耶利米書 第 27 章

1

(THR) Iû-tāi ông Iok-se-a ê kiáⁿ Iok-ngá-kèng khí-thâu chē-ūi ê sî, ū chit ê ōe tùi Iâ-hô-hoa lîm-kàu Iâ-lī-bí kóng,

(BCL) 猶大王約西亞的子約雅敬起頭坐位的時，有一個話對耶和華臨到耶利米講：

2

(THR) Iâ-hô-hoa tùi góa án-ni kóng, Lí ūi ka-kī chòe soh kap taⁿ, hē tī lí ê ām-kún;

(BCL) 「耶和華對我按呢講：你為家己做索及軛，下佇你的頷頸，

3

(THR) thok-tiōng lâi Iâ-lō͘-sat-léng kìⁿ Iû-tāi ông Se-tí-ka hiah ê sù-chiá ê chhiú; hō͘ in tòa hiah ê mı̍h kàu Í-tong ông, Mô͘-ap ông, A-bûn cho̍k ê ông, Chhui-lô ông, Se-tùn ông hia.

(BCL) 託仗來耶路撒冷見猶大王西底家許個使者的手，互帶許個物到以東王、摩押王、亞捫族的王、推羅王、西頓王遐，

4

(THR) Koh bēng-lēng sù-chiá tùi in ê chú kóng, Bān-kun ê Iâ-hô-hoa, Í-sek-lia̍t ê Siōng-tè án-ni kóng, Lín tio̍h tùi lín ê chú án-ni kóng,

(BCL) 閣命令使者，對的主講，萬軍的耶和華──以色列的上帝按呢講：恁著對恁的主按呢講，

5

(THR) Góa ēng Góa ê tōa kôan-lêng, kap Góa chhun-chhut ê chhiú, chhòng-chō tōe kap tōe-chiūⁿ ê lâng, í-kı̍p cheng-siⁿ; chiong i siúⁿ-sù Góa só͘ khòaⁿ-chòe ha̍p-gî--ê.

(BCL) 我用我的大權能及我伸出的手，創造地及地上的人，以及精牲。將伊賞賜我所看做合宜的。

6

(THR) Taⁿ Góa chiong chiah ê tōe lóng kau hō͘ Góa ê lô͘-po̍k Pa-pí-lûn ông, Nî-pò͘-kah-nî-sat ê chhiú; Góa ia̍h chiong chhân-iá ê cháu-siù hō͘ i, chòe i ê chhe-ēng.

(BCL) 今我將諸個地攏交互我的奴僕巴比倫王尼布甲尼撒的手，我亦將田野的走獸互伊，做伊的差用。

7

(THR) Lia̍t-kok lóng beh ho̍k-sāi i, í-kı̍p i ê kiáⁿ, i ê sun; tı̍t-kàu i pún-kok tú-tio̍h pò-èng ê jı̍t kàu; hit-sî chōe-chōe kok kap tōa kun-ông beh ēng i chòe lô͘-po̍k.

(BCL) 列國攏欲服事伊以及伊的子，伊的孫，直到伊本國抵著報應的日到。彼時，多多國及大君王欲用伊做奴僕。

8

(THR) Nā ū sím-mı̍h peh-sìⁿ, sím-mı̍h kok, m̄-khéng ho̍k-sāi chit ê Pa-pí-lûn ông Nî-pò͘-kah-nî-sat, ia̍h m̄-khéng chiong ām-kún kòa Pa-pí-lûn ông ê taⁿ--ê; Góa beh ēng to-kiàm, ēng ki-hng, ēng un-e̍k hêng-ho̍at hit ê peh-sìⁿ, tı̍t-kàu Góa chioh i ê chhiú lâi it-chīn bia̍t in; che sī Iâ-hô-hoa kóng--ê.

