創世記 第 50 章

1

(THR) Iok-sek phak tī i ê lāu-pē ê bīn, thî-khàu, chim-i.

(BCL) 約瑟仆佇伊的老父的面啼哭，唚伊。

2

(THR) Iok-sek hoan-hù su-hāu i ê i-seng, ēng hiuⁿ-liāu kòan i ê lāu-pē; i-seng chiū ēng hiuⁿ-liāu kòan Í-sek-lia̍t.

(BCL) 約瑟吩咐伺候伊的醫生用香料灌伊的老父，醫生就用香料灌以色列。

3

(THR) Kòan sin-si tiāⁿ-tio̍h ê lē tio̍h sì-cha̍p jı̍t; hit ê sì-cha̍p jı̍t móa, koh Ai-kı̍p lâng ūi i thî-khàu chhit-cha̍p jı̍t.

(BCL) 灌身屍定著的例著四十日；彼個四十日滿，閣埃及人為伊啼哭七十日。

4

(THR) Ūi-tio̍h i thî-khàu ê jı̍t í-keng kè, Iok-sek tùi Hoat-ló ke-lāi ê lâng kóng, Góa nā tī lín ê bīn-chêng tit-tio̍h un-tián, chhiáⁿ lín thong-ti Hoat-ló, kā i kóng,

(BCL) 為著伊啼哭的日已經過，約瑟對法老家內的人講：「我若佇恁的面前得著恩典，請恁通知法老給伊講：

5

(THR) Góa ê lāu-pē kah góa chiù-chōa kóng, Góa beh sí lah, lí tio̍h chiong góa bâi-chòng tī Ka-lâm tōe, tī góa ūi pún-sin só͘ ku̍t ê bōng; taⁿ kiû lí chún góa chiūⁿ-khì bâi-chòng góa ê lāu-pē, jiân-āu góa beh tò-tńg-lâi.

(BCL) 『我的老父教我咒誓講：我欲死啦，你著將我埋葬佇迦南地，佇我為本身所掘的墓。』今求你准我上去埋葬我的老父，然後我欲倒轉來。」

6

(THR) Hoat-ló kóng, Lí thang chiūⁿ-khì bâi-chòng lí ê lāu-pē, chiàu i só͘ kah lí chiù ê chōa.

(BCL) 法老講：「你通上去，埋葬你的老父照伊所教你咒的誓。」

7

(THR) Tùi án-ni Iok-sek chiūⁿ-khì bâi-chòng i ê lāu-pē; kap i saⁿ-kap chiūⁿ-khì ê, ū Hoat-ló ê chèng jîn-sîn, kap Hoat-ló ke-lāi ê tióng-ló, kap Ai-kı̍p kok chèng tióng-ló.

(BCL) 對按呢約瑟上去埋葬伊的老父及伊相及上去的，有法老的眾人臣及法老家內的長老，及埃及國眾長老，

8

(THR) Koh ū Iok-sek chôan-ke, kap i hiah ê hiaⁿ-tī, í-kı̍p i ê lāu-pē ê ke-kòan; chí-ū in ê gín-á, kap iûⁿ-kûn gû-kûn, lóng lâu tī Ko-san tōe.

(BCL) 閣有約瑟全家及伊許個兄弟，以及伊的老父的家眷；只有的囝仔，及羊群牛群，攏留佇歌珊地。

9

(THR) Koh ū chhia kap khiâ-bé-ê, hit-tīn ê lâng put-chí chōe.

(BCL) 閣有車及騎馬者，彼陣的人不止多。

10

(THR) In kàu Iok-tàn hô gōa, A-ta̍t ê gō͘-kak-tiûⁿ, chiū tī-hia tōa thî-khàu, tōa ai-siong; Iok-sek ūi-tio̍h lāu-pē pi-ai chhit-jı̍t.

(BCL) 到約但河外，亞達的五穀場，就佇遐大啼哭大哀傷。約瑟為著老父悲哀七日。

11

(THR) Ka-lâm tōe khiā-khí ê peh-sìⁿ khòaⁿ-kìⁿ A-ta̍t gō͘-kak-tiûⁿ ê thî-khàu, chiū kóng, Che sī Ai-kı̍p lâng chı̍t-tiûⁿ ê tōa thî-khàu; in-ūi án-ni, hit ê tōe miâ kiò A-pek-be̍k-se, sī tī Iok-tàn hô gōa.

(BCL) 迦南地徛起的百姓看見亞達五穀場的啼哭，就講：「這是埃及人一場的大啼哭。」因為按呢彼個地名叫亞伯麥西，是佇約但河外。

12

(THR) Ngá-kok hiah ê kiáⁿ chiū chiàu lāu-pē só͘ hoan-hù-ê kā i chòe;

(BCL) 雅各許個子就照老父所吩咐的給伊做，

13

(THR) hiah ê kiáⁿ chiong i ūn kàu Ka-lâm tōe, bâi-chòng tī Bān-lī ê thâu-chêng, Be̍k-pí-la̍h chhân-nı̍h ê hia̍t, hit ê hia̍t kap chhân sī A-pek-la̍h-hán tùi Hek-lâng Í-hut-lûn bóe chòe gia̍p, lâi chòe bōng-tōe ê.

