創世記 第 27 章

1

(THR) Í-sat nî-lāu, ba̍k-chiu hoe bōe khòaⁿ-kìⁿ, chiū kiò i ê tōa-kiáⁿ Í-sò lâi, kā i kóng, Góa ê kiáⁿ ah; i ìn kóng, Góa tī-chia.

(BCL) 以撒年老，目睭花，看見，就叫伊的大子以掃來，給伊講：「我的子啊。」伊應講：「我佇遮。」

2

(THR) Kóng, Góa taⁿ lāu lah, m̄-chai tah-lo̍h chı̍t-jı̍t beh sí.

(BCL) 講：「我今老啦，呣知叨落一日欲死。

3

(THR) Taⁿ kia̍h lí ê ke-si, chiū-sī chìⁿ-tē kap keng, khì soaⁿ-nı̍h, kā góa phah-la̍h,

(BCL) 今抬你的家私，就是箭袋及弓，去山裡給我拍獵，

4

(THR) chiàu góa só͘ kah-ì ê, chú hō͘ i hó chu-bī, phâng-lâi hō͘ góa, góa thang chia̍h; hō͘ góa tī bē sí ê tāi-seng kā lí chiok-hok.

(BCL) 照我所合意的煮互伊好滋味，捧來互我，我通食，互我佇未死的代先給你祝福。」

5

(THR) Í-sat kā i ê kiáⁿ Í-sò kóng-ōe ê sî, Lī-pek-ka thiaⁿ-kìⁿ. Í-sò khì soaⁿ-nı̍h beh phah-la̍h, thang tòa tò-lâi.

(BCL) 以撒給伊的子以掃講話的時，利百加聽見。以掃去山裡欲拍獵，通帶倒來。

6

(THR) Lī-pek-ka chiū tùi i ê kiáⁿ Ngá-kok kóng, Lí khòaⁿ, góa thiaⁿ-kìⁿ lín lāu-pē kā lí ê hiaⁿ Í-sò kóng,

(BCL) 利百加就對伊的子雅各講：「你看，我聽見恁老父給你的兄以掃講：

7

(THR) Lí chiong iá-siù kā góa tòa-lâi, kā góa chú hō͘ i hó chu-bī, hō͘ góa chia̍h; góa beh tī bē sí ê tāi-seng, tī Iâ-hô-hoa ê bīn-chêng kā lí chiok-hok.

(BCL) 『你將野獸給我帶來，給我煮互伊好滋味互我食，我欲佇未死的代先，佇耶和華的面前給你祝福。』

8

(THR) Taⁿ góa ê kiáⁿ, lí tio̍h thiaⁿ góa ê ōe, chiàu góa só͘ hoan-hù lí-ê.

(BCL) 今，我的子，你著聽我的話，照我所吩咐你的。

9

(THR) Lí khì iûⁿ-kûn hia, kā góa lia̍h nn̄g chiah pûi ê soaⁿ-iûⁿ-á lâi; góa beh kā lí ê lāu-pē chú hó ê bī-sò͘, chiàu i só͘ kah-ì-ê.

(BCL) 你去羊群遐，給我掠二隻肥的山羊仔來，我欲給你的老父煮好的味素，照伊所合意的。

10

(THR) Lí phâng-khì lín lāu-pē hia, hō͘ i chia̍h; hō͘ i tī bē sí ê tāi-seng kā lí chiok-hok.

(BCL) 你捧去恁老父遐互伊食，互伊佇未死的代先給你祝福。」

11

(THR) Ngá-kok tùi i ê lāu-bú Lī-pek-ka kóng, M̄-kú góa ê hiaⁿ Í-sò sin-khu ū mn̂g, góa sī kng-ku̍t.

(BCL) 雅各對伊的老母利百加講：「呣拘我的兄以掃身軀有毛，我是光滑；

12

(THR) Siat-sú góa ê lāu-pē bong-tio̍h góa, beh khòaⁿ góa chòe khi-phiàn lâng-ê, góa chiū chio chiù-chó͘; bô tit-tio̍h chiok-hok.

(BCL) 設使我的老父摸著我，欲看我做欺騙人者，我就招咒詛，無得著祝福。」

13

(THR) I ê lāu-bú kóng, Góa ê kiáⁿ ah, lí chio ê chiù-chó͘ kui tī góa; chòe lí thiaⁿ góa ê ōe, khì lia̍h lâi hō͘ góa.

(BCL) 伊的老母講：「我的子啊！你招的咒詛歸佇我；做你聽我的話，去掠來互我。」

14

(THR) I chiū khì lia̍h lâi hō͘ i ê lāu-bú; lāu-bú chiū chú hó ê chu-bī, chiàu lāu-pē só͘ kah-ì-ê.

