創世記 第 38 章

1

(THR) Hit-sî Iû-tāi lī-khui i ê hiaⁿ-tī, lo̍h-khì kàu chı̍t ê A-tō͘-lân lâng, miâ chòe Hi-la̍h ê ke;

(BCL) 彼時，猶大離開伊的兄弟，落去到一個亞杜蘭人名做希拉的家。

2

(THR) Iû-tāi tī-hia khòaⁿ-kìⁿ chı̍t ê Ka-lâm lâng, miâ-kiò Su-a ê cha-bó͘-kiáⁿ; chiū chhōa i, kap i tâng-pâng.

(BCL) 猶大佇遐看見一個迦南人名叫書亞的查某子，就娶伊，及伊同房，

3

(THR) I chiū hôai-īn siⁿ-kiáⁿ; Iû-tāi chiū kā i hō miâ chòe Jíⁿ.

(BCL) 伊就懷孕生子，猶大就給伊號名做珥。

4

(THR) I koh hôai-īn siⁿ-kiáⁿ; lāu-bú kā i hō miâ Gô-lâm.

(BCL) 伊閣懷孕生子，老母給伊號名俄南。

5

(THR) I iū-koh siⁿ-kiáⁿ, kā i hō-miâ Sī-la̍h; i siⁿ Sī-la̍h ê sî, Iû-tāi tú-á tī Ki-sek.

(BCL) 伊又閣生子，給伊號名示拉。伊生示拉的時，猶大抵仔佇基悉。

6

(THR) Iû-tāi kā i ê tōa-kiáⁿ Jíⁿ chhōa-bó͘, miâ-kiò Tha-má.

(BCL) 猶大給伊的大子珥娶某，名叫她瑪。

7

(THR) Iû-tāi ê tōa-kiáⁿ Jíⁿ kiâⁿ-pháiⁿ tī Iâ-hô-hoa ê bīn-chêng; Iâ-hô-hoa chiū hō͘ i sí.

(BCL) 猶大的大子珥行歹佇耶和華的面前，耶和華就互伊死。

8

(THR) Iû-tāi kā Gô-lâm kóng, Lí tio̍h kap lí ê hiaⁿ-só tâng-pâng, tùi i lâi chīn lí chòe sió-tī ê pún-hūn, kā lí ê hiaⁿ lı̍p hō͘-sû.

(BCL) 猶大給俄南講：「你著及你的兄嫂同房，對伊來盡你做小弟的本份，給你的兄立後嗣。」

9

(THR) Gô-lâm chai só͘ siⁿ ê kiáⁿ bô kui tī i ka-kī; só͘-í tâng-pâng ê sî, ûi-siat tī tōe-nı̍h, bián-tit hō͘ i ê hiaⁿ ū hō͘-sû.

(BCL) 俄南知所生的子無歸佇伊家己，所以同房的時，遺泄佇地裡，免得互伊的兄有後嗣。

10

(THR) I ê só͘-chòe, Iâ-hô-hoa khòaⁿ chòe pháiⁿ; hō͘ i iā sí.

(BCL) 伊的所做，耶和華看做歹，互伊亦死。

11

(THR) Iû-tāi sim-lāi kóng, Kiaⁿ-liáu Sī-la̍h ia̍h sí, chhin-chhiūⁿ i nn̄g ê hiaⁿ chı̍t-iūⁿ; chiū tùi i ê sim-pū Tha-má kóng, Lí khì tòa lín lāu-pē ê ke chiú-kóaⁿ, thèng-hāu góa ê kiáⁿ Sī-la̍h tióng-sêng. Tha-má chiū tò-khì, tòa tī in lāu-pē ê ke.

(BCL) 猶大心內講：「驚了示拉亦死，親像伊二個兄一樣。」就對伊的媳婦她瑪講：「你去，住恁老父的家守寡，聽候我的子示拉長成。」她瑪就倒去，住佇老父的家。

12

(THR) Kè kú-kú, Iû-tāi ê bó͘ Su-a ê cha-bó͘-kiáⁿ sí; Iû-tāi siū an-ùi; chiū kap i ê pêng-iú A-tō͘-lân lâng Hi-la̍h chiūⁿ-khì Têng-ná, kàu i chián iûⁿ-mn̂g ê lâng hia.

