創世記 第 18 章

1

(THR) Iâ-hô-hoa tī Bān-lī ê siōng-chhiū hia, tùi A-pek-la̍h-hán chhut-hiān; hit-sî jı̍t tng jo̍ah; A-pek-la̍h-hán chē tī pò͘-pîⁿ mn̂g-kháu;

(BCL) 耶和華佇幔利的橡樹遐對亞伯拉罕出現。彼時日當熱，亞伯拉罕坐佇布棚門口，

2

(THR) kia̍h-ba̍k khí-lâi khòaⁿ, khòaⁿ-kìⁿ saⁿ lâng tī tùi-bīn teh khiā; i chı̍t-ē khòaⁿ-kìⁿ, chiū tùi pò͘-pîⁿ mn̂g-kháu, cháu khì ngiâ-chih in,

(BCL) 抬目起來看，看見三人佇對面徛。伊一下看見，就對布棚門口走去迎接，仆佇地裡，

3

(THR) phak tī tōe-nı̍h, kóng, góa ê chú, góa nā tī lí ê bīn-chêng tit-tio̍h un-tián, kiû lí m̄-thang lī-khui lô͘-po̍k chòe lí khì;

(BCL) 講：「我的主，我若佇你的面前得著恩典，求你呣通離開奴僕做你去。

4

(THR) iông-ún the̍h tām-po̍h chúi, hō͘ lín sóe-kha; chhiáⁿ hioh-khùn tī chhiū-kha;

(BCL) 容允提淡薄水，互恁洗腳，請歇睏佇樹腳。

5

(THR) góa koh the̍h tām-po̍h piáⁿ, hō͘ lín tiám-sim; jiân-āu chìn-chêng khì; in-ūi lín sī ūi-tio̍h án-ni, chiah kàu lín ê lô͘-po̍k chia. In kóng, Thang chiàu lí ê ōe khì kiâⁿ.

(BCL) 我閣提淡薄餅，互恁點心，然後進前去。因為恁是為著按呢，才到恁的奴僕遮。」講：「通照你的話去行。」

6

(THR) A-pek-la̍h-hán kóaⁿ-kín jı̍p pò͘-pîⁿ, kìⁿ Sat-la̍h kóng, Lí kín-kín ēng saⁿ sè-a ê mī-hún, nóa chòe piáⁿ.

(BCL) 亞伯拉罕趕緊入布棚見撒拉，講：「你緊緊用三細亞的麵粉撋做餅。」

7

(THR) A-pek-la̍h-hán koh cháu kàu gû-kûn ê só͘-chāi, khan chı̍t chiah chíⁿ koh hó ê gû-á lâi; kau hō͘ lô͘-po̍k, i chiū kóaⁿ-kín khì pī-pān.

(BCL) 亞伯拉罕閣走到牛群的所在，牽一隻茈閣好的牛仔來，交互奴僕，伊就趕緊去備辦。

8

(THR) A-pek-la̍h-hán koh the̍h lin-iû kap lin, kap só͘ pī-pān ê gû-á lâi, pâi tī in ê bīn-chêng; ka-kī tī chhiū-kha khiā tī in ê sin-piⁿ; in chiū chia̍h.

(BCL) 亞伯拉罕閣提奶油及奶，及所備辦的牛仔來，排佇的面前，家己佇樹腳徛佇的身邊，就食。

9

(THR) In kā i kóng, Lí ê bó͘ Sat-la̍h tī tah-lo̍h? I kóng, Tī pò͘-pîⁿ-lāi.

(BCL) 給伊講：「你的某撒拉佇叨落？」伊講：「佇布棚內。」

10

(THR) In tiong-kan chı̍t-ê kóng, Kàu-kî Góa tek-khak beh koh lâi lí chia; lí ê bó͘ Sat-la̍h beh siⁿ chı̍t ê kiáⁿ. Sat-la̍h tī āu-bīn, pò͘-pîⁿ mn̂g-kháu, teh thiaⁿ.

(BCL) 中間一個講：「到期，我的確欲閣來你遮；你的某撒拉欲生一個子。」撒拉佇後面布棚門口聽。

11

(THR) A-pek-la̍h-hán kap Sat-la̍h nî-hè í-keng lāu; Sat-la̍h ê ge̍h-keng í-keng cho̍at.

(BCL) 亞伯拉罕及撒拉年歲已經老，撒拉的月經已經絕。

12

(THR) Sat-la̍h sim-lāi chhiò kóng, Góa í-keng soe-lám, góa ê chú ia̍h lāu-lah; kiám iáu ū chit-hō ê hoaⁿ-hí?

