耶利米書 第 48 章

1

(THR) Lūn Mô͘-ap. Bān-kun ê Iâ-hô-hoa Í-sek-lia̍t ê Siōng-tè án-ni kóng, Nî-pho ū chai-ē ah, in-ūi siū húi-hōai; Ki-lia̍t-têng tú-tio̍h kiàn-siàu, siū-chhú; Bí-su-ka tú-tio̍h kiàn-siàu, siū pāi-hōai.

(BCL) 論摩押。萬軍的耶和華──以色列的上帝按呢講：尼波有災禍啊！因為受毀壞。基列亭抵著見誚受取；米斯迦抵著見誚受敗壞；

2

(THR) Mô͘-ap bô koh siū o-ló, ū lâng tī Hi-sı̍t-pún siat kè-bô͘ beh hāi i; kóng, Lâi lah, lán kā i chián-tû, hō͘ i bô koh chiâⁿ-chòe kok. Má-tek-biân ah, lí ia̍h tio̍h chēng-chēng, bo̍h chòe siaⁿ; to-kiàm beh tui-kóaⁿ lí.

(BCL) 摩押無閣受謳咾。有人佇希實本設計謀欲害伊，講：來啦！咱給伊剪除，互伊無閣成做國。瑪得緬啊，你亦著靜靜無做聲；刀劍欲追趕你。

3

(THR) Tùi Hô-lô-liām ū âu-kiò ê siaⁿ, ū chhiúⁿ-kiap kap tōa ê húi-bia̍t.

(BCL) 對何羅念有喉叫的聲有搶劫及大的毀滅：

4

(THR) Mô͘-ap tú-tio̍h húi-bia̍t, i ê gín-á háu ê siaⁿ hō͘ lâng thiaⁿ-kìⁿ.

(BCL) 摩押抵著毀滅！伊的囝仔哮的聲，互人聽見。

5

(THR) In-ūi lâng peh-chiūⁿ Ló͘-hi ê soaⁿ-phiâⁿ, ná-kiâⁿ ná-khàu; lo̍h Hô-lô-liām ê soaⁿ-phiâⁿ, thiaⁿ-kìⁿ húi-bia̍t ai-khàu ê siaⁿ.

(BCL) 因為人絔上魯希的山坪愈行愈哭，落何羅念的山坪聽見毀滅哀哭的聲。

6

(THR) Lín tio̍h tô-cháu, ka-kī kiù sìⁿ-miā; chhin-chhiūⁿ khòng-iá ê tō͘-siông.

(BCL) 恁著逃走，家己救生命，親像曠野的杜松。

7

(THR) Lí in-ūi óa-khò ka-kī ê só͘-chòe, kap ka-kī ê châi-pó, ia̍h beh siū-lia̍h. Ki-boat kap sio̍k i ê chè-si kùi-cho̍k, ia̍h beh chòe-chı̍t-ē siū chhian-î.

(BCL) 你因為倚靠家己的所做及家己的財寶亦欲受掠。基抹及屬伊的祭司貴族，亦欲做一下受遷移。

8

(THR) Kiâⁿ húi-bia̍t--ê, beh kàu ta̍k ê siâⁿ; bô chı̍t ê siâⁿ ōe bián-tit; soaⁿ-kok beh tì-kàu pāi-lo̍h, pîⁿ-iûⁿ beh siū húi-hōai, chiàu Iâ-hô-hoa só͘ kóng--ê.

(BCL) 行毀滅者欲到逐個城，無一個城會免得。山谷欲致到敗落，平洋欲受毀壞；照耶和華所講的。

9

(THR) Tio̍h ēng sı̍t hō͘ Mô͘-ap, hō͘ i pe-cháu; i chiah ê siâⁿ beh tì-kàu pha-hng, bô lâng khiā-khí.

(BCL) 著用翅互摩押，互伊飛走。伊諸個城欲致到拋荒，無人徛起。（

10

(THR) Chhìn-chhìn chhái-chhái chòe Iâ-hô-hoa ê kang--ê, tio̍h siū chiù-chó͘; kìm-chí i ê to bak-tio̍h huih--ê, tio̍h siū chiù-chó͘.

