創世記 第 20 章

1

(THR) A-pek-la̍h-hán tùi-hia chām-chām ǹg lâm-hng sóa-khì; tòa tī Ka-te-su kap Su-jíⁿ ê tiong-kan, kià-ku tī Ki-la̍h-jíⁿ.

(BCL) 亞伯拉罕對遐站站向南方徙去，住佇加低斯及書珥的中間，寄居佇基拉耳。

2

(THR) A-pek-la̍h-hán kóng kàu i ê bó͘ Sat-la̍h, chiū kóng, Sī góa ê sió-bē; Ki-la̍h-jíⁿ ông A-pí-bí-le̍k chhe lâng chiong Sat-la̍h chhōa-khì.

(BCL) 亞伯拉罕講到伊的某撒拉，就講是我的小妹，基拉耳王亞比米勒差人將撒拉導去。

3

(THR) Mî-sî, bîn-bāng-tiong, Siōng-tè lâi kā A-pí-bí-le̍k kóng, Lí sī kai sí ê lâng, in-ūi lí só͘ chhōa hit ê hū-jîn-lâng sī lâng ê bó͘.

(BCL) 暝時，眠夢中，上帝來，給亞比米勒講：「你是該死的人！因為你所導彼個婦仁人；是人的某。」

4

(THR) A-pí-bí-le̍k iáu-bē chhin-kūn i, chiū kóng, Chú ah, kiâⁿ-gī ê peh-sìⁿ, Lí ia̍h beh bia̍t i mah?

(BCL) 亞比米勒猶未親近伊；就講：「主啊！行義的百姓，你亦欲滅伊嗎？

5

(THR) Hit-lâng kiám m̄-sī pún-sin tùi góa kóng, I sī góa ê sió-bē mah? Chiū hū-jîn-lâng ia̍h pún-sin kóng, I sī góa ê hiaⁿ; góa chòe chit ê sū, sī sim toan-chèng, chhiú chheng-khì.

(BCL) 彼人豈呣是本身對我講，『伊是我的小妹』嗎？就婦仁人也本身講：『伊是我的兄。』我做此個事是心端正手清氣。」

6

(THR) Siōng-tè tī bāng-tiong tùi i kóng, Góa pún chai lí chòe chit ê sū, sī sim-tiong toan-chèng; Góa chiah chó͘-tòng lí, bián-tit lí tek-chōe Góa; só͘-í Góa bô iông-ún lí bong-tio̍h i.

(BCL) 上帝佇夢中對伊講：「我本知你做此個事是心中端正；我才阻擋你，免得你得罪我，所以我無容允你摸著伊。

7

(THR) Taⁿ lí tio̍h chiong chit lâng ê bó͘ hêng-i, in-ūi i sī sian-ti; i beh thòe lí kî-tó, lí chiah ōe o̍ah; lí nā m̄ hêng-i, lí tio̍h chai, lí kap lí só͘ ū ê lâng lóng tit-beh sí.

(BCL) 今你著將此人的某還伊；因為伊是先知，伊欲替你祈禱，你才會活。你若呣還伊，你著知，你及你所有的人攏得欲死。」

8

(THR) A-pí-bí-le̍k thàu-chá khí-lâi, kiò chèng lô͘-po̍k lâi, chiong chiah ê tāi-chì lóng kóng hō͘ in thiaⁿ; hiah ê lâng lóng chin kiaⁿ.

(BCL) 亞比米勒透早起來，叫眾奴僕來，將諸個代誌攏講互聽，許個人攏真驚。

9

(THR) A-pí-bí-le̍k kiò A-pek-la̍h-hán lâi, tùi i kóng, Lí tùi góan só͘ kiâⁿ-ê sī sím-mı̍h sū? góa ū sím-mı̍h tek-chōe lí, lí kéng-jiân hō͘ góa kap góa kok-lāi ê lâng hām-lo̍h tāng-chōe? lí tùi góa kiâⁿ m̄ eng-kai kiâⁿ ê sū.

(BCL) 亞比米勒叫亞伯拉罕來，對伊講：「你對阮所行的是甚麼事？我有甚麼得罪你，你竟然互我及我國內的人陷落重罪？你對我行呣應該行的事！」

10

(THR) A-pí-bí-le̍k koh tùi A-pek-la̍h-hán kóng, Lí khòaⁿ-kìⁿ sím-mı̍h, chiah chòe chit ê sū?

(BCL) 亞比米勒閣對亞伯拉罕講：「你看見甚麼才做此個事？」

11

(THR) A-pek-la̍h-hán kóng, Góa phah-sǹg chit só͘-chāi ê lâng lóng bô kiaⁿ Siōng-tè; in beh ūi-tio̍h góa ê bó͘ ê iân-kò͘ thâi-sí góa.

(BCL) 亞伯拉罕講：「我拍算此所在的人攏無驚上帝，欲為著我的某的緣故死我。

12

(THR) Koh i ia̍h sı̍t-chāi sī góa ê sió-bē, siâng-pē koh-bú, āu-lâi chòe góa ê bó͘.

(BCL) 閣伊亦實在是我的小妹；像父各母，後來做我的某。

13

(THR) Tng Siōng-tè kah góa lī-khui lāu-pē ê ke, sì-kòe kiâⁿ ê sî, góa kā i kóng, chiong-lâi lán só͘ kàu ê só͘-chāi, chhiáⁿ lí chheng góa kóng, I sī góa ê hiaⁿ; che chiū-sī lí khóan-thāi góa ê un.

(BCL) 當上帝教我離開老父的家、四界行的時，我給伊講：『將來咱所到的所在，請你稱我講：伊是我的兄；這就是你款待我的恩。』」

14

(THR) A-pí-bí-le̍k chiong iûⁿ, gû, lô͘-po̍k, lú-pī, hō͘ A-pek-la̍h-hán; koh chiong i ê bó͘ Sat-la̍h hêng-i.

(BCL) 亞比米勒將羊、牛、奴僕、女婢互亞伯拉罕，閣將伊的某撒拉還伊。

15

(THR) A-pí-bí-le̍k koh kóng, Lí khòaⁿ, góa ê tōe lóng tī lí ê bīn-chêng, lí thang sûi-ì khiā-khí.

(BCL) 亞比米勒閣講：「你看，我的地攏佇你的面前，你通隨意徛起。」

16

(THR) Koh kā Sat-la̍h kóng, Góa hō͘ lí ê hiaⁿ chı̍t chheng gûn, kā lí tùi chôan-ke chòe jia ba̍k-chiu-ê; taⁿ lí tī it-chhè lóng bô put-sī.

(BCL) 閣給撒拉講：「我互你的兄一千銀，給你對全家做遮目睭的，今你佇一切攏無不是。」

17

(THR) A-pek-la̍h-hán kî-tó Siōng-tè; Siōng-tè chiū i-hó A-pí-bí-le̍k kap i ê bó͘ kap lú-pī, in chiū ōe siⁿ kiáⁿ.

(BCL) 亞伯拉罕祈禱上帝，上帝就醫好亞比米勒及伊的某，及女婢，就會生子。

18

(THR) In-ūi Iâ-hô-hoa ūi-tio̍h A-pek-la̍h-hán ê bó͘ Sat-la̍h ê iân-kò͘, í-keng hō͘ A-pí-bí-le̍k ke-lāi ê hū-jîn-lâng bōe-ōe siⁿ-kiáⁿ.

(BCL) 因為耶和華為著亞伯拉罕的某撒拉的緣故，已經互亞比米勒家內的婦仁人會生子。

Bible Color Mark

• 台語漢字羅馬本
• 巴克禮全羅