哈該書 第 2 章

1

(THR) Chhit-ge̍h jī-cha̍p-it jı̍t, Iâ-hô-hoa ê ōe thok sian-ti Hap-kai kóng,

(BCL) 七月二十一日，耶和華的話託先知哈該講：

2

(THR) Lí tio̍h kā Iû-tāi ê chóng-tok Sat-la̍h-thiat ê kiáⁿ, Só͘-lô-pa-pek, kap Iok-sat-tap ê kiáⁿ, chè-si-thâu Iok-su-a, í-kı̍p só͘ chhun ê peh-sìⁿ kóng,

(BCL) 「你著給猶大的總督撒拉鐵的子所羅巴伯及約撒答的子祭司頭約書亞，以及所剩的百姓，講：

3

(THR) Lín tiong-kan iáu tī-teh ê lâng, ū chī-chūi bat khòaⁿ-kìⁿ chit keng tiān chiông-chêng ê êng-kng mah? Hiān-chāi lín khòaⁿ-liáu cháiⁿ-iūⁿ ah? kiám-m̄-sī tī lín ê ba̍k-chiu khòaⁿ chhin-chhiūⁿ bô mah?

(BCL) 恁中間猶佇的人，有是誰曾看見此間殿從前的榮光嗎？現在恁看了怎樣啊？豈呣是佇恁的目睭看親像無嗎？」

4

(THR) Iâ-hô-hoa kóng, Só͘-lô-pa-pek ah, lí tio̍h ióng-kám; Iok-sat-tap ê kiáⁿ, chè-si-thâu Iok-su-a ah, lí ia̍h tio̍h ióng-kám; Iâ-hô-hoa koh kóng, Chit só͘-chāi ê peh-sìⁿ ah, lín ia̍h tio̍h ióng-kám, ia̍h tio̍h chòe-kang, in-ūi Góa kap lín tī-teh; che sī bān-kun ê Iâ-hô-hoa kóng--ê.

(BCL) 耶和華講：「所羅巴伯啊，你著勇敢！約撒答的子祭司頭約書亞啊，你亦著勇敢！」耶和華閣講：「此所在的百姓啊，恁亦著勇敢！亦著做工，因為我及恁佇。這是萬軍的耶和華講的。

5

(THR) Tng lín chhut Ai-kı̍p ê sî, Góa kap lín lı̍p iok ê ōe, Góa ê Sîn tiàm-tī lín tiong-kan; lín bo̍h-tit kiaⁿ.

(BCL) 當恁出埃及的時我及恁立約的話。我的神踮佇恁中間，恁莫得驚。」

6

(THR) In-ūi bān-kun ê Iâ-hô-hoa án-ni kóng, Koh bô jōa-kú, Góa beh koh chı̍t-pái tín-tāng thiⁿ kap tōe kap hái kap ta-tōe.

(BCL) 因為萬軍的耶和華按呢講：「閣無偌久，我欲閣一擺振動天、及地、及海，及乾地。

7

(THR) Góa beh tín-tāng bān-kok, bān-kok só͘ him-bō͘--ê beh lâi; Góa chiū hō͘ êng-kng chhiong-móa chit keng tiān; che sī bān-kun ê Iâ-hô-hoa kóng--ê.

(BCL) 我欲振動萬國；萬國所欣慕者欲來，我就互榮光充滿此間殿。這是萬軍的耶和華講的。」

8

(THR) Bān-kun ê Iâ-hô-hoa kóng, Gûn sī Góa--ê, kim ia̍h sī Góa--ê.

(BCL) 萬軍的耶和華講：「銀是我的，金亦是我的。

9

(THR) Chit keng tiān āu-lâi ê êng-kng, beh iâⁿ-kè chêng ê êng-kng; che sī bān-kun ê Iâ-hô-hoa kóng--ê; koh tī chit ê só͘-chāi, Góa beh siúⁿ-sù pêng-an; che sī bān-kun ê Iâ-hô-hoa kóng--ê.

(BCL) 此間殿後來的榮光欲贏過前的榮光；這是萬軍的耶和華講的；閣佇此個所在我欲賞賜平安。這是萬軍的耶和華講的。」

10

(THR) Tāi-lī-o͘ ông jī-nî, káu ge̍h jī-cha̍p-sì jı̍t, Iâ-hô-hoa ê ōe thok sian-ti Hap-kai kóng,

(BCL) 大利烏王二年九月二十四日，耶和華的話託先知哈該講：

11

(THR) Bān-kun ê Iâ-hô-hoa án-ni kóng, Koan-hē tī lu̍t-hoat lí thang mn̄g chè-si,

(BCL) 萬軍的耶和華按呢講：「關係佇律法你通問祭司，

12

(THR) kóng, Siat-sú ū lâng ēng saⁿ-á-ku pau sèng ê bah, chit ê saⁿ-á-ku óa-tio̍h piáⁿ, á-sī thng, á-sī chiú, á-sī iû, á-sī pa̍t-hō chia̍h-mı̍h, chiū chit ê mı̍h chiâⁿ-chòe sèng mah? Chè-si ìn kóng, Bô--lah.