(BCL) 凊凊彩彩做耶和華的工者，著受咒詛；禁止伊的刀染著血者，著受咒詛。）

11

(THR) Mô͘-ap tùi siàu-liân í-lâi, siông-siông hióng-siū pêng-an; chhin-chhiūⁿ chē-chheng ê chiú, bô tùi chit ê khì-kū piàⁿ tī pa̍t ê khì-kū; ia̍h bē bat siū-lia̍h; in-ūi án-ni i ê gôan-bī iáu tī-teh, khì-bī bē piàn.

(BCL) 摩押對少年以來常常享受平安，親像坐清的酒，無對此個器具傾佇別個器具，亦未曾受掠。因為按呢，伊的原味猶佇，氣味未變。

12

(THR) Iâ-hô-hoa kóng, Khòaⁿ ah, jı̍t-chí beh kàu, Góa beh chhe piàⁿ-chiú--ê khì i hia, kā i piàⁿ-chhut--lâi; piàⁿ-khang i ê khì-kū, phah-phòa i ê chiú-àng.

(BCL) 耶和華講：「看啊，日子欲到，我欲差傾酒者去伊遐，給伊傾出來，傾空伊的器具，拍破伊的酒甕。

13

(THR) Mô͘-ap beh ūi-tio̍h Ki-boat lâi kiàn-siàu, chhin-chhiūⁿ Í-sek-lia̍t-ke ūi-tio̍h in só͘ óa-khò ê Pek-te̍k-lī lâi kiàn-siàu chı̍t-iūⁿ.

(BCL) 摩押欲為著基抹來見誚，親像以色列家為著所倚靠的伯特利來見誚一樣。

14

(THR) Lí cháiⁿ-iūⁿ kóng, Góan sī ióng-sū, sī ū la̍t thang kau-chiàn ê lâng?

(BCL) 你怎樣講：阮是勇士，是有力通交戰的人？

15

(THR) Mô͘-ap pìⁿ-chòe pha-hng, tùi-te̍k chiūⁿ-khì, jı̍p i hiah ê siâⁿ; só͘ kéng-sóan ê siàu-liân lâng lo̍h-khì tú-tio̍h thâi-sí; che sī Kun-ông, miâ chòe bān-kun ê Iâ-hô-hoa, kóng--ê.

(BCL) 摩押變做拋荒，對敵上去，入伊許個城。所揀選的少年人落去抵著死；這是君王──名做萬軍的耶和華講的。

16

(THR) Mô͘-ap ê chai-ē kūn lah, i ê hōan-lān kín-kín kàu.

(BCL) 摩押的災禍近啦；伊的患難緊緊到。

17

(THR) Kìⁿ-nā tī i ê chiu-ûi, bat i ê miâ--ê, lín lóng tio̍h ūi i pi-siong; kóng, Hit ê ióng ê thûi, súi ê kóaiⁿ-á, thái ōe chı̍h kàu án-ni?

(BCL) 見若佇伊的周圍識伊的名者，恁攏著為伊悲傷，講：彼個勇的槌，娞的枴仔，豈會折到按呢？

18

(THR) Tòa tī Tí-pún ê peh-sìⁿ ah, tio̍h tùi lí êng-kng ê ūi lo̍h-lâi, chē tī ta-sò ê tōe; in-ūi húi-bia̍t Mô͘-ap--ê chiūⁿ-lâi kong-kek lí, húi-hōai lí hiah ê ōe-só͘.

(BCL) 住佇底本的百姓啊，著對你榮光的位落來，坐佇乾燥的地；因為毀滅摩押者上來攻擊你，毀壞你許個衛所。

19

(THR) Tòa tī A-lô-jíⁿ--ê ah, tio̍h khiā tī lō͘-piⁿ koan-khòaⁿ, mn̄g tô-cháu ê ta-po͘-lâng, kap thoat-lī ê hū-jîn-lâng, kóng, Sī sím-mı̍h tāi-chì ah?

