以賽亞書 第 40 章

1

(THR) Lín ê Siōng-tè kóng, Lín tio̍h an-ùi, an-ùi Góa ê peh-sìⁿ.

(BCL) 恁的上帝講：恁著安慰，安慰我的百姓。

2

(THR) Tio̍h tùi Iâ-lō͘-sat-léng kóng hó-ōe, koh pò i chai, i ê kau-chiàn í-keng chīn, i ê chōe-kòa í-keng sià; i ūi-tio̍h i it-chhè ê chōe, tùi Iâ-hô-hoa ê chhiú ka-pē siū hêng-ho̍at.

(BCL) 著對耶路撒冷講好話，閣報伊知，伊的交戰已經盡；伊的罪過已經赦；伊為著伊一切的罪，對耶和華的手加倍受刑罰。

3

(THR) Ū siaⁿ kiò kóng, Tī khòng-iá pī-pān Iâ-hô-hoa ê lō͘, tī soa-bô͘ ê tōe, siu-pîⁿ lán ê Siōng-tè ê tōa-lō͘.

(BCL) 有聲叫講：佇曠野備辦耶和華的路，佇沙漠的地，修平咱的上帝的大路。

4

(THR) Chiah ê soaⁿ-kok lóng beh thūn hō͘ i tīⁿ, tōa-sòe ê soaⁿ-thâu lóng beh ku̍t hō͘ i kē; oan-oat--ê, beh kóe hō͘ i tı̍t, khâm-khia̍t--ê, beh siu hō͘ i pîⁿ.

(BCL) 諸個山谷攏欲填互伊淀，大細的山頭攏欲掘互伊低；彎越的欲改互伊直，嵁硈的欲修互伊平。

5

(THR) Iâ-hô-hoa ê êng-kng tek-khak hián-hiān, hōan-nā ū hiat-khì-ê beh lóng khòaⁿ-kìⁿ; in-ūi che sī Iâ-hô-hoa chhin-chhùi kóng--ê.

(BCL) 耶和華的榮光的確顯現；凡若有血氣者欲攏看見；因為這是耶和華親嘴講的。

6

(THR) Ū siaⁿ kóng, Lí tio̍h kiò, i kóng, Góa tio̍h kiò sím-mı̍h? kìⁿ-nā ū hiat-khì--ê lóng chhin-chhiūⁿ chháu, i ê êng-kng lóng chhin-chhiūⁿ soaⁿ--nih ê hoe; chháu ōe ta, hoe ōe siā;

(BCL) 有聲講：你著叫！伊講：我著叫甚麼？見若有血氣者攏親像草；伊的榮光攏親像山裡的花。

7

(THR) in-ūi Iâ-hô-hoa ê khì chhe tī i ê téng-bīn; peh-sìⁿ chin-chiàⁿ sī chháu.

(BCL) 草會乾，花會謝，因為耶和華的氣吹佇伊的頂面；百姓真正是草。

8

(THR) Chháu ōe ta, hoe ōe siā; to̍k-to̍k lán ê Siōng-tè ê ōe tek-khak éng-óan tī-teh.

(BCL) 草會乾，花會謝，獨獨咱的上帝的話的確永遠佇。

9

(THR) Pò hó siau-sit hō͘ Sek-an--ê ah, lí tio̍h chiūⁿ kôaiⁿ-soaⁿ; pò hó siau-sit hō͘ Iâ-lō͘-sat-léng--ê ah, lí tio̍h chīn-la̍t chhut lí ê siaⁿ; tio̍h chhut-siaⁿ, m̄-bián kiaⁿ; tùi Iû-tāi ê siâⁿ kóng, Khòaⁿ ah, lín ê Siōng-tè.

(BCL) 報好消息互錫安的啊，你著上高山；報好消息互耶路撒冷者啊，你著盡力出你的聲。著出聲呣免驚，對猶大的城講：看啊，恁的上帝！

10

(THR) Khòaⁿ ah, Chú Iâ-hô-hoa beh chhin-chhiūⁿ tōa kôan-lêng--ê lîm-kàu , I ê chhiú tek-khak ūi I chiáng-kôan; khòaⁿ ah, I ê siúⁿ-sù tī I hia, I ê pò-tap ia̍h tī I ê bīn-chêng.

