耶利米書 第 13 章

1

(THR) Iâ-hô-hoa tùi góa án-ni kóng, Lí tio̍h khì bóe chı̍t-tiâu môa-pò͘ ê tòa lâi hâ-io; m̄-thang hē tī chúi--nih.

(BCL) 耶和華對我按呢講：「你著去買一條麻布的帶來縖腰，呣通下佇水裡。」

2

(THR) Góa chiū chiàu Iâ-hô-hoa ê ōe, bóe chı̍t tiâu tòa hâ-io.

(BCL) 我就照耶和華的話，買一條帶縖腰。

3

(THR) Iâ-hô-hoa ê ōe tē-jī pái lîm-kàu góa kóng,

(BCL) 耶和華的話第二擺臨到我講：

4

(THR) Tio̍h the̍h lí só͘ bóe ê tòa, chiū-sī lí io--nih ê tòa, khí--lâi khì Pek-la̍h, tī-hia khǹg--i tī chio̍h-pôaⁿ khang.

(BCL) 「著提你所買的帶，就是你腰裡的帶，起來去伯拉，佇遐囥伊佇石磐孔。」

5

(THR) Góa chiū khì, khǹg i tī Pek-la̍h, chiàu Iâ-hô-hoa só͘ hoan-hù góa--ê.

(BCL) 我就去，囥伊佇伯拉，照耶和華所吩咐我的。

6

(THR) Kè chōe-chōe jı̍t, Iâ-hô-hoa tùi góa kóng, Lí khí--lâi, khì Pek-la̍h, chiong Góa hoan-hù lí khǹg tī-hia ê io-tòa the̍h--lâi.

(BCL) 過多多日，耶和華對我講：「你起來去伯拉，將我吩咐你囥佇遐的腰帶提來。」

7

(THR) Góa chiū khì Pek-la̍h lâi ku̍t, tùi góa só͘ khǹg ê só͘-chāi the̍h hit tiâu tòa; khòaⁿ ah, hit tiâu tòa í-keng pháiⁿ--khì, lóng bô lō͘-ēng.

(BCL) 我就去伯拉來掘，對我所囥的所在提彼條帶，看啊，彼條帶已經歹去，攏無路用。

8

(THR) Iâ-hô-hoa ê ōe lîm-kàu góa kóng,

(BCL) 耶和華的話臨到我講：

9

(THR) Iâ-hô-hoa án-ni kóng, Góa beh chiàu án-ni pāi-hōai Iû-tāi ê kiau-ngō͘, kap Iâ-lō͘-sat-léng ê tōa kiau-ngō͘.

(BCL) 「耶和華按呢講：我欲照按呢敗壞猶大的驕傲及耶路撒冷的大驕傲。

10

(THR) Chit-ê pháiⁿ ê peh-sìⁿ m̄-khéng thiaⁿ Góa ê ōe, chiàu in ê sim ê kong-ngī khì kiâⁿ; koh thàn pa̍t-hō ê siōng-tè, ho̍k-sāi i, kūi-pài i; in beh chhin-chhiūⁿ chit-tiâu bô lō͘-ēng ê tòa.

(BCL) 此個歹的百姓呣肯聽我的話，照的心的剛硬去行，閣趁別號的上帝，服事伊，跪拜伊，欲親像此條無路用的帶。」

11

(THR) Iâ-hô-hoa kóng, Io-tòa cháiⁿ-iūⁿ liân tī lâng ê io, Góa ū hō͘ Í-sek-lia̍t chôan-ke, kap Iû-tāi chôan-ke, liân tī Góa, ia̍h sī án-ni; beh hō͘ in chòe Góa ê peh-sìⁿ, chòe Góa ê miâ-siaⁿ, chòe Góa ê o-ló, chòe Góa ê êng-kng; chóng-sī in m̄-khéng thiaⁿ.

