耶利米書 第 25 章

1

(THR) Tng Iû-tāi ông Iok-se-a ê kiáⁿ Iok-ngá-kèng ê sì--nî, chiū-sī Pa-pí-lûn ông Nî-pò͘-kah-nî-sat gôan--nî, ū lūn-khí Iû-tāi peh-sìⁿ ê ōe lîm-kàu Iâ-lī-bí.

(BCL) 當猶大王約西亞的子約雅敬的四年，就是巴比倫王尼布甲尼撒元年，有論起猶大百姓的話臨到耶利米。

2

(THR) Sian-ti Iâ-lī-bí chiū chiong chit ê ōe tùi Iû-tāi chèng peh-sìⁿ, í-kı̍p it-chhè khiā-khí Iâ-lō͘-sat-léng ê lâng kóng:

(BCL) 先知耶利米就將此個話對猶大眾百姓以及一切徛起耶路撒冷的人講：

3

(THR) Tùi Iû-tāi ông A-bûn ê kiáⁿ Iok-se-a cha̍p-saⁿ--nî, kàu taⁿ, jī-cha̍p-saⁿ nî kú, ū Iâ-hô-hoa ê ōe lîm-kàu góa; góa í-keng tùi lín kóng; koh chá-chá khí-lâi kóng; to̍k-to̍k lín m̄-thiaⁿ.

(BCL) 「對猶大王亞們的子約西亞十三年到今，二十三年久，有耶和華的話臨到我；我已經對恁講，閣早早起來講，獨獨恁呣聽。

4

(THR) Iâ-hô-hoa iā chá-chá khí--lâi, chhe I ê lô͘-po̍k chèng sian-ti kàu lín chia; nā-sī lín bô thiaⁿ-thàn, ia̍h bô àⁿ hī-khang lâi thiaⁿ.

(BCL) 耶和華也早早起來，差伊的奴僕眾先知到恁遮（若是恁無聽趁，亦無俯耳孔來聽），

5

(THR) I kóng, Lín ta̍k-lâng tio̍h o̍at-thâu lī-khui i ê pháiⁿ-lō͘, kap lín só͘ chòe ê pháiⁿ; chiū thang khiā-khí Iâ-hô-hoa só͘ siúⁿ-sù lín, kap lín ê lia̍t-chó͘ ê tōe, tùi kó͘-chá kàu éng-óan.

(BCL) 伊講：『恁逐人著越頭，離開伊的歹路及恁所做的歹，就通徛起耶和華所賞賜恁及恁的列祖的地，對古早到永遠。

6

(THR) M̄-thang thàn pa̍t-hō ê siōng-tè, ho̍k-sāi kūi-pài in; m̄-thang ēng lín ê chhiú só͘ chòe--ê, lâi jiá Góa ê siū-khì; án-ni Góa chiū bô kàng chai-ē hō͘ lín.

(BCL) 呣通趁別號的上帝服事跪拜，呣通用恁的手所做的來惹我的受氣；按呢，我就無降災禍互恁。

7

(THR) Chóng-sī lín bô thiaⁿ-thàn Góa, kèng-jiân ēng chhiú só͘ chòe--ê, jiá Góa ê siū-khì, hām-hāi ka-kī; che sī Iâ-hô-hoa kóng--ê.

(BCL) 總是恁無聽趁我，竟然用手所做的惹我的受氣，陷害家己。這是耶和華講的。』」

8

(THR) Só͘-í bān-kun ê Iâ-hô-hoa án-ni kóng, In-ūi lín bô thiaⁿ-thàn Góa ê ōe,

(BCL) 所以萬軍的耶和華按呢講：「因為恁無聽趁我的話，

9

(THR) khòaⁿ ah, Góa beh tiàu pak-hng chiah ê cho̍k, kap Góa ê lô͘-po̍k Pa-pí-lûn ông Nî-pò͘-kah-nî-sat, lâi kong-kek chit só͘-chāi, kap chit só͘-chāi khiā-khí ê peh-sìⁿ, í-kı̍p sì-ûi ê lia̍t-pang, Góa beh it-chīn châu-bia̍t in, hō͘ in chòe thang gông-ngia̍h, thang ki-chhì, éng-óan pha-hng ê só͘-chāi; che sī Iâ-hô-hoa kóng--ê.

