以賽亞書 第 50 章

1

(THR) Iâ-hô-hoa án-ni kóng, Góa lî-chhut lín ê lāu-bú, lî-su tī toh-lo̍h ah? Góa chiong lín bōe hō͘ Góa toh-lo̍h chı̍t ê chè-chú ah? Khòaⁿ ah, lín siū-bōe sī in-ūi lín ê chōe-kòa, lín ê lāu-bú siū lî-chhut, sī in-ūi lín ê kè-sit.

(BCL) 耶和華按呢講：我離出恁的老母，離書佇叨落啊？我將恁賣互我叨落一個債主啊？看啊，恁受賣是因為恁的罪過；恁的老母受離出，是因為恁的過失。

2

(THR) Góa lâi ê sî, bô lâng tī-teh sī cháiⁿ-iūⁿ? Góa kiò ê sî, bô lâng ìn sī cháiⁿ-iūⁿ? Góa ê chhiú kiám-sī té, bōe-ōe kiù-sio̍k mah? Góa kiám bô chín-kiù ê la̍t mah? Khòaⁿ ah, Góa chı̍t-ē hoah, hái chiū ta--khì; Góa hō͘ kang-hô pìⁿ-chòe soa-bô͘, kî-tiong ê hî, in-ūi bô chúi, chhàu-nōa, chhùi-ta chiū sí.

(BCL) 我來的時，無人佇是怎樣？我叫的時，無人應是怎樣？我的手豈是短、會救贖嗎？我豈無拯救的力嗎？看啊，我一下喝，海就乾去；我互江河變做沙漠；其中的魚因為無水臭爛，嘴乾就死。

3

(THR) Góa hō͘ chiah ê thiⁿ ēng o͘-àm chòe i-ho̍k, ēng môa-pò͘ chòe jia-khàm.

(BCL) 我互諸個天用黑暗做衣服，用麻布做遮蓋。

4

(THR) Chú Iâ-hô-hoa siúⁿ-sù góa siū kà-sī--ê ê chı̍h, hō͘ góa chai cháiⁿ-iūⁿ ēng giân-gú hû-chō͘ ià-siān ê lâng; Chú ta̍k chá-khí kiò-chhíⁿ, kiò-chhíⁿ góa ê hī-khang, hō͘ góa ōe thiaⁿ, chhin-chhiūⁿ siū kà-sī ê lâng chı̍t-iūⁿ.

(BCL) 主耶和華賞賜我受教示者的舌，互我知怎樣用言語扶助厭倦的人。主逐早起叫醒，叫醒我的耳孔，互我會聽，親像受教示的人一樣。

5

(THR) Chú Iâ-hô-hoa khai-thong góa ê hī-khang, góa pēng-bô ûi-ke̍h, ia̍h bô thè-āu.

(BCL) 主耶和華開通我的耳孔；我並無違逆，亦無退後。

6

(THR) Lâng phah góa ê ka-chiah-phiaⁿ, góa chhut-chāi i phah; lâng chhoah góa chhùi-phóe ê chhùi-chhiu, góa chhut-chāi i chhoah; lâng lêng-jio̍k góa, kā góa phùi-nōa, góa ia̍h bô ng-bīn.

(BCL) 人拍我的尻脊骿，我出在伊拍；人掇我嘴的嘴鬚，我出在伊掇；人凌辱我，給我呸涎，我亦無掩面。

7

(THR) In-ūi Chú Iâ-hô-hoa tek-khak pang-chān góa, só͘-í góa bô kiàn-siàu; ūi-tio̍h án-ni, góa hō͘ góa ê bīn ngī chhin-chhiūⁿ tēng-chio̍h; góa ia̍h chai góa tek-khak bô tì-kàu làu-khùi.

(BCL) 因為主耶和華的確幫助我，所以我無見誚。為著按呢，我互我的面硬親像石；我亦知我的確無致到漏氣。

8

(THR) Chheng góa chòe gī--ê kūn--lah; chī-chūi kap góa saⁿ-chiⁿ? i thang kap góa saⁿ-kap khiā; chī-chūi chòe góa ê tùi-te̍k? i thang chiū-kūn góa.

(BCL) 稱我做義者近啦；是誰及我相爭，伊通及我相及徛；是誰做我的對敵，伊通就近我。

9

(THR) Khòaⁿ ah, Chú Iâ-hô-hoa beh pang-chān góa, chī-chūi ōe tēng góa ū-chōe ah? khòaⁿ ah, in lóng chhin-chhiūⁿ saⁿ chiām-chiām kū, hō͘ chiù-thâng só͘ chia̍h.

(BCL) 看啊，主耶和華欲幫助我；是誰會定我有罪啊？看啊，攏親像衫漸漸舊，互蛀蟲所食。

10

(THR) Lín tiong-kan chī-chūi kèng-ùi Iâ-hô-hoa, thiaⁿ-thàn I ê lô͘-po̍k ê ōe ah? kiâⁿ tī o͘-àm bô-ū kng-bêng--ê, tio̍h óa-khò Iâ-hô-hoa ê miâ, óa-khò i ê Siōng-tè.

(BCL) 恁中間是誰敬畏耶和華、聽趁伊的奴僕的話啊？行佇黑暗，無有光明者。著倚靠耶和華的名，倚靠伊的上帝。

11

(THR) Khòaⁿ ah, hōan-nā lín tiám-hé, ēng hé-pé ûi ka-kī--ê, thang lâi kiâⁿ tī lín ê hé-iām lāi, kap lín só͘ tiám ê hé-pé tiong. Che sī Góa ê chhiú só͘ tiāⁿ-tio̍h ê ; lín beh tó tī kan-khó͘ ê tiong-kan.

(BCL) 看啊，凡若恁點火，用火把圍家己者，通來行佇恁的火焰內，及恁所點的火把中。這是我的手所定著的；恁欲倒佇艱苦的中間。

Bible Color Mark

• 台語漢字羅馬本
• 巴克禮全羅