創世記 第 8 章

1

(THR) Siōng-tè kì-tit Ná-a, kap it-chhè ê o̍ah-mı̍h, í-kı̍p kap i tī tōa-chûn it-chhè ê cheng-siⁿ; Siōng-tè hō͘ hong chhe tōe, chúi chiū chiām-chiām siau-sı̍h.

(BCL) 上帝記得挪亞及一切的活物以及及伊佇大船一切的精牲。上帝互風吹地，水就漸漸消失。

2

(THR) Chhim-ian ê chúi-gôan, kap thiⁿ ê khang-khiah, lóng koaiⁿ-ba̍t; thiⁿ-nı̍h ê hō͘ ia̍h soah.

(BCL) 深淵的水源及天的孔隙攏關密，天裡的雨亦息。

3

(THR) Chúi tùi tōe-chiūⁿ tı̍t-tı̍t thè; chı̍t-pah gō͘-cha̍p jı̍t āu, chúi chiū chiām-chiām siau.

(BCL) 水對地上直直退。一百五十日後，水就漸漸消。

4

(THR) Chhit-ge̍h cha̍p chhit jı̍t, chûn khòa tī A-la̍h-lia̍p ê soaⁿ.

(BCL) 七月十七日船靠佇亞拉臘的山。

5

(THR) Chúi koh chiām-chiām siau, tı̍t-tı̍t kàu cha̍p-ge̍h. Cha̍p-ge̍h chhoe-it jı̍t, soaⁿ-thâu chiah chhut-hiān.

(BCL) 水閣漸漸消，直直到十月，十月初一日，山頭才出現。

6

(THR) Kè sì-cha̍p jı̍t, Ná-a khui i só͘ chòe tōa-chûn ê thang-á;

(BCL) 過四十日，挪亞開伊所做大船的窗仔，

7

(THR) pàng chı̍t chiah o͘-a chhut-khì; o͘-a pe-lâi pe-khì, tı̍t-tı̍t kàu tōe-chiūⁿ ê chúi ta.

(BCL) 放一隻烏鴉出去；烏鴉飛來飛去，直直到地上的水乾。

8

(THR) I koh pàng chı̍t chiah chíⁿ-á chhut-khì, beh khòaⁿ chúi tùi tōe-chiūⁿ thè á-bē.

(BCL) 伊閣放一隻鴿仔出去，欲看水對地上退抑未。

9

(THR) Chóng-sī chíⁿ-á chhē bô hioh-kha ê só͘-chāi, chiū tò-tńg lâi tōa-chûn Ná-a hia; in-ūi piàn-tōe-bīn iáu ū chúi; Ná-a chhun-chhiú chih i, lia̍h jı̍p tōa-chûn.

(BCL) 總是鴿仔尋無歇腳的所在，就倒轉來大船挪亞遐，因為遍地面猶有水，挪亞伸手接伊，掠入大船。

10

(THR) I koh thèng-hāu chhit-jı̍t, koh pàng chíⁿ-á chhut tōa-chûn.

(BCL) 伊閣聽候七日，閣放鴿仔出大船。

11

(THR) Kàu ê-hng chíⁿ-á tò-lâi i hia, chhùi kā chı̍t-hio̍h sin ê kaⁿ-ná-hio̍h; Ná-a chiah chai chúi tùi tōe-chiūⁿ thè lah.

(BCL) 到下昏鴿仔倒來伊遐，嘴咬一葉新的橄欖葉，挪亞才知水對地上退啦。

12

(THR) I koh thèng-hāu chhit-jı̍t, pàng chíⁿ-á chhut-khì; chíⁿ-á lóng bô koh tò-lâi.

(BCL) 伊閣聽候七日，放鴿仔出去，鴿仔攏無閣倒來。

13

(THR) Kàu Ná-a la̍k-pah liân chı̍t hè, chiaⁿ-ge̍h chhoe-it jı̍t, tōe-chiūⁿ ê chúi lóng ta; Ná-a chiū hian-khui tōa-chûn ê kòa, lâi khòaⁿ; chiū khòaⁿ-kìⁿ tōe-bīn í-keng ta.

(BCL) 到挪亞六百連一歲，正月初一日，地上的水攏乾。挪亞就掀開大船的蓋來看，就看見地面已經乾。

14

(THR) Jī-ge̍h jī-chhit-jı̍t, thô͘-tōe lóng ta.

(BCL) 二月二七日，土地攏乾。

15

(THR) Siōng-tè tùi Ná-a kóng,

(BCL) 上帝對挪亞講：

16

(THR) Lí kap lí ê bó͘, lí ê kiáⁿ, lí ê sim-pū, lóng tio̍h chhut tōa-chûn.

(BCL) 「你及你的某、你的子、你的媳婦攏著出大船。

17

(THR) Tī lí hia kìⁿ-ū jio̍k-thé ê o̍ah-mı̍h, chiū-sī pe-chiáu, cheng-siⁿ, kap it-chhè sô tī tōe-chiūⁿ ê thâng-thōa, lóng tio̍h tòa in chhut; hō͘ in heng-ōng tī tōe-nı̍h, siⁿ-thòaⁿ chin-chōe.

(BCL) 佇你遐見有肉體的活物，就是飛鳥、精牲，及一切趖佇地上的蟲，攏著帶出，互興旺佇地裡，生湠真多。」

18

(THR) Tùi hit-tia̍p Ná-a kap i ê kiáⁿ, i ê bó͘, i ê sim-pū, lóng chhut-lâi.

(BCL) 對彼霎挪亞及伊的子、伊的某、伊的媳婦攏出來。

19

(THR) It-chhè ê cháu-siù, it-chhè ê thâng-thōa, it-chhè ê pe-chiáu, kìⁿ-nā tōe-chiūⁿ só͘ ū ê tōng-bu̍t, kok chiàu i ê cho̍k-lūi, ia̍h lóng chhut tōa-chûn.

(BCL) 一切的走獸、一切的蟲、一切的飛鳥，見若地上所有的動物，各照伊的族類，亦攏出大船。

20

(THR) Ná-a ūi-tio̍h Iâ-hô-hoa khí chı̍t chō tôaⁿ; tùi ta̍k-iūⁿ chheng-khì ê cheng-siⁿ, ta̍k-iūⁿ chheng-khì ê pe-chiáu, chhú lâi hiàn tī tôaⁿ-téng chòe sio-chè.

(BCL) 挪亞為著耶和華起一座壇，對逐樣清氣的精牲，逐樣清氣的飛鳥取來獻佇壇頂做燒祭。

21

(THR) Iâ-hô-hoa phīⁿ i ê phang-bī; Iâ-hô-hoa sim-lāi chiū kóng, Góa bô koh in-ūi lâng ê iân-kò͘ chiù-chó͘ tōe, in-ūi lâng tùi sòe-hàn ê sî, sim só͘ siūⁿ chiū pháiⁿ; Góa bô beh chiàu Góa só͘ ū kiâⁿ-ê, koh bia̍t kok-chéng ê o̍ah-mı̍h.

(BCL) 耶和華鼻伊的芳味，耶和華心內就講：「我無閣因為人的緣故咒詛地（因為人對細漢的時心所想就歹），我無欲照我所有行的閣滅各種的活物。

22

(THR) Tōe iáu tī-teh ê sî, chai-chèng siu-sêng, kôaⁿ jo̍ah, tang-thiⁿ, hē-thiⁿ, jı̍t mî, lóng bô hioh.

(BCL) 地猶佇的時，栽種收成、寒熱、冬天夏天、日暝攏無歇。

Bible Color Mark

• 台語漢字羅馬本
• 巴克禮全羅