(BCL) 伊就去掠來互伊的老母；老母就煮好的滋味，照老父所合意的。

15

(THR) Lī-pek-ka koh hiaⁿh tōa-kiáⁿ Í-sò siu tī i ke-lāi ê súi-saⁿ, kā i ê sòe-kiáⁿ Ngá-kok chhēng.

(BCL) 利百加閣　大子以掃收佇伊家內的娞衫給伊的細子雅各穿，

16

(THR) Koh ēng soaⁿ-iûⁿ-á phê pau Ngá-kok ê chhiú, kap i ām-kún kng-ku̍t ê ūi.

(BCL) 閣用山羊的皮包雅各的手及伊頷頸光滑的位，

17

(THR) Chiū chiong só͘ chú ê hó chu-bī kap piáⁿ, hē tī i ê kiáⁿ Ngá-kok ê chhiú.

(BCL) 就將所煮的好滋味及餅下佇伊的子雅各的手。

18

(THR) Ngá-kok kàu in lāu-pē hia, kóng, Góa ê pē ah; i kóng, Góa tī-chia; góa ê kiáⁿ, lí sī chī-chūi?

(BCL) 雅各到老父遐講：「我的父啊！」伊講：「我佇遮。我的子，你是是誰？」

19

(THR) Ngá-kok tùi i ê lāu-pē kóng, Góa sī lí ê tōa-kiáⁿ Í-sò; góa í-keng chiàu lí só͘ hoan-hù góa-ê khì kiâⁿ; chhiáⁿ lí khí-lâi chē, chia̍h góa só͘ phah-tio̍h-ê, hó thang kā góa chiok-hok.

(BCL) 雅各對伊的老父講：「我是你的大子以掃；我已經照你所吩咐我的去行。請你起來坐，食我所拍著的，好通給我祝福。」

20

(THR) Í-sat tùi i ê kiáⁿ kóng, Góa ê kiáⁿ, lí cháiⁿ-iūⁿ chiah khòai tit-tio̍h? I kóng, In-ūi lí ê Siōng-tè Iâ-hô-hoa hō͘ góa hó cho-gū lâi tit-tio̍h.

(BCL) 以撒對伊的子講：「我的子，你怎樣即快得著？」伊講：「因為你的上帝──耶和華互我好遭遇來得著。」

21

(THR) Í-sat kā Ngá-kok kóng, Góa ê kiáⁿ ah, lí kūn-óa-lâi, góa beh bong lí, khòaⁿ lí chin-chiàⁿ sī góa ê kiáⁿ Í-sò, á m̄-sī.

(BCL) 以撒給雅各講：「我的子啊！你近倚來，我欲摸你，看你真正是我的子以掃抑呣是。」

22

(THR) Ngá-kok chiū óa-kūn i ê lāu-pē Í-sat; i chiū bong i kóng, Siaⁿ, sī Ngá-kok ê siaⁿ; chhiú, sī Í-sò ê chhiú.

(BCL) 雅各就倚近伊的老父以撒。伊就摸伊講：「聲是雅各的聲，手是以掃的手。」

23

(THR) Í-sat hun-piat bōe bêng, in-ūi i ê chhiú ū mn̂g, chhin-chhiūⁿ i ê hiaⁿ Í-sò ê chhiú; chiū kā i chiok-hok.

(BCL) 以撒分別明，因為伊的手有毛，親像伊的兄以掃的手，就給伊祝福；

24

(THR) Koh kóng, Lí chin-chiàⁿ sī góa ê kiáⁿ Í-sò mah? I kóng, Góa sī.

(BCL) 閣講：「你真正是我的子以掃嗎？」伊講：「我是。」

25

(THR) Í-sat kóng, Phâng-lâi hō͘ góa, góa beh chia̍h góa ê kiáⁿ só͘ tit-tio̍h ê iá-bī, hó thang kā lí chiok-hok. Chiū phâng hō͘ i, i chiū chia̍h; ia̍h phâng chiú hō͘ i, i chiū lim.

(BCL) 以撒講：「捧來互我，我欲食我的子所得著的野味，好通給你祝福。」就捧互伊，伊就食，亦捧酒互伊，伊就飲。

26

(THR) I ê lāu-pē Í-sat tùi i kóng, Góa ê kiáⁿ, chìn-chêng lâi chim góa.

