創世記 第 40 章

1

(THR) Chiah ê tāi-chì í-āu, Ai-kı̍p ông ê chiú-chèng kap tû-pâng tek-chōe in ê chú Ai-kı̍p ông.

(BCL) 諸個代誌以後，埃及王的酒政及廚房得罪的主──埃及王，

2

(THR) Hoat-ló siū-khì i nn̄g ê jîn-sîn, chiū-sī chiú-chèng-tiúⁿ kap tû-pâng-tiúⁿ,

(BCL) 法老受氣伊二個人臣就是酒政長及廚房長，

3

(THR) chiong in koaiⁿ tī sī-ōe-tiúⁿ hú-lāi ê kaⁿ, chiū-sī Iok-sek siū koaiⁿ ê só͘-chāi.

(BCL) 將關佇侍衛長府內的監，就是約瑟受關的所在。

4

(THR) Sī -ōe-tiúⁿ chiong in kau-tài Iok-sek, i chiū su-hāu in; in chiū tī kaⁿ-lāi ū hiah-kú.

(BCL) 侍衛長將交代約瑟，伊就伺候；就佇監內有許久。

5

(THR) Siū-koaiⁿ tī kaⁿ-ê, Ai-kı̍p ông ê chiú-chèng kap tû-pâng, nn̄g-lâng tâng chı̍t-mî kok bāng-kìⁿ chı̍t ê bāng, lóng chiàu ta̍k ê bāng ê ì-gī lâi bāng.

(BCL) 受關佇監的埃及王的酒政及廚房二人同一暝各夢見一個夢，攏照逐個夢的意義來夢。

6

(THR) Kàu thiⁿ-kng, Iok-sek jı̍p-khì in hia, khòaⁿ-kìⁿ in ū iu-būn ê khóan-sit.

(BCL) 到天光，約瑟入去遐，看見有憂悶的款式。

7

(THR) I chiū mn̄g Hoat-ló nn̄g ê jîn-sîn, chiū-sī kap i pîⁿ-pîⁿ koaiⁿ tī chú-lâng hú-lāi-ê, kóng, Kin-á-jı̍t lín siáⁿ-sū bīn tài-iu-iông?

(BCL) 伊就問法老二個人臣，就是及伊平平關佇主人府內者，講：「今仔日恁啥事面帶憂容？」

8

(THR) In kā i kóng, Góan ta̍k-lâng bāng-kìⁿ chı̍t ê bāng, bô lâng thang ôan. Iok-sek kā in kóng, Ôan-bāng kiám-m̄-sī chāi tī Siōng-tè mah? chhiáⁿ lín kā góa kóng.

(BCL) 給伊講：「阮逐人夢見一個夢，無人通圓。」約瑟給講：「圓夢豈呣是在佇上帝嗎？請恁給我講。」

9

(THR) Chiú-chèng chiū tùi Iok-sek pâi-lia̍t i ê bāng, kóng, Góa bāng-tiong khòaⁿ-kìⁿ ū chı̍t châng phû-tô-chhiū tī góa ê bīn-chêng;

(BCL) 酒政就對約瑟排列伊的夢講：「我夢中看見有一欉葡萄樹佇我的面前，

10

(THR) chhiū-téng ū saⁿ-ki, chhin-chhiūⁿ ū hoat-gê khui-hoe; i ê pha kiat-chiâⁿ se̍k ê phû-tô.

(BCL) 樹頂有三枝，親像有發芽開花，伊的葩結成熟的葡萄。

11

(THR) Hoat-ló ê poe tī góa ê chhiú-lāi, góa chiū the̍h phû-tô, nı̍h i tī Hoat-ló ê poe-lāi, chiong poe phâng kau Hoat-ló ê chhiú.