(BCL) 「若有甚麼百姓，甚麼國，呣肯服事此個巴比倫王尼布甲尼撒，亦呣肯將頷頸掛巴比倫王的軛者，我欲用刀劍、用飢荒、用瘟疫刑罰彼個百姓，直到我借伊的手來一盡滅。這是耶和華講的。

9

(THR) Chóng-sī lín, lín m̄-thang thiaⁿ lín ê sian-ti, lín ê pok-kòa--ê, lín ê ôan-bāng--ê, lín ê kiâⁿ siâ-su̍t ê, lín ê sai-kong; in kā lín kóng, Lín bōe tì-kàu ho̍k-sāi Pa-pí-lûn ông.

(BCL) 總是恁，恁呣通聽恁的先知、恁的卜卦的、恁的圓夢的、恁的行邪術的，恁的師公；給恁講：『恁致到服事巴比倫王。』

10

(THR) In tùi lín chhàm-gú pe̍h-chha̍t, beh hō͘ lín chhian-sóa lī-khui pún só͘-chāi hn̄g-hn̄g; tì-kàu Góa kóaⁿ lín chhut, hō͘ lín bia̍t-bô.

(BCL) 對恁讖語白賊，欲互恁遷徙，離開本所在遠遠，致到我趕恁出，互恁滅無。

11

(THR) To̍k-to̍k nā ū sím-mı̍h peh-sìⁿ khéng chiong ām-kún kòa Pa-pí-lûn ông ê taⁿ, lâi ho̍k-sāi i--ê, Góa beh hō͘ i iû-gôan tòa tī pún só͘-chāi, thang chèng-choh, thang khiā-khí; che sī Iâ-hô-hoa kóng--ê.

(BCL) 獨獨若有甚麼百姓肯將頷頸掛巴比倫王的軛來服事伊的，我欲互伊猶原住佇本所在，通種作，通徛起。這是耶和華講的。」

12

(THR) Góa chiū chiàu chiah-ê it-chhè ê ōe, tùi Iû-tāi ông Se-tí-ka kóng, Tio̍h chiong lín ê ām-kún kòa Pa-pí-lûn ông ê taⁿ, lâi ho̍k-sāi i kap i ê peh-sìⁿ, chiah ōe tit-tio̍h o̍ah.

(BCL) 我就照諸個一切的話對猶大王西底家講：「著將恁的頷頸掛巴比倫王的軛，來服事伊及伊的百姓，才會得著活。

13

(THR) Lí kap lí ê peh-sìⁿ siáⁿ-sū beh in-ūi to-kiàm, in-ūi ki-hng, in-ūi un-e̍k lâi sí, chiàu Iâ-hô-hoa lūn-khí m̄-khéng ho̍k-sāi Pa-pí-lûn ông hit-hō kok ê ōe ah?

(BCL) 你及你的百姓啥事欲因為刀劍、因為飢荒、因為瘟疫來死，照耶和華論起呣肯服事巴比倫王彼號國的話啊？

14

(THR) Hiah ê sian-ti kā lín kóng, Lín bōe tì-kàu ho̍k-sāi Pa-pí-lûn ông, bo̍h-tit thiaⁿ--in; in-ūi in tùi lín só͘ soan-thôan--ê sī pe̍h-chha̍t.

(BCL) 許個先知給恁講：『恁致到服事巴比倫王』，莫得聽，因為對恁所宣傳的是白賊。

15

(THR) Iâ-hô-hoa kóng, Góa bô chhe in, chóng-sī in thok Góa ê miâ soan-thôan pe̍h-chha̍t; tì-kàu Góa chiong lín kap hiah ê tùi lín soan-thôan ê sian-ti, lóng kóaⁿ chhut, saⁿ-kap bia̍t-bô.