(BCL) 伊的老父以撒對伊講：「我的子，進前來唚我。」

27

(THR) I chiū chìn-chêng, chim i ê lāu-pē; i ê lāu-pē phīⁿ-tio̍h i ê saⁿ ê phang-bī, chiū kā i chiok-hok kóng: Góa ê kiáⁿ ê phang-bī, Chhin-chhiūⁿ Iâ-hô-hoa sù-hok ê chhân ê phang-bī;

(BCL) 伊就進前，唚伊的老父。伊的老父鼻著伊的衫的芳味，就給伊祝福，講：我的子的芳味親像耶和華賜福的田的芳味。

28

(THR) Gōan Siōng-tè siúⁿ-sù lí thiⁿ-téng ê kam-lō͘; Sè-chiūⁿ ê pûi-tōe, Gō͘-kak kap sin ê chiú chin-chōe;

(BCL) 願上帝賞賜你天頂的甘露，世上的肥地，五穀及新的酒真多。

29

(THR) Chèng peh-sìⁿ ho̍k-sāi lí, Lia̍t-kok kūi-pài lí, Lí chòe lí hiaⁿ-tī ê chú, Lí ê lāu-bú ê kiáⁿ kūi-pài lí; Chiù-chó͘ lí-ê siū chiù-chó͘, Chiok-hok lí-ê tit-tio̍h hok-khì.

(BCL) 眾百姓服事你，列國跪拜你。你做你兄弟的主；你的老母的子跪拜你。咒詛你的受咒詛，祝福你的得著福氣。

30

(THR) Í-sat kā Ngá-kok chiok-hok bêng-pe̍k, Ngá-kok tú-tú tùi i ê lāu-pē Í-sat hia chhut-lâi, i ê hiaⁿ Í-sò phah-la̍h tò-lâi.

(BCL) 以撒給雅各祝福明白，雅各抵抵對伊的老父以撒遐出來，伊的兄以掃拍獵倒來，

31

(THR) I ia̍h chú hó ê bī-sò͘, phâng-lâi hō͘ i ê lāu-pē, kóng, Góa ê pē ah, chhiáⁿ khí-lâi chia̍h kiáⁿ só͘ phah-tio̍h-ê, hó thang kā góa chiok-hok.

(BCL) 伊亦煮好的味素，捧來互伊的老父，講：「我的父啊！請起來，食子所拍著的，好通給我祝福。」

32

(THR) I ê lāu-pē Í-sat kā i kóng, Lí sī chī-chūi? I kóng, Góa sī lí ê kiáⁿ, chiū-sī lí ê tōa-kiáⁿ, Í-sò.

(BCL) 伊的老父以撒給伊講：「你是是誰？」伊講：「我是你的子，就是你的大子以掃。」

33

(THR) Í-sat tōa-kiaⁿ, ngia̍uh-ngia̍uh-chhoah, kóng, He sī chī-chūi, lí bē lâi ê tāi-seng, phâng i só͘ phah-tio̍h-ê lâi hō͘ góa; góa chia̍h i, kā i chiok-hok? i tek-khak beh tit-tio̍h hok-khì.

(BCL) 以撒大驚愕愕惙，講：「彼是是誰？你未來的代先捧伊所拍著的來互我，我食伊，給伊祝福；伊的確欲得著福氣。」

34

(THR) Í-sò thiaⁿ-kìⁿ lāu-pē ê ōe, khui-siaⁿ kiò-khó͘ tōa-khàu; tùi i ê lāu-pē kóng, Góa ê pē ah, góa, lí ia̍h tio̍h kā góa chiok-hok.

(BCL) 以掃聽見老父的話，開聲叫苦大哭，對伊的老父講：「我的父啊！我，你亦著給我祝福！」

35

(THR) Í-sat kóng, Lí ê sió-tī ēng khúi-kè lâi, chhiúⁿ lí ê hok-hūn.

(BCL) 以撒講：「你的小弟用詭計來搶你的福份。」

36

(THR) Í-sò kóng, I miâ-chòe Ngá-kok, kiám bô chin ha̍p mah? i khi-phiàn góa nn̄g-pái; chêng chhiúⁿ góa tōa-kiáⁿ ê bêng-hūn; lí khòaⁿ, taⁿ i koh chhiúⁿ góa ê hok-hūn. Koh kóng, Kiám bô lâu chı̍t-ê thang kā góa chiok-hok mah?

(BCL) 以掃講：「伊名做雅各，豈無真合嗎？伊欺騙我二擺：前搶我大子的名份，你看，今伊閣搶我的福份。」閣講：「豈無留一個通給我祝福嗎？」

37

(THR) Í-sat ìn Í-sò kóng, Góa í-keng lı̍p i chòe lí ê chú, ia̍h chiong i ê chèng hiaⁿ-tī hō͘ i chòe lô͘-po̍k; ia̍h ēng gō͘-kak sin-chiú iúⁿ-chhī i; góa ê kiáⁿ ah, taⁿ góa iáu ōe kā lí chòe sím-mı̍h?