(BCL) 住佇亞羅珥的啊，著徛佇路邊觀看，問逃走的查甫人，及脫離的婦仁人講：是甚麼代誌啊？

20

(THR) Mô͘-ap in-ūi húi-hōai lâi kiàn-siàu, lín tio̍h thî-khàu âu-kiò; tio̍h tī A-lùn pò-kò, kóng, Mô͘-ap pìⁿ-chòe pha-hng.

(BCL) 摩押因為毀壞來見誚；恁著啼哭喉叫，著佇亞嫩報告講：摩押變做拋荒！

21

(THR) Hêng-ho̍at í-keng kàu tī pîⁿ-iûⁿ ê tōe, tī Hô-lûn, tī Ngá-cha̍p, tī Bí-hoat-ap;

(BCL) 「刑罰已經到佇平洋的地佇何倫、佇雅雜、佇米法押、

22

(THR) tī Tí-pún, tī Nî-pho, tī Pek-te-pí-la̍h-thài-im;

(BCL) 佇底本、佇尼波、佇伯低比拉太音、

23

(THR) tī Ki-lia̍t-têng, tī Pek-ka-bo̍at, tī Pek-bí-un;

(BCL) 佇基列亭、佇伯迦末、佇伯米恩、

24

(THR) tī Ka-lio̍k, tī Pho-su-la̍h, kap Mô͘-ap tōe hn̄g-kūn só͘ ū ê siâⁿ.

(BCL) 佇加略、佇波斯拉，及摩押地遠近所有的城。

25

(THR) Mô͘-ap ê kak chhò-tn̄g lah, i ê chhiú-kut at-chı̍h lah; che sī Iâ-hô-hoa kóng--ê.

(BCL) 摩押的角剉斷啦，伊的手骨遏折啦。這是耶和華講的。」

26

(THR) Lín tio̍h hō͘ Mô͘-ap chiú-chùi; in-ūi i chū-ko, pōe-ge̍k Iâ-hô-hoa; i beh tī i só͘ thò͘ ê tiong-kan kō-lâi kō-khì; koh beh hō͘ lâng thí-chhiò.

(BCL) 「恁著互摩押酒醉，因為伊自高悖逆耶和華。伊欲佇伊所吐的中間翱來翱去，閣欲互人恥笑。

27

(THR) Í-sek-lia̍t kiám m̄-bat hō͘ lí thí-chhiò mah? i kiám sī tī chha̍t ê tiong-kan hō͘ lâng chhâ-chhut mah? in-ūi lí ta̍k-pái kóng-khí i ê sî, chiū iô-thâu pōaⁿ-hī.

(BCL) 以色列豈呣曾互你恥笑嗎？伊豈是佇賊的中間互人查出嗎？因為你逐擺講起伊的時，就搖頭拂耳。

28

(THR) Khiā-khí tī Mô͘-ap--ê ah, lín tio̍h lī-khui chiah ê siâⁿ, khiā-khí tī chio̍h-pôaⁿ; chhin-chhiūⁿ ka-chui choh-siū tī khang-kháu ê piⁿ.

(BCL) 徛起佇摩押的啊，恁著離開諸個城，徛起佇石磐，親像鳩鵻作巢佇孔口的邊。

29

(THR) Góan ū thiaⁿ-kìⁿ Mô͘-ap ê kiau-ngō͘, i ê kiau-ngō͘ kàu-ke̍k; i ê chū-ko, i ê kiau-ngō͘, i ê bú-bān, chûn-sim ka-kī lia̍h chòe-tōa.

(BCL) 阮有聽見摩押的驕傲，伊的驕傲到極；伊的自高，伊的驕傲，伊的侮慢，存心家己掠做大。

30

(THR) Iâ-hô-hoa kóng, Góa chai i ê siū-khì, kap i khang-khang ê khoa-kháu, só͘-kiâⁿ sī khang-khang.

(BCL) 耶和華講：我知伊的受氣，及伊空空的誇口，所行是空空。

31

(THR) In-ūi án-ni, góa beh ūi-tio̍h Mô͘-ap thî-khàu, góa beh ūi-tio̍h Mô͘-ap chôan-tōe âu-kiò; in beh ūi-tio̍h Kiat-jíⁿ-hap-lia̍t-siat ê lâng thó͘-khùi.