(BCL) 過久久，猶大的某書亞的查某子死。猶大受安慰，就及伊的朋友亞杜蘭人希拉上去亭拿，到伊剪羊毛的人遐。

13

(THR) Ū lâng kā Tha-má kóng, Lín ta-koaⁿ chiūⁿ-khì Têng-ná, chián i ê iûⁿ ê mn̂g.

(BCL) 有人給她瑪講：「恁乾官上去亭拿剪伊的羊的毛。」

14

(THR) Tha-má khòaⁿ-kìⁿ Sī-la̍h í-keng tióng-sêng, iáu bô chhōa i chòe-bó͘; chiū thǹg i chiú-kóaⁿ ê saⁿ, ēng phè tà-bīn, koh moa sin-thé; chē tī Têng-ná ê lō͘, I-ná-ìn mn̂g-kháu.

(BCL) 她瑪看見示拉已經長成，猶無娶伊做某，就褪伊守寡的衫，用帕罩面，閣身體，坐佇亭拿的路伊拿印門口。

15

(THR) Iû-tāi khòaⁿ-kìⁿ i, lia̍h-chòe sī chhiong-ki, in-ūi i ū tà-bīn.

(BCL) 猶大看見伊，掠做是娼妓，因為伊有罩面。

16

(THR) Chiū oat-khì lō͘-piⁿ chiū-kūn i; kóng, Lâi, hō͘ góa kap lí saⁿ-kap khùn; in-ūi m̄-chai sī i ê sim-pū; ìn kóng, Lí beh kap góa khùn, beh ēng sím-mı̍h hō͘ góa?

(BCL) 就越去路邊就近伊，講：「來！互我及你相及睏。」因為呣知是伊的媳婦。應講：「你欲及我睏，欲用甚麼互我？」

17

(THR) Iû-tāi kóng, Góa tùi iûⁿ-kûn-lāi lia̍h chı̍t chiah soaⁿ-iûⁿ-á, kià-lâi hō͘ lí. Kóng, Lí beh ēng mı̍h hō͘ góa chòe chún-tǹg, thèng-hāu lí kià-lâi mah?

(BCL) 猶大講：「我對羊群內掠一隻山羊仔，寄來互你。」講：「你欲用物互我做準當，聽候你寄來嗎？」

18

(THR) Iû-tāi kóng, Góa tio̍h sím-mı̍h hō͘ lí chòe chún-tǹg? I chiū kóng, Lí ê ìn, lí ê tòa, kap lí chhiú-nı̍h ê kóaiⁿ-á; chiū hō͘ i, kap i khùn; i chiū tùi Iû-tāi hôai-īn.

(BCL) 猶大講：「我著甚麼互你做準當？」伊就講：「你的印、你的帶，及你手裡的枴仔。」就互伊，及伊睏，伊就對猶大懷孕。

19

(THR) Tha-má khí-lâi khì; thǹg i ê phè, iû-gôan chhēng i chiú-kóaⁿ ê saⁿ.

(BCL) 她瑪起來去，褪伊的帕，猶原穿伊守寡的衫。

20

(THR) Iû-tāi thok i ê pêng-iú A-tō͘-lân lâng sàng chı̍t chiah soaⁿ-iûⁿ-á, beh tùi hit ê hū-jîn-lâng ê chhiú the̍h chún-tǹg; chhē i bōe tio̍h.

(BCL) 猶大託伊的朋友亞杜蘭人送一隻山羊仔，欲對彼個婦仁人的手提準當，尋伊著，

21

(THR) Chiū mn̄g hit só͘-chāi ê lâng kóng, I-ná-ìn lō͘-piⁿ ê chhiong-ki tī tah-lo̍h? in kóng, chit-ūi bô chhiong-ki.

