創世記 第 33 章

1

(THR) Ngá-kok kia̍h-ba̍k khòaⁿ, khòaⁿ-kìⁿ Í-sò lâi; koh ū sì-pah lâng kap i lâi. I chiū chiong hiah ê gín-á pun-khui, kau hō͘ Lī-a, kau hō͘ La̍h-kiat, kau hō͘ nn̄g ê lú-pī.

(BCL) 雅各抬目看，看見以掃來，閣有四百人及伊來，伊就將許個囝仔分開交互利亞，交互拉結，交互二個女婢，

2

(THR) Chiong lú-pī kap in ê kiáⁿ pâi tī thâu-chêng, Lī-a kap i ê kiáⁿ pâi tī āu-bīn, La̍h-kiat kap Iok-sek pâi tī lō͘-bé.

(BCL) 將女婢及的子排佇頭前，利亞及伊的子排佇後面，拉結及約瑟排佇路尾。

3

(THR) I pún-sin tī in ê thâu-chêng kè-khì, liân-liân chhit-pái phak tī tōe-nı̍h, chiah óa-kūn i ê hiaⁿ.

(BCL) 伊本身佇的頭前過去，連連七擺仆佇地裡才倚近伊的兄。

4

(THR) Í-sò cháu-lâi ngiâ-chih i, chiong i phō-teh, koh lám i ê ām-kún, chim i; nn̄g-lâng chiū thî-khàu.

(BCL) 以掃走來迎接伊，將伊抱，閣攬伊的頷頸，唚伊，二人就啼哭。

5

(THR) Í-sò kia̍h-ba̍k khòaⁿ-kìⁿ hū-jîn-lâng kap gín-á, chiū kóng, Chiah-ê kap lí tâng-kiâⁿ-ê sī chī-chūi? Ngá-kok kóng, Chiah ê gín-á sī Siōng-tè si-un hō͘ lí ê lô͘-po̍k-ê.

(BCL) 以掃抬目看見婦仁人及囝仔，就講：「諸個及你同行者是是誰？」雅各講：「諸個囝仔是上帝施恩互你的奴僕的。」

6

(THR) Tùi hit-tia̍p nn̄g ê lú-pī, kap in ê gín-á, chìn-chêng lâi pài.

(BCL) 對彼霎二個女婢及的囝仔進前來拜；

7

(THR) Lī-a kap i ê gín-á ia̍h chìn-chêng lâi pài; lō͘-bé Iok-sek kap La̍h-kiat ia̍h chìn-chêng lâi pài.

(BCL) 利亞及伊的囝仔亦進前來拜；路尾約瑟及拉結亦進前來拜。

8

(THR) Í-sò kóng, Góa só͘ tú-tio̍h kui-kûn ê cheng-siⁿ, lí sī sím-mı̍h ì-sù? Ngá-kok kóng, Sī beh tī góa ê chú ê bīn-chêng tit-tio̍h un-tián.

(BCL) 以掃講：「我所抵著歸群的精牲，你是甚麼意思？」雅各講：「是欲佇我的主的面前得著恩典。」

9

(THR) Í-sò kóng, Sió-tī ah, góa-ê í-keng kàu-gia̍h, lí-ê iû-gôan kui lí.

(BCL) 以掃講：「小弟啊，我的已經夠額，你的猶原歸你。」

10

(THR) Ngá-kok kóng, Bo̍h án-ni, góa nā tī lí ê bīn-chêng tit-tio̍h un-tián, kiû lí tùi góa ê chhiú siu góa ê lé-mı̍h; in-ūi góa kìⁿ-tio̍h lí ê bīn, chhin-chhiūⁿ kìⁿ-tio̍h Siōng-tè ê bīn, lí ia̍h chiap-la̍p góa;

(BCL) 雅各講：「莫按呢，我若佇你的面前得著恩典，求你對我的手收我的禮物；因為我見著你的面，親像見著上帝的面，你亦接納我。

11

(THR) kiû lí siu góa tòa-lâi hō͘ lí ê lé-mı̍h; in-ūi Siōng-tè un-tián góa, hō͘ góa chhiong-chiok; pek-i, jiân-āu siu.

(BCL) 求你收我帶來互你的禮物；因為上帝恩典我，互我充足。」迫伊，然後收。

12

(THR) Í-sò kóng, Lán khí-sin lâi khì, góa chòe-thâu kiâⁿ.

(BCL) 以掃講：「咱起身來去，我做頭行。」

13

(THR) Ngá-kok tùi i kóng, góa ê chú chai chiah ê gín-á nńg-chiáⁿ, gû-iûⁿ ia̍h tú-á siⁿ; nā chòe chı̍t-jı̍t kóaⁿ, kui-kûn lóng beh sí.

(BCL) 雅各對伊講：「我的主知諸個囝仔軟茈，牛羊亦抵仔生，若做一日趕，歸群攏欲死。

14

(THR) Kiû góa ê chú tī lô͘-po̍k ê thâu-chêng kiâⁿ, góa beh chiàu tī góa bīn-chêng kui-kûn cheng-siⁿ ê le̍k-liōng, ia̍h chiàu gín-á ê le̍k-liōng, bān-bān chìn-chêng, kiâⁿ kàu Se-jíⁿ, kàu góa ê chú hia.

(BCL) 求我的主佇奴僕的頭前行，我欲照佇我面前歸群精牲的力量亦照囝仔的力量慢慢進前，行到西珥到我的主遐。」

15

(THR) Í-sò kóng, Iông-ún góa chiong tè góa ê lâng lâu kúi-ê kap lí chòe-tīn. Ngá-kok kóng, Mih-sái án-ni? tī góa ê chú ê bīn-chêng tit-tio̍h un-tián chiū hó.

(BCL) 以掃講：「容允我將隨我的人留幾個及你做陣。」雅各講：「乜使按呢？佇我的主的面前得著恩典就好。」

16

(THR) Hit-jı̍t Í-sò khí-sin, chiàu gôan-lō͘ tò-khì Se-jíⁿ.

(BCL) 彼日，以掃起身，照原路倒去西珥。

17

(THR) Ngá-kok kiâⁿ kàu Sò͘-kat, tī-hia ūi pún-sin khí-chhù, ūi cheng-siⁿ tah chháu-liâu; só͘-í miâ hit só͘-chāi chòe Sò͘-kat.

(BCL) 雅各行到疏割，佇假為本身起厝，為精牲搭草寮；所以名彼所在做疏割。

18

(THR) Ngá-kok tùi Pa-tàn-a-lân tò-lâi ê sî, pêng-an kàu Ka-lâm tōe ê Sī-kiàm siâⁿ; tī siâⁿ ê bīn-chêng tah pò͘-pîⁿ.

(BCL) 雅各對巴旦亞蘭倒來的時，平安到迦南地的示劍城，佇城的面前搭布棚，

19

(THR) Ēng chı̍t-pah tè gûn, tùi Sī-kiàm ê lāu-pē Hap-boat ê kiáⁿ-sun, bóe i tah pò͘-pîⁿ hit tè tōe;

(BCL) 用一百塊銀對示劍的老父、哈抹的子孫買伊搭布棚彼塊地，

20

(THR) tī-hia khí chı̍t chō tôaⁿ, kā i hō miâ kiò I-lī I-lô-i Í-sek-lia̍t.

(BCL) 佇遐起一座壇，給伊號名叫伊利伊羅伊以色列。

Bible Color Mark

• 台語漢字羅馬本
• 巴克禮全羅