(BCL) 看啊，主耶和華欲親像大權能者臨到；伊的手的確為伊掌權。看啊，伊的賞賜佇伊遐；伊的報答亦佇伊的面前。

11

(THR) I beh chhin-chhiūⁿ bo̍k-chiá kò͘ I ê iûⁿ-kûn, I beh ēng chhiú âⁿ-óa iûⁿ-á-kiáⁿ, phō i tī heng-chêng, bān-bān chhōa hiah-ê hō͘ iûⁿ-á suh-lin--ê.

(BCL) 伊欲親像牧者顧伊的羊群，伊欲用手伏倚羊仔子，抱伊佇胸前，慢慢導許個互羊仔吸奶者。

12

(THR) Chī-chūi bat ēng chhiú-sim niû chiah ê chúi, ēng chhiú-hó͘-kháu niû kiong-chhong, ēng táu tóe tōa-tōe ê thô͘-hún, ēng chhìn chhìn soaⁿ-niá, ēng thian-phêng phêng soaⁿ-thâu ah?

(BCL) 是誰曾用手心量諸個水，用手虎口量穹蒼，用斗貯大地的土粉，用秤秤山嶺，用天秤秤山頭啊？

13

(THR) Chī-chūi bat chhek-to̍k Iâ-hô-hoa ê sim, á-sī chòe I ê bô͘-sū lâi chí-kàu I ah?

(BCL) 是誰曾測　耶和華的心，抑是做伊的謀士來指教伊啊？

14

(THR) I kap chī-chūi siong-liông, chī-chūi kà-sī I, chiong kong-pêng ê lō͘ chí-sī I, koh chiong tì-sek kà-sī I, chiong thong-ta̍t ê tō-lō͘ chí-kàu I ah?

(BCL) 伊及是誰商量，是誰教示伊，將公平的路指示伊，閣將智識教示伊，將通達的道路指教伊啊？

15

(THR) Khòaⁿ ah, bān peh-sìⁿ lóng chhin-chhiūⁿ chúi-tháng ê chı̍t-tih-chúi, koh chhin-chhiūⁿ thian-phêng-téng ê tîn-ai; I the̍h chiah ê hái-sū khí-lâi chhin-chhiūⁿ ke̍k bî-sòe ê mı̍h.

(BCL) 看啊，萬百姓攏親像水桶的一滴水，閣親像天秤頂的塵埃；伊提諸個海嶼起來，親像極微細的物。

16

(THR) Lī-pa-lùn bô kàu-gia̍h thang chòe hé-chhâ, kî-tiong ê cháu-siù bô kàu-gia̍h chòe sio-chè.

(BCL) 黎巴嫩無夠額通做火柴；其中的走獸無夠額做燒祭。

17

(THR) Bān peh-sìⁿ tī I ê bīn-chêng chhin-chhiūⁿ bô mı̍h; hō͘ I khòaⁿ ke̍k-kî bô, chiū-sī khang-khang.

(BCL) 萬百姓佇伊的面前親像無物，互伊看極其無，就是空空。

18

(THR) Lín kiù-kèng beh chiong chī-chūi pí-phēng Siōng-tè? ēng sím-mı̍h hêng-siōng kap Siōng-tè pí-phēng ah?

(BCL) 恁究竟欲將是誰比並上帝，用甚麼形像及上帝比並啊？

19

(THR) Ngó͘-siōng sī sai-hū chù-chō, gûn-chhiūⁿ ēng kim an--i, kā i chù gûn-liān.

(BCL) 偶像是師傅鑄造，銀匠用金安伊，給伊鑄銀鍊。

20

(THR) Sòng-hiong lâng bô la̍t thang hiàn chit-hō mı̍h, chiū kéng bōe-ōe hiú-hōai ê chhâ, ūi i chhē kî-khiáu ê sai-hū, chhāi bōe-ōe iô-tāng ê ngó͘-siōng.

(BCL) 喪鄉人無力通獻此號物，就揀會朽壞的柴，為伊尋奇巧的師傅，祀會搖動的偶像。

21

(THR) Lín kiám bē chai mah? lín kiám bē thiaⁿ-kìⁿ mah? tùi khí-thâu kiám bô kā lín kóng mah? tùi siat-lı̍p tōe ê kun-ki lín kiám bô bêng-pe̍k mah?