(BCL) 看啊，我欲召北方諸個族，及我的奴僕巴比倫王尼布甲尼撒，來攻擊此所在及此所在徛起的百姓，以及四圍的列邦。我欲一盡剿滅，互做通卬愕、通譏刺，永遠拋荒的所在。這是耶和華講的。

10

(THR) Koh in tiong-kan hoaⁿ-hí ê siaⁿ, khòai-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ, oe-bō ê siaⁿ, kap teng ê kng, Góa beh hō͘ in lóng soah.

(BCL) 閣中間歡喜的聲快樂的聲，新子婿的聲，新娘的聲，挨磨的聲及燈的光，我欲互攏息。

11

(THR) Chôan-tōe tek-khak pha-hng, hō͘ lâng gông-ngia̍h; chiah ê lia̍t-pang beh ho̍k-sāi Pa-pí-lûn ông chhit-cha̍p-nî.

(BCL) 全地的確拋荒，互人卬愕。諸個列邦欲服事巴比倫王七十年。

12

(THR) Chhit-cha̍p-nî í-keng móa, Góa beh hêng-ho̍at Pa-pí-lûn ông, kap i ê kok ê chōe, koh hō͘ Ka-le̍k-tí lâng ê tōe éng-óan pha-hng; che sī Iâ-hô-hoa kóng--ê.

(BCL) 七十年已經滿，我欲刑罰巴比倫王及伊的國的罪，閣互迦勒底人的地永遠拋荒。這是耶和華講的。

13

(THR) Góa beh ēng Góa só͘ kóng kong-kek hit-ê tōe ê sū, lóng kàu tī in; chiū-sī kìⁿ-nā kì tī chit pún chheh, Iâ-lī-bí só͘ lūn-khí chiah ê kok só͘ chhàm-gú--ê.

(BCL) 我欲用我所講攻擊彼個地的事，攏到佇，就是見若記佇此本冊，耶利米所論起諸個國所讖語的。

14

(THR) In-ūi ū chōe-chōe kok, kap tōa ê kun-ông, beh ēng in Ka-le̍k-tí lâng chòe lô͘-po̍k; Góa ia̍h beh chiàu in ê só͘ kiâⁿ, kap in ê chhiú só͘ chòe--ê, pò-èng in.

(BCL) 因為有多多國及大的君王欲用迦勒底人做奴僕；我亦欲照的所行，及的手所做的，報應。」

15

(THR) Iâ-hô-hoa, Í-sek-lia̍t ê Siōng-tè, tùi góa án-ni kóng, Lí tùi Góa ê chhiú chih chit poe siū-khì ê chiú, hō͘ Góa só͘ chhe lí khì ê lia̍t-kok lim.

(BCL) 耶和華──以色列的上帝對我按呢講：「你對我的手接此杯受氣的酒，互我所差你去的列國飲。

16

(THR) In lim-liáu chiū tian-tian tó-tó, ia̍h beh hoat-kông; in-ūi Góa hō͘ to-kiàm kàu in tiong-kan.

(BCL) 飲了就顛顛倒倒，亦欲發狂，因為我互刀劍到中間。」

17

(THR) Góa chiū tùi Iâ-hô-hoa ê chhiú chih chit ê poe; hō͘ Iâ-hô-hoa só͘ chhe góa khì ê lia̍t-kok lim--i.

(BCL) 我就對耶和華的手接此杯，互耶和華所差我去的列國飲伊，

18

(THR) Chiū-sī Iâ-lō͘-sat-léng kap Iû-tāi chiah ê siâⁿ, í-kı̍p in ê lia̍t-ông kùi-cho̍k; hō͘ in pha-hng; chòe thang gông-ngia̍h, thang ki-chhì, thang chiù-chó͘--ê, chhin-chhiūⁿ kin-á-jı̍t chı̍t-iūⁿ.