(BCL) 撒拉心內笑，講：「我已經衰膦，我的主亦老啦，豈猶有此號的歡喜？」

13

(THR) Iâ-hô-hoa tùi A-pek-la̍h-hán kóng, Sat-la̍h ūi siáⁿ-sū chhiò, kóng, Góa í-keng lāu, kó-chin ōe siⁿ-kiáⁿ mah?

(BCL) 耶和華對亞伯拉罕講：「撒拉為啥事笑，講：『我已經老，果真會生子嗎？』

14

(THR) Kiám Iâ-hô-hoa ū chòe-bōe-lâi ê sū mah? Kàu-kî, mê-nî chit-sî, Góa beh koh lâi lí chia, Sat-la̍h beh siⁿ chı̍t ê kiáⁿ.

(BCL) 豈耶和華有做來的事嗎？到期，明年此時，我欲閣來你遮，撒拉欲生一個子。」

15

(THR) Sat-la̍h kiaⁿ, m̄-jīn, kóng, Góa bô chhiò. Hit-lâng kóng, Bô-iáⁿ; lí sı̍t-chāi ū chhiò.

(BCL) 撒拉驚，呣認，講：「我無笑。」彼人講：「無影，你實在有笑。」

16

(THR) Hiah ê lâng chiū tùi hia khí-lâi, ǹg Só͘-to-má khì; A-pek-la̍h-hán iā kap in saⁿ-kap kiâⁿ, beh sàng in chı̍t-chām.

(BCL) 許個人就對遐起來，向所多瑪去，亞伯拉罕也及相及行，欲送一站。

17

(THR) Iâ-hô-hoa kóng, Góa só͘ beh chòe ê sū, kiám thang tùi A-pek-la̍h-hán ún-khǹg mah?

(BCL) 耶和華講：「我所欲做的事豈通對亞伯拉罕隱囥嗎？

18

(THR) In-ūi A-pek-la̍h-hán tek-khak beh chiâⁿ-chòe kiông-tōa ê kok, tōe-chiūⁿ bān-kok beh in-ūi i lâi tit-tio̍h hok-khì.

(BCL) 因為亞伯拉罕的確欲成做強大的國；地上萬國欲因為伊來得著福氣。

19

(THR) Góa bat i, sī beh hō͘ i bēng-lēng i ê kiáⁿ kap i ê ke-kòan; hō͘ in tn̂g-tn̂g siú Iâ-hô-hoa ê tō-lí, péng-kong kiâⁿ-gī; tì-kàu Iâ-hô-hoa chí A-pek-la̍h-hán só͘ kóng ê ōe, lóng kui hō͘ i.

(BCL) 我識伊，是欲互伊命令伊的子及伊的家眷，互長長守耶和華的道理，秉公行義，致到耶和華指亞伯拉罕所講的話攏歸互伊。」

20

(THR) Iâ-hô-hoa kóng, Só͘-to-má, Gô-mô͘-la̍h hoah-hiàm ê siaⁿ chin-tōa, in ê chōe-ok sı̍t-chāi tāng.

(BCL) 耶和華講：「所多瑪、蛾摩拉喝喊的聲真大，的罪惡實在重。

21

(THR) Góa taⁿ beh lo̍h-khì, khòaⁿ in só͘ kiâⁿ-ê, kó-jiân it-chīn chiàu Góa só͘ thiaⁿ ê siaⁿ á bô; nā bô án-ni, Góa ia̍h ōe chai.

(BCL) 我今欲落去，看所行的，果然一盡照我所聽的聲抑無？若無按呢，我亦會知。」

22

(THR) Hiah ê lâng tùi-hia o̍at-tńg-sin, ǹg Só͘-to-má khì; A-pek-la̍h-hán iáu khiā tī Iâ-hô-hoa ê bīn-chêng.

(BCL) 許個人對遐越轉身，向所多瑪去；亞伯拉罕猶徛佇耶和華的面前。

23

(THR) A-pek-la̍h-hán kūn-chêng lâi kóng, Hó-lâng kap pháiⁿ-lâng, Lí lóng beh châu-bia̍t mah?

(BCL) 亞伯拉罕近前來，講：「好人及歹人，你攏欲剿滅嗎？

24

(THR) Siat-sú siâⁿ-lāi ū gō͘-cha̍p ê hó-lâng, Lí iû-gôan beh châu-bia̍t hit só͘-chāi mah? bô-beh ūi-tio̍h siâⁿ-lāi chí gō͘-cha̍p ê hó-lâng, lâi sià-bián in mah?

