耶利米書 第 47 章

1

(THR) Hoat-ló kong-kek Ka-sat ê tāi-seng, ū Iâ-hô-hoa lūn Hui-lī-sū lâng ê ōe lîm-kàu sian-ti Iâ-lī-bí.

(BCL) 法老攻擊迦薩的代先，有耶和華論非利士人的話臨到先知耶利米。

2

(THR) Iâ-hô-hoa án-ni kóng, Khòaⁿ ah, ū chúi tùi pak-hng chhèng--khí-lâi, chiâⁿ-chòe tiòng-móa ê hô, beh tiòng-móa chit ê tōe, kap kî-tiong só͘ ū-ê, kap siâⁿ kap kî-tiong só͘ khiā-khí--ê; lâng beh âu-kiò, kéng-lāi khiā-khí ê peh-sìⁿ beh thî-khàu.

(BCL) 耶和華按呢講：看啊，有水對北方淐起來，成做漲滿的河，欲漲滿此個地及其中所有的，及城及其中所徛起的。人欲喉叫；境內徛起的百姓欲啼哭。

3

(THR) Ūi-tio̍h tùi-te̍k ióng ê bé, i ê tôe kho̍k-kho̍k-háu ê siaⁿ, iā ūi-tio̍h i hiah ê chiàn-chhia kín-kín cháu, i ê chhia-lûn hū-hū-háu, chiū chiah-ê chòe lāu-pē--ê chhiú nńg, bô o̍at-thâu khòaⁿ i ê kiáⁿ.

(BCL) 為著對敵勇的馬，伊的蹄硞硞哮的聲也為著伊許個戰車緊緊走，伊的車輪呼呼哮，就諸個做老父的手軟，無越頭看伊的子。

4

(THR) In-ūi sî-jı̍t kàu lah, beh húi-bia̍t it-chhè ê Hui-lī-sū lâng, beh tùi Chhui-lô Se-tùn chián-tû só͘ chhun pang-chān in--ê; in-ūi Iâ-hô-hoa beh húi-bia̍t Hui-lī-sū lâng, Ka-hui-thok hái-sū só͘ chhun ê peh-sìⁿ.

(BCL) 因為時日到了，欲毀滅一切的非利士人，欲對推羅、西頓剪除所剩幫助者。因為耶和華欲毀滅非利士人，迦斐託海嶼所剩的百姓。

5

(THR) Ka-sat í-keng bô pòaⁿ-ki thâu-mn̂g; A-sı̍t-ki-lûn kui tī bô; soaⁿ-kok só͘ chhun--ê, lí ka-kī koah-bah, beh kàu jōa-kú ah?

(BCL) 迦薩已經無半支頭毛；亞實基倫歸佇無，山谷所剩者，你家己割肉，欲到偌久啊？

6

(THR) Iâ-hô-hoa ê to-kiàm ah, lí beh kàu tī-sî chiah soah? tio̍h kiu jı̍p lí ê to-siù, an-chēng bô tín-tāng.

(BCL) 耶和華的刀劍啊，你欲到底時才息？著勼入你的刀鞘，安靜無振動。

7

(THR) Iâ-hô-hoa í-keng bēng-lēng lí kong-kek A-sı̍t-ki-lûn, kong-kek hái-piⁿ ê tōe; I í-keng phài lí tiāⁿ-tio̍h, lí thái-thó ōe thêng-chí ah?

(BCL) 耶和華已經命令你攻擊亞實基倫攻擊海邊的地，伊已經派你定著，你豈可會停止啊？

Bible Color Mark

• 台語漢字羅馬本
• 巴克禮全羅