(BCL) 就問彼所在的人講：「伊拿印路邊的娼妓佇叨落？」講：「此位無娼妓。」

22

(THR) I tò-khì kìⁿ Iû-tāi kóng, Góa chhē i bô; hit-ūi ê lâng ia̍h kóng, Chit-ūi bô chhiong-ki.

(BCL) 伊倒去見猶大講：「我尋伊無，彼位的人亦講：『此位無娼妓。』」

23

(THR) Iû-tāi kóng, Kù-chāi i the̍h-khì, bián-tit lán kiàn-siàu; lí khòaⁿ, góa í-keng chiong chit chiah soaⁿ-iûⁿ-á sàng i, lí kéng-jiân chhē i bô.

(BCL) 猶大講：「據在伊提去，免得咱見誚。你看，我已經將此隻山羊仔送伊，你竟然尋伊無。」

24

(THR) Iok-lio̍k kè saⁿ-ge̍h-jı̍t, ū lâng kā Iû-tāi kóng, Lí ê sim-pū Tha-má chòe chhiong-ki; koh in-ūi kiâⁿ-îm, sòa ū sin-īn. Iû-tāi kóng, Kā i thoa-chhut-lâi sio.

(BCL) 約略過三月日，有人給猶大講：「你的媳婦她瑪做娼妓，閣因為行淫續有娠孕。」猶大講：「給伊拖出來燒！」

25

(THR) Tha-má hō͘ lâng thoa-chhut-lâi ê sî, chiū chhe lâng khì kìⁿ i ê ta-koaⁿ kóng, Chiah ê mı̍h sī chī-chūi ê, góa chiū-sī tùi i lâi hôai-īn.

(BCL) 她瑪互人拖出來的時就差人去見伊乾官講：「諸個物是是誰的，我就是對伊來懷孕。」閣講：「請你認，看此個印及帶及枴仔是是誰的？」

26

(THR) Koh kóng, Chhiáⁿ lí jīn, khòaⁿ chit ê ìn kap tòa kap kóaiⁿ-á sī chī-chūi ê. Iû-tāi jīn-tit, chiū kóng, I pí góa khah ū-gī; in-ūi góa bô chiong i kè hō͘ góa ê kiáⁿ Sī-la̍h; tùi hit-tia̍p Iû-tāi bô koh chhin-kūn i.

(BCL) 猶大認得就講：「伊比我卡有義，因為我無將伊嫁互我的子示拉。」對彼霎猶大無閣親近伊。

27

(THR) Tha-má tit-beh siⁿ ê sî, chai i pak-tó͘-lāi sī siang-ê.

(BCL) 她瑪得欲生的時，知伊腹肚內是雙個。

28

(THR) Teh siⁿ ê sî, chı̍t ê gín-á chhun chı̍t ki chhiú chhut-lâi; khioh-chiá the̍h âng-sòaⁿ pa̍k tī i ê chhiú kóng, Chit-ê sī tāi-seng chhut-ê.

(BCL) 生的時，一個囝仔伸一支手出來；拾姐提紅線縛佇伊的手，講：「此個是代先出的。」

29

(THR) Āu-lâi i ê chhiú kiu-jı̍p-khì; tē-jī-ê chhut-sì; khioh-chiá kóng, Lí siáⁿ-sū chông-chhut-lâi? chit ê piak-phòa sī ūi-tio̍h lí; só͘-í kā i hō-miâ chòe Hoat-le̍k-su.

(BCL) 後來伊的手勼入去，第二個出世；拾姐講：「你啥事出來？」此個爆破是為著你，所以給伊號名做法勒斯。

30

(THR) Āu-lâi hit-ê, chhiú pa̍k âng-sòaⁿ-ê, ia̍h siⁿ-chhut-lâi; chiū hō i ê miâ chòe Siā-la̍h.

(BCL) 後來，彼個手縛紅線的亦生出來，就號伊的名做謝拉。

Bible Color Mark

• 台語漢字羅馬本
• 巴克禮全羅