(BCL) 因為按呢，我欲為著摩押啼哭，我欲為著摩押全地喉叫；欲為著吉珥哈列設的人吐氣。

32

(THR) Se-pí-má ê phû-tô-chhiū ah, góa ūi-tio̍h lí thî-khàu, pí Ngá-siā lâng ê thî-khàu khah siong-tiōng; lí ê ki thòaⁿ-kè hái, tı̍t-tı̍t chhun kàu Ngá-siā ê hái; hit ê kiâⁿ húi-bia̍t--ê í-keng lîm-kàu lí beh siu-sêng ê ké-chí, kap lí ê phû-tô.

(BCL) 西比瑪的葡萄樹啊，我為著你啼哭，比雅謝人的啼哭卡傷重。你的枝湠過海，直直伸到雅謝的海。彼個行毀滅者已經臨到你欲收成的果子，及你的葡萄。

33

(THR) Pûi ê chhân kap Mô͘-ap tōe, i ê hoaⁿ-hí khòai-lo̍k lóng bô--khì. Góa hō͘ chiú-khut ê chiú bô--khì; bô lâng ta̍h chiú, chhut hoaⁿ-hí ê siaⁿ, hit ê siaⁿ m̄-sī hoaⁿ-hí ê siaⁿ.

(BCL) 肥的田及摩押地，伊的歡喜快樂攏無去；我互酒窟的酒無去，無人踏酒出歡喜的聲；彼個聲呣是歡喜的聲。

34

(THR) In-ūi Hi-sı̍t-pún ai-siong ê siaⁿ thàng-kàu Í-lī-a-lī, tı̍t-tı̍t kàu Ngá-cha̍p, koh tùi Só-jíⁿ kàu Hô-lô-liām, tı̍t-kàu I-ki-la̍h Si-lī-si-a, in-ūi Lêng-lîm ê chúi tek-khak ko͘-tâ.

(BCL) 「因為希實本哀傷的聲到以利亞利，直直到雅雜；閣對瑣珥到何羅念，直到伊基拉．施利施亞，因為寧林的水的確枯焦。」

35

(THR) Iâ-hô-hoa kóng, Góa beh tī Mô͘-ap tōe, hō͘ hit ê hiàn-chè tī soaⁿ-thâu-tôaⁿ--ê kap hit ê sio-hiuⁿ tī i hiah ê sîn-bêng--ê, lóng soah.

(BCL) 耶和華講：「我欲佇摩押地互彼個獻祭佇山頭壇者，及彼個燒香佇伊許個神明者攏息。

36

(THR) In-ūi án-ni, góa ê sim ūi-tio̍h Mô͘-ap chhin-chhiūⁿ phín-siau teh tân; góa ê sim ūi-tio̍h Kiat-jíⁿ-hap-lia̍t-siat lâng chhin-chhiūⁿ phín-siau teh tân; in-ūi in só͘ chek-chū ê châi-bu̍t lóng bô--khì.

(BCL) 因為按呢，我的心為著摩押親像　簫鳴，我的心為著吉珥哈列設人親像　簫鳴，因為所聚集的財物攏無去。

37

(THR) Thâu-khak ta̍k-ê kng-khō-khō, chhùi-chhiu ta̍k-ê chián té-té, chhiú-kut ta̍k-ê koah-siong, io hâ môa-pò͘.

(BCL) 「頭殼逐個光裸裸，嘴鬚逐個剪短短，手骨逐個割傷，腰縖麻布。

38

(THR) Tī Mô͘-ap ta̍k-keng ê chhù-téng, kap i hiah ê koe-chhī, ta̍k só͘-chāi ū thî-khàu; in-ūi Góa kong-phòa Mô͘-ap, chhin-chhiūⁿ kòng-phòa m̄-tèng-ì ê khì-kū. Che sī Iâ-hô-hoa kóng--ê.

(BCL) 佇摩押逐間的厝頂及伊許個街市逐所在有啼哭；因為我攻破摩押，親像摃破呣中意的器具。這是耶和華講的。

39

(THR) I húi-hōai kàu án-ni! in thî-khàu kàu án-ni! Mô͘-ap kiàn-siàu o̍at-tò-tńg kàu án-ni! chhin-chhiūⁿ án-ni, Mô͘-ap beh hō͘ sì-ûi ê lâng thí-chhiò gông-ngia̍h.