(BCL) 法老的杯佇我的手內，我就提葡萄勒伊佇法老的杯內，將杯捧交法老的手。」

12

(THR) Iok-sek kā i kóng, Lí ê bāng sī án-ni ôan; saⁿ-ki chiū-sī saⁿ-jı̍t;

(BCL) 約瑟給伊講：「你的夢是按呢圓：三枝就是三日；

13

(THR) koh saⁿ-jı̍t, Hoat-ló beh kú-khí lí ê thâu, ho̍k-tò lí ê koaⁿ-chit; Hoat-ló ê chiú-poe beh iû-gôan hē tī lí ê chhiú, chhin-chhiūⁿ chêng chòe i ê chiú-chèng chı̍t-iūⁿ.

(BCL) 閣三日，法老欲舉起你的頭，復倒你的官職，法老的酒杯欲猶原下佇你的手，親像前做伊的酒政一樣。

14

(THR) Lí nā tek-chì ê sî, tio̍h kì-liām góa, si-un hō͘ góa; tī Hoat-ló ê bīn-chêng thòe góa kóng chı̍t siaⁿ; kiù góa chhut chit ê kaⁿ.

(BCL) 你若得志的時，著記念我，施恩互我，佇法老的面前替我講一聲，救我出此個監，

15

(THR) Góa sı̍t-chāi sī tùi Hi-pek-lâi lâng ê tōe siū-bōe-lâi-ê; góa tī-chia ia̍h bô chòe-chhut sím-mı̍h, hō͘ in kā góa koaiⁿ-lo̍h kaⁿ.

(BCL) 我實在是對希伯來人的地受賣來的；我佇遮亦無做出甚麼；互給我關落監。」

16

(THR) Tû-pâng khòaⁿ-kìⁿ bāng ôan-liáu hó, chiū kā Iok-sek kóng, Góa ia̍h tī góa ê bāng-tiong khòaⁿ, tī góa ê thâu-khak-téng ū saⁿ-kheng pek ê piáⁿ;

(BCL) 廚房看見夢圓了好，就給約瑟講：「我亦佇我的夢中看佇我的頭殼頂有三筐的餅；

17

(THR) téng-bīn hit-kheng ū tóe Hoat-ló só͘ chia̍h ta̍k-hō pek ê mı̍h; ū chiáu lâi teh góa thâu-khak-téng kheng-lāi ê mı̍h.

(BCL) 頂面彼筐有貯法老所食逐號的物，有鳥來啄我頭殼頂筐內的物。」

18

(THR) Iok-sek ìn i kóng, Lí ê bāng sī án-ni ôan; saⁿ khia kheng sī saⁿ-jı̍t;

(BCL) 約瑟應伊講：「你的夢是按呢圓：三奇筐是三日；

19

(THR) koh saⁿ-jı̍t, Hoat-ló beh kú-khí lí ê thâu-khak lī-khui lí, tiàu lí tī chhâ-nı̍h; beh ū pe-chiáu lâi teh lí sin-khu ê bah.

(BCL) 閣三日，法老欲舉起你的頭殼離開你，吊你佇柴裡，欲有飛鳥來啄你身軀的肉。」

20

(THR) Kàu tē-saⁿ jı̍t, sī Hoat-ló ê siⁿ-jı̍t, i ūi chèng jîn-sîn pâi-siat iân-sia̍h; tī chiah ê jîn-sîn ê tiong-kan, thâi-kú chiú-chèng kap tû-pâng;

(BCL) 到第三日，是法老的生日，伊為眾人臣排設筵席，佇諸個人臣的中間，抬舉酒政及廚房，

21

(THR) hō͘ chiú-chèng-tiúⁿ ho̍k-tò koaⁿ-chit; i iû-gôan phâng-poe tī Hoat-ló ê chhiú;

(BCL) 互酒政長復倒官職，伊猶原捧杯佇法老的手；

22

(THR) chóng-sī chiong tû-pâng-thâu tiàu-khí-lâi; tú-tú chiàu Iok-sek só͘ kā in ôan-ê.

(BCL) 總是將廚房頭吊起來，抵抵照約瑟所給圓的。

23

(THR) Nā-sī chiú-chèng-tiúⁿ bô liām-tio̍h Iok-sek, kéng-jiân bōe-kì-tit i.

(BCL) 若是酒政長無念著約瑟，竟然記得伊。

Bible Color Mark

• 台語漢字羅馬本
• 巴克禮全羅