耶利米書 第 31 章

1

(THR) Iâ-hô-hoa kóng, Hit-sî Góa beh chòe Í-sek-lia̍t ta̍k pâng-thâu ê Siōng-tè; in beh chòe Góa ê peh-sìⁿ.

(BCL) 耶和華講：「彼時，我欲做以色列逐房頭的上帝，欲做我的百姓。」

2

(THR) Iâ-hô-hoa án-ni kóng, Í-sek-lia̍t hō͘ to thâi-bô-liáu ê peh-sìⁿ, tī khòng-iá tit-tio̍h un-tián; Góa khì hō͘ in tit-tio̍h an-hioh.

(BCL) 耶和華按呢講：以色列互刀無了的百姓。佇曠野得著恩典，我去互得著安息。

3

(THR) Chá-sî Iâ-hô-hoa tùi góa hián-hiān, kóng, Góa ēng éng-óan ê thiàⁿ, thiàⁿ lí; in-ūi án-ni, Góa ēng chû-ài khan lí.

(BCL) 早時耶和華對我顯現，講：我用永遠的疼，疼你，因為按呢我用慈愛牽你。

4

(THR) Í-sek-lia̍t ê chāi-sek-lú ah, Góa beh koh kiàn-lı̍p lí, lí chiū tit-tio̍h kiàn-lı̍p; lí beh koh ēng lin-long-kó͘ chòe chng-thāⁿ, kap khòai-lo̍k ê lâng chòe-tīn thiàu-bú chhut-khì.

(BCL) 以色列的在室女啊，我欲閣建立你，你就得著建立；你欲閣用鈴瓏鼓做妝飾，及快樂的人做陣跳舞出去；

5

(THR) Lí beh koh chai-chèng phû-tô-hn̂g tī Sat-má-lī-a chiah ê soaⁿ chai-chèng--ê beh chai-chèng i, lâi hióng-siū i ê ké-chí.

(BCL) 你欲閣栽種葡萄園佇撒瑪利亞諸個山，栽種者欲栽種伊，來享受伊的果子。

6

(THR) In-ūi beh ū chı̍t-jı̍t, Í-hoat-liân soaⁿ siú-bāng ê lâng beh kiò kóng, Khí-lâi, lán chiūⁿ-lâi khì Sek-an, kàu Iâ-hô-hoa lán ê Siōng-tè hia.

(BCL) 因為欲有一日，以法蓮山守望的人欲叫講：起來！咱上來去錫安，到耶和華──咱的上帝遐。

7

(THR) Iâ-hô-hoa án-ni kóng, Lín tio̍h ūi Ngá-kok chhiùⁿ hoaⁿ-hí ê koa, ūi bān-kok-tiong chòe-thâu ê kok chhut tōa-siaⁿ, thôan-pò͘ o-ló kóng, Iâ-hô-hoa ah, kiù Lí ê peh-sìⁿ Í-sek-lia̍t só͘ chhun ê lâng.

(BCL) 耶和華按呢講：恁著為雅各唱歡喜的歌，為萬國中做頭的國出大聲。傳報謳咾講：耶和華啊，救你的百姓以色列所剩的人。

8

(THR) Khòaⁿ ah, Góa beh chhōa in tùi pak-hng lâi, chū-chı̍p in tùi tōe-ke̍k lâi; kap in lâi--ê, ū chhiⁿ-mî--ê, pái-kha--ê, tòa-sin--ê, beh siⁿ-kiáⁿ--ê, kui tōa-tīn saⁿ-kap lâi.

(BCL) 看啊，我欲導對北方來，聚集對地極來；及來者有睛暝者、跛腳者、帶娠者、欲生子者；歸大陣相及來。

9

(THR) In beh thî-khàu lâi, Góa beh tī kî-tó chhōa in; Góa beh tī chèng-tı̍t bōe po̍ah-tó ê lō͘ chhōa in kàu hô-piⁿ; in-ūi Góa sī Í-sek-lia̍t ê pē, Í-hoat-liân chòe Góa ê tōa kiáⁿ.

