雅各書 第 3 章

1

(THR) Góa ê hiaⁿ-tī ah, m̄ thang chōe-chōe lâng chòe sian-siⁿ, in-ūi chai lán beh siū khah tāng ê sím-phòaⁿ.

(BCL) 我的兄弟啊，呣通多多人做先生，因為知咱欲受卡重的審判。

2

(THR) In-ūi lán chèng lâng tī chōe-chōe hāng po̍ah-tó. Tī kóng ōe bô po̍ah-tó ê, chiū-sī chòe ôan-chôan ê lâng, iā ōe iok-sok i thong seng-khu.

(BCL) 因為咱眾人佇多多項跋倒；佇講話無跋倒的，就是做完全的人，也會約束伊通身軀。

3

(THR) Lán hē bé-kā-kiuⁿ tī bé ê chhùi, hō͘ in sūn-thàn lán, chiū kóan-hat in thong seng-khu.

(BCL) 咱下馬咬韁佇馬的嘴，互順趁咱，就管轄通身軀。

4

(THR) Koh, lí khòaⁿ, hiah ê chûn, sui-jiân hiah tōa chiah, hō͘ tōa hong sàu i, iû-gôan sī ēng sòe-sòe ê tōa hō͘ i tńg-oat, chiàu tāi-kong ê ì-sù só͘ ài.

(BCL) 閣你看，許個船雖然許大隻，互大風掃伊，猶原是用細細的舵，互伊轉越照舵公的意思所愛。

5

(THR) Án-ni chı̍h sī sòe-sòe ê thé, iáu-kú kóng tōa ōe. Lí khòaⁿ, sió-khóa ê hé sio chhiū-ba̍k jōa chōe ah!

(BCL) 按呢，舌是細細的體，猶久講大話。你看，小可的火燒樹木偌多啊！

6

(THR) Chı̍h chiū-sī hé, tī lán pah-thé tiong chòe put-gī ê sè-kài, phah lâ-sâm thong seng-khu, it-seng ê hêng-tōng tūi i hoat hé; i ka-kī ê hé sī tùi tē-ge̍k hoat.

(BCL) 舌就是火，佇咱百體中做不義的世界，拍垃墋通身軀，一生的行動對伊發火，伊家己的火是對地獄發。

7

(THR) In-ūi ta̍k lūi ê cháu-siù, pe-chiáu, thâng-thōa, chúi-cho̍k, lóng siū chè-ap, iā í-keng hō͘ jîn-lūi chè-ap.

(BCL) 因為逐類的走獸、飛鳥、蟲、水族，攏受制壓，也已經互人類制壓；

8

(THR) To̍k-to̍k chı̍h bô lâng ōe chè-ap; sī bô thêng-hioh ê pháiⁿ mı̍h, ū sí ê to̍k móa-móa.

(BCL) 獨獨舌無人會制壓，是無停歇的歹物，有死的毒滿滿。

9

(THR) Lán ēng i o-ló Chú, chiū-sī Pē, koh ēng i chiù-chó͘ lâng, chiū-sī chiàu Siōng-tè ê khóan-sit lâi chhòng-chō ê.

(BCL) 咱用伊謳咾主、就是父，閣用伊咒詛人，就是照上帝的款式來創造者。

10

(THR) O-ló kap chiù-chó͘ siāng chı̍t ê chhùi chhut. Góa ê hiaⁿ-tī ah, che sī m̄ eng-kai.

(BCL) 謳咾及咒詛像一個嘴出。我的兄弟啊，這是呣應該！

11

(THR) Chúi-chôaⁿ kiám ōe tùi siāng chı̍t khang lâu chhut tiⁿ-ê khó͘-ê mah?

(BCL) 水泉豈會對像一孔流出甜的苦的嗎？

12

(THR) Góa ê hiaⁿ-tī ah, bû-hoa-kó chhiū ōe siⁿ kaⁿ-ná mah? á-sī phû-tô chhiū ōe siⁿ bû-hoa-kó mah? án-ni tùi kiâm-ê lâu-chhut chiáⁿ-ê iā bōe-ōe.

(BCL) 我的兄弟啊，無花果樹會生橄欖嗎？抑是葡萄樹會生無花果嗎？按呢對鹹的流出　的也會。

13

(THR) Lín tiong-kan chī-chūi ū tì-hūi kiàn-sek ê ah? chiū tio̍h ēng tì-hūi ê un-jiû, tùi hó ê phín-hēng, lâi hián-bêng i ê só͘ kiâⁿ.

(BCL) 恁中間是誰有智慧見識的啊？就著用智慧的溫柔，對好的品行來顯明伊的所行。

14

(THR) Lín sim-lāi nā khǹg ok-to̍k ê òan-tò͘ kap saⁿ-chiⁿ, chiū bo̍h-tit khoa-kháu, bo̍h-tit pe̍h-chha̍t lâi ge̍k chin-lí.

(BCL) 恁心內若囥惡毒的怨妒及相爭，就莫得誇口，莫得白賊來逆真理。

15

(THR) Chit hō tì-hūi m̄ sī tùi téng-bīn lâi ê, sī sio̍k tī chōe, sio̍k tī hiat-khì, sio̍k kúi ê khóan.

(BCL) 此號智慧呣是對頂面來的，是屬佇罪，屬佇血氣，屬鬼的款。

16

(THR) In-ūi tī sím-mı̍h só͘-chāi ū òan-tò͘ kap saⁿ-chiⁿ, chiū tī hia ū jiáu-lōan kap it-chhè ê pháiⁿ sū.

(BCL) 因為佇甚麼所在有怨妒及相爭，就佇遐有擾亂及一切的歹事。

17

(THR) To̍k-to̍k tùi téng-bīn ê tì-hūi, it sī chheng-kiat, iáu-ê sī hô-pêng, un-jiû, hó siong-liông, ū lîn-bín kap hó ê ké-chí móa-móa, bô phian-thán, bô ké-hó.

(BCL) 獨獨對頂面的智慧，一是清潔，猶的是和平，溫柔好商量，有憐憫及好的果子滿滿，無偏袒，無假好。

18

(THR) Koh gī ê ké-chí sī chāi-tī hô-pêng, kā kiâⁿ hô-pêng ê lâng lâi chèng.

(BCL) 閣義的果子是在佇和平，給行和平的人來種。

Bible Color Mark

• 台語漢字羅馬本
• 巴克禮全羅