雅各書 第 4 章

1

(THR) Lín tiong-kan chiah ê cheng-chiàn tùi tá-lo̍h lâi, chiah ê saⁿ-chiⁿ tùi tá-lo̍h lâi? Kiám m̄ sī tùi lín ê iàn-lo̍k, kau-chiàn tī lín pah-thé tiong ê, lâi mah?

(BCL) 恁中間諸個爭戰對叨落來，諸個相爭對叨落來？豈呣是對恁的宴樂，交戰佇恁百體中的來嗎？

2

(THR) Lín tham-lôan, iā bô só͘ ū; lín thâi lâng, òan-tò͘, iā bōe tit-tio̍h; lín saⁿ-chiⁿ cheng-chiàn; lín bô só͘ ū, in-ūi lín bô kiû.

(BCL) 恁貪戀，也無所有；恁人、怨妒，也得著。恁相爭爭戰，恁無所有，因為恁無求。

3

(THR) lín kiû iā bô tit-tio̍h, in-ūi lām-sám kiû, sī beh khai-ēng i tī lín ê iàn-lo̍k.

(BCL) 恁求也無得著，因為濫糝求，是欲開用伊佇恁的宴樂。

4

(THR) Lín chiah ê îm-hū ah, kiám m̄ chai kap sè-kan chòe pêng-iú sī kap Siōng-tè chòe tùi-te̍k mah? Só͘-í kìⁿ-nā ài chòe sè-kan ê pêng-iú ê, chiū-sī chòe Siōng-tè ê tùi-te̍k.

(BCL) 恁諸個淫婦啊，豈呣知及世間做朋友是及上帝做對敵嗎？所以見若愛做世間的朋友的，就是做上帝的對敵。

5

(THR) Á-sī lín phah-sǹg sèng-keng sī khang-khang kóng mah? I só͘ siúⁿ-sù lán ê sîn, kiám lôan-bō͘ kàu tī òan-tò͘ mah?

(BCL) 抑是恁拍算聖經是空空講嗎？伊所賞賜咱的神，豈戀慕到佇怨妒嗎？

6

(THR) Nā-sī I siúⁿ-sù khah tōa ê un. Só͘-í kóng, Siōng-tè tí-te̍k kiau-ngō͘ ê, siúⁿ-sù un hō͘ khiam-pi ê.

(BCL) 若是伊賞賜卡大的恩，所以講：上帝抵敵驕傲者，賞賜恩互謙卑者。

7

(THR) Só͘-í lín tio̍h sūn-ho̍k Siōng-tè; iā tio̍h tí-te̍k Mô͘-kúi, i chiū cháu-siám lín.

(BCL) 所以，恁著順服上帝。也著抵敵魔鬼，伊就走閃恁。

8

(THR) Chhin-kūn Siōng-tè, I chiū chhin-kūn lín. Lín hōan chōe ê, tio̍h sóe lín ê chhiú; nn̄g iūⁿ sim ê lâng, tio̍h chheng-khì lín ê sim.

(BCL) 親近上帝，伊就親近恁。恁犯罪者，著洗恁的手！二樣心的人，著清氣恁的心！

9

(THR) Tio̍h iu-khó͘, ai-siong, thî-khàu; lín ê chhiò tio̍h ōaⁿ-chòe ai-siong, lín ê hoaⁿ-hí tio̍h ōaⁿ-chòe iu-būn.

(BCL) 著憂苦、哀傷、啼哭，恁的笑著換做哀傷，恁的歡喜著換做憂悶。

10

(THR) Tio̍h ka-kī khiam-pi tī Chú ê bīn-chêng, I chiū beh ko-seng lín.

(BCL) 著家己謙卑佇主的面前，伊就欲高升恁。

11

(THR) Hiaⁿ-tī ah, bo̍h-tit saⁿ húi-pòng; húi-pòng hiaⁿ-tī, á-sī phoe-phêng i ê hiaⁿ-tī ê, chiū-sī húi-pòng lu̍t-hoat, phoe-phêng lu̍t-hoat. Lí nā phoe-phêng lu̍t-hoat, chiū m̄ sī kiâⁿ lu̍t-hoat ê, chiū-sī chòe phoe-phêng ê.

(BCL) 兄弟啊，莫得相誹謗。誹謗兄弟，抑是批評伊的兄弟的，就是誹謗律法，批評律法。你若批評律法，就呣是行律法的，就是做批評的。

12

(THR) Lı̍p-hoat ê, phoe-phêng ê, chí ū chı̍t-ê, I ōe kiù iā ōe bia̍t; lí sī sím-mı̍h lâng teh phoe-phêng chhù-piⁿ ah?

(BCL) 立法的、批評的，只有一個，伊會救也會滅。你是甚麼人，批評厝邊啊？

13

(THR) Taⁿ, lín teh kóng, Kin-á-jı̍t á-sī bîn-á-jı̍t, góan beh khì bó͘ ê siâⁿ, tòa tī hia chı̍t nî kú, chòe seng-lí thàn chîⁿ;

(BCL) 今，恁講：「今仔日抑是明仔日，阮欲去某個城，住佇遐一年久，做生理趁錢。」

14

(THR) nā-sī bîn-á-jı̍t ê sū lín iáu m̄ chai. Lín ê o̍ah-miā sī cháiⁿ-iūⁿ? Lín sī hûn-bū chiām-sî chhut-hiān, āu-lâi chiū bô khòaⁿ-kìⁿ.

(BCL) 若是明仔日的事，恁猶呣知。恁的活命是怎樣？恁是雲霧暫時出現，後來就無看見。

15

(THR) Lín khah hó tio̍h án-ni kóng, Chú nā gōan, góan chiū ōe o̍ah, iā beh chòe chit hāng hit hāng.

(BCL) 恁卡好著按呢講：「主若願，阮就會活，也欲做此項、彼項。」

16

(THR) Taⁿ lín ēng chiah ê phín-phóng ê sū teh khoa-kháu; hōan-nā chit hō ê khoa-kháu, lóng sī pháiⁿ.

(BCL) 今恁用諸個品嗙的事誇口；凡若此號的誇口攏是歹。

17

(THR) Só͘-í chai ū hó tio̍h kiâⁿ, iā m̄ kiâⁿ ê, chiū-sī i ê chōe.

(BCL) 所以知有好著行，也呣行的，就是伊的罪。

Bible Color Mark

• 台語漢字羅馬本
• 巴克禮全羅