創世記 第 17 章

1

(THR) A-pek-lân káu-cha̍p-káu hè ê sî, Iâ-hô-hoa tùi A-pek-lân hián-hiān, kā i kóng, Góa sī chôan-lêng ê Siōng-tè, lí tī Góa ê bīn-chêng kiâⁿ-chòe tio̍h ôan-chôan.

(BCL) 亞伯蘭九十九歲的時，耶和華對亞伯蘭顯現，給伊講：「我是全能的上帝。你佇我的面前行做著完全，

2

(THR) Góa beh kap lí lı̍p Góa ê iok, hō͘ lí ê hō͘-è ke̍k-kî chōe.

(BCL) 我欲及你立我的約，互你的後裔極其多。」

3

(THR) A-pek-lân chiū phak-lo̍h tī tōe-nı̍h; Siōng-tè koh kap i kóng-ōe, kóng,

(BCL) 亞伯蘭就仆落佇地裡；上帝閣及伊講話，講：

4

(THR) Góa kap lí lı̍p Góa ê iok, lí beh chòe chōe-chōe kok ê pē.

(BCL) 「我及你立我的約：你欲做多多國的父。

5

(THR) Tùi taⁿ í-āu, lí ê miâ bô koh kiò-chòe A-pek-lân, sī beh kiò-chòe A-pek-la̍h-hán, in-ūi Góa í-keng lı̍p lí chòe chōe-chōe kok ê pē.

(BCL) 對今以後，你的名無閣叫做亞伯蘭，是欲叫做亞伯拉罕，因為我已經立你做多多國的父。

6

(THR) Góa beh hō͘ lí ê hō͘-è ke̍k-kî chōe, kok-tō͘ tùi lí lâi lı̍p, kun-ông tùi lí lâi chhut.

(BCL) 我欲互你的後裔極其多；國度對你來立，君王對你來出。

7

(THR) Góa beh kap lí, í-kı̍p lí le̍k-tāi ê hō͘-è, siat-lı̍p Góa ê iok chòe éng-óan ê iok; sī beh chòe lí kap lí ê hō͘-è ê Siōng-tè.

(BCL) 我欲及你以及你歷代的後裔設立我的約，做永遠的約，是欲做你及你的後裔的上帝。

8

(THR) Góa beh chiong lí hiān-chāi chhut-gōa ê tōe, chiū-sī Ka-lâm chôan-tōe, siúⁿ-sù lí kap lí ê hō͘-è, chòe éng-óan ê gia̍p; Góa ia̍h beh chòe in ê Siōng-tè.

(BCL) 我欲將你現在出外的地，就是迦南全地，賞賜你及你的後裔做永遠的業，我亦欲做的上帝。」

9

(THR) Siōng-tè koh tùi A-pek-la̍h-hán kóng, Lí kap lí ê hō͘-è tio̍h le̍k-tāi chun-siú Góa ê iok.

(BCL) 上帝閣對亞伯拉罕講：「你及你的後裔著歷代遵守我的約。

10

(THR) Lín tiong-kan só͘ ū ê ta-po͘-ê, lóng tio̍h siū kat-lé; che chiū-sī Góa kap lí í-kı̍p lí ê hō͘-è só͘ lı̍p ê iok, sī lín só͘ tio̍h chun-siú-ê.

(BCL) 恁中間所有的查甫者攏著受割禮；這就是我及你以及你的後裔所立的約，是恁所著遵守的。

11

(THR) Lín tio̍h koah lín iông-bu̍t ê phê; che sī beh chòe Góa kap lín só͘ lı̍p ê iok ê kì-hō.

(BCL) 恁著割恁陽物的皮；這是欲做我及恁所立的約的記號。

12

(THR) Lín le̍k-tāi ê ta-po͘-ê, bô-lūn ke-lāi siⁿ-ê, á-sī lí ê hō͘-è í-gōa, ēng gûn tùi gōa-bīn lâng bóe-ê, í-keng chhut-sì poeh-jı̍t, lóng tio̍h siū kat-lé.

(BCL) 恁歷代的查甫者，無論家內生的，抑是你的後裔以外用銀對外面人買的，已經出世八日，攏著受割禮。

13

(THR) Lí ke-lāi siⁿ-ê, kap lí ēng gûn bóe-ê, lóng tek-khak tio̍h siū kat-lé; án-ni Góa ê iok beh hē tī lín ê sin-chiūⁿ, chòe éng-óan ê iok.

(BCL) 你家內生的及你用銀買的，攏的確著受割禮。按呢，我的約欲下佇恁的身上做永遠的約。

14

(THR) Bô siū kat-lé ê ta-po͘-ê, i sin-khu kì-jiân bô siū kat-lé, sī pōe Góa ê iok; tek-khak tùi peh-sìⁿ ê tiong-kan tû-khì.

(BCL) 無受割禮的查甫者，伊身軀既然無受割禮，是背我的約，的確對百姓的中間除去。」

15

(THR) Siōng-tè koh tùi A-pek-la̍h-hán kóng, Lí ê bó͘ Sat-lāi, m̄-thang koh kiò i ê miâ Sat-lāi; i ê miâ beh kiò-chòe Sat-la̍h.

