCL) 恁有光的時，就著信光，互恁成做光明的人。」耶穌講諸個話，就離開家己隱密。

37

(THR) . Sui-jiân tī in ê bīn-chêng kiâⁿ chiah chōe sîn-jiah, in iû-gôan m̄ sìn I;

(BCL) 雖然佇的面前行即多神蹟，猶原呣信伊。

38

(THR) . che sī beh èng-giām sian-ti Í-sài-a ê ōe, kóng, Chú ah, góan só͘ thôan hō͘ lâng thiaⁿ, chī-chūi sìn ah? Chú chhiú-kut ê la̍t, tùi chī-chūi hián-bêng ah?

(BCL) 這是欲應驗先知以賽亞的話，講：主啊，阮所傳互人聽是誰信啊？主手骨的力對是誰顯明啊？

39

(THR) . Só͘-í in bōe sìn; in-ūi Í-sài-a koh ū kóng, Chú hō͘ in ê ba̍k-chiu chhiⁿ-mî, sim ngī; Bián-tit in ēng ba̍k-chiu khòaⁿ-kìⁿ, ēng sim hiáu-ngō͘, O̍at-tò-tńg, Chiū góa i-hó in.

(BCL) 所以信，因為以賽亞閣有講：

40

(THR) .

(BCL) 主互的目睭睛暝，心硬，免得用目睭看見，用心曉悟，越倒轉，就我醫好。

41

(THR) . Í-sài-a kóng chiah-ê, in-ūi khòaⁿ-kìⁿ I ê êng-kng, lâi lūn-kàu I.

(BCL) 以賽亞講諸個，因為看見伊的榮光來論到伊。

42

(THR) . Sui-jiân án-ni, in ê sī-tōa khiok ū chōe-chōe sìn I; ūi-tio̍h Hoat-lī-sài lâng chiah bô jīn I, bián-tit kek-chhut hōe-tn̂g;

(BCL) 雖然按呢，的序大卻有多多信伊，為著法利賽人才無認伊，免得革出會堂。

43

(THR) . in-ūi in ì-ài tùi lâng lâi ê êng-kng, khah kè-thâu tùi Siōng-tè lâi ê êng-kng.

(BCL) 因為意愛對人來的榮光卡過頭對上帝來的榮光。

44

(THR) . Iâ-so͘ kiò kóng, Sìn góa ê lâng m̄ sī sìn góa, chiū-sī sìn chhe góa ê.

(BCL) 耶穌叫講：「信我的人，呣是信我，就是信差我的。

45

(THR) . Khòaⁿ-kìⁿ góa ê, chiū-sī khòaⁿ-kìⁿ chhe góa ê.

(BCL) 看見我的，就是看見差我的。

46

(THR) . Góa chiū-sī kng lâi jı̍p sè-kan, hō͘ kìⁿ-nā sìn góa ê lâng bô khiā-khí tī àm.

(BCL) 我就是光，來入世間，互見若信我的人，無徛起佇暗。

47

(THR) . Lâng nā thiaⁿ góa ê ōe ia̍h m̄ siú, góa bô sím-phòaⁿ i; in-ūi góa lâi, m̄ sī beh sím-phòaⁿ sè-kan, sī beh kiù sè-kan.

(BCL) 人若聽我的話亦呣守，我無審判伊。因為我來呣是欲審判世間，是欲救世間。

48

(THR) . Khì-sak góa, ia̍h m̄ chiap-la̍p góa ê ōe ê lâng, chiū ū sím-phòaⁿ i ê, chiū-sī góa só͘ kóng ê tō-lí, beh tī bo̍at-jı̍t sím-phòaⁿ i.

(BCL) 棄拺我、亦呣接納我的話的人，就有審判伊的─就是我所講的道理欲佇末日審判伊。

49

(THR) . In-ūi góa só͘ kóng m̄ sī chhut tī ka-kī; chiū-sī chhe góa ê Pē, I ū bēng-lēng góa, tio̍h thôan sím-mı̍h, kóng sím-mı̍h.

(BCL) 因為我所講呣是出佇家己，就是差我的父，伊有命令我，著傳甚麼，講甚麼。

50

(THR) . Góa chai I ê bēng-lēng sī éng-o̍ah; só͘-í góa só͘ kóng ê, sī chiàu Pē só͘ thôan hō͘ góa ê, lâi kóng i.

(BCL) 我知伊的命令是永活。所以，我所講的是照父所傳互我的來講伊。」

Bible Color Mark

• 台語漢字羅馬本
• 巴克禮全羅