(BCL) 伊毀壞到按呢！啼哭到按呢！摩押見誚越倒轉到按呢！親像按呢摩押欲互四圍的人恥笑卬愕。」

40

(THR) In-ūi Iâ-hô-hoa án-ni kóng, Khòaⁿ ah, i beh chhin-chhiūⁿ eng-chiáu pe--lâi, thí-khui i ê sı̍t tī Mô͘-ap.

(BCL) 因為耶和華按呢講：看啊，伊欲親像鷹鳥飛來，展開伊的翅佇摩押。

41

(THR) Ka-lio̍k hō͘ lâng chhú--khì, hiah ê ōe-só͘ hō͘ lâng chiàm--khì; kàu hit-jı̍t, Mô͘-ap chiah ê ióng-sū ê sim chhin-chhiūⁿ beh siⁿ-kiáⁿ ê hū-jîn-lâng ê sim.

(BCL) 迦略互人取去，許個衛所互人佔去。到彼日，摩押諸個勇士的心親像欲生子的婦仁人的心。

42

(THR) Mô͘-ap beh tú-tio̍h húi-bia̍t, bô koh chiâⁿ-chòe kok; in-ūi in chū-ko, pōe-ge̍k Iâ-hô-hoa.

(BCL) 摩押欲抵著毀滅，無閣成做國，因為自高悖逆耶和華。

43

(THR) Iâ-hô-hoa kóng, Mô͘-ap khiā-khí ê peh-sìⁿ ah, kiaⁿ-hiâⁿ, hām-khiⁿ, o̍ah-tauh, lóng kàu tī lí.

(BCL) 耶和華講：摩押徛起的百姓啊，驚惶、陷坑、活罩攏到佇你。

44

(THR) Cháu-pī kiaⁿ-hiâⁿ-ê, beh po̍ah-lo̍h hām-khiⁿ; tùi hām-khiⁿ peh--khí-lâi ê, beh hō͘ o̍ah-tauh tauh-tio̍h; in-ūi Góa beh hō͘ hêng-ho̍at ê nî lîm-kàu Mô͘-ap; che sī Iâ-hô-hoa kóng--ê.

(BCL) 走避驚惶的欲跋落陷坑；對陷坑絔起來的欲互活罩罩著，因為我欲互刑罰的年臨到摩押。這是耶和華講的。

45

(THR) Hiah ê tô-cháu--ê khùi-la̍t chīn, khiā tī Hi-sı̍t-pún ìm-ńg-ē; chóng-sī hé tùi Hi-sı̍t-pún chhut, hé-iām tùi Se-hông hoat, it-chīn sio Mô͘-ap ê pian-kài, kap chok-lōan ê lâng thâu-khak ê téng-bīn.

(BCL) 許個逃走者氣力盡，徛佇希實本蔭影下；總是火對希實本出，火焰對西宏發，一盡燒摩押的邊界，及作亂的人頭殼的頂面。

46

(THR) Mô͘-ap ah, lí ū chai-ē; Ki-boat ê peh-sìⁿ bia̍t-bô lah, lí ê chèng-kiáⁿ hō͘ lâng lia̍h--khì, lí ê chèng cha-bó͘-kiáⁿ chòe siū-lia̍h--ê.

(BCL) 摩押啊，你有災禍！基抹的百姓滅無啦！你的眾子互人掠去，你的眾查某子做受掠者。

47

(THR) Iâ-hô-hoa kóng, Chóng-sī kàu jı̍t-āu, Góa beh hō͘ Mô͘-ap siū-lia̍h ê lâng tò-tńg. Lūn Mô͘-ap siū sím-phòaⁿ ê ōe, kàu chia ûi-chí.

(BCL) 耶和華講：總是到日後，我欲互摩押受掠的人倒轉。論摩押受審判的話到遮為止。

Bible Color Mark

• 台語漢字羅馬本
• 巴克禮全羅