耶利米書 第 52 章

1

(THR) Se-tí-ka chē-ūi ê sî, jī-cha̍p-it hè; tī Iâ-lō͘-sat-léng chòe ông cha̍p-it nî. I ê lāu-bú miâ Hap-bō͘-tha; sī Lı̍p-ná lâng Iâ-lī-bí ê cha-bó͘-kiáⁿ.

(BCL) 西底家坐位的時二十一歲，佇耶路撒冷做王十一年。伊的老母名哈慕他，是立拿人耶利米的查某子。

2

(THR) I kiâⁿ Iâ-hô-hoa só͘ khòaⁿ-chòe pháiⁿ ê sū; chiàu Iok-ngá-kèng it-chhè só͘ kiâⁿ--ê.

(BCL) 伊行耶和華所看做歹的事，照約雅敬一切所行的。

3

(THR) Iâ-lō͘-sat-léng kap Iû-tāi tú-tio̍h chiah ê sū, sī in-ūi Iâ-hô-hoa hoat-chhut siū-khì; beh tùi I ê bīn-chêng kóaⁿ-chhut in; hit-sî Se-tí-ka pōe-pōan Pa-pí-lûn ông.

(BCL) 耶路撒冷及猶大抵著諸個事，是因為耶和華發出受氣欲對伊的面前趕出；彼時西底家背叛巴比倫王。

4

(THR) Tng Se-tí-ka chē-ūi tē-káu nî, Cha̍p-ge̍h chhoe-cha̍p, Pa-pí-lûn ông Nî-pò͘-kah-nî-sat chhōa i chôan-kun lâi kong-kek Iâ-lō͘-sat-léng, tī siâⁿ ê tùi-bīn chat-iâⁿ, koh tī sì-ûi choh thô͘-tui kong-kek siâⁿ.

(BCL) 當西底家坐位第九年十月初十，巴比倫王尼布甲尼撒導伊全軍來攻擊耶路撒冷，佇城的對面紮營，閣佇四圍作土堆攻擊城。

5

(THR) Tùi án-ni siâⁿ siū ûi-khùn, tı̍t-kàu Se-tí-ka cha̍p-it nî.

(BCL) 對按呢城受圍困直到西底家十一年。

6

(THR) Sì-ge̍h chhoe-káu jı̍t, siâⁿ-lāi ki-hng chin siong-tiōng, tì-kàu hit só͘-chāi ê peh-sìⁿ lóng bô niû.

(BCL) 四月初九日，城內飢荒真傷重，致到彼所在的百姓攏無糧。

7

(THR) Siâⁿ siū kong-phòa, it-chhè ê peng-teng thàu-mî tùi óa-kūn ông ê hn̂g, nn̄g ê siâⁿ-chhiûⁿ tiong ê mn̂g, hit tiâu lō͘ cháu chhut siâⁿ. Ka-le̍k-tí lâng tú-tú tī sì-ûi kong-kek siâⁿ, in chiū tùi A-la̍h-pa ê lō͘ tô-cháu.

(BCL) 城受攻破，一切的兵丁透暝對倚近王的園，二個城牆中的門，彼條路走出城；迦勒底人抵抵佇四圍攻擊城。就對亞拉巴的路逃走。

8

(THR) Ka-le̍k-tí ê kun-peng tui-jip ông, tī Iâ-lī-ko ê pîⁿ-iûⁿ tui--tio̍h Se-tí-ka; i ê chôan-kun lóng lī-khui i sì-sòaⁿ.

(BCL) 迦勒底的軍兵追王，佇耶利哥的平洋追著西底家。伊的全軍攏離開伊四散。

9

(THR) In lia̍h-tio̍h ông, tòa kàu Hap-má tōe ê Lī-pí-la̍h, Pa-pí-lûn ông hia; Pa-pí-lûn ông chiū sím-phòaⁿ i.

(BCL) 掠著王，帶到哈馬地的利比拉，巴比倫王遐；巴比倫王就審判伊。

10

(THR) Pa-pí-lûn ông tī Se-tí-ka ê ba̍k-chiu-chêng, thâi-sí i hiah ê kiáⁿ, koh tī Lī-pí-la̍h thâi Iû-tāi it-chhè ê kùi-cho̍k.

(BCL) 巴比倫王佇西底家的目睭前死伊許個子，閣佇利比拉猶大一切的貴族，

11

(THR) Koh iah Se-tí-ka nn̄g-lúi ba̍k-chiu, Pa-pí-lûn ông ēng thih-liān liān--i, tòa kàu Pa-pí-lûn, koaiⁿ i tī kaⁿ--nih, tı̍t-kàu i sí ê jı̍t.