(BCL) 欲啼哭來。我欲佇祈禱導，我欲佇正直跋倒的路導到河邊，因為我是以色列的父，以法蓮做我的大子。

10

(THR) Lia̍t-kok ah, tio̍h thiaⁿ Iâ-hô-hoa ê ōe, thôan-pò tī hn̄g ê hái-sū, kóng, Kóaⁿ-sòaⁿ Í-sek-lia̍t--ê beh chū-chı̍p i, koh kò͘-siú i, chhin-chhiūⁿ bo̍k-chiá kò͘-siú i ê iûⁿ-kûn.

(BCL) 列國啊，著聽耶和華的話，傳報佇遠的海嶼講：趕散以色列的欲聚集伊，閣顧守伊，親像牧者顧守伊的羊群。

11

(THR) In-ūi Iâ-hô-hoa í-keng kiù-sio̍k Ngá-kok, sio̍k -hôe i thoat-lī pí i khah kiông--ê ê chhiú.

(BCL) 因為耶和華已經救贖雅各，贖回伊脫離比伊卡強者的手。

12

(THR) In beh kàu Sek-an kôaiⁿ ê só͘-chāi chhiùⁿ-koa; koh beh chhin-chhiūⁿ hô-chúi lâu, kàu Iâ-hô-hoa un-tián ê tōe, tit-tio̍h gō͘-kak, chiú, iû, iûⁿ-kûn, gû-kûn ê sòe-chiah--ê; in ê sim beh chhin-chhiūⁿ kòan-ak ê hn̂g, lóng bô koh iu-khó͘.

(BCL) 欲到錫安高的所在唱歌，閣欲親像河水流到耶和華恩典的地，得著五穀、酒、油、羊群、牛群的細隻的的心欲親像灌沃的園；攏無閣憂苦。

13

(THR) Hit-sî chāi-sek-lú beh thiàu-bú lâi hoaⁿ-hí, siàu-liân-lâng lāu-lâng ia̍h beh saⁿ-kap hoaⁿ-hí; in-ūi Góa beh hō͘ in ê pi-ai pìⁿ-chòe hoaⁿ-hí, ia̍h beh an-ùi in, hō͘ in tī iu-būn liáu-āu lâi khòai-lo̍k.

(BCL) 彼時，在室女欲跳舞來歡喜；少年人、老人，亦欲相及歡喜；因為我欲互的悲哀變做歡喜，亦欲安慰，互佇憂悶了後來快樂。

14

(THR) Góa beh ēng iû-jī hō͘ chè-si ê sim móa-chiok; Góa ê peh-sìⁿ ia̍h beh in-ūi Góa ê un-hūi móa-ì; che sī Iâ-hô-hoa kóng--ê.

(BCL) 我欲用油膩互祭司的心滿足；我的百姓亦欲因為我的恩惠滿意。這是耶和華講的。

15

(THR) Iâ-hô-hoa án-ni kóng, Tī La̍h-má thiaⁿ-kìⁿ siaⁿ, thî-khàu koh tōa siong-pi, La̍h-kiat khàu i ê kiáⁿ-jî, m̄-gōan siū an-ùi, in-ūi i ê kiáⁿ bô--khì.

(BCL) 耶和華按呢講：佇拉瑪聽見聲，啼哭閣大傷悲，拉結哭伊的子兒，呣願受安慰，因為伊的子無去。

16

(THR) Iâ-hô-hoa án-ni kóng, Tio̍h kìm-chí lí ê siaⁿ, bo̍h-tit thî-khàu; kìm-chí lí ê ba̍k-chiu, bo̍h-tit lâu ba̍k-sái; in-ūi lí chòe-kang, beh ū pò-siúⁿ; in beh tùi tùi-te̍k ê kok tò-lâi; che sī Iâ-hô-hoa kóng--ê.