(BCL) 就是耶路撒冷及猶大諸個城，以及的列王貴族，互拋荒，做通卬愕、通譏刺、通咒詛的，親像今仔日一樣。

19

(THR) Koh Ai-kı̍p ông Hoat-ló, kap i ê jîn-sîn, kùi-cho̍k, chèng peh-sìⁿ;

(BCL) 閣埃及王法老及伊的人臣、貴族、眾百姓，

20

(THR) kap saⁿ-chham-chhap ê peh-sìⁿ, Ou-su tōe chiah ê ông, Hui-lī-sū tōe chiah ê ông, A-sı̍t-ki-lûn, Ka-sat, Í-kek-lûn, í-kı̍p A-sı̍t-tu̍t só͘ chhun ê lâng;

(BCL) 及相參插的百姓，烏斯地諸個王，非利士地諸個王（亞實基倫、迦薩、以革倫，以及亞實突所剩的人）；

21

(THR) koh Í-tong, Mô͘-ap, kap A-bûn ê hō͘-è;

(BCL) 閣以東、摩押、及亞捫的後裔、

22

(THR) Chhui-lô lia̍t-ông, Se-tùn lia̍t-ông, hái-gōa ê hái-sū ê lia̍t-ông;

(BCL) 推羅列王、西頓列王、海外的海嶼的列王、

23

(THR) Tí-tàn, Thê-má, Pò͘-su, kap it-chhè thì pìn-piⁿ--ê;

(BCL) 底但、提瑪、布斯、及一切剃鬢邊者；

24

(THR) A-lat-pek ê lia̍t-ông, tiàm tī khòng-iá saⁿ-chham-chhap ê peh-sìⁿ ê lia̍t-ông;

(BCL) 亞拉伯的列王、踮佇曠野相參插的百姓的列王、

25

(THR) Sim-lī ê lia̍t-ông, Í-lân ê lia̍t-ông, Bí-thài ê lia̍t-ông;

(BCL) 心利的列王、以攔的列王、米太的列王、

26

(THR) pak-hng hn̄g-kūn ê lia̍t-ông, chit-ê hit-ê, í-kı̍p thiⁿ-ē bān-kok lim--i; í-āu Si-sa-khek ông ia̍h beh lim--i.

(BCL) 北方遠近的列王，此個彼個，以及天下萬國飲伊，以後示沙克王亦欲飲伊。

27

(THR) Lí tio̍h kā in kóng, Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín tio̍h lim, lâi chùi, lâi thò͘, lâi po̍ah-tó; bô koh khí--lâi; in-ūi Góa hō͘ to-kiàm kàu lín tiong-kan.

(BCL) 「你著給講：『萬軍的耶和華──以色列的上帝按呢講：恁著飲，來醉，來吐，來跋倒，無閣起來，因為我互刀劍到恁中間。』

28

(THR) In nā m̄-khéng tùi lí ê chhiú chih chit ê poe khì lim, lí chiū tio̍h kā in kóng, Bān-kun ê Iâ-hô-hoa án-ni kóng, Lín koat-tòan tio̍h lim.

(BCL) 「若呣肯對你的手接此個杯去飲，你就著給講：『萬軍的耶和華按呢講：恁決斷著飲！

29

(THR) In-ūi Góa kàng chai-ē tùi hit ê ēng Góa ê miâ lâi chheng ê siâⁿ khí-chhiú, lín ōe it-chīn bián hêng-ho̍at mah? tek-khak bōe bián-tit; in-ūi Góa beh bēng-lēng to-kiàm lîm-kàu tōe-chiūⁿ lóng-chóng ê peh-sìⁿ; che sī bān-kun ê Iâ-hô-hoa kóng--ê.

(BCL) 因為我降災禍對彼個用我的名來稱的城起手，恁會一盡免刑罰嗎？的確免得，因為我欲命令刀劍臨到地上攏總的百姓。這是萬軍的耶和華講的。』

30

(THR) Só͘-í lí tio̍h tùi in soan-thôan che it-chhè ê ōe, lâi kong-kek in, kóng, Iâ-hô-hoa beh tùi téng-bīn âu-kiò, tùi I khiā-khí ê sèng-só͘ chhut-siaⁿ, tùi I ê iûⁿ-kûn tōa-siaⁿ âu-kiò; I beh tùi tōe-chiūⁿ lóng-chóng ê peh-sìⁿ hoah-hiàm, chhin-chhiūⁿ ta̍h phû-tô--ê chı̍t-iūⁿ.