(BCL) 以撒應以掃講：「我已經立伊做你的主，亦將伊的眾兄弟互伊做奴僕，亦用五穀新酒養飼伊。我的子啊！今我猶會給你做甚麼？」

38

(THR) Í-sò kā i ê lāu-pē kóng, Pē ah, lí ê chiok-hok kiám chí-ū chı̍t-pái mah? Góa ê pē ah, góa, lí ia̍h tio̍h kā góa chiok-hok.

(BCL) 以掃給伊的老父講：「父啊！你的祝福豈只有一擺嗎？我的父啊！我，你亦著給我祝福！」以掃開聲啼哭。

39

(THR) Í-sò khui-siaⁿ thî-khàu. I ê lāu-pē Í-sat ìn i, kóng: Lí só͘ khiā-khí-ê, beh ū sè-chiūⁿ ê pûi-tōe, Ia̍h ū thiⁿ-téng ê kam-lō͘;

(BCL) 伊的老父以撒應伊講：你所徛起的欲有世上的肥地；亦有天頂的甘露。

40

(THR) Lí beh óa-khò to-kiàm tō͘-o̍ah, koh beh ho̍k-sāi lí ê sió-tī; Kàu lí hùn-heng ê sî, Beh tùi lí ê ām-kún kùn-khui i ê gû-taⁿ.

(BCL) 你欲倚靠刀劍度活，閣欲服事你的小弟；到你奮興的時，欲對你的頷頸滾開伊的牛軛。

41

(THR) Í-sò in-ūi i ê lāu-pē kā Ngá-kok chiok hok-khì, chiū òan-hūn Ngá-kok; sim-lāi kóng, Ūi lāu-pē teng-iu ê sî kūn-lah; kàu hit-sî, góa beh thâi-sí góa ê sió-tī Ngá-kok.

(BCL) 以掃因為伊的老父給雅各祝福氣，就怨恨雅各，心內講：「為老父丁憂的時近啦，到彼時，我欲死我的小弟雅各。

42

(THR) Ū lâng chiong i ê tōa-kiáⁿ Í-sò ê ōe kā Lī-pek-ka kóng; i chiū chhe lâng khì kiò i ê sòe-kiáⁿ Ngá-kok lâi, kā i kóng, Lí ê hiaⁿ Í-sò beh thâi lí, lâi siau i ê hūn-khì.

(BCL) 有人將伊的大子以掃的話給利百加講，伊就差人去叫伊的細子雅各來，給伊講：「你的兄以掃欲你，來消伊的恨氣。

43

(THR) Taⁿ góa ê kiáⁿ, lí tio̍h thiaⁿ góa ê ōe; khí-lâi, cháu khì Hap-lân, góa ê hiaⁿ La̍h-pan hia;

(BCL) 今，我的子，你著聽我的話：起來，走去哈蘭、我的兄拉班遐，

44

(THR) kap i tiàm kúi-jı̍t, thèng-hāu lí ê hiaⁿ siū-khì siau.

(BCL) 及伊踮幾日，聽候你的兄受氣消。

45

(THR) Kàu lí ê hiaⁿ siū-khì soah, bōe kì-tit lí tùi i só͘ chòe ê sū, hit-sî góa chiū chhe lâng chhōa lí tùi hia tò-lâi. Góa siáⁿ-sū chı̍t-jı̍t sit-lo̍h lín nn̄g-lâng?

(BCL) 到你的兄受氣息，記得你對伊所做的事，彼時我就差人導你對遐倒來。我啥事一日失落恁二人？」

46

(THR) Lī-pek-ka kā Í-sat kóng, Góa in-ūi chiah ê Hek-lâng ê cha-bó͘-kiáⁿ, liân sìⁿ-miā to m̄-ài. Siat-sú Ngá-kok iā chhōa chit só͘-chāi ê cha-bó͘-kiáⁿ chòe bó͘, chhin-chhiūⁿ Hek-lâng ê cha-bó͘-kiáⁿ hit-khóan, góa o̍ah ū siáⁿ lō͘-ēng?

(BCL) 利百加給以撒講：「我因為諸個赫人的查某子連性命都呣愛；設使雅各也娶此所在的查某子做某，親像赫人的查某子彼款，我活有啥路用？」

Bible Color Mark

• 台語漢字羅馬本
• 巴克禮全羅