(BCL) 許個子將伊運到迦南地，埋葬佇幔利的頭前、麥比拉田裡的穴；彼個穴及田是亞伯拉罕對赫人以弗崙買做業，來做墓地的。

14

(THR) Iok-sek bâi-chòng in lāu-pē í-āu, chiū kap chèng hiaⁿ-tī, í-kı̍p it-chhè kap i chiūⁿ-khì bâi-chòng in lāu-pē ê lâng, lóng tò-tńg Ai-kı̍p.

(BCL) 約瑟埋葬老父以後，就及眾兄弟，以及一切及伊上去埋葬老父的人，攏倒轉埃及。

15

(THR) Iok-sek hiah ê hiaⁿ khòaⁿ in lāu-pē í-keng sí, chiū kóng, Kiám-chhái Iok-sek beh òan-hūn lán, chiàu lán chêng khóan-thāi i lóng-chóng ê pháiⁿ, it-chīn pò-èng lán.

(BCL) 約瑟許個兄看老父已經死，就講：「豈採約瑟欲怨恨咱，照咱前款待伊攏總的歹一盡報應咱。」

16

(THR) In chiū thok lâng khì kìⁿ Iok-sek kóng, Lí ê lāu-pē bē sí ê tāi-seng, hoan-hù kóng,

(BCL) 就託人去見約瑟，講：「你的老父未死的代先，吩咐講：

17

(THR) Lín tio̍h tùi Iok-sek án-ni kóng, Chêng lí chiah ê hiaⁿ pháiⁿ khóan-thāi lí, kiû lí sià-bián in ê kè-sit kap chōe-ok; taⁿ kiû lí sià-bián lí ê lāu-pē ê Siōng-tè ê lô͘-po̍k ê kè-sit. In tùi Iok-sek kóng chiah ê ōe, Iok-sek chiū thî-khàu.

(BCL) 『恁著對約瑟按呢講，前你諸個兄歹款待你，求你赦免的過失及罪惡。』今求你赦免你的老父的上帝的奴僕的過失。」對約瑟講諸個話，約瑟就啼哭。

18

(THR) I chiah ê hiaⁿ koh lâi phak tī i bīn-chêng kóng, Góan sī lí ê lô͘-po̍k.

(BCL) 伊諸個兄閣來仆佇伊面前，講：「阮是你的奴僕。」

19

(THR) Iok-sek kā in kóng, M̄-bián kiaⁿ; góa kiám thòe Siōng-tè mah?

(BCL) 約瑟給講：「呣免驚，我豈替上帝嗎？

20

(THR) Chêng lín ê ì-sù sī pháiⁿ, chóng-sī Siōng-tè ê ì-sù sī hó; beh pó-chôan chōe-chōe lâng ê sìⁿ-miā, chhin-chhiūⁿ kin-á-jı̍t.

(BCL) 前恁的意思是歹，總是上帝的意思是好，欲保全多多人的生命，親像今仔日。

21

(THR) Taⁿ lín m̄-bián kiaⁿ; góa beh iúⁿ-chhī lín, kap lín ê kiáⁿ-jî. Tùi án-ni Iok-sek ēng chhin-ài ê ōe an-ùi in.

(BCL) 今恁呣免驚，我欲養飼恁及恁的子兒。」對按呢約瑟用親愛的話安慰。

22

(THR) Iok-sek kap in lāu-pē ê ke-kòan lóng tiàm Ai-kı̍p; Iok-sek chia̍h pah-it hè.

(BCL) 約瑟及老父的家眷攏　埃及。約瑟食百一歲。

23

(THR) Iok-sek tit-tio̍h khòaⁿ-kìⁿ Í-hoat-liân tē-saⁿ tāi ê sun; Má-ná-se ê sun Má-kiat ê kiáⁿ, Iok-sek ia̍h phō in tī kha-thâu-u.

(BCL) 約瑟得著看見以法蓮第三代的孫。瑪拿西的孫、瑪吉的子約瑟亦抱佇腳頭窩。

24

(THR) Iok-sek tùi i ê hiaⁿ-tī kóng, Góa beh sí lah; chóng-sī Siōng-tè tek-khak khòaⁿ-kò͘ lín, chhōa lín tùi chit só͘-chāi chiūⁿ-khì, kàu I chiù-chōa èng-ún hō͘ A-pek-la̍h-hán, Í-sat, Ngá-kok ê tōe.

(BCL) 約瑟對伊的兄弟講：「我欲死啦，總是上帝的確看顧恁，導恁對此所在上去，到伊咒誓應允互亞伯拉罕、以撒、雅各的地。」

25

(THR) Iok-sek kah Í-sek-lia̍t ê kiáⁿ-sun chiù-chōa kóng, Siōng-tè tek-khak chiàu-kò͘ lín, lín tio̍h chiong góa ê kut-thâu ūn-chiūⁿ-khì. Iok-sek sí, tú-á pah-it hè; lâng ēng hiuⁿ-liāu kā i kòan; chiong i siu-lo̍h koan, thêng tī Ai-kı̍p.53

(BCL) 約瑟教以色列的子孫咒誓講：「上帝的確照顧恁；恁著將我的骨頭運上去。」

26

(THR) 約瑟死，抵仔百一歲。人用香料給伊灌，將伊收落棺，停佇埃及。

Bible Color Mark

• 台語漢字羅馬本
• 巴克禮全羅