(BCL) 耶和華按呢講：著禁止你的聲，莫得啼哭，禁止你的目睭，莫得流目屎，因為你做工，欲有報賞；欲對對敵的國倒來。這是耶和華講的。

17

(THR) Iâ-hô-hoa kóng, Lí ê bé-kéng ū ǹg-bāng, lí ê kiáⁿ-jî beh tò--lâi ka-kī ê kéng-lāi.

(BCL) 耶和華講：你的尾境有向望；你的子兒欲倒來家己的境內。

18

(THR) Góa sı̍t-chāi ū thiaⁿ-kìⁿ Í-hoat-liân ka-kī thòng-hūn, kóng, Lí tok-chek góa, góa chiū siū tok-chek; góa chhin-chhiūⁿ kà bē-chiūⁿ-chōa ê gû-á, kiû Lí hō͘ góa o̍at-tò-tńg, góa chiū o̍at-tò-tńg; in-ūi Lí sī góa ê Siōng-tè Iâ-hô-hoa.

(BCL) 我實在有聽見以法蓮家己痛恨，講：你督責我，我就受督責，我親像教未上畷的牛仔，求你互我越倒轉，我就越倒轉，因為你是我的上帝──耶和華。

19

(THR) Góa o̍at-tò-tńg í-āu chiū hóan-hóe; siū kà-sī í-āu, chiū phah kha-thúi; góa chiū kiàn-siàu làu-khùi, in-ūi góa tam-tng siàu-liân ê sî ê lêng-jio̍k.

(BCL) 我越倒轉以後就反悔；受教示以後就拍腳腿；我就見誚漏氣，因為我擔當少年的時的凌辱。

20

(THR) Iâ-hô-hoa kóng, Í-hoat-liân sī Góa thiàⁿ ê kiáⁿ mah? sī thang hoaⁿ-hí ê gín-ná mah? Góa kìⁿ-nā chek-pī i, iáu-kú chhim-chhim siàu-liām i; só͘-í Góa ê sim-tn̂g ūi-tio̍h i bōe pêng-an, Góa tek-khak beh lîn-bín i.

(BCL) 耶和華講：以法蓮是我疼的子嗎？是通歡喜的囝仔嗎？我見若責備他，猶久深深數念伊；所以我的心腸為著伊平安；我的確欲憐憫伊。

21

(THR) Í-sek-lia̍t ê peh-sìⁿ ah, lí tio̍h ūi ka-kī lı̍p chí-lō͘-pâi, khiā ín-lō͘-thiāu; lí tio̍h liû-sim ǹg tōa-lō͘, chiū-sī lí só͘ khì ê gôan-lō͘; lí tio̍h tò--lâi, tò-lâi tī lí chiah ê siâⁿ.

(BCL) 以色列的百姓啊，你著為家己立指路牌，豎引路柱。你著留心向大路，就是你所去的原路；你著倒來，倒來佇你諸個城。

22

(THR) Pōe-biū ê cha-bó͘-gín-ná ah, lí sì-kòe liû bô tiāⁿ-tio̍h, beh kàu tī-sî ah? Iâ-hô-hoa tī tōe-chiūⁿ chhòng chı̍t-hāng sin ê sū, chiū-sī cha-bó͘-lâng beh pó-hō͘ ta-po͘-lâng.

(BCL) 悖謬的查某囝仔啊，你四界流無定著，欲到底時啊？耶和華佇地上創一項新的事，就是查某人欲保護查甫人。

23

(THR) Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Góa hō͘ siū-lia̍h ê lâng tò--lâi ê sî, tī Iû-tāi tōe kap i hiah ê siâⁿ, lâng beh koh ēng chit ê ōe kóng, Kong-gī ê chhù, sèng ê soaⁿ ah, gōan Iâ-hô-hoa sù-hok lí.