(BCL) 耶和華講：「腰帶怎樣連佇人的腰，我有互以色列全家及猶大全家連佇我，亦是按呢，欲互做我的百姓，做我的名聲，做我的謳咾，做我的榮光；總是呣肯聽。」

12

(THR) Lí tio̍h koh tùi in kóng chit ê ōe, Í-sek-lia̍t ê Siōng-tè Iâ-hô-hoa án-ni kóng, Ta̍k ê àng beh tóe chiú móa-móa; in beh tùi lí kóng, Góan kiám m̄-chai ta̍k ê àng beh tóe chiú móa-móa mah?

(BCL) 「你著閣對講此個話：『以色列的上帝──耶和華按呢講：逐個甕欲貯酒滿滿。』欲對你講：『阮豈呣知逐個甕欲貯酒滿滿嗎？』

13

(THR) Lí chiū tio̍h tùi in kóng, Iâ-hô-hoa án-ni kóng, Khòaⁿ ah, Góa beh hō͘ chit só͘-chāi it-chhè khiā-khí ê peh-sìⁿ, chiū-sī chē Tāi-pı̍t pó-chō ê lia̍t-ông, kap chè-si, sian-ti, í-kı̍p Iâ-lō͘-sat-léng it-chhè khiā-khí ê peh-sìⁿ, lóng tōa-tōa chiú-chùi.

(BCL) 你就著對講：『耶和華按呢講：看啊，我欲互此所在一切徛起的百姓，就是坐大衛寶座的列王及祭司、先知，以及耶路撒冷一切徛起的百姓，攏大大酒醉。』」

14

(THR) Iâ-hô-hoa kóng, Góa beh hō͘ in tāi-ke saⁿ-kha̍p; chiū-sī pē kap kiáⁿ saⁿ-kha̍p; Góa bô beh khó-lîn, bô beh thiàⁿ-sioh, bô beh lîn-bín, lâi m̄-bia̍t--i.

(BCL) 耶和華講：「我欲互大家相磕，就是父及子相磕；我無欲可憐，無欲疼惜，無欲憐憫，來呣滅伊。」

15

(THR) Lín tio̍h thiaⁿ, tio̍h àⁿ hī-khang; bo̍h-tit kiau-ngō͘, in-ūi Iâ-hô-hoa í-keng kóng--i.

(BCL) 恁著聽，著俯耳孔。莫得驕傲，因為耶和華已經講伊。

16

(THR) Ou-àm bē kàu, lín ê kha bē tio̍h-tak tī o͘-àm ê soaⁿ, só͘ ǹg-bāng ê kng iáu-bē piàn-chòe sí-bô ê ìm-ńg, o͘-o͘ àm-àm ê tāi-seng, lín tio̍h kui êng-kng lín ê Siōng-tè Iâ-hô-hoa.

(BCL) 黑暗未到，恁的腳未著觸佇黑暗的山，所向望的光猶未變做死無的蔭影，黑黑暗暗的代先，恁著歸榮光恁的上帝──耶和華。

17

(THR) Lín nā m̄ thiaⁿ chit ê ōe, chiū góa ê sim beh in-ūi lín ê kiau-ngō͘, tī ún-ba̍t ê só͘-chāi thî-khàu; góa ê ba̍k-chiu beh ba̍k-sái chhē-chhē-tò; in-ūi Iâ-hô-hoa ê iûⁿ-kûn siū-lia̍h.

(BCL) 恁若呣聽此個話，就我的心欲因為恁的驕傲佇隱密的所在啼哭；我的目睭欲目屎泚泚倒，因為耶和華的羊群受掠。

18

(THR) Lí tio̍h tùi kun-ông kap thài-hō͘ kóng, Lín tio̍h khiam-pi, chē tī ē-bīn; in-ūi lín êng-kng ê bián-liû tùi lín ê thâu-khak lak--lo̍h-khì.

