以賽亞書 第 55 章

1

(THR) Eh, kìⁿ-nā lín chhùi-ta-ê, tio̍h lâi chiū-kūn chúi, iā bô chîⁿ-ê, lín tio̍h lâi; lâi bóe lâi chia̍h; lâi ah, m̄-bián gûn, m̄-bián kè-chîⁿ, lâi bóe chiú kap lin.

(BCL) 呃，見若恁嘴乾的著來就近水；也無錢的恁著來。來買來食；來啊，呣免銀，呣免價錢，來買酒及奶。

2

(THR) Lín siáⁿ-sū khai-hùi chîⁿ, bóe hit-ê bōe chia̍h-tit ê mı̍h? siáⁿ-sū tio̍h-bôa, tī hit-ê bōe hō͘ lâng chia̍h-pá--ê ah? lín tio̍h liû-sim thiaⁿ Góa, chiū ōe chia̍h hit ê hó-mı̍h, tit-tio̍h hióng-siū iû-jī, hō͘ sim hoaⁿ-hí.

(BCL) 恁啥事開費錢買彼個食得的物？啥事著磨佇彼個互人食飽的啊？恁著留心聽我就會食彼個好物，得著享受油膩，互心歡喜。

3

(THR) Lín tio̍h àⁿ hī-khang chiū-kūn Góa; tio̍h thiaⁿ, chiū lín ê sim-sîn ōe o̍ah; Góa beh kap lín lı̍p éng-óan ê iok, chiū-sī só͘ èng-ún Tāi-pı̍t kian-kò͘ ê un-hūi.

(BCL) 恁著俯耳孔就近我；著聽，就恁的心神會活。我欲及恁立永遠的約，就是所應允大衛堅固的恩惠。

4

(THR) Khòaⁿ ah, Góa í-keng siat-lı̍p i chòe lia̍t-pang ê kan-chèng, chòe lia̍t-pang ê kun-ông kap siú-léng.

(BCL) 看啊，我已經設立伊做列邦的干證，做列邦的君王及首領。

5

(THR) Khòaⁿ ah, lí pêng-sò͘ m̄-bat ê peh-sìⁿ, lí beh kiò i lâi; pêng-sò͘ m̄-bat lí ê peh-sìⁿ ia̍h beh cháu lâi óa lí; lóng sī ūi-tio̍h Iâ-hô-hoa lí ê Siōng-tè, Í-sek-lia̍t ê Sèng--ê; in-ūi I í-keng êng-kng lí.

(BCL) 看啊，你平素呣識的百姓，你欲叫伊來；平素呣識你的百姓亦欲走來倚你，攏是為著耶和華──你的上帝以色列的聖者，因為伊已經榮光你。

6

(THR) Tio̍h thàn Iâ-hô-hoa thang chhē-tio̍h ê sî, lâi chhē I, tī I saⁿ-kūn ê sî kiû-kiò I.

(BCL) 著趁耶和華通尋著的時來尋伊，佇伊相近的時求叫伊。

7

(THR) Pháiⁿ-lâng tio̍h lī-khui i ê lō͘, put-gī ê lâng tio̍h kóe-ōaⁿ i ê liām-thâu; kui-ǹg Iâ-hô-hoa, I beh lîn-bín i; kui-ǹg lán ê Siōng-tè, in-ūi I beh piàn-kiâⁿ sià-bián.

(BCL) 歹人著離開伊的路；不義的人著改換伊的念頭。歸向耶和華，伊欲憐憫伊；歸向咱的上帝，因為伊欲遍行赦免。

8

(THR) Iâ-hô-hoa kóng, Góa ê liām-thâu m̄-sī lín ê liām-thâu, lín ê lō͘ m̄-sī Góa ê lō͘.

(BCL) 耶和華講：我的念頭呣是恁的念頭；恁的路呣是我的路。

9

(THR) In-ūi thiⁿ cháiⁿ-iūⁿ khah-kôaiⁿ tōe, án-ni Góa ê lō͘ khah-kôaiⁿ lín ê lō͘, Góa ê liām-thâu khah-kôaiⁿ lín ê liām-thâu.

(BCL) 因為天怎樣卡高地，按呢，我的路卡高恁的路；我的念頭卡高恁的念頭。

10

(THR) In-ūi chhin-chhiūⁿ hō͘ kap seh tùi thiⁿ kàng-lo̍h, ia̍h bô koh tò-tńg, chiū-sī lūn-te̍k thó͘-tōe, hō͘ tōe-chiūⁿ puh-gê kiat-sı̍t, hō͘ iā-chéng--ê ū chéng-chí, hō͘ chia̍h--ê ū bí-niû;

(BCL) 因為親像雨及雪對天降落，亦無閣倒轉，就是潤澤土地，互地上發芽結實，互撒種的有種子，互食的有米糧。

11

(THR) Góa ê chhùi só͘ kóng-chhut ê ōe ia̍h beh án-ni; koat-tòan bô khang-khang tò-tńg lâi Góa chia, sī beh chiâⁿ Góa só͘ hoaⁿ-hí--ê, beh hō͘ Góa só͘ chhe i chòe ê sū tit-tio̍h heng-thong.

(BCL) 我的嘴所講出的話亦欲按呢，決斷無空空倒轉來我遮，是欲成我所歡喜的，欲互我所差伊做的事得著亨通。

12

(THR) Lín chhut-khì beh hoaⁿ-hoaⁿ hí-hí, tit-tio̍h ín-chhōa pêng-pêng an-an: tōa-soaⁿ sió-soaⁿ beh tī lín ê bīn-chêng chhut-siaⁿ chhiùⁿ-koa, tiân-iá ê chhiū-ba̍k lóng beh tah-chhiú.

(BCL) 恁出去欲歡歡喜喜，得著引導平平安安。大山小山欲佇恁的面前出聲唱歌；田野的樹木攏欲搭手。

13

(THR) Chhêng-peh hoat-siⁿ lâi thòe chháu-chhì, kong-liam-chhiū hoat-siⁿ lâi thòe chı̍t-lê; che sī beh chòe Iâ-hô-hoa ê miâ ê kì-liām, chòe éng-óan ê chèng-kù, bōe-ōe chián-tû.

(BCL) 松柏發生，來替草茦；岡拈樹發生，來替蒺藜。這是欲做耶和華的名的記念，做永遠的證據，會剪除。

Bible Color Mark

• 台語漢字羅馬本
• 巴克禮全羅