(BCL) 萬軍的耶和華──以色列的上帝按呢講：「我互受掠的人倒來的時，佇猶大地及伊許個城，人欲閣用此個話講：公義的厝，聖的山啊，願耶和華賜福你。

24

(THR) Iû-tāi kap hiah ê siâⁿ ê lâng í-kı̍p choh-sit lâng, sì-kòe chhī-iûⁿ ê lâng, lóng beh saⁿ-kap khiā-khí tī-hia.

(BCL) 猶大及許個城的人，以及作穡人，四界飼羊的人，攏欲相及徛起佇遐。

25

(THR) In-ūi sim-sîn ià-siān ê lâng, Góa í-keng hō͘ i móa-chiok; sim-sîn iu-būn ê lâng, Góa í-keng hō͘ i ti-chiok.

(BCL) 因為心神厭倦的人，我已經互伊滿足；心神憂悶的人，我已經互伊知足。」

26

(THR) Sian-ti kóng, Góa khùn-chhíⁿ teh siūⁿ, góa ê khùn chin hoaⁿ-hí.

(BCL) 先知講：「我睏醒想，我的睏真歡喜！」

27

(THR) Iâ-hô-hoa kóng, Khòaⁿ ah, jı̍t-chí beh kàu, Góa beh hō͘ Í-sek-lia̍t ke kap Iû-tāi ke, lâng kap cheng-siⁿ, lóng thôan-chéng.

(BCL) 耶和華講：「看啊，日子欲到，我欲互以色列家及猶大家，人及精牲攏傳種。

28

(THR) Góa chá-chêng cháiⁿ-iūⁿ choan-sim chiong in pu̍ih-chhut, thiah-húi, chhia-tó, bia̍t-bô, khùn-khó͘; ia̍h beh chiàu án-ni choan-sim chiong in kiàn-lı̍p, chai-chèng; che sī Iâ-hô-hoa kóng-ê.

(BCL) 我早前怎樣專心將拔出、拆毀、捙倒、滅無、困苦，亦欲照按呢專心將建立、栽種。這是耶和華講的。

29

(THR) Tng hiah ê jı̍t, lâng bô koh kóng, Lāu-pē chia̍h sng ê phû-tô, kiáⁿ ê chhùi-khí sng-nńg.

(BCL) 當許個日，人無閣講：老父食酸的葡萄，子的嘴齒酸軟。

30

(THR) Ta̍k-lâng beh in-ūi ka-kī ê chōe lâi sí; kìⁿ-nā chia̍h sng ê phû-tô--ê, in ê chhùi-khí beh nńg.

(BCL) 逐人欲因為家己的罪來死；見若食酸的葡萄者，的嘴齒欲軟。」

31

(THR) Iâ-hô-hoa kóng, Khòaⁿ ah, jı̍t-chí beh kàu, Góa beh kap Í-sek-lia̍t ke, Iû-tāi ke, lı̍p sin ê iok:

(BCL) 耶和華講：「看啊，日子欲到，我欲及以色列家、猶大家立新的約，

32

(THR) m̄-sī chiàu Góa kap in ê lia̍t-chó͘ só͘ lı̍p ê iok, tī Góa khan in ê chhiú, chhōa in chhut Ai-kı̍p tōe ê sî só͘ lı̍p--ê; Góa sui-bóng chòe in ê tiōng-hu, in iû-gôan pōe Góa ê iok; che sī Iâ-hô-hoa kóng--ê.

(BCL) 呣是照我及的列祖所立的約，佇我牽的手，導出埃及地的時所立的。我雖莽做的丈夫，猶原背我的約。這是耶和華講的。」

33

(THR) Iâ-hô-hoa kóng, Hiah ê jı̍t liáu-āu, Góa kap Í-sek-lia̍t ke só͘ beh lı̍p ê iok sī chit-ê; chiū-sī Góa beh ēng Góa ê lu̍t-hoat hē tī in ê sim-lāi, khek tī in ê sim; Góa beh chòe in ê Siōng-tè, in beh chòe Góa ê peh-sìⁿ.

