希伯來書 第 2 章

1

(THR) Só͘-í lán tio̍h it-hoat tì-ì só͘ thiaⁿ-kìⁿ ê, kiaⁿ-liáu lán ōe tì-kàu liu-khì.

(BCL) 所以咱著益發致意所聽見的，驚了咱會致到溜去。

2

(THR) In-ūi tùi thiⁿ-sài só͘ thôan ê tō-lí, siōng-chhiáⁿ sī kian-kò͘, iā kìⁿ-nā kan-hōan ûi-ke̍h ê tāi-chì lóng tú-tio̍h eng-kai siū ê pò-èng;

(BCL) 因為對天使所傳的道理尚且是堅固；也見若干犯違逆的代誌攏抵著應該受的報應。

3

(THR) lán nā hut-lio̍k chiah-nı̍h tōa ê chín-kiù kiám ōe tô-siám mah? Chit ê chín-kiù kì-jiân sī Chú khí-thâu kóng ê, thiaⁿ-kìⁿ ê lâng kan-chèng kàu sı̍t-sı̍t hō͘ lán;

(BCL) 咱若忽略即呢大的拯救，豈會逃閃嗎？此個拯救既然是主起頭講的，聽見的人干證到實實互咱。

4

(THR) koh Siōng-tè ēng chiah ê sîn-jiah, kî-sū, ta̍k hāng ê kôan-lêng kap Sèng Sîn ê siúⁿ-sù, lóng chiàu ka-kī ê chí-ì, kap in saⁿ-kap kan-chèng.

(BCL) 閣上帝用諸個神蹟、奇事、逐項的權能，及聖神的賞賜，攏照家己的旨意，及相及干證。

5

(THR) In-ūi góan só͘ kóng teh lâi ê sè-kài Siōng-tè bē bat hō͘ i hâng-ho̍k tī thiⁿ-sài.

(BCL) 因為阮所講來的世界，上帝未曾互伊降服佇天使。

6

(THR) To̍k-to̍k ū kan-chèng tī bó͘ só͘-chāi ê, kóng, Lâng sī sím-mı̍h, hō͘ lí siàu-liām i? Lâng ê kiáⁿ sī sím-mı̍h, hō͘ lí khòaⁿ-kò͘ i?

(BCL) 獨獨有干證佇某所在的講：人是甚麼，互你數念伊？人的子是甚麼，互你看顧伊？

7

(THR) Lí hō͘ i lio̍h-á khah-su thiⁿ-sài, Koh ēng êng-kng chun-kùi, hō͘ i chòe bián-liû, Koh siat-lı̍p i tī lí ê chhiú só͘ chō ê ê téng-bīn;

(BCL) 你互伊略仔卡輸天使，閣用榮光尊貴，互伊做冕旒，閣設立伊佇你的手所造者的頂面，

8

(THR) Hō͘ bān mı̍h lóng hâng-ho̍k tī i ê kha-ē.I2-keng hō͘ bān mı̍h lóng hâng-ho̍k i, chiū bô chhun chı̍t hāng mı̍h bô hâng-ho̍k i. Chóng-sī kàu taⁿ lán iáu-bē khòaⁿ-kìⁿ bān mı̍h lóng hâng-ho̍k i.

(BCL) 互萬物攏降服佇伊的腳下。已經互萬物攏降服伊，就無剩一項物無降服伊。總是到今咱猶未看見萬物攏降服伊。

9

(THR) To̍k-to̍k khòaⁿ-kìⁿ hit ê lio̍h-á khah-su thiⁿ-sài ê Iâ-so͘, ūi-tio̍h siū sí ê kan-khó͘ tit-tio̍h êng-kng chun-kùi chòe bián-liû, thang tùi Siōng-tè ê un, ūi-tio̍h chèng lâng siū sí.

(BCL) 獨獨看見彼個略仔卡輸天使的耶穌；為著受死的艱苦，得著榮光尊貴做冕旒，通對上帝的恩，為著眾人受死。

10

(THR) In-ūi bān mı̍h só͘ ūi-tio̍h I, bān mı̍h só͘ tùi I ê, teh chhōa chōe-chōe kiáⁿ kàu tī êng-kng, chiū hō͘ kiù in ê siú-léng tùi khó͘-lān lâi chiâⁿ ôan-chôan, pún sī ha̍p-gî.

(BCL) 因為萬物所為著伊、萬物所對伊的，導多多子到佇榮光，就互救的首領，對苦難來成完全，本是合宜。

11

(THR) In-ūi hit ê hō͘ lâng chiâⁿ sèng ê, kap hiah ê tit-tio̍h chiâⁿ sèng ê, lóng tùi chı̍t-ê chhut; só͘-í I chheng in chòe hiaⁿ-tī bô lia̍h chòe kiàn-siàu;

(BCL) 因為彼個互人成聖的及許個得著成聖的，攏對一個出。所以伊稱做兄弟無掠做見誚，

12

(THR) kóng, Góa beh pò-iông lí ê miâ tī góa ê hiaⁿ-tī, O-ló lí tī hōe-tiong.

(BCL) 講：我欲報揚你的名佇我的兄弟，謳咾你佇會中；

13

(THR) Koh kóng, Góa beh óa-khò I.Koh kóng, Khòaⁿ ah! góa kap Siōng-tè só͘ hō͘ góa ê kiáⁿ-jî.

(BCL) 閣講：我欲倚靠伊；閣講：看啊，我及上帝所互我的子兒。

14

(THR) Taⁿ chiah ê kiáⁿ-jî kì-jiân saⁿ-tâng ū huih bah ê thé, I pún-sin ia̍h pîⁿ-pîⁿ ū; beh ēng sí lâi hòe-bô ū sí ê kôan-sè ê, chiū-sī Mô͘-kúi;

(BCL) 今諸個子兒既然相同有血肉的體，伊本身亦平平有，欲用死來廢無有死的權勢的，就是魔鬼，

15

(THR) ia̍h beh hō͘ it-seng kiaⁿ-ùi sí kàu chhin-chhiūⁿ chòe lô͘-châi ê, lóng tit-tio̍h tháu-pàng.

(BCL) 亦欲互一生驚畏死到親像做奴才者，攏得著解放。

16

(THR) In-ūi I bô khan-kiù thiⁿ-sài, sī khan-kiù A-pek-la̍h-hán ê hō͘-è.

(BCL) 因為伊無牽救天使，是牽救亞伯拉罕的後裔。

17

(THR) Só͘-í hōan sū I tio̍h kap hiaⁿ-tī saⁿ-tâng, thang tī Siōng-tè ê sū chòe lîn-bín tiong-sìn ê chè-si-thâu, in-ūi peh-sìⁿ ê chōe hiàn bán-hôe ê chè.

(BCL) 所以，凡事伊著及兄弟相同，通佇上帝的事做憐憫忠信的祭司頭，因為百姓的罪獻挽回的祭。

18

(THR) In-ūi I í-keng siū khó͘ lâi tú-tio̍h chhì, chiū ōe pang-chān chiah ê siū chhì ê lâng.

(BCL) 因為伊已經受苦來抵著試，就會幫助諸個受試的人。

Bible Color Mark

• 台語漢字羅馬本
• 巴克禮全羅