(BCL) 耶和華講：『我無差，總是託我的名宣傳白賊，致到我將恁及許個對恁宣傳的先知攏趕出，相及滅無。』」

16

(THR) Góa koh tùi chiah ê chè-si kap chit kok ê chèng peh-sìⁿ kóng, Iâ-hô-hoa án-ni kóng, Lín m̄-thang thiaⁿ hiah ê sian-ti tùi lín só͘ chhàm-gú--ê; in kóng, Khòaⁿ ah, Iâ-hô-hoa ê chhù ê khì-kū bô jōa-kú beh tùi Pa-pí-lûn tòa tò-lâi; kî-sı̍t in tùi lín só͘ soan-thôan--ê, sī pe̍h-chha̍t.

(BCL) 我閣對諸個祭司及此國的眾百姓講：「耶和華按呢講：恁呣通聽許個先知對恁所讖語的。講：『看啊，耶和華的厝的器具無偌久欲對巴比倫帶倒來』；其實對恁所宣傳的，是白賊。

17

(THR) Bo̍h-tit thiaⁿ--in, tio̍h ho̍k-sāi Pa-pí-lûn ông, lâi tit-tio̍h o̍ah; mih-sái hō͘ chit ê siâⁿ pìⁿ-chòe pha-hng?

(BCL) 莫得聽，著服事巴比倫王來得著活。乜使互此個城變做拋荒？

18

(THR) In nā kó-jiân sī sian-ti, ū Iâ-hô-hoa ê ōe kàu tī in, in chiū tio̍h kiû bān-kun ê Iâ-hô-hoa, hō͘ hiah-ê tī Iâ-hô-hoa ê chhù, kap Iû-tāi ê ông-kiong, kap Iâ-lō͘-sat-léng chhun ê khì-kū, bô poaⁿ khì Pa-pí-lûn.

(BCL) 若果然是先知，有耶和華的話到佇，就著求萬軍的耶和華，互許個佇耶和華的厝及猶大的王宮，及耶路撒冷剩的器具，無搬去巴比倫。（

19

(THR) In-ūi bān-kun ê Iâ-hô-hoa án-ni kóng, Lūn-kàu chiah ê tâng thiāu, tâng hái, phûn-chō, kap lâu tī chit ê siâⁿ só͘ chhun ê khì-kū;

(BCL) 因為萬軍的耶和華按呢講，論到諸個銅柱、銅海、盆座，及留佇此個城所剩的器具，

20

(THR) chiū-sī Pa-pí-lûn ông Nî-pò͘-kah-nî-sat lia̍h Iû-tāi ông Iok-ngá-kèng ê kiáⁿ Iâ-ko-nî-ngá, kap Iû-tāi Iâ-lō͘-sat-léng chiah ê chun-kùi ê lâng, tùi Iâ-lō͘-sat-léng kàu Pa-pí-lûn ê sî, só͘ bô chhiúⁿ--khì-ê;

(BCL) 就是巴比倫王尼布甲尼撒掠猶大王約雅敬的子耶歌尼雅，及猶大、耶路撒冷諸個尊貴的人對耶路撒冷到巴比倫的時所無搶去的。）

21

(THR) sı̍t-chāi bān-kun ê Iâ-hô-hoa Í-sek-lia̍t ê Siōng-tè án-ni kóng, Lūn-kàu lâu tī Iâ-hô-hoa ê chhù, kap Iû-tāi ông-kiong, kap Iâ-lō͘-sat-léng ê khì-kū,

(BCL) 實在萬軍的耶和華──以色列的上帝按呢講：論到留佇耶和華的厝及猶大王宮，及耶路撒冷的器具，

22

(THR) hiah-ê beh poaⁿ kàu Pa-pí-lûn lâu tī-hia; kàu Góa kòan-kò͘ in ê jı̍t, chiū Góa beh tòa in chiūⁿ-lâi, koh kui chit ê só͘-chāi; che sī Iâ-hô-hoa kóng--ê.

(BCL) 許個欲搬到巴比倫留佇遐，到我眷顧的日。就我欲帶上來，閣歸此個所在。這是耶和華講的。」

Bible Color Mark

• 台語漢字羅馬本
• 巴克禮全羅