(BCL) 你著對君王及太后講：恁著謙卑，坐佇下面；因為恁榮光的冕旒，對恁的頭殼落落去。

19

(THR) Lâm-hng chiah ê siâⁿ lóng koaiⁿ, bô lâng khui; Iû-tāi chôan-cho̍k siū-lia̍h; koh lia̍h kàu liáu-liáu.

(BCL) 南方諸個城攏關，無人開；猶大全族受掠；閣掠到了了。

20

(THR) Lín tio̍h kia̍h-ba̍k khòaⁿ, tùi pak-hng lâi ê lâng; chêng só͘ hō͘ lí ê iûⁿ-kûn, chiū-sī lí súi ê iûⁿ-kûn, taⁿ tī toh-lo̍h ah?

(BCL) 恁著抬目看對北方來的人。前所互你的羊群，就是你娞的羊群，今佇叨落啊？

21

(THR) Lí pêng-sò͘ só͘ chhin-bı̍t ê pêng-iú, siat-sú I siat-lı̍p in chòe-thâu lâi kóan-hat lí, lí iáu ū sím-mı̍h ōe thang kóng? thòng-khó͘ kiám bô khîⁿ-tiâu lí, chhin-chhiūⁿ siⁿ-kiáⁿ ê hū-jîn-lâng?

(BCL) 你平素所親密的朋友，設使伊設立做頭來管轄你，你猶有甚麼話通講？痛苦豈無擒住你，親像生子的婦仁人？

22

(THR) Lí nā sim-lāi kóng, Che it-chhè ê sū ūi-hô kàu tī góa leh? sī in-ūi lí ê chōe-kòa chin-tāng, só͘-í lí lō͘-thé chhiah-kha.

(BCL) 你若心內講：這一切的事為何到佇我咧？是因為你的罪過真重，所以你露體赤腳。

23

(THR) Kó͘-sı̍t ê lâng ōe piàn-ōaⁿ phê-hu, pà ōe piàn-ōaⁿ pan-tiám mah? Nā ōe, chiū lín chiah-ê kòan-liān kiâⁿ pháiⁿ--ê, ōe kiâⁿ hó.

(BCL) 古實的人會變換皮膚？豹會變換斑點嗎？若會，就恁諸個慣練行歹的會行好。

24

(THR) Só͘-í Góa beh phah-sòaⁿ in, chhin-chhiūⁿ chháu-iù hō͘ khòng-iá ê hong chhe--khì chı̍t-iūⁿ.

(BCL) 所以我欲拍散，親像草幼互曠野的風吹去一樣。

25

(THR) Iâ-hô-hoa kóng, Che sī lí só͘ eng-kai tú-tio̍h--ê; sī Góa niû hō͘ lí ê hūn-gia̍h; in-ūi lí bōe-kì-tit Góa, khì óa-khò hu-ké.

(BCL) 耶和華講：這是你所應該抵著的，是我量互你的份額，因為你記得我，去倚靠虛假。

26

(THR) Só͘-í Góa beh hian-khí lí ê kûn, tà tī lí ê bīn; lí ê kiàn-siàu chiū lō͘-chhut.

(BCL) 所以我欲掀起你的裙，罩佇你的面，你的見誚就露出。

27

(THR) Lí hiah-ê khó-ò͘ⁿ ê sū, chiū-sī tī soaⁿ--nih chhân--nih kiâⁿ kan-îm, chhut ki--ki-háu ê siaⁿ, chhiong-ki khóan ê îm-lōan, Góa lóng khòaⁿ-kìⁿ lah. Iâ-lō͘-sat-léng ah, lí ū chai-ē; lí m̄-khéng chheng-khì, beh kàu tī-sî ah?

(BCL) 你許個可惡的事──就是佇山裡田裡行姦淫，出嘰嘰哮的聲，娼妓款的淫亂──我攏看見啦。耶路撒冷啊，你有災禍！你呣肯清氣，欲到底時啊？

Bible Color Mark

• 台語漢字羅馬本
• 巴克禮全羅