(BCL) 設使城內有五十個好人，你猶原欲剿滅彼所在嗎？無欲為著城內此五十個好人來赦免嗎？

25

(THR) Gōan Lí koat-tòan bô án-ni kiâⁿ, chiong hó-lâng kap pháiⁿ-lâng chòe-chı̍t-ē hāi-sí; tì-kàu hó-lâng kap pháiⁿ-lâng saⁿ-tâng; gōan Lí koat-tòan bô án-ni kiâⁿ; sím-phòaⁿ chôan-tōe ê Chú kiám bô kiâⁿ kong-gī mah?

(BCL) 願你決斷無按呢行，將好人及歹人做一下害死，致到好人及歹人相同，願你決斷無按呢行。審判全地的主豈無行公義嗎？」

26

(THR) Iâ-hô-hoa kóng, Góa nā tī Só͘-to-má siâⁿ-lāi tú-tio̍h ū gō͘-cha̍p ê hó-lâng, Góa chiū ūi-tio̍h in ê iân-kò͘ khoan-iông hit só͘-chāi.

(BCL) 耶和華講：「我若佇所多瑪城內抵著有五十個好人，我就為著的緣故寬容彼所在。」

27

(THR) A-pek-la̍h-hán ìn kóng, Góa sui-jiân sī hé-hu thô͘-hún, iáu-kú káⁿ tùi Chú kóng-ōe;

(BCL) 亞伯拉罕應講：「我雖然是火灰土粉，猶久敢對主講話。

28

(THR) siat-sú chiah ê gō͘-cha̍p ê hó-lâng khiàm gō͘-ê; Lí chiū in-ūi khiàm gō͘-ê, châu-bia̍t chôan-siâⁿ mah? I kóng, Góa tī-hia nā tú-tio̍h ū sì-cha̍p-gō͘ ê, ia̍h bô beh châu-bia̍t.

(BCL) 設使諸個五十個好人欠五個，你就因為欠五個剿滅全城嗎？」伊講：「我佇遐若抵著有四十五個，亦無欲剿滅。」

29

(THR) A-pek-la̍h-hán koh tùi I kóng, Siat-sú tī-hia tú-tio̍h sì-cha̍p-ê nih? I kóng, Ūi-tio̍h chiah ê sì-cha̍p-ê ê iân-kò͘, Góa ia̍h bô beh chòe chit ê sū.

(BCL) 亞伯拉罕閣對伊講：「設使佇遐抵著四十個呢？」伊講：「為著諸個四十個的緣故，我亦無欲做此個事。」

30

(THR) I koh kóng, Kiû Chú bo̍h-tit siū-khì, góa beh koh kóng; siat-sú tī-hia nā tú-tio̍h saⁿ-cha̍p-ê nih? I kóng, Góa tī-hia nā tú-tio̍h ū saⁿ-cha̍p-ê, Góa ia̍h bô beh chòe chit ê sū.

(BCL) 伊閣講：「求主莫得受氣，我欲閣講，設使佇遐若抵著三十個呢？」伊講：「我佇遐若抵著有三十個，我亦無欲做此個事。」

31

(THR) I kóng, Góa iáu-kú káⁿ tùi Chú kóng; siat-sú tī-hia tú-tio̍h ū jī-cha̍p-ê nih? I kóng, Ūi-tio̍h chiah ê jī-cha̍p-ê ê iân-kò͘, Góa ia̍h bô beh châu-bia̍t.

(BCL) 伊講：「我猶久敢對主講，設使佇遐抵著有二十個呢？」伊講：「為著諸個二十個的緣故，我亦無欲剿滅。」

32

(THR) I kóng, Kiû Chú bo̍h-tit siū-khì, góa koh kóng chit chı̍t-pái; siat-sú tī-hia tú-tio̍h ū cha̍p-ê nih? I kóng, Ūi-tio̍h chiah ê cha̍p-ê ê iân-kò͘, Góa ia̍h bô beh châu-bia̍t.

(BCL) 伊講：「求主莫得受氣，我閣講此一擺，設使佇遐抵著有十個呢？」伊講：「為著諸個十個的緣故，我亦無欲剿滅。」

33

(THR) Iâ-hô-hoa kap A-pek-la̍h-hán kóng bêng-pe̍k, chiū chiūⁿ-khì. A-pek-la̍h-hán ia̍h tò-khì i ê só͘-chāi.

(BCL) 耶和華及亞伯拉罕講明白就上去；亞伯拉罕亦倒去伊的所在。

Bible Color Mark

• 台語漢字羅馬本
• 巴克禮全羅