(BCL) 恁豈未知嗎？恁豈未聽見嗎？對起頭豈無給恁講嗎？對設立地的根基恁豈無明白嗎？

22

(THR) Chú chē tī tōe ê tōa-khôan, tōe-chiūⁿ khiā-khí ê peh-sìⁿ chhin-chhiūⁿ chháu-meh; I tián-khui thiⁿ chhin-chhiūⁿ tiùⁿ-pak, an-tì i, chhin-chhiūⁿ thang khiā-khí ê pò͘-pîⁿ.

(BCL) 主坐佇地的大圈；地上徛起的百姓親像草蜢。伊展開天親像帳幅，安置伊親像通徛起的布棚。

23

(THR) I hō͘ kun-ông kui tī bô; hō͘ tōe-chiūⁿ ê sím-phòaⁿ-koaⁿ chiâⁿ-chòe khang-hu.

(BCL) 伊互君王歸佇無，互地上的審判官成做空虛。

24

(THR) In sī tú-á chai, tú-á chèng; i ê châng tú-á tèng-kun tī tōe--nih; I chı̍t-ē chhe tī i téng-bīn, chiū lóng ko͘-tâ, kńg-lê-hong chiong i chhe--khì, chhin-chhiūⁿ chháu-iù chı̍t-iūⁿ.

(BCL) 是抵仔栽，抵仔種，伊的欉抵仔釘根佇地裡，伊一下吹佇伊頂面，就攏枯焦；捲螺風將伊吹去，親像草幼一樣。

25

(THR) Chì-sèng-ê kóng, Lín beh ēng chī-chūi pí-phēng Góa, hō͘ Góa kap i pîⁿ ah?

(BCL) 至聖者講：恁欲用是誰比並我，互我及伊平啊？

26

(THR) Lín kia̍h-ba̍k khòaⁿ téng-bīn, khòaⁿ chī-chūi chhòng-chō chiah-ê, chiàu siàu-ba̍k chhōa hiah ê bān-kun chhut-lâi; I chı̍t-ê chı̍t-ê chheng in ê miâ; in-ūi I ê kôan-lêng, koh in-ūi I ê tōa kôan-lêng, tōa khùi-la̍t, liân chı̍t-ê ia̍h bô khiàm.

(BCL) 恁抬目看頂面，看是誰創造諸個，照數目導許個萬軍出來，伊一個一個稱的名；因為伊的權能，閣因為伊的大權能大氣力，連一個亦無欠。

27

(THR) Ngá-kok ah, lí siáⁿ-sū kóng, Í-sek-lia̍t ah, lí siáⁿ-sū kóng, Góa ê tō-lō͘ ún-ba̍t tī Iâ-hô-hoa, góa ê àn-kiāⁿ bô tit-tio̍h Siōng-tè liāu-lí.

(BCL) 雅各啊，你啥事講，以色列啊，你啥事講，我的道路隱密佇耶和華？我的案件無得著上帝料理？

28

(THR) Lí kiám bē chai mah? Lí kiám bē thiaⁿ-kìⁿ mah? éng-éng tī-teh ê Siōng-tè, Iâ-hô-hoa, chhòng-chō tōe-ke̍k--ê, I bô ià, ia̍h bô siān; I ê tì-hūi bô thang chhek-to̍k.

(BCL) 你豈未知嗎？你豈未聽見嗎？永永佇的上帝耶和華，創造地極者，伊無厭，亦無倦；伊的智慧無通測　。

29

(THR) Ià-siān--ê I hō͘ i lêng-le̍k; nńg-chiáⁿ-ê, I ke-thiⁿ i ê khùi-la̍t.

(BCL) 厭倦者，伊互伊能力；軟茈者，伊加添伊的氣力。

30

(THR) Siàu-liân lâng ia̍h ōe ià ōe siān, ióng-chòng ê lâng ia̍h ōe po̍ah-tó.

(BCL) 少年人亦會厭會倦；勇壯的人亦會跋倒。

31

(THR) To̍k-to̍k óa-khò Iâ-hô-hoa--ê beh tit-tio̍h sin ê khùi-la̍t; in beh chhin-chhiūⁿ eng-chiáu thí-sı̍t pe-kôaiⁿ; in cháu, ia̍h bô ià; kiâⁿ ia̍h bô siān.

(BCL) 獨獨倚靠耶和華者欲得著新的氣力。欲親像鷹鳥展翅飛高；走亦無厭，行亦無倦。

Bible Color Mark

• 台語漢字羅馬本
• 巴克禮全羅