何西阿書 第 2 章

1

(THR) Tio̍h tùi lín ê hiaⁿ-tī kóng, A-bí, koh tùi lín ê chí-bē kóng, Lō͘-hap-má.

(BCL) 著對恁的兄弟講阿米，閣對恁的姊妹講路哈瑪。

2

(THR) Tio̍h kap lín lāu-bú piān-lūn, koh piān-lūn; in-ūi i m̄-sī Góa ê bó͘, Góa iā m̄-sī i ê tiōng-hu; kah i tû--khì bīn--nih ê îm-lōan, kap i heng-khám ê îm-hēng;

(BCL) 著及恁老母辯論閣辯論；因為伊呣是我的某，我也呣是伊的丈夫。教伊除去面裡的淫亂及伊胸坎的淫行，

3

(THR) bián-tit Góa kā i thǹg kng-kng, hō͘ i chhin-chhiūⁿ tú-á chhut-sì ê jı̍t, hō͘ i chhin-chhiūⁿ khòng-iá, chhin-chhiūⁿ ta-sò ê tōe, hō͘ i tùi chhùi-ta lâi sí.

(BCL) 免得我給伊褪光光，互伊親像抵仔出世的日，互伊親像曠野，親像乾燥的地，互伊對嘴乾來死。

4

(THR) Góa bô beh lîn-bín i ê kiáⁿ, in-ūi in sī tùi îm-lōan siⁿ ê kiáⁿ.

(BCL) 我無欲憐憫伊的子，因為是對淫亂生的子。

5

(THR) In-ūi in ê lāu-bú kiâⁿ îm-lōan; hôai-īn--ê chòe-chhut kiàn-siàu sū; in-ūi i kóng, Góa beh tè góa só͘ lôan-ài ê lâng, góa ê piáⁿ, chúi, iûⁿ-mn̂g, môa, iû kap góa só͘ lim--ê, lóng sī in hō͘ góa.

(BCL) 因為的老母行淫亂，懷孕者做出見誚事，因為伊講：我欲隨我所戀愛的人；我的餅，水，羊毛，麻，油及我所飲的，攏是互我。

6

(THR) Khòaⁿ ah, in-ūi án-ni, Góa beh ēng chhì-á chó͘-that i ê lō͘, choh-chhiûⁿ hō͘ i chhē-bô i ê lō͘.

(BCL) 看啊，因為按呢，我欲用莿仔阻塞伊的路，築牆互伊尋無伊的路。

7

(THR) I beh tui-jip só͘ lôan-ài ê lâng, nā-sī jip-bōe-tio̍h, i beh chhē in, chóng-sī chhē-bōe-tio̍h; chiū kóng, Góa beh tò-khì chhē góa ê pún-hu, in-ūi góa hit-sî ê kéng-hóng pí hiān-kim iáu khah-hó.

(BCL) 伊欲追所戀愛的人，若是著；伊欲尋，總是尋著，就講：我欲倒去尋我的本夫，因為我彼時的景況比現今猶卡好。

8

(THR) I m̄-chai i ê ngó͘-kok, chiú, iû, sī Góa hō͘ i; ke-thiⁿ i ê gûn kap kim--ê, iā sī Góa; i ēng chiah-ê ho̍k-sāi Pa-le̍k.

(BCL) 伊呣知伊的五穀、酒、油是我互伊，加添伊的銀及金的，也是我；伊用諸個服事巴力。

9

(THR) Só͘-í kàu siu-koah ê jı̍t, Góa beh chiong Góa ê ngó͘-kok tùi in the̍h tò-tńg; koh tī chhut-chiú ê sî, beh chiong Góa ê sin-chiú the̍h tò-tńg, iā beh chiong Góa hō͘ i thang jia chhiah-theh ê iûⁿ-mn̂g kap môa, chhiúⁿ tò-tńg.

(BCL) 所以到收割的日，我欲將我的五穀對提倒轉，閣佇出酒的時，欲將我的新酒提倒轉，也欲將我互伊通遮赤體的羊毛及麻搶倒轉。

10

(THR) Taⁿ Góa beh tī i só͘ lôan-ài ê lâng ê ba̍k-chiu-chêng, lō͘-chhut i ê îm-hēng; tek-khak bô lâng ōe kiù i thoat-lī Góa ê chhiú.

(BCL) 今我欲佇伊所戀愛的人的目睭前露出伊的淫行；的確無人會救伊脫離我的手。

11

(THR) Góa beh soah in hiah ê iàn-lo̍k, choeh-iân, ge̍h ê chhoe-it, an-hioh-jı̍t, kap lóng-chóng ê choeh-kî.

(BCL) 我欲息許個宴樂、節筵、月的初一、安息日，及攏總的節期。

12

(THR) Góa iā beh húi-hōai i ê phû-tô-chhiū, kap bû-hoa-kó chhiū, chiū-sī kóng, Che sī hiah-ê lôan-ài góa--ê hō͘ góa ê lé-sò͘; Góa beh hō͘ hiah-ê piàn-chòe chhiū-nâ, hō͘ iá-siù chia̍h--i.