(BCL) 閣挖西底家二蕊目睭，巴比倫王用鐵鍊鍊伊，帶到巴比倫，關伊佇監裡，直到伊死的日。

12

(THR) Pa-pí-lûn ông Nî-pò͘-kah-nî-sat ông cha̍p-káu nî, gō͘-ge̍h chhoe-cha̍p jı̍t, kun-sûi Pa-pí-lûn ông ê sī-ōe-tiúⁿ Nî-pò͘-sat-la̍h-tàn jı̍p Iâ-lō͘-sat-léng.

(BCL) 巴比倫王尼布甲尼撒王十九年五月初十日，跟隨巴比倫王的侍衛長尼布撒拉旦入耶路撒冷，

13

(THR) Ēng hé sio Iâ-hô-hoa ê tiān, kap ông-kiong; koh ēng hé sio Iâ-lō͘-sat-léng it-chhè ê chhù, chiū-sī hù-kùi-ke ê chhù.

(BCL) 用火燒耶和華的殿及王宮，閣用火燒耶路撒冷一切的厝，就是富貴家的厝。

14

(THR) Kun-tè sī-ōe-tiúⁿ Ka-le̍k-tí ê chôan-kun chiū thiah-húi Iâ-lō͘-sat-léng sì-ûi ê siâⁿ-chhiûⁿ.

(BCL) 跟隨侍衛長迦勒底的全軍就拆毀耶路撒冷四圍的城牆。

15

(THR) Hit-sî sī-ōe-tiúⁿ Nî-pò͘-sat-la̍h-tàn chiong bîn-kan sòng-hiong--ê, kap lâu tī siâⁿ-lāi só͘ chhun ê peh-sìⁿ, kap hiah ê tâu-hâng Pa-pí-lûn ông--ê, í-kı̍p chèng-lâng-tiong só͘ chhun--ê, lóng lia̍h-khì.

(BCL) 彼時侍衛長尼布撒拉旦將民間喪鄉者及留佇城內所剩的百姓，及許個投降巴比倫王者，以及眾人中所剩者，攏掠去。

16

(THR) To̍k-to̍k sī-ōe-tiúⁿ Nî-pò͘-sat-la̍h-tàn lâu hit ê tōe-hng tē-it sòng-hiong--ê, hō͘ in tī-lí phû-tô-hn̂g, kap chèng-choh.

(BCL) 獨獨侍衛長尼布撒拉旦留彼個地方第一喪鄉者，互治理葡萄園，及種作。

17

(THR) Iâ-hô-hoa tiān-lāi ê tâng-thiāu, kap Iâ-hô-hoa tiān-lāi ê phûn-chō, í-kı̍p tâng-hái, Ka-le̍k-tí lâng lóng phah-phòa, chiong hiah ê tâng ūn kàu Pa-pí-lûn.

(BCL) 耶和華殿內的銅柱及耶和華殿內的盆座以及銅海，迦勒底人攏拍破，將許個銅運到巴比倫，

18

(THR) Koh tòa-khì tiáⁿ, thuh-á, chián-to, pôaⁿ, óaⁿ, kap só͘ ēng it-chhè ê tâng-khì.

(BCL) 閣帶去鼎、托仔、剪刀、盤、碗、及所用一切的銅器、

19

(THR) Poe, hé-lô͘, pôaⁿ, tiáⁿ, teng-tâi, óaⁿ, au, it-chhè kim-khì ê kim, gûn-khì ê gûn, sī-ōe-tiúⁿ lóng tòa-khì.

(BCL) 杯、火爐、盤、鼎、燈台、碗、甌，一切金器的金，銀器的銀，侍衛長攏帶去。

20

(THR) Koh tòa Só͘-lô-bûn ūi Iâ-hô-hoa ê tiān só͘ chhòng nn̄g ki thiāu, chı̍t ê tâng-hái kap chō-ē cha̍p-jī chiah tâng-gû, chiah ê khì-kū ê tâng bōe-ōe chhìn i ê khin-tāng.

(BCL) 閣帶所羅門為耶和華的殿所創二支柱、一個銅海，及座下十二隻銅牛，諸個器具的銅會秤伊的輕重。

21

(THR) Chı̍t-ki thiāu kôaiⁿ cha̍p-poeh tiú, îⁿ-khôan cha̍p-jī tiú, kāu sì-cháiⁿ, tiong-ng khang-khak.

(BCL) 一支柱高十八肘，圓環十一肘，厚四指，中央空殼。

22

(THR) Thiāu ê téng-bīn ū tâng ê thiāu-táu, kôaiⁿ gō͘ tiú; thiāu-táu ê chiu-ûi ū bāng-á kap sia̍h-liû, lóng sī tâng chòe--ê; tē-jī ki thiāu siâng chı̍t-khóan, ia̍h ū sia̍h-liû.

(BCL) 柱的頂面有銅的柱枓，高五肘；柱枓的周圍有網仔及石榴，攏是銅做的。第二支柱像一款，亦有石榴。

23

(THR) Sì-bīn ū káu-cha̍p-la̍k lia̍p ê sia̍h-liû; tī bāng-á ê chiu-ûi kiōng ū chı̍t-pah lia̍p sia̍h-liû.