(BCL) 上帝閣對亞伯拉罕講：「你的某撒萊呣通閣叫伊的名撒萊，伊的名欲叫做撒拉。

16

(THR) Góa beh sù-hok i, Góa ia̍h beh hō͘ lí tùi i tit-tio̍h chı̍t ê kiáⁿ; Góa beh sù-hok i, i ia̍h beh chòe lia̍t-kok ê lāu-bú; beh ū pang-kok ê ông tùi i chhut.

(BCL) 我欲賜福伊，我亦欲互你對伊得著一個子。我欲賜福伊，伊亦欲做列國的老母；欲有邦國的王對伊出。」

17

(THR) A-pek-la̍h-hán chiū phak-teh chhiò, sim-lāi kóng, Chı̍t-pah hè ê lâng iáu ōe siⁿ-kiáⁿ mah? Sat-la̍h í-keng káu-cha̍p hè, iáu ōe seng-ióng mah?

(BCL) 亞伯拉罕就仆笑，心內講：「一百歲的人猶會生子嗎？撒拉已經九十歲，猶會生養嗎？」

18

(THR) A-pek-la̍h-hán tùi Siōng-tè kóng, Tān gōan Í-sı̍t-má-lī o̍ah tī Lí ê bīn-chêng.

(BCL) 亞伯拉罕對上帝講：「但願以實瑪利活佇你的面前。」

19

(THR) Siōng-tè kóng, M̄-sī lah, lí ê bó͘ Sat-la̍h beh kā lí siⁿ chı̍t ê kiáⁿ, lí beh kā i hō-miâ kiò Í-sat; Góa beh kap i siat-lı̍p Góa ê iok, chòe i ê hō͘-è éng-óan ê iok.

(BCL) 上帝講：「呣是啦，你的某撒拉欲給你生一個子，你欲給伊號名叫以撒。我欲及伊設立我的約，做伊的後裔永遠的約。

20

(THR) Lūn-kàu Í-sı̍t-má-lī, Góa ia̍h thiaⁿ lí kiû; lí khòaⁿ, Góa í-keng sù-hok i, beh hō͘ i heng-ōng, ke-thiⁿ ke̍k-kî chōe. I beh siⁿ cha̍p-jī ê cho̍k-tiúⁿ, Góa ia̍h beh hō͘ i chiâⁿ-chòe tōa-kok.

(BCL) 論到以實瑪利，我亦聽你求：你看！我已經賜福伊，欲互伊興旺，加添極其多。伊欲生十二個族長；我亦欲互伊成做大國。

21

(THR) Kàu mê-nî chit-sî, Sat-la̍h beh kā lí siⁿ Í-sat; Góa beh kap i siat-lı̍p Góa ê iok.

(BCL) 到明年此時，撒拉欲給你生以撒，我欲及伊設立我的約。」

22

(THR) Siōng-tè kap A-pek-la̍h-hán kóng soah, chiū lī-khui i chiūⁿ-khì.

(BCL) 上帝及亞伯拉罕講息，就離開伊上去。

23

(THR) Tú-tú hit-jı̍t, A-pek-la̍h-hán chiàu Siōng-tè só͘ kā i kóng-ê, kā i ê kiáⁿ Í-sı̍t-má-lī, kap A-pek-la̍h-hán ke-lāi it-chhè ê ta-po͘-lâng, bô-lūn tī ke-nı̍h siⁿ-ê, á-sī ēng i ê gûn bóe-ê, lóng kiâⁿ kat-lé.

(BCL) 抵抵彼日，亞伯拉罕照上帝所給伊講的，給伊的子以實瑪利及亞伯拉罕家內一切的查甫人，無論佇家裡生的，抑是用伊的銀買的，攏行割禮。

24

(THR) A-pek-la̍h-hán siū kat-lé ê sî káu-cha̍p-káu hè;

(BCL) 亞伯拉罕受割禮的時九十九歲。

25

(THR) i ê kiáⁿ Í-sı̍t-má-lī siū kat-lé ê sî cha̍p-saⁿ hè.

(BCL) 伊的子以實瑪利受割禮的時十三歲。

26

(THR) Tú-tú hit jı̍t A-pek-la̍h-hán kap i ê kiáⁿ Í-sı̍t-má-lī tâng siū kat-lé.

(BCL) 抵抵彼日，亞伯拉罕及伊的子以實瑪利同受割禮。

27

(THR) Ke-lāi só͘-ū ê lâng, bô-lūn tī ke-nı̍h siⁿ-ê, á-sī ēng gûn tùi gōa-bīn lâng bóe-ê, lóng kap i tâng siū kat-lé.

(BCL) 家內所有的人，無論佇家裡生的，抑是用銀對外面人買的，攏及伊同受割禮。

Bible Color Mark

• 台語漢字羅馬本
• 巴克禮全羅