(BCL) 我也欲毀壞伊的葡萄樹及無花果樹，就是講「這是許個戀愛我者互我的禮數」。我欲互許個變做樹林，互野獸食伊。

13

(THR) I chêng-jı̍t sio-hiuⁿ ho̍k-sāi chiah ê Pa-le̍k, koh ēng hī-kau kap pa̍t-hō siú-sek ka-kī chng-thāⁿ, tè i saⁿ-lôan-ài ê lâng, lâi bōe-kì-tit Góa; in-ūi án-ni Góa beh pān--i. Che sī Iâ-hô-hoa kóng--ê.

(BCL) 伊前日燒香服事諸個巴力，閣用耳及別號首飾家己妝飾，隨伊相戀愛的人，來記得我，因為按呢我欲辦伊。這是耶和華講的。

14

(THR) Khòaⁿ ah, Góa beh chio-ho͘ i, chhōa i kàu khòng-iá, ēng ōe an-ùi i.

(BCL) 看啊，我欲招呼伊，導伊到曠野，用話安慰伊。

15

(THR) Góa iā beh tùi-hia siúⁿ-sù i phû-tô-hn̂g, koh siúⁿ-sù i A-kat ê soaⁿ-kok chòe ǹg-bāng ê mn̂g; i beh tī-hia ìn-siaⁿ, kap siàu-liân ê jı̍t bô koh-iūⁿ, kap tùi Ai-kı̍p tōe chiūⁿ-lâi ê jı̍t saⁿ-tâng.

(BCL) 我也欲對遐賞賜伊葡萄園，閣賞賜伊亞割的山谷做向望的門。伊欲佇遐應聲，及少年的日無各樣，及對埃及地上來的日相同。

16

(THR) Iâ-hô-hoa kóng, Tng hit-jı̍t lí beh kiò Góa kóng, Góa ê tiōng-hu ah, bô koh kiò Góa kóng, Góa ê Chú ah.

(BCL) 耶和華講：「當彼日你欲叫我講，我的丈夫啊，無閣叫我講，我的主啊；

17

(THR) In-ūi Góa beh tùi in ê chhùi tû--khì chiah ê Pa-le̍k ê miâ, bô koh ēng chit ê miâ kì-liām i.

(BCL) 因為我欲對的嘴除去諸個巴力的名，無閣用此個名紀念伊。

18

(THR) Tng hit-jı̍t Góa beh ūi-tio̍h in, kap chhân-iá ê cháu-siù, kap khong-tiong ê pe-chiáu, í-kı̍p tōe-chiūⁿ ê thâng-thōa lı̍p-iok; Góa iā beh tùi chit ê tōe-hng at-chı̍h keng, to, kau-chiàn, hō͘ in an-jiân tó-teh khùn.

(BCL) 當彼日，我欲為著，及田野的走獸及空中的飛鳥，以及地上的蟲　立約；我也欲對此個地方遏折弓刀，交戰，互安然倒睏。

19

(THR) Góa beh phèng-tiāⁿ lí éng-óan kui tī Góa, koh Góa beh ēng kong-gī, kong-pêng, chû-ài, lîn-bín, phèng-tiāⁿ lí kui Góa.

(BCL) 我欲聘定你永遠歸佇我，閣我欲用公義、公平、慈愛、憐憫聘定你歸我；

20

(THR) Góa iā beh ēng sêng-sı̍t phèng-tiāⁿ lí kui Góa, lí chiū beh bat Iâ-hô-hoa.

(BCL) 我也欲用誠實聘定你歸我，你就欲識耶和華。

21

(THR) Iâ-hô-hoa kóng, Hit-jı̍t Góa beh ìn-tap, Góa beh ìn-tap thiⁿ, thiⁿ beh ìn-tap tōe;

(BCL) 耶和華講：彼日我欲應答，我欲應答天，天欲應答地；

22

(THR) tōe beh ìn-tap gō͘-kak, chiú, iû, chiah-ê beh ìn-tap Iâ-su-lia̍t.

(BCL) 地欲應答五穀、酒、油，諸個欲應答耶斯列。

23

(THR) Góa beh ūi ka-kī chai-chèng i tī chit ê tōe; pêng-sò͘ bô tit-tio̍h lîn-bín--ê, Góa beh lîn-bín--i; m̄-sī Góa ê peh-sìⁿ--ê, Góa beh tùi i kóng, Lí sī Góa ê peh-sìⁿ, i iā beh kóng, Lí sī góa ê Siōng-tè.

(BCL) 我欲為家己栽種伊佇此個地。平素無得著憐憫者，我欲憐憫伊；呣是我的百姓者，我欲對伊講：你是我的百姓，伊也欲講，你是我的上帝。」

Bible Color Mark

• 台語漢字羅馬本
• 巴克禮全羅