(BCL) 「所以你著對宣傳這一切的話，來攻擊，講：耶和華欲對頂面喉叫，對伊徛起的聖所出聲，對伊的羊群大聲喉叫；伊欲對地上攏總的百姓喝喊，親像踏葡萄者一樣。

31

(THR) Beh ū hoah ê siaⁿ thiaⁿ kàu tōe-ke̍k; in-ūi Iâ-hô-hoa beh kap lia̍t-kok kè-kàu; kìⁿ ū hiat-khì--ê, I beh kap in cheng-piān; lūn-kàu pháiⁿ-lâng, I beh chiong in kau hō͘ to-kiàm; che sī Iâ-hô-hoa kóng--ê.

(BCL) 欲有喝的聲聽到地極，因為耶和華欲及列國計較；見有血氣者，伊欲及爭辯；論到歹人，伊欲將交互刀劍。這是耶和華講的。

32

(THR) Bān-kun ê Iâ-hô-hoa án-ni kóng, Khòaⁿ ah, beh ū chai-ē tùi chit-kok hoat kàu hit-kok; koh ū tōa pò-thâu-hong tùi tōe-ke̍k khí.

(BCL) 萬軍的耶和華按呢講：看啊，欲有災禍對此國發到彼國，閣有大颶頭風對地極起。

33

(THR) Tng hit-jı̍t, Iâ-hô-hoa só͘ thâi--ê, tùi tōe ê chit-pêng kàu tōe ê hit-pêng lóng ū; bô lâng thî-khàu, bô lâng kā i siu-sı̍p, bô lâng kā i bâi-chòng; beh chiâⁿ-chòe tōe-chiūⁿ ê pùn-sò.

(BCL) 「當彼日，耶和華所者對地的此旁到地的彼旁攏有。無人啼哭，無人給伊收拾，無人給伊埋葬，欲成做地上的糞埽。

34

(THR) Bo̍k-chiá ah, lín tio̍h ai-khàu âu-kiò; iûⁿ-kûn ê thâu-ba̍k ah, lín tio̍h kō tī hé-hu-tiong; in-ūi lín siū-thâi kap hun-sòaⁿ ê jı̍t-kî í-keng kàu; lín beh tó--lo̍h-khì chhin-chhiūⁿ lâng só͘ hoaⁿ-hí ê khì-kū ka-la̍uh.

(BCL) 牧者啊，恁著哀哭，喉叫；羊群的頭目啊，恁著翱佇火灰中；因為恁受及分散的日期已經到。恁欲倒落去，親像人所歡喜的器具磕落。

35

(THR) Bo̍k-chiá bô lō͘ thang tô-cháu, iûⁿ-kûn ê thâu-ba̍k ia̍h bô lō͘ thang thoat-lī.

(BCL) 牧者無路通逃走；羊群的頭目亦無路通脫離。

36

(THR) Ū bo̍k-chiá âu-kiò ê siaⁿ, ū iûⁿ-kûn ê thâu-ba̍k teh ai-khàu; in-ūi Iâ-hô-hoa hō͘ in ê chháu-tiûⁿ pha-hng.

(BCL) 有牧者喉叫的聲，有羊群的頭目哀哭，因為耶和華互的草場拋荒。

37

(THR) Iâ-hô-hoa hoat-chhut béng-lia̍t ê siū-khì; pêng-an ê iûⁿ-tiâu chiâⁿ-chòe léng-chēng.

(BCL) 耶和華發出猛烈的受氣，平安的羊牧成做冷靜。

38

(THR) I chhin-chhiūⁿ sai lī-khui i ê hia̍t; in-ūi khi-ap ê béng-lia̍t koh in-ūi I siū-khì ê béng-lia̍t; in ê tōe lóng chiâⁿ-chòe thang gông-ngia̍h--ê.

(BCL) 伊親像獅離開伊的穴，因為欺壓的猛烈閣因為伊受氣的猛烈，的地攏成做通卬愕的。」

Bible Color Mark

• 台語漢字羅馬本
• 巴克禮全羅