(BCL) 講：設使有人用衫仔裾包聖的肉，此個衫仔裾倚著餅，抑是湯，抑是酒，抑是油，抑是別號食物，就此個物成做聖嗎？」祭司應講：「無啦。」

13

(THR) Hap-kai koh kóng, Siat-sú ū lâng bong--tio̍h sin-si bak lâ-sâm, lâi óa-tio̍h chiah ê mı̍h ê chı̍t-hāng, chit ê mı̍h chiâⁿ-chòe ù-òe mah? Chè-si ìn kóng, Chiâⁿ-chòe ù-òe.

(BCL) 哈該閣講：「設使有人摸著身屍染垃墋，來倚著諸個物的一項，此個物成做污穢嗎？」祭司應講：「成做污穢。」

14

(THR) Hap-kai chiū ìn kóng, Iâ-hô-hoa kóng, Tī Góa ê bīn-chêng, chit ê peh-sìⁿ sī chhin-chhiūⁿ án-ni, chit ê kok iā sī án-ni; in ê chhiú só͘ chòe ta̍k-hō ê kang iā lóng sī án-ni; in tī-chia só͘ hiàn--ê bô chheng-khì.

(BCL) 哈該就應講：「耶和華講：佇我的面前，此個百姓是親像按呢，此個國也是按呢；的手所做逐號的工也攏是按呢；佇遮所獻的無清氣。」

15

(THR) Taⁿ chhiáⁿ lín siūⁿ, chit-jı̍t í-chêng, Iâ-hô-hoa ê tiān iáu-bē ū chio̍h tha̍h tī chio̍h-téng ê sî;

(BCL) 今請恁想，此日以前，耶和華的殿猶未有石褡佇石頂的時。

16

(THR) le̍k-kè hiah ê sî, lâng lâi kàu gō͘-kak-tui, siūⁿ beh tit-tio̍h jī-cha̍p táu, chí-ū cha̍p-táu; ū lâng lâi kàu chiú-khut, siūⁿ beh tit-tio̍h gō͘-cha̍p àng, chí-ū tit-tio̍h jī-cha̍p àng.

(BCL) 歷過許個時，人來到五穀堆，想欲得著二十斗，只有十斗。有人來到酒窟，想欲得著五十甕，只有得著二十甕。

17

(THR) Tī lín ê chhiú só͘-chòe it-chhè ê kang, Góa ēng ko͘-tâ, hiú-nōa, tōa-pha̍uh phah lín, lín iáu-kú bô kui-ǹg Góa; che sī Iâ-hô-hoa kóng--ê.

(BCL) 佇恁的手所做一切的工，我用枯焦、朽爛、大雹拍恁，恁猶久無歸向我，。這是耶和華講的。

18

(THR) Chhiáⁿ lín siūⁿ chit-jı̍t í-chêng, tùi káu-ge̍h jī-sì jı̍t kiàn-lı̍p Iâ-hô-hoa tiān ê tōe-ki ê sî, lín tio̍h siūⁿ i.

(BCL) 請恁想此日以前，對九月二四日，建立耶和華殿的地基的時恁著想伊。

19

(THR) Chhek-chhng iáu ū chéng-chí mah? Phû-tô-chhiū, bû-hoa-kó-chhiū, sia̍h-liû-chhiū, kaⁿ-ná-chhiū, lóng bē ū kiat ké-chí; tùi kin-á-jı̍t khí, Góa beh sù-hok lín.

(BCL) 粟倉猶有種子嗎？葡萄樹、無花果樹、石榴樹、橄欖樹攏未有結果子。對今仔日起，我欲賜福恁。

20

(THR) Hit-ge̍h jī-cha̍p-sì jı̍t, Iâ-hô-hoa ê ōe tē-jī-pái lîm-kàu Hap-kai kóng,

(BCL) 彼月二十四日，耶和華的話第二擺臨到哈該講：

21

(THR) Lí tio̍h kā Iû-tāi ê chóng-tok Só͘-lô-pa-pek kóng, Góa beh tín-tāng thiⁿ kap tōe;

(BCL) 「你著給猶大的總督所羅巴伯講：我欲振動天及地。

22

(THR) Góa beh chhia-tó lia̍t-kok ê pó-chō, tû-bia̍t ta̍k pang-kok ê sè-le̍k, ia̍h beh chhia-tó chiàn-chhia kap chē-chhia--ê, bé kap bé-peng lóng beh tó--lo̍h-khì, ta̍k-ê tùi i ê hiaⁿ-tī ê to lâi sí.

(BCL) 我欲捙倒列國的寶座，除滅逐邦國的勢力，亦欲捙倒戰車及坐車者。馬及馬兵攏欲倒落去，逐個對伊的兄弟的刀來死。

23

(THR) Bān-kun ê Iâ-hô-hoa kóng, Góa ê lô͘-po̍k Sat-la̍h-thiat ê kiáⁿ Só͘-lô-pa-pek ah, tng hit-jı̍t, Góa beh tiàu lí, Iâ-hô-hoa kóng i; koh Góa beh ēng lí chòe chhiú-chí-ìn; in-ūi Góa bat kéng-sóan lí; che sī bān-kun ê Iâ-hô-hoa kóng--ê.

(BCL) 萬軍的耶和華講：我的奴僕撒拉鐵的子所羅巴伯啊，當彼日，我欲召你，耶和華講伊；閣我欲用你做手指印，因為我曾揀選你。這是萬軍的耶和華講的。」

Bible Color Mark

• 台語漢字羅馬本
• 巴克禮全羅