(BCL) 四面有九十六粒的石榴，佇網仔的周圍，共有一百粒石榴。

24

(THR) Sī-ōe-tiúⁿ lia̍h chè-si-thâu Se-lâi-ngá, kap tē-jī-kip ê chè-si Se-hoan-a, kap saⁿ ê kò͘-mn̂g--ê;

(BCL) 侍衛長掠祭司頭西萊雅，及第二級的祭司西番亞，及三個顧門者，

25

(THR) koh tùi siâⁿ-lāi lia̍h chı̍t ê kóan-peng ê koaⁿ, kap tī siâⁿ-lāi só͘ tú-tio̍h siông-siông kìⁿ ông ê bīn--ê chhit-lâng, kap kun-tiúⁿ ê su-kì, tiám-sǹg peh-sìⁿ--ê, í-kı̍p siâⁿ-tiong só͘ tú-tio̍h ê kok-bîn la̍k-cha̍p lâng.

(BCL) 閣對城內掠一個管兵的官，及佇城內所抵著常常見王的面者七人及軍長的書記點算百姓者，以及城中所抵著的國民六十人。

26

(THR) Sī-ōe-tiúⁿ Nî-pò͘-sat-la̍h-tàn chiong chiah ê lâng tòa kàu Lī-pí-la̍h, Pa-pí-lûn ông hia.

(BCL) 侍衛長尼布撒拉旦將諸個人帶到利比拉，巴比倫王遐。

27

(THR) Pa-pí-lûn ông phah--in, tī Hap-má tōe ê Lī-pí-la̍h thâi-sí in; án-ni Iû-tāi peh-sìⁿ siū-lia̍h, lī-khui pún-tōe.

(BCL) 巴比倫王拍佇哈馬地的利比拉死。按呢，猶大百姓受掠離開本地。

28

(THR) Nî-pò͘-kah-nî-sat só͘ lia̍h ê jîn-sò͘, kì tī ē-tóe; tī tē chhit nî, lia̍h Iû-tāi lâng saⁿ-chheng liân-jī-cha̍p-saⁿ lâng.

(BCL) 尼布甲尼撒所掠的人數記佇下底；佇第七年掠猶大人三千連二十三人；

29

(THR) Nî-pò͘-kah-nî-sat cha̍p-poeh nî, tùi Iâ-lō͘-sat-léng lia̍h-khì poeh-pah saⁿ-cha̍p-jī lâng.

(BCL) 尼布甲尼撒十八年對耶路撒冷掠去八百三十二人；

30

(THR) Nî-pò͘-kah-nî-sat jī-cha̍p-saⁿ-nî, sī-ōe-tiúⁿ Nî-pò͘-sat-la̍h-tàn lia̍h--khì Iû-tāi lâng chhit-pah sì-cha̍p-gō͘ miâ; kiōng ū sì-chheng la̍k-pah lâng.

(BCL) 尼布甲尼撒二十三年，侍衛長尼布撒拉旦掠去猶大人七百四十五名；共有四千六百人。

31

(THR) Iû-tāi ông Iok-ngá-kun siū-lia̍h liáu-āu, tē saⁿ-cha̍p-chhit--nî, Pa-pí-lûn ông Í-bī-bí-lô-ta̍t gôan--nî, cha̍p-jī-ge̍h jī-gō͘ jı̍t, kú-khí Iû-tāi ông Iok-ngá-kun, pàng i chhut-kaⁿ.

(BCL) 猶大王約雅斤受掠了後第三十七年，巴比倫王以未米羅達元年十二月二五日，舉起猶大王約雅斤，放伊出監，

32

(THR) Ia̍h ēng hó-ōe an-ùi i, hō͘ i ê ūi khah-kôaiⁿ kî-û chiah ê ông ê ūi, chiū-sī kap i tâng tī Pa-pí-lûn--ê.

(BCL) 亦用好話安慰伊，互伊的位卡高其餘諸個王的位，就是及伊同佇巴比倫者，

33

(THR) Thǹg--khì i kaⁿ-lāi só͘ chhēng ê saⁿ, chı̍t-sì-lâng kap Pa-pí-lûn ông saⁿ-kap chia̍h.

(BCL) 褪去伊監內所穿的衫。一世人及巴比倫王相及食。

34

(THR) Pa-pí-lûn ông siúⁿ-sù i só͘ khiàm-ēng ê sı̍t-bu̍t, jı̍t-jı̍t hō͘ i chı̍t-hūn; kui-sì-lâng sī án-ni, tı̍t-kàu i sí ê jı̍t.

(BCL) 巴比倫王賞賜伊所欠用的食物，日日互伊一份，歸世人是按呢，直到伊死的日。

Bible Color Mark

• 台語漢字羅馬本
• 巴克禮全羅