(BCL) 耶和華講：「許個日了後，我及以色列家所欲立的約是此個：就是我欲用我的律法下佇的心內，刻佇的心。我欲做的上帝，欲做我的百姓。

34

(THR) In bô koh ta̍k-lâng kà-sī in ê chhù-piⁿ, kap in ta̍k-lâng ê hiaⁿ-tī, kóng, Lín tio̍h bat Iâ-hô-hoa; in-ūi in tùi tōa kàu sòe, lóng beh bat Góa; in-ūi Góa beh sià-bián in ê chōe-kòa, bô koh kì-tit in ê chōe; che sī Iâ-hô-hoa kóng--ê.

(BCL) 無閣逐人教示的厝邊，及逐人的兄弟，講：『恁著識耶和華』，因為對大到細攏欲識我。因為我欲赦免的罪過，無閣記得的罪。這是耶和華講的。」

35

(THR) Iâ-hô-hoa siat thài-iông chòe jı̍t--sî ê kng, siat ge̍h kap chhiⁿ ê tēng-lē chòe mî--sî ê kng; iô-tāng tōa-hái, hō͘ i ê éng hōa-hōa-háu; bān-kun ê Iâ-hô-hoa chiū-sī I ê miâ;

(BCL) 耶和華設太陽做日時的光，設月及星的定例，做暝時的光，搖動大海，互伊的湧嘩嘩哮，萬軍的耶和華就是伊的名。伊有按呢講：

36

(THR) I ū án-ni kóng, Chiah ê tēng-lē nā ōe tī Góa ê bīn-chêng hòe-bô, Í-sek-lia̍t ê hō͘-è chiah ōe tī Góa ê bīn-chêng cho̍at-tn̄g, éng-óan bōe chiâⁿ-chòe kok; che sī Iâ-hô-hoa kóng--ê.

(BCL) 諸個定例若會佇我的面前廢無，以色列的後裔才會佇我的面前絕斷，永遠成做國。這是耶和華講的。

37

(THR) Iâ-hô-hoa án-ni kóng, Nā tī téng-bīn ê thiⁿ ōe niû--tit, tī ē-bīn ê tōe chiah ê kun-ki ōe chhek-to̍k--tit, chiū Góa tek-khak in-ūi Í-sek-lia̍t ê hō͘-è it-chhè ê só͘-kiâⁿ lâi khì-sak--i; che sī Iâ-hô-hoa kóng--ê.

(BCL) 耶和華按呢講：若佇頂面的天會量得，佇下面的地諸個根基會測　得，就我的確因為以色列的後裔一切的所行來棄拺伊。這是耶和華講的。

38

(THR) Iâ-hô-hoa kóng, Khòaⁿ ah, jı̍t-chí beh kàu, chit ê siâⁿ beh kā Iâ-hô-hoa khí-chō, tùi Hap-lâm-gia̍p ê lâu, kàu kak-thâu ê mn̂g.

(BCL) 耶和華講：「看啊，日子欲到，此個城欲給耶和華起造，對哈楠業的樓到角頭的門。

39

(THR) Niû ê soh koh khan chhut--khì, tı̍t-kàu Ka-lı̍p soaⁿ; o̍at-tńg kàu Ko-a.

(BCL) 量的索閣牽出去，直到迦立山，越轉到歌亞。

40

(THR) Hiat sin-si kap piàⁿ hé-hu ka-nn̂g ê soaⁿ-kok, kap it-chhè ê chhân-hn̂g, tı̍t-kàu Khip-lûn khoe, koh tı̍t-kàu tang--sì Bé ê mn̂g ê kak-thâu, lóng beh chòe-sèng, kui tī Iâ-hô-hoa, bô koh pu̍ih-chhut, bô koh chhia-tó, tı̍t-kàu éng-óan.

(BCL) 身屍及傾火灰整個的山谷，及一切的田園，直到汲淪溪，閣直到東勢馬的門的角頭，攏欲做聖歸佇耶和華，無閣拔出，無閣捙倒，直到永遠。」

Bible Color Mark

• 台語漢字羅馬本
• 巴克禮全羅